Jehova—Em God Bilong Kamapim As Bilong Ol Tok Hait
“I gat wanpela God i stap long heven na em i save kamapim as bilong ol samting i hait.”—DANIEL 2:28.
JEHOVA, em nambawan bikpela God bilong heven na graun na God bilong sori, em Man bilong wokim olgeta samting, em i gat gutpela tingting na save na em i God bilong mekim stretpela kot. Em i no gat wok long haitim nem o wok o laik bilong em. Long taim em yet i bin makim, na long save bilong em yet, em i save kamapim ol pasin na tingting bilong em long ol man. Long dispela samting em i stap narapela kain long Birua bilong em, Satan, em i laik haitim pasin tru bilong em yet na ol samting em i tingting long mekim.
2 Jehova na Satan i narapela narapela kain, na ol man i lotu long ol, ol tu i narapela narapela kain. Ol man i bihainim Satan ol i gat tupela maus na ol i save mekim pasin giaman. Ol i laik mekim olsem ol i man bilong helpim ol man, tasol ol i mekim ol wok bilong tudak. Aposel Pol i tokim ol Kristen long Korin olsem ol i no ken kirap nogut long dispela samting, long wanem, “dispela ol man ol i giaman aposel na giaman wokman. Ol i save senisim pasin bilong ol bilong mekim ol man i ting ol i stap aposel tru bilong Krais. . . . Yumi save, Satan yet i save senisim pasin bilong en na kamap olsem ensel bilong lait.” (2 Korin 11:13, 14) Tasol ol Kristen i save bihainim Krais, em Gopas bilong ol. Taim em i stap long graun, pasin bilong em i wankain stret olsem pasin bilong Papa bilong em, God Jehova. (Hibru 1:1-3) Olsem na taim ol Kristen i bihainim Krais, ol i save bihainim pasin bilong Jehova, em God bilong tok tru, na God bilong mekim ol samting long ples klia, na God bilong lait. Ol tu i no gat wok long haitim nem o wok o laik bilong ol.—Efesus 4:17-19; 5:1, 2.
3 Long taim stret bilong en, Jehova i save tokaut long sampela samting em i laik mekim na ol samting bai kamap bihain, em ol man bilong graun i no bin save long en. Long dispela samting em i God bilong kamapim long ples klia ol tok hait. Olsem na ol man i laik mekim wok bilong em, em i singautim ol—yes, em i laik kirapim ol—long kisim save long ol kain tok olsem em i kamapim long ples klia pinis. Long 1994, wanpela lain i bin kisim tingting bilong 145,000 Witnes long wanpela kantri long Yurop na dispela lain i kisim save olsem: Ol wan wan Witnes yet i bin wok long kisim save long tok bilong ol Witnes Bilong Jehova inap 3-pela yia pastaim, na bihain ol i kamap Witnes. Ol i mekim long laik bilong ol yet, na i no gat wanpela man i subim ol. Na ol i stap fri yet long mekim ol samting ol i laik mekim. Olsem: Sampela i no wanbel long ol strongpela lo bilong stretpela pasin ol Kristen i mas bihainim, olsem na bihain ol i tingting olsem ol i no laik i stap moa olsem Witnes. Tasol insait long 5-pela yia i go pinis, planti bilong ol dispela manmeri bipo ol i stap Witnes, ol i kirap mekim ol samting bambai ol i ken kirap gen long bung wantaim ol Witnes na mekim wok gen olsem Witnes.
4 Tasol i gat sampela man bipo ol i stap Witnes, tasol ol i no kam bek, na sampela namel long ol i bin holim bikpela wok insait long kongrigesen Kristen. Yumi no ken kirap nogut long dispela, long wanem, wanpela disaipel bilong Jisas i bin poroman gut wantaim em, em aposel Judas, em i lusim Jisas. (Matyu 26:14-16, 20-25) Tasol yu ting dispela em i wanpela as na yumi ken tingting planti long lotu Kristen yet? Yu ting dispela i mekim na ol gutpela wok ol Witnes Bilong Jehova i mekim bilong skulim ol man i lus nating? Nogat tru. Na i wankain tu long taim Judas i kamapim Jisas long ol birua—dispela i no pasim God long kamapim ol laik bilong em.
Em i Gat Olgeta Strong Tasol Em i Gat Pasin Sori
5 Jehova em i God bilong sori. Em i save tingim ol man. (1 Jon 4:7-11) Maski em i holim bikpela namba olgeta, em i amamas long ol man i kamap pren bilong em. Baibel i stori long wanpela wokman bilong em bilong bipo yet olsem: “ ‘Abraham em i bilip long God, na God i kolim em stretpela man.’ Na God i kolim Abraham olsem, ‘Pren bilong mi.’ ” (Jems 2:23; 2 Stori 20:7; Aisaia 41:8) Taim tupela man i stap olsem gutpela pren, narapela i save kamapim ol tok hait long narapela, na Jehova tu i save mekim olsem long ol pren bilong em. Jisas i bin bihainim pasin bilong Papa bilong em long dispela samting—em i kamap pren bilong ol disaipel bilong em na em i save kamapim ol tok hait long ol. Em i tokim ol: “Wokboi i no save long ol samting bikman bilong en i save mekim. Olsem na mi no kolim yupela ‘wokboi’ moa. Nogat. Olgeta tok mi harim long Papa bilong mi, em mi tokim yupela pinis. Olsem na mi kolim yupela ‘pren.’ ” (Jon 15:15) Ol “tok hait” em Jehova, na Pikinini bilong em, na ol pren bilong tupela ol tasol i save long en, dispela i save pasim ol gut wantaim na narapela i laikim tru narapela na givim bel olgeta long em.—Kolosi 3:14.
6 Insait bilong nem Jehova, olsem “Em i Mekim i Kamap,” dispela i makim olsem Jehova inap kamap wanem wanem kain bambai em i ken kamapim laik bilong em. Jehova i no olsem ol man—em i no save pret na ting em i mas haitim ol laik bilong em, nogut sampela inap pasim em long kamapim ol dispela laik bilong em. Em i no inap lus long mekim ol dispela samting, olsem na long Baibel em i save kamapim klia planti samting em i laik mekim. Em i tok promis olsem: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”—Aisaia 55:11.
7 Bihain liklik long taim pasin bikhet i kamap long Iden, Jehova i tokaut long ol samting bihain bai kamap long dispela pasin birua i bin i stap longtaim namel long em na Birua bilong em, Satan. Dispela Pikinini God i tok promis long salim i kam, Satan bai krungutim lek bilong em na givim pen long em, tasol em i no ken bagarap olgeta; tasol bihain bihain dispela Pikinini bai krungutim het bilong Satan na em bai bagarap olgeta. (Stat 3:15) Na tru tumas, long yia 33 C.E., Satan i bin krungutim lek bilong dispela Pikinini, em Krais Jisas—Satan i kirapim ol man long kilim em i dai. Long dispela rot Satan i truim tok bilong Baibel, na long dispela taim tu em i kamapim klia olsem Jehova em i God bilong tok tru. Tasol i no olsem Satan i laik mekim olsem, nogat tru. Em i birua long tok i tru na stretpela pasin, na em i gat pasin antap na em i no tanim bel, na dispela i stiaim em i go long mekim samting Jehova i tok profet long em bai mekim, na i no abrus liklik. Tru tumas, i gat wanpela lo i sutim tru ol man i birua long tok i tru na i sutim Satan yet, olsem: “Yumi no inap mekim wanpela samting bilong daunim tok tru. Nogat. Yumi inap wok long helpim tok tru tasol.”—2 Korin 13:8.
8 Kirap long taim Kingdom bilong God i kamap long heven long 1914, tok bilong Kamapim Tok Hait 12:12 i kamap tru, em i tok: “Olsem na yu heven, na yupela olgeta lain i stap long heven, yupela i ken amamas. Tasol yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” Tru, Satan i save em i gat sotpela taim tasol bilong i stap, tasol yu ting dispela save i kirapim em long baut na lusim dispela rot em i bihainim? Sapos em i mekim dispela samting, i olsem em i tokaut olsem Jehova em i God bilong tok tru, na Jehova em inap tru long olgeta man i mas lotuim em wanpela tasol, long wanem, em i Nambawan Bikpela King. Tasol Satan i no laik tokaut olsem em i lus, maski em i save long ol dispela samting.
9 Jehova i save tokaut klia wanem ol samting bai kamap taim Krais i kam bilong givim strafe long ol lain bilong Satan long graun. (Matyu 24:29-31; 25:31-46) Baibel i toksave long samting ol hetman bilong dispela graun bai mekim, olsem: “Ol . . . bai i tok olsem, ‘Nau em i gutpela taim tru. Yumi stap gut,’ na wantu tasol samting bilong bagarapim ol bai i kamap long ol, olsem pen i save kamap long meri i laik karim pikinini.” (1 Tesalonaika 5:3) Ol man i bihainim pasin bilong Satan ol i sakim dispela tok lukaut i klia tru. Bel bilong ol i nogut na dispela i pasim tingting bilong ol na ol i no inap tanim bel na lusim pasin nogut bilong ol, na ol i no senisim laik bilong ol na ol samting ol i tingting long mekim bilong pasim rot bilong Jehova long kamapim laik bilong em.
10 Kirap long 1986, taim Yunaitet Nesen i tokaut long Intenesenel Yia Bilong Gutaim, i gat planti tok moa yet long bel isi na gutpela sindaun bai kamap. Ol gavman i bin mekim tru sampela samting bilong kamapim gutaim long olgeta hap bilong graun, na i olsem sampela samting ol i bin mekim i kamap gutpela. Orait olsem wanem? Ating dispela samting i truim dispela tok profet na i no gat narapela hap truim bilong en? O yumi mas wetim wanpela bikpela toksave i kamap bihain, em yumi bai kirap nogut long en? Bihain, long taim em yet i makim, Jehova bai kamapim klia dispela samting. Tasol nau yumi mas was i stap na “wetim De bilong God i kamap, na [yumi] mas wok strong long hariapim dispela De, bai em i kamap kwiktaim.” (2 Pita 3:12) Bihain ol bai wok yet long toktok long bel isi na gutpela sindaun, na sampela man em ol i save pinis long dispela tok lukaut, tasol ol i sakim, ating ol dispela man bai bikhet moa yet na i ting Jehova bai i no ken truim tok bilong em, o em i no inap mekim. (Skelim wantaim Saveman 8:11-13; 2 Pita 3:3, 4.) Tasol ol Kristen tru i save Jehova bai kamapim tru laik bilong em!
Daun Long Ol Man Jehova i Mekim Wok Long Rot Bilong Ol
11 Wanpela taim King Nebukatnesar, em king bilong Babilon, em i kisim wanpela driman em i tingting planti long en, na em i no inap tingim bek dispela driman, olsem na em i singaut long sampela i helpim em. Ol pris na glasman na posinman samting ol i no inap tokim em long dispela driman o kamapim as bilong en. Tasol Daniel, em wokman bilong God, em inap mekim olsem, tasol em i tokaut stret olsem i no long gutpela tingting na save bilong em na bai em i kamapim dispela driman na as bilong en, nogat. Daniel i tok: “I gat wanpela God i stap long heven na em i save kamapim as bilong ol samting i hait. King, God i bin givim yu dispela driman bilong soim yu ol samting bai i kamap bihain.” (Daniel 2:1-30) Sampela handet yia paslain long dispela, kain samting olsem i bin painim Josep, em narapela profet bilong God, na em i save Jehova em i God bilong kamapim as bilong ol tok hait.—Stat 40:8-22; Amos 3:7, 8.
12 Nambawan bikpela profet bilong Jehova i bin mekim wok long graun, em Jisas. (Aposel 3:19-24) Pol i tok: “Bipo long planti taim na long planti pasin God i bin givim tok long ol tumbuna bilong yumi long maus bilong ol profet. Tasol long dispela taim nau, em long taim bilong las de, God i bin autim tok long yumi long maus bilong Pikinini Man bilong em. God i makim dispela Pikinini pinis bilong kisim olgeta samting, na long han bilong en God i bin mekim kamap dispela graun tu.”—Hibru 1:1, 2.
13 Jehova i bin givim tok long ol Kristen bilong pastaim long rot bilong Pikinini bilong em, Jisas, na Jisas i bin kamapim ol tok hait bilong God long ol. Jisas i tokim ol: “God i larim yupela i save pinis long as bilong ol tok hait bilong kingdom bilong God.” (Luk 8:10) Bihain Pol i stori long ol Kristen God i bin makim na em i tok, ol i ‘wokman bilong Krais na ol i gat wok bilong lukautim gut ol tok hait bilong God.’ (1 Korin 4:1) Long nau ol Kristen God i bin makim ol i mekim yet wankain wok, na ol i wanpela lain wokboi i gat gutpela tingting, na long rot bilong hap lain bilong en, olsem Lain Bilong Bosim Ol Witnes, em i save givim kaikai bilong spirit long yumi long taim stret bilong en. (Matyu 24:45-47) Sapos yumi tingim tru na daun long ol profet bilong God bilong bipo yet, na Pikinini bilong God tu, orait yumi mas tingim gut na daun long ol man nau Jehova i mekim wok long rot bilong ol long kamapim klia ol tok bilong Baibel em lain bilong em i mas save gut long en nau long dispela taim bilong planti hevi.—2 Timoti 3:1-5, 13.
Tokaut o Haitim Tok?
14 Tru, Jehova i save kamapim ol tok hait na em i no save haitim, tasol yu ting dispela i makim olsem long olgeta taim ol Kristen i mas kamapim olgeta samting ol i save long en na ol i no ken haitim wanpela samting? Ol Kristen i save bihainim tok Jisas i bin givim long ol aposel bilong em, olsem: “Yupela i mas bihainim pasin bilong ol snek, na tingim gut pastaim ol samting yupela i laik mekim. Na yupela i mas bihainim pasin bilong ol dispela pisin ol i kolim balus, na yupela i no ken tingting long mekim wanpela pasin nogut.” (Matyu 10:16) Sapos ol man i tokim ol Kristen ol i no ken lotuim God long pasin em maus bilong bel i tok long mekim, ol Kristen i save “bihainim tok bilong God,” long wanem, ol i save i no stret long wanpela man bilong graun i pasim ol man long lotuim Jehova. (Aposel 5:29) Jisas yet i kamapim klia olsem dispela samting i stret. Baibel i tok: “Long sampela taim bihain, Jisas i raun insait long distrik Galili tasol. Em i no laik i go raun moa insait long distrik Judia, long wanem, ol Juda i laik kilim em i dai. Na ol bikpela de bilong lotu bilong ol Juda klostu ol i laik kamap, em Ol Bikpela De Bilong I Stap Long Haus Win. Orait na Jisas i bekim tok bilong ol [em ol brata bilong skin ol i no bilip long em] olsem, . . . ‘Yupela go long ol dispela bikpela de bilong lotu long Jerusalem. Mi, bai mi no inap i go, long wanem, taim bilong mi em i no kamap yet.’ Em i tok olsem long ol, na em i wet i stap long Galili. Tasol taim ol brata bilong en i go pinis, orait bihain Jisas tu i go. Tasol em i hait tasol na i go, bai ol man i no ken luksave long em.”—Jon 7:1, 2, 6, 8-10.
Bai Yumi Tokaut o No Ken Tokaut?
15 Long sampela taim, em i pasin bilong gutpela tingting na pasin sori tu sapos yumi haitim wanpela tok samting. Yumi ken tingim Josep, em waspapa bilong Jisas. Taim em i kisim save olsem dispela meri em i laik marit long en, em Maria, em “i gat bel,” em i mekim wanem? Baibel i tok: “Man bilong en, Josep, em i stretpela man. Em i harim olsem Maria i gat bel, na em i laik lusim em. Tasol em i no laik givim sem long Maria long ai bilong ol manmeri. Olsem na em i laik lusim em isi tasol [olsem mekim hait].” (Matyu 1:18, 19) Sapos Josep i tokaut long dispela samting na ol man i save long en, dispela i no gutpela pasin, a?
16 Sapos i gat sampela samting i mas i stap hait, yumi no ken kamapim long ol man i no gat wok long save long dispela samting, long wanem, dispela inap semim em o givim bel hevi long em. Ol elda Kristen i mas tingim dispela samting taim ol i mas givim sampela tok long ol narapela Kristen bilong helpim ol o bilong mekim gut bel bilong ol o bilong stretim ol taim ol i bin mekim wanpela bikpela rong long Jehova. Ol i mas mekim dispela wok long rot Baibel i makim; sapos ol i kamapim long ol man i no gat wok long save long en, dispela i no pasin sori. Na ol manmeri bilong kongrigesen Kristen i no ken wok long kirapim ol elda long kamapim sampela tok i mas i stap hait; ol bai daun long wok bilong elda long larim ol dispela tok i stap hait, em ol tok i no bilong ol narapela i mas save long en. Sindaun 25:9 i tok: “Sapos yu gat tok long wantok bilong yu long wanpela samting, orait yu mas i go na stretim tok wantaim dispela wantok yet. Tasol sapos yu bin harim tok hait long dispela samting, yu no ken autim dispela tok long em.”
17 Na dispela lo i stret long bihainim insait long famili tu, o namel long ol gutpela pren. Yumi mas larim sampela tok i stap hait na bai i no gat sampela kros o bel hevi i kamap long dispela namel long famili o pren bilong yumi. “Tok baksait [olsem man i kamapim wanpela tok i stap hait] i save mekim man i pes drai, olsem win i save bringim ren i kam.” (Sindaun 25:23) Tasol yumi mas i stap gut long Jehova na ol stretpela lo bilong em, na yumi mas mekim pasin sori long ol man o meri i mekim wanpela popaia, olsem na sampela taim yumi mas tokim papamama o elda Kristen o narapela man olsem long wanpela samting i stap hait.a Tasol klostu olgeta taim ol Kristen i no save kamapim ol samting bilong narapela man i mas i stap hait—ol i haitim gut olsem em i wanpela samting bilong ol yet na ol i no laik bai narapela i save long en.
18 Orait yumi ken tok olsem: Kristen i save bihainim pasin bilong Jehova taim em i larim sampela tok i stap hait sapos em i mas mekim olsem, na em i save kamapim long taim i stret em i mas mekim, na long ol narapela taim, nogat. Bilong skelim wanem samting em i mas kamapim na wanem samting em i no ken kamapim, em i save larim pasin daun, na bilip, na pasin sori i stiaim em. Pasin daun i save helpim em na bai em i no ken ting em yet i samting tru, o hambak na tokim ol narapela long olgeta samting em i save long en, o tokim ol olsem em i save long sampela tok hait tasol em i no inap tokim ol, na nau yau bilong ol i skrap tru long harim. Em i bilip long tok bilong Baibel na kongrigesen Kristen na dispela i save kirapim em long autim ol tok bilong Baibel em God i bin givim long yumi, tasol em i was gut na bai em i no ken mekim sampela tok inap bagarapim bel bilong man taim em i kirap long autim dispela tok. Yes, pasin sori i save kirapim em long tokaut long ol samting i save litimapim nem bilong God na ol samting ol man i mas save long en bambai ol i ken kisim laip. Tasol em i no save kamapim ol tok i mas i stap hait, long wanem, em i save sapos em i mekim olsem, planti taim dispela bai makim olsem em i no gat pasin sori.
19 Taim Kristen i bihainim dispela gutpela pasin, dispela i save helpim ol man long save husat ol i Kristen tru. Ol i no save haitim nem bilong God na mekim olsem em i no gat wanpela nem, o kamapim bilip bilong God Triwan, em as bilong dispela bilip i stap hait tru na ol i no inap kamapim klia. Ol god bilong ol lotu giaman, ol man i no save long ol dispela god; tasol God bilong trupela lotu i no olsem. (Lukim Aposel 17:22, 23.) Ol Witnes Bilong Jehova em i bin makim ol, ol i amamas tru long ol “i gat wok bilong lukautim gut ol tok hait bilong God.” Ol i save kamapim ol dispela tok hait long ol narapela man, na long dispela pasin ol i helpim ol man i gat gutpela bel long painim rot bilong kamap pren bilong God.—1 Korin 4:1; 14:22-25; Sekaraia 8:23; Malakai 3:18.
[Futnot]
a Lukim stori “Do Not Share in the Sins of Others” long Wastaua (tok Inglis), Novemba 15, 1985.
Bai Yu Bekim Olsem Wanem?
◻ Bilong wanem Jehova i no gat wok long haitim ol laik bilong em?
◻ Jehova i save kamapim as bilong ol tok hait bilong em long husat?
◻ Ol Kristen i mas mekim wanem long ol tok i mas i stap hait?
◻ Wanem 3-pela pasin bai helpim ol Kristen long save, wanem samting ol i mas kamapim na wanem samting ol i no ken kamapim?
[Askim Bilong Stadi]
1, 2. (a) Jehova i narapela kain olsem wanem long bikpela Birua bilong em? (b) Olsem wanem ol man i stap narapela narapela kain olsem?
3. Olsem wanem yumi ken daunim tok bilong sampela man olsem ol man i kamap Witnes Bilong Jehova, i gat sampela i bin subim ol long go insait long wanpela “lain i save wok hait”?
4. Ol Kristen i stap gut long God ol i no ken tingting planti long wanem samting? Bilong wanem ol i no ken tingting planti?
5. Olsem wanem yumi save Jehova na Jisas i laikim tru ol man? Ol i bin mekim wanem bilong kamapim klia dispela samting?
6. Bilong wanem Jehova i no gat wok long haitim ol laik bilong em?
7. (a) Jehova i mekim wanem tok profet long Iden? Olsem wanem Satan i kamapim klia olsem God i save tok tru tasol? (b) Olsem wanem dispela lo i stap long 2 Korin 13:8 i stret long olgeta taim?
8, 9. (a) Satan i save long wanem samting? Tasol dispela save inap pasim rot bilong Jehova long kamapim ol laik bilong em? (b) Ol man i birua long Jehova ol i sakim wanem tok lukaut? Bilong wanem ol i mekim olsem?
10. (a) Ating truim bilong 1 Tesalonaika 5:3 i kamap pinis o olsem wanem? Tasol lain bilong Jehova i mas mekim wanem? (b) Olsem wanem na bihain ol man i no bilip ol bai strong moa long biruaim lain bilong God?
11. Daniel na Josep i kisim wanem save long Jehova?
12, 13. (a) Husat em i nambawan bikpela profet bilong God? I gat wanem as na yu bekim tok olsem? (b) Long nau husat ol i mekim “wok bilong lukautim gut ol tok hait bilong God”? Yumi mas ting olsem wanem long ol?
14. Wanem taim ol Kristen i save mekim hait wok bilong ol? Taim ol i mekim olsem, ol i bihainim pasin bilong husat?
15. Olsem wanem Josep i makim olsem sampela taim em i pasin sori sapos man i no kamapim wanpela tok i stap hait?
16. Ol elda na olgeta narapela insait long kongrigesen ol i gat wok long mekim wanem long ol tok i mas i stap hait?
17. Bilong wanem klostu olgeta taim ol Kristen i no save kamapim ol samting bilong narapela man? Tasol bilong wanem sampela taim ol i mas kamapim?
18. Wanem 3-pela pasin Kristen inap helpim yumi long skelim wanem samting yumi mas kamapim na wanem samting yumi no ken kamapim?
19. Wanem samting inap helpim ol man long save husat ol i Kristen tru? Wanem gutpela samting i save kamap long en?
[Ol Piksa long pes 8, 9]
Jehova i save kamapim as bilong ol tok hait long rot bilong Baibel