Kisim Save Long God​—Long Wanem Rot?

Sampela man i no bilip tumas olsem God i gat laik long kamapim em yet long ol man. Sapos em i gat laik, orait em i mekim long wanem rot?

INAP olsem 500 yia i go pinis, John Calvin, wanpela bikman bilong lotu Talatala, i tok stret olsem: ‘Long strong bilong ol yet, ol man i no inap save long God. Bilong ol i ken save long God, God i mas kamapim em yet long ol.’ Tasol sampela man i no bilip olsem God i gat laik long kamapim em yet long ol man. Na sapos em i gat laik, em i save mekim long wanem rot?

Jehova, em i Bikpela Man Bilong Wokim ol samting, na olgeta samting em i mekim i gat as na em i mekim. Na tu, em i “God I Gat Olgeta Strong,” olsem na em inap tru long kamapim olgeta samting em i tingting pinis long mekim. (Saveman 12:1; Kisim Bek 6:3) Yumi ken save olsem God i bin amamas long tokim ol man long ol samting em i laik mekim, long wanem, em i bin tokim profet Amos long raitim dispela tok: “Olgeta samting God, Bikpela i laik mekim, em i save autim pastaim long ol wokman bilong en, em ol profet, na bihain em i save mekim olsem em i bin tok.” Tingim: Ol samting God i autim, em i bin autim long ol wokboi bilong em tasol, em ol man i laikim em tru. Dispela i stret, a? Taim yu laik autim samting yu laik mekim, yu save autim long husat? Long ol man yu no save long ol, o long ol gutpela pren bilong yu?​​—Amos 3:7; Aisaia 40:​13, 25, 26.

Taim ol man i gat pasin daun i kisim save long ol tingting na save bilong God, ol i save kirap nogut na rispek long God, na i stret ol i mekim olsem. Tasol bilong ol gutpela tingting na save bilong God i ken helpim tru yumi, yumi mas mekim sampela samting moa. Baibel i soim klia olsem sapos yumi laik save long ol tingting bilong God, yumi mas i gat pasin daun: ‘Harim tok bilong mi na putim gut long tingting. Putim yau gut long olgeta tok i save givim yu gutpela tingting. Wok strong long kisim gutpela save. Askim gutpela tingting na save long kam long yu. Wok hat long painim gutpela tingting, olsem man i wok long painim silva ol i bin haitim insait long graun.’​​—Sindaun 2:​1-4.

Sapos man i gat pasin daun i wok strong olsem, em bai inap tru long kisim save long God. Buk Sindaun i tok moa: “Bikpela yet em i as bilong gutpela tingting. Na em i save givim gutpela tingting na save long yumi.” Tru tumas, ol man husat i wok strong long painim tok i tru, ol inap tru long ‘save long olgeta gutpela rot bilong wokabaut, na ol gutpela na stretpela pasin.’​​—Sindaun 2:​6-9.

Painim Tok i Tru

Buk The Encyclopedia of Religion i tok: “Ol man i gat laik long skelim ol samting, olsem ol samting i stap tru na ol samting i no stap tru, ol samting i gat strong na ol samting i no gat strong, ol samting i tru na ol samting i giaman, ol samting i klin na ol samting i doti, ol samting i stap ples klia na ol samting i no stap ples klia, ol pasin i stret na ol pasin i no stret.” Bilong inapim dispela laik, longtaim pinis ol man i bin wok long painim tok i tru. Taim ol i wok strong long painim Jehova, em man bilong raitim song i kolim em olsem “God bilong mekim pasin tru tasol,” dispela i bin helpim ol long painim tok i tru.​​—Song 31:5.

Mining bilong nem Jehova i olsem: “Em i Mekim i Kamap.” (Stat 2:​4, NW, sta) Dispela mining i kamapim olsem em i Man Bilong Wokim ol samting na kamapim ol laik bilong em. Ol man i lotu tru long God ol i save long nem Jehova na ol i save kamapim. Jisas i save long dispela samting. Em i tingim ol disaipel bilong em na em i beten long God olsem: “Mi bin kamapim nem bilong yu long ol. Na bai mi kamapim moa yet, bai ol i ken kisim pasin bilong laikim ol arapela man, olsem yu save laikim mi. Na mi tu mi ken i stap long ol.”​​—Jon 17:​26.

Taim wanpela Hibru bilong bipo, em Josep, i mas kamapim as bilong ol driman, Josep i tingim pasin bilong em long pren wantaim God, na em i tok: “God tasol i save soim yumi as bilong ol driman.”​​—Stat 40:8; 41:​15, 16.

Sampela handet yia bihain, King Nebukatnesar bilong Babilon i kisim wanpela driman em ol saveman bilong em i no inap kamapim as bilong en. Profet Daniel i tokim king: “I gat wanpela God i stap long heven na em i save kamapim as bilong ol samting i hait. King, God i bin givim yu dispela driman bilong soim yu ol samting bai i kamap bihain.”​​—Daniel 2:28.

Stori bilong Josep na Daniel i soim olsem, ol wokboi bilong God Jehova, ol tasol inap save long ol tingting na save bilong God. Bilong God i ken orait long yumi, ating yumi mas lusim sampela tingting em pastaim yumi bin holim. Ol Juda i kamap Kristen long taim bilong ol aposel, ol i bin mekim olsem. Ol i bin kamap bikpela insait long wanpela lain i save rispektim na bihainim ol pasin na lo ol Juda i stap aninit long en, olsem na ol i mas lusim sampela tingting ol i holim na bai ol inap bilip olsem Jisas em i Mesaia. Em i bin kam bilong inapim Lo Bilong Moses, em dispela Lo i olsem “piksa o tewel tasol bilong ol gutpela samting i laik kamap bihain.” (Hibru 10:1; Matyu 5:​17; Luk 24:​44, 45) Samting i kamap senis bilong en, em “lo bilong Krais,” na dispela lo i winim tru Lo Bilong Moses.​​—Galesia 6:2; Rom 13:10; Jems 2:8.

Yumi olgeta i bin kamap namel long ol man i stap longwe long God. Yumi bin kisim sin long namba wan man na meri, olsem na taim mama i karim yumi, yumi stap birua bilong God, yumi no gat stretpela save long ol samting em i laik mekim. Na tu, bel bilong yumi i save giamanim yumi. (Jeremaia 17:9; Efesus 2:​12; 4:​18; Kolosi 1:​21) Bilong kamap pren bilong God, tingting bilong yumi i mas lain long bihainim tingting bilong God. Tasol dispela i no isi long mekim.

Ating bai i hatwok liklik long lusim ol tingting na ol pasin bilong lotu giaman, na moa yet sapos yumi bin lain long ol dispela samting taim yumi liklik yet. Tasol sapos yumi bihainim yet rot i no stret, yu ting dispela em savetingting? Nogat tru! Em i gutpela moa sapos yumi senisim tingting yumi holim na kisim nupela tingting na bai God i ken orait long yumi.

Rot Bilong God Long Givim Save

Husat inap helpim yu long kliagut long ol tok i tru bilong Baibel na bihainim ol dispela tok? Long bipo, God i save stiaim ol Israel long rot bilong sampela man, em ol man em inap bilip long ol na ol i stap gut long em. Het bilong kongrigesen Kristen long nau, em Krais, em tu i save stiaim ol man i gat laik tru long painim tok i tru. Em i save mekim olsem long rot bilong sampela man em i bilip long ol na ol i stap gut long em​—ol i stap olsem rot God i mekim wok long en bilong stiaim na lukautim ol man i wok strong long painim tok i tru. (Matyu 24:​45-​47; Kolosi 1:​18) Tasol olsem wanem yumi inap save long dispela rot bilong God long givim save?

Ol disaipel tru bilong Jisas Krais ol i wok strong long kamapim ol pasin em Jisas yet i bin kamapim taim em i stap long graun. Pasin bilong dispela graun i wok long go nogut moa, olsem na i no hatwok long luksave long ol dispela disaipel, em ol i wok long kamapim ol pasin bilong Jisas. (Lukim blok long pes 6.) Olsem wanem? Yu inap lukim ol dispela pasin long lain bilong misin bilong yu yet o long ol misin bilong ol neiba bilong yu? Em i bikpela samting tru sapos yu skelim dispela samting wantaim Baibel.

Mipela i singautim yu long mekim olsem long rot bilong wanpela Baibel stadi kos. Long yia i go pinis, winim 6,000,000 manmeri long 235 kantri i bin stadi long Baibel wantaim ol Witnes Bilong Jehova. Wok bilong kisim ol gutpela tingting na save bilong God, em wanpela wok i no gat pinis bilong en, na em inap helpim gut yumi. I gutpela sapos yu kirap nau long kisim save long ol gutpela tingting na save bilong God. Bai yu amamas long yu bin mekim olsem. Tru tumas, yumi inap save long God!

[Blok long pes 6]

OL MAN I WOK WANTAIM GOD . . .

ol i no save insait long ol kros pait bilong politik.​—Aisaia 2:4.

ol i save kamapim gutpela kaikai long rot bilong bihainim laik bilong God.​—Matyu 7:​13-​23.

narapela i laikim tru narapela.​—Jon 13:35; 1 Jon 4:20.

ol i wanbel long ol toktok ol i mekim.​—Maika 2:​12.

ol i no bihainim ol tingting na pasin nogut bilong dispela graun.​—Jon 17:16.

ol i save autim tok i tru na kamapim ol disaipel.​—Matyu 24:14; 28:​19, 20.

ol i save bung wantaim bilong strongim bel bilong narapela narapela.​—Hibru 10:25.

olgeta olsem wanpela lain long olgeta hap i litimapim nem bilong God.​—KTH 7:​9, 10.

[Ol Piksa long pes 7]

Yu inap kisim save long God long rot bilong stadi yu yet i mekim, na long rot bilong famili, na kongrigesen