Yu Ting Yumi Inap Save Long God?

“Laip bilong i stap gut oltaim, em i olsem. Ol man i kisim dispela laip, ol i save long . . . God.”​—Jon 17:3.

APOSEL POL i tok: “Olaman! Ol gutpela pasin bilong God na tingting na save bilong en i pulap tru, na i daun tumas olsem solwara! Yumi man i no inap tru long painim as bilong olgeta tingting bilong en. Yumi no inap tru long bihainim olgeta rot bilong en.” (Rom 11:33) Yu ting dispela tok i makim olsem yumi ol man bilong graun i no inap tru long save long tingting na save bilong God, na sapos olsem, orait yumi no inap save long em na ol samting em i tingting pinis long mekim?

Sampela man bilong tingim ol samting bilong lotu i save ting olsem yumi no inap save long God. Buk The Encyclopedia of Religion i stori long dispela tingting olsem: “God i winim tru mak bilong olgeta save ol man inap kisim long em. . . . Yumi no inap givim nem long God o tok em i wanem kain. Em i antap tumas, winim ol nem na ol pasin yumi laik givim long em. . . . Yumi no inap save long em, long wanem, em i antap tru long olgeta save.”a

Nius Newsweek i tok, planti man i ting olsem “i gat wanpela tok i tru tasol, na dispela tok i tru i olsem: I no gat wanpela tok i tru.”

Tasol planti man i laik save yumi stap bilong mekim wanem. Ol i lukim ol hevi em bikpela sik, na pasin bilong i stap rabis, na pasin bilong pait na bagarapim man i kamapim na ol i tingting planti. Ol i no save long wanem taim indai bai painim ol. Ol i gat bikpela laik long painim bekim bilong ol askim bilong ol, na taim ol i no painim, ating ol i kisim tingting olsem ol dispela askim i no gat bekim bilong en. Long dispela as, planti man i bin lusim misin bilong ol na ol i wok long painim narapela rot bilong i go klostu long God​—em sapos ol i bilip yet olsem em i stap.

Baibel i Tok Wanem?

Ol man husat i laikim ol tok bilong Baibel na i bilip olsem Jisas Krais em i Mausman Bilong God, ol i mas i gat laik long save long Baibel i tok wanem. Ating yu save long tok Jisas i bin mekim long 2-pela rot, wanpela i “bikpela, na . . . i go long ples bilong lus,” na wanpela i “liklik tru, na . . . i go long ples bilong kisim laip.” Em i stori long olsem wanem yumi inap luksave long ol man i wokabaut long dispela 2-pela rot. Em i tok: “Yupela i mas lukim pasin bilong ol.” Samting man i mekim, na i no toktok bilong em, i makim em i bihainim wanem rot. Jisas i tok: “Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.” Man i tok em i bilip long God, dispela tasol i no inap. Yumi mas bihainim laik bilong God. Bilong mekim olsem, pastaim yumi mas i gat stretpela save long laik bilong God.​​—Matyu 7:​13-​23.

Jisas i kamapim klia olsem ol man inap kisim save long God. Em i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Dispela i kamapim klia olsem yumi inap kisim tingting na save em God i kamapim​—tasol bilong kisim, yumi mas wok strong tru long painim. Tasol presen God i givim long ol man i mekim olsem, em laip bilong i stap gut oltaim, olsem na i bikpela samting tru yumi wok long painim dispela save.

[Futnot]

[Piksa long pes 4]

Jisas i tok olsem liklik rot em i go long laip