Yu Pren Bilong God?—Ol Beten Bilong Yu i Kamapim Dispela Samting
OLSEM WANEM? Sampela taim yu bin putim yau long tok bilong tupela man? Ating i no longtaim na yu kisim save olsem tupela hia i pren o narapela i no save long narapela, o narapela i save liklik tasol long narapela o em i save gut long em, o tupela i gutpela pren tru. Na i wankain long yumi, ol beten bilong yumi inap kamapim olsem yumi stap pren bilong God o nogat.
Baibel i tokim yumi olsem God “i no i stap longwe long yumi olgeta wan wan.” (Aposel 17:27) Tru tumas, God i singautim yumi long kisim save long em. Yumi inap i stap pren bilong em. (Song 34:8; Jems 2:23) Yumi inap pas gut wantaim em! (Song 25:14) Pasin bilong i stap pren bilong God em i nambawan gutpela samting tru yumi man i gat sin inap kisim. Na Jehova i tingim tru pasin pren bilong yumi. Yumi ken save long dispela, long wanem, bilip bilong yumi long Pikinini bilong em, em i bin givim laip bilong em bilong helpim yumi, i olsem as na yumi stap pren bilong Jehova.—Kolosi 1:19, 20.
Olsem na ol beten bilong yumi i mas kamapim olsem yumi laikim tru Jehova na yumi pilim tru ol samting em i mekim bilong helpim yumi. Tasol olsem wanem? Sampela taim yu pilim olsem maski yu save mekim ol beten long pasin bilong lotuim God, tasol yu no givim bel olgeta long beten? Dispela samting i save painim planti man. Wanem samting bai helpim yu na ol beten bilong yu bai kamap gutpela moa? Yu mas wok strong long i stap pren bilong God Jehova.
Painim Taim Bilong Beten
Pastaim, yumi mas lusim bikpela hap taim na wok strong long kamap pren bilong narapela. Ating long olgeta de yu save gude long planti man o yu toktok wantaim ol—ol man i stap klostu, ol wanwok, ol draiva bilong bas, na ol man i wok long ol stua. Tasol dispela i no mekim na yu pren tru wantaim ol dispela man. Pasin bilong stap pren tru bai kamap strong moa taim yu toktok gut wantaim narapela, yu no mekim ol tok nating tasol, yu kamapim ol samting yu pilim long bel na tingting bilong yu.
Na i wankain long ol beten bilong yumi, ol inap helpim yumi long go klostu long Jehova. Tasol yu mas lusim bikpela hap taim liklik bilong beten long Jehova; ol sotpela beten bilong tok tenkyu long taim bilong kaikai i no inap. Sapos yu toktok planti taim long Jehova, dispela bai helpim yu long save gut long bel na tingting bilong yu, na long ol samting yu mekim. Na rot bilong stretim ol bikpela hevi bai wok long kamap klia taim spirit bilong God i helpim yu long tingim ol lo bilong Baibel. (Song 143:10; Jon 14:26) Na tu, taim yu beten, Jehova bai kamap olsem wanpela man tru long yu, na bai yu tingim moa pasin bilong em long tingim gut yu.
Na dispela i moa yet taim yu pilim olsem Jehova i truim beten bilong yu. Tru tumas, “olgeta samting yumi save askim God long mekim, ol i no inap tru long mak bilong strong bilong en”! (Efesus 3:20) Tasol i no olsem God bai wokim ol mirakel bilong helpim yu, nogat. Long rot bilong Baibel, na ol buk na nius bilong gutpela wokboi, o long maus bilong wanpela brata o sista i gat pasin sori, Jehova bai givim ol gutpela tok yu mas kisim o em bai soim rot long yu. O em bai givim strong long yu bambai yu inap sanap strong o sakim wanpela traim. (Matyu 24:45; 2 Timoti 4:17) Kain samting olsem i mekim na yumi pilim tru ol gutpela samting em Pren bilong yumi long heven i mekim bilong helpim yumi!
Olsem na yumi mas makim taim bilong beten. Tru, yumi no gat bikpela hap taim nau long dispela taim nogut. Tasol sapos yu laikim tru wanpela man, bai yu makim taim long i stap wantaim em. Tingim tok man bilong raitim Song i mekim, olsem: “Wel abus i save dai long wara na i ran i go long liklik wara bilong dring. Na olsem tasol, God, mi laikim tumas bai mi stap klostu long yu. God, yu God i gat laip, na mi laikim yu tumas, olsem man, nek bilong en i drai na i laik dringim wara. God, wanem taim bai mi ken i go long yu na lotu long yu?” (Song 42:1, 2) Olsem wanem? Yu gat wankain laik long toktok long God? Sapos olsem, yu mas makim taim bilong mekim olsem!—Skelim wantaim Efesus 5:16.
Olsem: Yu inap traim long kirap hariap long moningtaim bambai yu gat sampela hap taim bilong yu yet na yu ken beten. (Song 119:147) Olsem wanem? Sampela nait yu no inap slip? Sapos olsem, long kain taim olsem yu ken kamapim hevi bilong yu long God long rot bilong beten, olsem man bilong raitim Song i bin mekim. (Song 63:6) O yu inap mekim sampela sotpela beten long taim bilong san. Man bilong raitim Song i tok long God olsem: “Olgeta de long san na long nait, mi save beten long yu.”—Song 86:3.
Mekim Gutpela Beten Moa
Ating sampela taim bai yu pilim olsem i gutpela sapos yu beten inap longpela taim moa. Taim yu mekim ol sotpela beten, ating bai yu toktok long ol samting nating. Tasol taim yu mekim longpela beten na yu beten strong, bai yu kamapim tru tingting na bel bilong yu. Wanpela taim Jisas i beten wanpela nait olgeta. (Luk 6:12) Ating bai yu pilim olsem ol beten bilong yu i gutpela moa na yu kamapim moa yet bel bilong yu sapos yu no mekim kwik ol beten.
Tasol i no olsem yu mas mekim planti toktok sapos yu no gat planti samting yu laik kamapim; na yu no ken kolim kolim nating wankain tok. Jisas i tok: “Taim yupela i mekim prea, maski long mekim planti toktok nating, olsem ol haiden i save mekim. Ol i ting sapos ol i mekim planti toktok bai God i harim ol. Yupela i no ken bihainim pasin bilong ol. Taim yupela i no opim maus yet long askim Papa bilong yupela long wanpela samting, em i save pinis long olgeta samting yupela i sot long en.”—Matyu 6:7, 8.
Beten bilong yu bai kamap gutpela moa sapos yu tingting pastaim long ol samting yu laik toktok long en. I gat planti samting tru yu ken toktok long en—amamas yumi kisim long wok autim tok, ol pasin kranki na rong bilong yumi, ol samting yumi bel hevi long en, ol hevi bilong yumi long mani samting, ol hevi i kamap long ples wok o skul, i stap bilong famili bilong yumi, na i stap bilong kongrigesen bilong yumi long ol samting bilong spirit, o kain samting olsem.
Olsem wanem? Sampela taim tingting bilong yu i save wokabaut taim yu beten? Sapos olsem, yu mas wok strong moa long putim tingting bilong yu long beten, long wanem, Jehova i redi long ‘harim singaut bilong yumi.’ (Song 17:1) Yumi mas redi long wok strong tru long tingim gut ol beten bilong yumi. Yes, putim ‘tingting bilong yu long bihainim laik bilong Holi Spirit,’ na no ken tru larim tingting i wokabaut.—Rom 8:5.
Pasin bilong yumi long toktok long Jehova em tu i bikpela samting. Tru em i laik yumi tingim em olsem wanpela pren, tasol yumi no ken lusim tingting olsem yumi toktok long King bilong heven na graun. Kaunim na tingim long bel dispela bikpela samting em Kamapim Tok Hait sapta 4 na 5 i stori long en. Long dispela driman Jon i lukim gutpela bilas na bikpela lait bilong dispela Man em yumi save beten long em. Em i gutpela samting tru long yumi ken go klostu long “dispela Man i sindaun i stap long sia king,” na em i larim yumi i mekim olsem. Yumi no ken toktok long Jehova olsem em i wanpela man nating. Yumi mas wok strong bambai ol ‘tok bilong yumi na tingting bilong yumi i ken orait long ai bilong Jehova.’—Song 19:14.
Tasol yumi mas save, sapos yumi beten olsem man i save tru long pasin bilong toktok, i no olsem Jehova bai laikim moa yet dispela beten. Em i amamas taim yumi kamapim ol tok i stap long bel bilong yumi na yumi mekim long pasin daun, maski yumi mekim liklik tok tasol.—Song 62:8.
Jehova i Mekim Gut Bel na Pilim Hevi Bilong Yumi
Taim yumi laik wanpela i mekim gut bel bilong yumi na i helpim yumi, planti taim yumi save go long wanpela gutpela pren bambai em i ken helpim yumi na sori long yumi. Tasol i no gat wanpela pren i olsem Jehova. Em i “stap klostu na i redi long helpim yumi long taim bilong bikpela hevi.” (Song 46:1) Olsem “God bilong mekim isi bel bilong olgeta man i gat hevi,” em i pilim tru ol hevi bilong yumi, winim ol narapela man. (2 Korin 1:3, 4; Song 5:1; 31:7) Em i pilim tru hevi bilong narapela na i sori long ol man i gat bikpela hevi. (Aisaia 63:9; Luk 1:77, 78) Yumi save Jehova i wanpela gutpela pren i pilim tru ol hevi bilong yumi, olsem na yumi no pret long beten strong long em. Dispela i kirapim yumi long kamapim ol tingting pret na hevi bilong yumi. Na long dispela rot yumi pilim tru olsem Jehova i ‘save mekim bel bilong yumi i stap isi na em i mekim yumi amamas.’—Song 94:18, 19.
Ating sampela taim yumi pilim olsem yumi no gutpela inap long yumi ken beten long God, long wanem, yumi mekim ol rong. Tasol olsem wanem sapos wanpela gutpela pren i mekim rong long yu na em i askim yu long lusim rong bilong em? Ating bai yu mekim pasin sori na strongim bel bilong em, a? Jehova tu bai mekim olsem. Em i save lusim ol rong bilong ol pren bilong em, long wanem, sin i stap long skin bilong ol. (Song 86:5; 103:3, 8-11) Yumi save long dispela samting, olsem na yumi no pret long kamapim stret ol rong long em; yumi ken bilip tru olsem em bai mekim pasin sori na marimari long yumi. (Song 51:17) Sapos yumi bel hevi, long wanem, yumi mekim ol pasin kranki, tok bilong 1 Jon 3:19, 20 bai mekim gut bel bilong yumi. Jon i tok: “Sapos yumi laikim tru ol arapela, orait yumi ken save, yumi bihainim tok tru. Na maski sapos bel bilong yumi i kotim yumi long wanpela samting, yumi ken i stap bel isi long ai bilong God. Long wanem, God em i save long olgeta samting, na save bilong en i winim tru save i stap long bel bilong yumi.”
God i no save tingim yumi long taim bilong ol bikpela hevi tasol, nogat. Jehova i save tingim olgeta samting em inap helpim o nogutim yumi long ol samting bilong spirit na bel. Yes, yumi no ken ting ol tingting na wari bilong yumi i no bikpela samting long Jehova na yumi no ken beten long em long dispela samting. (Filipai 4:6) Olsem wanem? Taim yu stap wantaim wanpela gutpela pren, yupela i save toktok tasol long ol bikpela samting long i stap bilong yupela? O yupela i stori tu long ol wari i no bikpela tumas? Na i wankain tu long ol beten bilong yu, yu ken toktok long Jehova long olgeta samting long i stap bilong yu, long wanem, yu save em ‘i save wari long yumi.’—1 Pita 5:7.
Tasol yu no inap stap pren wantaim wanpela man inap longpela taim sapos yu stori long yu yet tasol. Olsem tasol long ol beten bilong yumi, yumi no ken stori tasol long yumi yet. Yumi mas kamapim tu olsem yumi laikim tumas Jehova na yumi tingim ol laik bilong em. (Matyu 6:9, 10) Taim yumi beten yumi ken askim God long helpim yumi, na tu, yumi ken tok tenkyu long God na litimapim nem bilong em. (Song 34:1; 95:2) Kisim save long God long rot bilong stadi bai helpim yumi, long wanem, long dispela rot bai yumi save gut moa long Jehova na ol pasin bilong em. (Jon 17:3) Sapos yu kaunim Buk Song em bai helpim yu tu, long wanem, yu ken save long ol samting ol narapela gutpela wokboi bilong Jehova i bin kamapim long ol beten bilong ol.
Em i wanpela gutpela presen tru long i stap pren bilong Jehova. Yumi ken soim olsem yumi pilim tru dispela samting taim yumi givim tru bel long ol beten bilong yumi na yumi kamapim ol tingting bilong bel bilong yumi long Jehova. Sapos yumi mekim olsem bai yumi kisim wankain amamas olsem man bilong raitim Song i stori long en: “Ol man yu save makim na bringim i go long haus bilong yu, ol i ken amamas.”—Song 65:4.
[Ol Piksa long pes 28]
Yumi ken beten long God long olgeta taim