Bilong Wanem Yumi Mas Beten Oltaim?
“Yupela i mas beten oltaim. Maski wanem samting i kamap long yupela, yupela i mas tenkyu long God.”—1 TESALONAIKA 5:17, 18.
1, 2. Olsem wanem Daniel i kamapim olsem em i pilim tru pasin bilong beten? Dispela i mekim wanem long pasin bilong em long pas gut wantaim God?
PROFET Daniel i gat pasin bilong beten long God tripela taim long wanpela de. Em i save brukim skru long rum bilong em long windo i lukluk i go long Jerusalem, na em i save beten. (1 King 8:46-49; Daniel 6:10) Maski king i putim wanpela lo long ol man i mas beten long Darius tasol, Daniel i no kisim tupela tingting long pasin bilong beten. Maski bagarap i painim em o nogat, dispela man bilong beten i save toktok oltaim wantaim Jehova.
2 Jehova i gat wanem tingting long Daniel? Taim ensel Gebriel i kam bilong kamapim bekim bilong wanpela beten bilong Daniel, em i tokim dispela profet olsem “God i laikim yu tumas.” (Daniel 9:20-23) Long tok profet bilong Esekiel, Jehova i tok long Daniel olsem em i gutpela man. (Esekiel 14:14, 20) Long i stap bilong em, ol beten bilong Daniel i bin kamapim pasin bilong pas gut wantaim God bilong em, na Darius tu i bin luksave long dispela samting.—Daniel 6:16.
3. Olsem ekspiriens bilong wanpela misineri i kamapim, olsem wanem beten inap helpim yumi long holimpas pasin bilong i stap gut long God?
3 Pasin bilong beten oltaim inap helpim yumi tu long karim ol bikpela hevi. Tingim stori bilong Harold King, em wanpela misineri long Saina, na inap 5-pela yia olgeta ol i bin putim em i stap wanpis long wanpela rum kalabus. Brata King i stori long ekspiriens bilong em, na em i tok: “Tru mi stap longwe long ol man, tasol i no gat man inap mekim mi i stap longwe long God. . . . Mi tingim Daniel em Baibel i stori long em, na long ples klia we ol man i abrusim sel bilong mi ol inap lukim mi, mi save brukim skru na beten strong tripela taim long de. . . . Long ol dispela taim, spirit bilong God i stiaim tingting bilong mi i go long ol gutpela samting na dispela i save mekim isi bel bilong mi. Beten i bin strongim mi tru long ol samting bilong spirit na i bin mekim gut bel bilong mi!”
4. Long dispela stori bai yumi skelim wanem ol askim long pasin bilong beten?
4 Baibel i tok: “Yupela i mas beten oltaim. Maski wanem samting i kamap long yupela, yupela i mas tenkyu long God.” (1 Tesalonaika 5:17, 18) Olsem na yumi ken skelim ol dispela askim: Bilong wanem yumi mas tingim gut ol beten bilong yumi? I gat wanem ol as na yumi mas toktok oltaim wantaim Jehova? Yumi save popaia, olsem na yumi mas mekim wanem sapos dispela i mekim na yumi pilim olsem yumi no gutpela inap long yumi ken beten long God?
Strongim Pasin Pren Long Rot Bilong Beten
5. Beten i helpim yumi long amamas long wanem kain pasin pren?
5 Yu laik bai Jehova i tingim yu olsem pren bilong em? Em i bin mekim olsem long Abraham. (Aisaia 41:8; Jems 2:23) Jehova i laik bai yumi kamapim dispela kain pasin bilong pas gut wantaim em. Em i singautim yumi long i go klostu long em. (Jems 4:8) Dispela i mas kirapim yumi long tingim gut pasin bilong beten. I hatwok long wanpela man inap kisim hap taim bilong toktok wantaim wanpela bikman bilong gavman, na i hatwok moa yet long kamap pren bilong em! Tasol dispela Man i bin wokim heven na graun em i kirapim yumi long toktok long em long rot bilong beten, na yumi ken mekim olsem long wanem wanem taim yumi laik mekim o long taim i gat wok long yumi mekim olsem. (Song 37:5) Pasin bilong yumi long beten oltaim i helpim yumi long pas gut wantaim Jehova.
6. Pasin bilong Jisas i skulim yumi long wanem samting long pasin bilong “prea i stap”?
6 Tasol em i isi tru long yumi inap lusim pasin bilong beten! Ol hevi bilong wan wan de inap pulim tingting bilong yumi na yumi no wok strong long toktok wantaim God. Jisas i bin kirapim ol disaipel bilong em long “prea i stap,” na em yet i bin mekim olsem. (Matyu 26:41) Maski kirap long moningtaim i go inap long nait em i gat wok bilong mekim, em i save makim taim bilong toktok wantaim Papa bilong em long heven. Sampela taim Jisas i save kirap long “moningtaim tru” bambai em i ken beten. (Mak 1:35) Sampela taim long apinun samting, em i save go long ol hap i no gat man long en bambai em inap toktok wantaim Jehova. (Matyu 14:23) Oltaim Jisas i bin makim taim bilong beten, na yumi tu i mas mekim olsem.—1 Pita 2:21.
7. Wanem ol samting i mas kirapim yumi long toktok wantaim Papa bilong yumi long heven long olgeta de?
7 Planti taim long olgeta de ol rot i op long yumi mekim ol beten bilong yumi yet taim ol hevi na traim i painim yumi, na taim yumi mas pasim tok long sampela samting yumi laik mekim. (Efesus 6:18) Taim yumi larim God i stiaim yumi long olgeta samting long i stap bilong yumi, pasin pren bilong yumi wantaim em bai kamap strong moa. Sapos tupela pren i karim hevi wantaim, dispela bai strongim pasin pren namel long tupela. (Sindaun 17:17) Taim yumi bilip long Jehova na lukim em i helpim yumi, dispela bai strongim pasin pren namel long em na yumi.—2 Stori 14:11.
8. Long ol stori bilong Nehemia, Jisas, na Hana, yumi lainim wanem samting long longpela bilong ol beten bilong yumi yet?
8 Yumi ken amamas tru olsem God i no putim mak long longpela bilong beten o hamas taim yumi ken toktok long em long rot bilong beten! Nehemia i mekim kwik sotpela beten paslain long em i kamapim askim bilong em long king bilong Persia. (Nehemia 2:4, 5) Jisas tu i bin mekim sotpela beten taim em i askim Jehova long givim em strong bilong kirapim bek Lasarus. (Jon 11:41, 42) Tasol Hana i bin “beten longpela taim long Bikpela” taim em i kamapim bel bilong em. (1 Samuel 1:12, 15, 16) Beten bilong yumi yet i ken sotpela o longpela inap long mak bilong ol samting i kamap.
9. Bilong wanem ol beten bilong yumi i mas litimapim nem bilong Jehova na tenkyu long olgeta samting em i bin mekim bilong helpim yumi?
9 Planti beten long Baibel i kamapim pasin bilong tenkyu na pilim tru bikpela namba bilong Jehova na ol gutpela wok em i bin mekim. (Kisim Bek 15:1-19; 1 Stori 16:7-36; Song 145) Long wanpela samting olsem driman, aposel Jon i lukim lain 24 elda—lain olgeta bilong ol Kristen God i bin makim, taim ol i kisim pinis wok bilong ol long heven—ol i litimapim nem bilong Jehova, na tok: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.” (KTH 4:10, 11) I gat as na oltaim yumi tu i mas litimapim nem bilong Man bilong wokim yumi. Taim ol papamama i mekim sampela samting bilong helpim pikinini bilong ol, ol i save amamas tru taim pikinini i pilim tru dispela samting long bel na em i tok tenkyu long ol! Pasin bilong amamas long tingim tingim ol gutpela pasin bilong Jehova na kamapim olsem yumi tenkyu tru na yumi pilim tru dispela samting long bel, dispela i gutpela rot bilong mekim ol beten bilong yumi i kamap gutpela moa.
“Beten Oltaim”—Bilong Wanem?
10. Beten i mekim wanem wok bilong strongim bilip bilong yumi?
10 Pasin bilong beten oltaim em i bikpela samting bilong strongim bilip bilong yumi. Taim Jisas i stori pinis olsem em i bikpela samting long ‘beten long olgeta taim na no ken les,’ em i askim olsem: “Taim Pikinini Bilong Man i kam, em bai i lukim ol manmeri i stap long graun ol i bilip, o nogat?” (Luk 18:1-8) Pasin bilong beten strong na pilim tru long bel i save strongim bilip. Taim Abraham i wok long go lapun na em i no kamapim yet wanpela pikinini, em i toktok wantaim God long dispela samting. Bilong bekim tok bilong em, pastaim Jehova i tokim em long lukluk i go antap long skai na kaunim namba bilong ol sta, sapos em inap mekim olsem. Bihain God i tokim Abraham: “Ol tumbuna pikinini bilong yu bai i kamap planti tru, olsem ol sta.” Wanem samting i kamap? Abraham “i bilipim tok bilong Bikpela. Olsem na Bikpela i kolim em stretpela man.” (Stat 15:5, 6) Sapos yumi kamapim bel bilong yumi long Jehova long rot bilong beten, na bilipim ol tok promis bilong em long Baibel, na bihainim tok bilong em, em bai strongim bilip bilong yumi.
11. Olsem wanem beten inap helpim yumi long stretim ol hevi?
11 Beten inap tu long helpim yumi long stretim ol hevi. Olsem wanem? Ol samting i painim yumi long wan wan de i givim hevi long yumi na ol hevi i painim yumi i hatwok long karim? Baibel i tokim yumi: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” (Song 55:22) Taim yumi gat wok long skelim ol bikpela samting yumi mas mekim, yumi ken bihainim pasin bilong Jisas. Em i beten inap long nait olgeta paslain long em i makim 12-pela aposel bilong em. (Luk 6:12-16) Na long nait paslain long em i dai, Jisas i beten strong tru na “tuhat bilong en i kamap olsem blut na i pundaun long graun.” (Luk 22:44) Wanem samting i kamap long dispela? “God i harim beten bilong em.” (Hibru 5:7) Pasin bilong beten strong long olgeta taim bai helpim yumi long karim ol hevi i painim yumi.
12. Olsem wanem beten i kamapim klia olsem Jehova i tingim tru yumi?
12 Narapela as bilong i go klostu long God long rot bilong beten i olsem, em tu bai kam klostu moa long yumi. (Jems 4:8) Taim yumi kamapim bel bilong yumi long Jehova long rot bilong beten, yumi inap pilim olsem em i tingim tru yumi na ol samting yumi sot long en. Yumi inap pilim olsem God i laikim tru yumi wan wan. Jehova i no bin makim narapela man long harim ol wan wan beten bilong ol wokman bilong em, nogat. Em yet i save harim ol beten ol i mekim long em olsem Papa bilong ol long heven. (Song 66:19, 20; Luk 11:2) Na em i tok ‘em i save wari long yumi, olsem na olgeta hevi yumi karim, yumi mas putim long han bilong em.’—1 Pita 5:6, 7.
13, 14. I gat wanem ol as na yumi mas beten oltaim?
13 Beten inap strongim yumi long givim bel moa yet long autim tok, na strongim yumi taim ol man i les long harim tok o pasin birua i mekim na yumi pilim olsem yumi laik lusim dispela wok. (Aposel 4:23-31) Na tu, beten inap lukautim yumi na bai yumi no bagarap long “olgeta kain pasin bilong trik na giaman Satan i save hait na mekim.” (Efesus 6:11, 17, 18) Taim yumi hatwok long karim ol hevi bilong wan wan de, oltaim yumi ken askim God long strongim yumi. Beten bilong Jisas i gat tok olsem Jehova i mas “kisim bek mipela long [“dispela man nogut,” NW ],” em Satan.—Matyu 6:13.
14 Sapos yumi wok yet long beten askim Jehova long helpim yumi long bosim gut ol laik nogut i stap long skin bilong yumi, bai yumi lukim em i helpim yumi. Baibel i tok promis olsem: “God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. Dispela rot i olsem. Em bai i mekim yupela i sanap strong, na dispela traim bai i no inap daunim yupela.” (1 Korin 10:13) Aposel Pol i bin lukim pasin bilong Jehova long strongim man long kain kain taim. Em i tok: “[“God,” NW ] i save strongim mi, na long strong bilong em mi inap mekim olgeta samting.”—Filipai 4:13; 2 Korin 11:23-29.
Beten Oltaim Maski Yumi Gat Pasin Kranki
15. Wanem samting inap kamap taim pasin bilong yumi i no stret wantaim ol lo bilong God?
15 Bilong God i ken harim beten bilong yumi, yumi no ken sakim ol gutpela tok bilong Baibel. Aposel Jon i tok: “Sapos yumi beten na askim em long wanpela samting, orait em i save givim long yumi, long wanem, yumi save bihainim lo bilong en, na yumi save mekim pasin em i laikim.” (1 Jon 3:22) Tasol wanem samting inap kamap taim pasin bilong yumi i pait wantaim ol lo bilong God? Adam na Iv i haitim ol yet taim ol i bin mekim sin long gaden Iden. Ating yumi tu bai gat tingting long “hait” long Jehova na lusim pasin bilong beten. (Stat 3:8) Klaus, em i bin mekim wok wasman raun inap longpela taim pinis, em i tok: “Mi lukim olsem klostu olgeta taim, namba wan popaia ol man i lusim Jehova na oganaisesen bilong em ol i save mekim, em ol i save lusim pasin bilong beten.” Dispela samting i bin kamap long José Ángel. Em i tok: “Klostu 8-pela yia olgeta mi no bin beten long Jehova. Tru, mi tingim em yet olsem Papa bilong mi, tasol mi pilim olsem mi no gutpela inap long mi ken toktok long em.”
16, 17. Stori long olsem wanem pasin bilong beten oltaim inap helpim yumi long daunim pasin bilong slek long ol samting bilong spirit.
16 Ating sampela bilong yumi i pilim olsem yumi no gutpela inap long yumi ken beten, long wanem, yumi no strong tumas long ol samting bilong spirit o yumi bin kirap mekim sampela pasin i no stret. Tasol dispela em taim stret we yumi mas larim beten i helpim yumi. Jona i bin ranawe long wok God i bin givim em. Tasol ‘Jona i bin karim hevi, na em i singaut long Bikpela, na Bikpela i harim singaut bilong em. Jona i stap long ples nogut bilong ol man i dai pinis, na em i krai long Bikpela. Na Bikpela i harim krai bilong em.’ (Jona 2:2) Jona i bin beten na Jehova i harim beten bilong em, na Jona i kamap strong gen long ol samting bilong spirit.
17 José Ángel em tu i bin beten strong long God i helpim em. Em i tok: “Mi kamapim bel bilong mi long God na askim God long lusim sin bilong mi. Na em i bin helpim mi. Mi no ting mi inap kam bek long tok i tru sapos mi no bin beten. Long nau mi save beten long olgeta de, na mi save amamas long wetim ol dispela taim bilong beten.” Yumi no ken pret long tokim God long ol popaia bilong yumi, na long pasin daun yumi askim em long lusim rong bilong yumi. Taim King Devit i autim ol sin bilong em, Jehova i lusim ol dispela sin. (Song 32:3-5) Jehova i gat laik long helpim yumi, na em i no laik daunim yumi. (1 Jon 3:19, 20) Na beten bilong ol elda long kongrigesen inap helpim yumi long ol samting bilong spirit, long wanem, ol kain beten olsem “i gat bikpela strong.”—Jems 5:13-16.
18. Ol wokman bilong God i ken bilip tru long wanem samting maski ol i bin i go longwe tru long God?
18 I no gat wanpela papa inap sakim pikinini em i bin mekim wanpela popaia na long pasin daun em i kam askim papa long helpim em na givim em sampela gutpela tok. Tok piksa bilong pikinini i lusim papa i soim olsem maski yumi go longwe tru long Papa bilong yumi long heven, em i save amamas taim yumi kam bek long em. (Luk 15:21, 22, 23) Jehova i tokim olgeta man i mekim rong long ol i mas singaut long em, long wanem, “em i save lusim sin” bilong olgeta man i kam bek long em. (Aisaia 55:6, 7) Maski Devit i bin mekim sampela bikpela rong, em i singaut long Jehova na tok: “God, yu mas harim beten bilong mi. Yu no ken pasim yau long krai bilong mi.” Na em i tok tu: “Long moningtaim na long biksan na long nait tu mi save krai long em long ol hevi i bagarapim mi. Na [Bikpela] i harim prea bilong mi.” (Song 55:1, 17) Dispela tok i strongim tru bel bilong yumi, a?
19. Sapos yumi lukim olsem God i no harim beten bilong yumi, bilong wanem yumi no ken ting olsem em i no orait long yumi?
19 Olsem wanem sapos yumi no kisim kwik bekim long beten bilong yumi? Sapos olsem, orait yumi mas save gut olsem samting yumi beten long en i stret wantaim laik bilong Jehova na yumi salim beten long nem bilong Jisas. (Jon 16:23; 1 Jon 5:14) Disaipel Jems i bin tok long sampela Kristen em ol i no bin kisim bekim long beten bilong ol, long wanem, ‘tingting bilong ol i no stret na ol i beten long God.’ (Jems 4:3) Tasol, sapos yumi lukim olsem God i no harim ol beten bilong yumi, yumi no ken hariap long ting olsem em i no orait long yumi, nogat. Sampela taim, Jehova inap larim ol gutpela wokman bilong em i beten planti taim long wanpela samting na mekim inap longtaim liklik, na bihain em i save kamapim olsem em i harim beten bilong ol. Jisas i tok: “Yupela i mas prea na askim God long givim ol samting long yupela, na em bai i givim long yupela.” (Matyu 7:7) Olsem na yumi mas “beten long olgeta taim.”—Rom 12:12.
Beten Long Olgeta Taim
20, 21. (a) Bilong wanem yumi mas beten oltaim nau long dispela “taim bilong las de”? (b) Bai yumi kisim wanem samting sapos long olgeta de yumi beten long Jehova?
20 Ol hevi i wok long kamap planti na i go nogut moa nau long dispela “taim bilong las de,” i gat “planti hevi nogut tru” long en. (2 Timoti 3:1) Na em i isi tru long yumi tingting tasol long ol hevi. Tasol, pasin bilong beten oltaim bai helpim yumi long tingim ol samting bilong spirit maski oltaim i gat ol hevi, traim, na ol samting i mekim yumi bel hevi. Pasin bilong beten long Jehova long olgeta de inap helpim tru yumi.
21 Jehova, em Man bilong “harim beten,” em i no save les long putim yau long yumi. (Song 65:2) Yumi no ken larim ol samting i pasim taim bilong yumi long toktok wantaim em. Pasin pren bilong yumi wantaim God em samting i nambawan tru. Yumi no ken mekim olsem em i samting nating, nogat. “Olsem na yumi ken i go klostu long God, na yumi no ken pret. Em i man bilong marimari. Yumi go long em, na bai yumi lukim em i sori long yumi. Na sapos yumi gat hevi, orait marimari bilong em bai i helpim yumi.”—Hibru 4:16.
Bai Yu Bekim Olsem Wanem?
• Pasin bilong profet Daniel i skulim yumi long wanem samting long pasin bilong beten?
• Olsem wanem yumi inap strongim pasin pren bilong yumi wantaim Jehova?
• Bilong wanem yumi mas beten long olgeta taim?
• Bilong wanem ol tingting olsem yumi no gutpela i no ken pasim yumi long beten long Jehova?
[Piksa long pes 16]
Nehemia i mekim sotpela beten paslain long em i toktok long king
[Piksa long pes 17]
Hana i bin “beten longpela taim” long Jehova
[Ol Piksa long pes 18]
Jisas i bin beten inap long nait olgeta paslain long em i makim 12-pela aposel bilong em
[Ol Piksa long pes 20]
Planti taim long olgeta de ol rot i op long yumi inap beten