‘Prea Long God na Askim Em Long Helpim Yupela’
“Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela.”—FILIPAI 4:6.
1. Yumi inap toktok wantaim husat? Bilong wanem yumi kirap nogut long dispela?
SAPOS yu tok olsem yu laik lukim praim minista bilong kantri bilong yu, yu ting lain bilong em bai tok wanem long yu? Ating ol wokman bilong em inap toktok wantaim yu, tasol ol i no inap larim yu i toktok wantaim praim minista yet. Tasol i no olsem sapos yu laik toktok wantaim Nambawan King bilong heven na graun, em God Jehova. Maski yumi stap we o em wanem taim, yumi inap toktok wantaim em. Em bai harim olgeta stretpela beten. (Sindaun 15:29) Dispela em i gutpela samting tru! Yumi amamas long dispela samting, olsem na oltaim yumi mas beten long Man bilong “harim beten.”—Song 65:2.
2. Man i mas mekim wanem na bai God i orait long ol beten bilong em?
2 Tasol ating man bai tok, ‘God i save orait long wanem ol beten?’ Baibel i kamapim wanpela samting man i mas mekim na bai God i orait long prea bilong em, Baibel i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” (Hibru 11:6) Olsem stadi i kamap paslain long dispela i bin kamapim, man i mas i gat bilip na bai em i ken go klostu long God. God i amamas long harim beten bilong ol man, tasol ol i mas bilip long God na mekim ol samting God i orait long en na ol i mas pilim tru tok ol i mekim na ol i mas i gat stretpela tingting long bel.
3. (a) Olsem ol prea bilong ol bilipman bilong bipo i kamapim, yumi inap kamapim wanem kain tok insait long ol beten? (b) I gat wanem kain kain beten yumi inap mekim?
3 Aposel Pol i tokim ol Kristen long taim bilong em: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela.” (Filipai 4:6, 7) Baibel i stori long planti manmeri husat i bin autim wari bilong ol long God long rot bilong beten. Olsem: Hana, Elaija, Hesekia, na Daniel. (1 Samuel 2:1-10; 1 King 18:36, 37; 2 King 19:15-19; Daniel 9:3-21) Yumi laik bihainim gutpela pasin bilong ol. Na tu, tok bilong Pol i soim olsem i gat kain kain beten man inap mekim. Em i stori long prea bilong tok tenkyu, em yumi mekim bilong tok tenkyu long ol gutpela samting God i bin mekim bilong helpim yumi. Long dispela kain prea ating bai yumi mekim tu tok bilong litimapim nem bilong God. Pol i tok, oltaim yumi mas tokim God long olgeta hevi, dispela i makim ol beten yumi mekim long pasin daun na i olsem yumi singaut long em. Na tu, yumi ken mekim ol prea bilong askim em long helpim yumi, olsem kolim stret samting yumi mas i gat. (Luk 11:2, 3) Papa bilong yumi long heven i amamas long harim ol dispela kain beten yumi mekim long em.
4. I tru Jehova i save long ol samting yumi mas i gat, tasol bilong wanem yumi beten yet long em long ol dispela samting?
4 Ating sampela inap tok: ‘Tasol mi ting Jehova i save pinis long ol samting yumi mas i gat.’ Yes, em i save. (Matyu 6:8, 32) Olsem na bilong wanem em i laik bai yumi askim em long ol samting yumi mas i gat? Tingim dispela tok piksa: Papa bilong wanpela stua i tok long givim wanpela presen long sampela kastama. Tasol bilong kisim dispela presen, ol kastama i mas kam long papa bilong stua na tok ol i laik kisim dispela presen. Ol kastama i no i laik go lukim papa bilong stua ol i soim olsem ol i no tingim tru presen em i laik givim ol. I wankain sapos yumi no beten long ol samting yumi mas i gat, dispela bai soim olsem yumi no tingim tru ol samting Jehova i givim long yumi. Jisas i tok: “Yupela i mas askim, na bai yupela i kisim.” (Jon 16:24) Long dispela rot yumi soim olsem yumi bilip long God.
Yumi Mas Bihainim Wanem Pasin Taim Yumi Beten Long God?
5. Bilong wanem yumi mas beten long nem bilong Jisas?
5 Jehova i no gat planti strongpela lo long pasin bilong prea. Tasol yumi mas kisim save long stretpela pasin bilong beten long God, em Baibel i kamapim. Olsem: Jisas i bin lainim ol disaipel: “Sapos yupela i askim Papa long wanpela samting long nem bilong mi, orait em bai i givim long yupela.” (Jon 16:23) Olsem na yumi mas beten long nem bilong Jisas, na luksave olsem long rot bilong Jisas tasol ol manmeri i save kisim ol gutpela samting bilong God.
6. Taim yumi beten, yumi mas sanap, sindaun, brukim skru o olsem wanem?
6 Olsem wanem? Taim yumi beten yumi mas sanap, sindaun, o brukim skru? Baibel i no makim wanpela pasin olsem yumi mas bihainim na bai God i ken harim prea bilong yumi. (1 King 8:22; Nehemia 8:6; Mak 11:25; Luk 22:41) Bikpela samting em yumi mas pilim tru tok yumi mekim na yumi mas i gat stretpela tingting long bel taim yumi beten.—Joel 2:12, 13.
7. (a) Wanem mining bilong dispela tok “amen”? (b) Wanem stretpela pasin long yusim dispela tok long ol beten?
7 Olsem wanem long kolim dispela tok “amen”? Mining bilong dispela tok Hibru, ʼa·menʹ i olsem “i tru.” Baibel i soim olsem dispela tok i stret long mekim long pinis bilong ol beten bilong yumi, na moa yet taim yumi prea long ai bilong ol man. (Song 72:19; 89:52) Wanpela buk (McClintok and Strong’s Cyclopedia) i tok, taim man i tok “Amen” long pinis bilong beten dispela i save “strongim ol tok em i kamapim insait long beten, na bilong askim God long mekim ol samting man i bin kamapim insait long beten.” Olsem na taim man i pinisim beten bilong em wantaim dispela tok “Amen,” dispela i makim olsem em i pilim tru samting em i bin beten long en. Taim wanpela Kristen i mekim beten long kongrigesen na em i tok “Amen,” ol man i putim yau ol tu ken tok “Amen” long bel o long maus bilong ol bilong soim olsem ol i wanbel long tok brata i bin mekim long beten.—1 Korin 14:16.
8. Olsem wanem sampela beten bilong yumi inap wankain olsem ol beten bilong Jekop na Abraham? Dispela bai kamapim klia wanem samting bilong yumi?
8 Sampela taim God bai larim yumi long soim olsem yumi pilim tru samting yumi beten long en. Ating yumi mas kisim pasin bilong Jekop, em i pait wantaim wanpela ensel long wanpela nait olgeta bilong kisim blesing. (Stat 32:24-26) O yumi mas bihainim pasin bilong Abraham, em planti taim em i askim Jehova long helpim Lot na ol arapela stretpela man husat i stap long Sodom. (Stat 18:22-33) Ating sampela taim bai yumi tu i askim Jehova strong long sampela samting em i bikpela samting long yumi, na yumi askim em strong long mekim stretpela pasin, gutpela-pasin-sori, na marimari long yumi.
Yumi Ken Askim Long Wanem Samting?
9. Taim yumi beten, wanem ol samting i mas stap olsem namba wan samting long tingting bilong yumi?
9 Tingim, Pol i bin tok: “Oltaim yupela i mas tokim God long olgeta hevi bilong yupela.” (Filipai 4:6) Olsem na yumi inap prea long klostu olgeta samting bilong laip bilong yumi. Tasol ol samting i mas i stap namba wan long beten bilong yumi em ol samting bilong Jehova. Daniel i makim gutpela piksa yumi ken bihainim. Taim lain Israel i kisim strafe long ol sin bilong ol, Daniel i askim Jehova long marimari long ol, em i tok: “Yu no ken wet. Tingim biknem bilong yu na helpim mipela kwiktaim.” (Daniel 9:15-19) Olsem wanem? Ol beten bilong yumi i kamapim klia olsem wok bilong mekim nem bilong Jehova i stap holi na wok bilong truim laik bilong em, em ol nambawan samting long tingting bilong yumi?
10. Olsem wanem yumi save i stret long beten askim God long ol samting bilong yumi yet?
10 Tasol i no gat rong long beten long ol samting bilong yumi yet. Olsem man bilong raitim song, yumi ken beten long kisimgut ol strongpela tok bilong God. Em i beten olsem: “Mekim klia mining bilong lo bilong yu na bai mi bihainim. Bel bilong mi bai i kirapim mi long bihainim olgeta lo.” (Song 119:33, 34; Kolosi 1:9, 10) Jisas i bin “mekim prea na beten long God. Em i save, God inap long kisim bek em, na em i no mas i dai.” (Hibru 5:7) Taim em i mekim olsem, em i kamapim klia olsem i stret long askim God long givim strong long yumi taim ol hevi o traim i painim yumi. Taim Jisas i skulim ol disaipel long beten, em i lainim ol long beten long ol samting bilong ol yet, olsem lusim ol rong ol i bin mekim na givim kaikai long ol.
11. Olsem wanem pasin bilong prea inap helpim yumi long sakim ol traim?
11 Long dispela beten, Jisas i tok: “Yu no ken larim ol traim i kamap long mipela, tasol yu ken kisim bek mipela long Man bilong mekim ol pasin nogut.” (Matyu 6:9-13, sta) Bihain em i tok: “Yupela i mas was na prea i stap. Nogut traim i kamap long yupela na yupela i pundaun.” (Matyu 26:41) Em i bikpela samting long yumi mas prea taim ol traim i painim yumi. Ating long ples wok o long skul traim i kamap na i kirapim yumi long sakim ol stiatok bilong Baibel. Ol man husat ol i no Witnes inap singautim yumi long mekim sampela samting i no stret tumas long Kristen i mekim. Ating ol man bai askim yumi long mekim samting i brukim ol stretpela stiatok. Long kain taim olsem i gutpela long bihainim tok bilong Jisas na prea—prea paslain long traim i kamap na long taim stret traim i painim yumi—askim God long helpim yumi na bai yumi no ken pundaun.
12. Wanem ol hevi inap kirapim yumi long prea? Yumi ken ting Jehova bai mekim wanem long dispela?
12 I gat kain kain samting i givim presa na mekim ol wokboi bilong God long nau i tingting planti. Planti man ol i tingting planti, long wanem, ol i gat sik o ol i bel hevi. Pasin pait i pulap long olgeta hap na dispela i givim bel hevi long ol man. Hevi bilong mani i mekim na i hatwok long painim mani bilong lukautim ol yet. Jehova i save harim beten bilong ol wokboi bilong em taim ol i kamapim ol dispela hevi long em, na dispela i save mekim gut bel bilong ol, a? Song 102:17 i tok long Jehova olsem: “Bai em i harim beten bilong ol manmeri bilong en, . . . Bai em i no ken givim baksait . . . long ol prea bilong ol.”
13. (a) I stret yumi ken beten long wanem ol samting bilong yumi yet? (b) Kamapim stori bilong wanpela kain beten olsem.
13 Yes, yumi inap beten long olgeta samting em inap helpim o nogutim wok bilong Jehova yumi mekim na pasin bilong yumi long pas gut wantaim em. (1 Jon 5:14) Sapos yu tingting long marit, kisim wanpela wok mani, o mekim bikpela wok moa long autim tok, orait no ken surik long beten askim God long stiaim tingting bilong yu. Olsem: Wanpela yangpela meri long Filipins i gat laik long mekim wok autim tok fultaim. Tasol em i no gat wok mani bilong lukautim em yet. Em i tok: “Wanpela Sarere mi beten stret long laik bilong mi long mekim wok painia. Long dispela de stret, taim mi mekim wok autim tok, mi tilim wanpela buk long wanpela skulmeri. Mi kirap nogut taim dispela meri i tok: ‘Long Mande moning yu mas i go hariap long skul bilong mi.’ Mi askim em, ‘Bilong wanem mi mas go?’ Em i tok i gat wanpela wok mani i stap na wantu ol i laik painim wanpela bilong mekim dispela wok. Mi bin go, na wantu ol i kisim mi long wok. Ol dispela samting i bin kamap kwiktaim tru.” Kain samting olsem i bin kamap long planti Witnes long olgeta hap. So no ken surik long kamapim bel bilong yu taim yu prea long God!
Olsem Wanem Sapos Yumi Bin Mekim Sin?
14, 15. (a) Bilong wanem man i no ken surik long beten maski em i bin mekim sin? (b) Man yet i mas beten, na wanem samting moa i ken helpim em long pas gut gen wantaim God?
14 Olsem wanem prea inap helpim man i bin mekim sin? Sampela i pilim sem long sin ol i bin mekim, olsem na ol i no beten. Tasol dispela i no savepasin. Yumi ken tok piksa olsem: Ol pailot bilong ol balus i save sapos ol i paul long rot ol inap toktok wantaim kontrol taua na kisim helpim. Tasol olsem wanem sapos pailot i pilim sem, long wanem, em i no save em i stap we na em i no laik kisim helpim long kontrol taua? Bikpela bagarap inap kamap, a? I wankain long man husat i bin mekim sin na em i sem long beten long God. Bikpela hevi moa inap painim em. Sapos yumi sem long sin yumi mekim, dispela i no ken pasim yumi long toktok wantaim Jehova. God i save singautim ol man husat i bin mekim ol bikpela rong long prea long em. Profet Aisaia i bin tokim ol sinman long taim bilong em long singaut long Jehova na em bai “lusim sin” bilong ol. (Aisaia 55:6, 7) Tasol man i mas daunim em yet na lusim pasin bilong mekim sin, tanim bel tru, na wok long ‘askim God’ long marimari long em.—Song 119:58; Daniel 9:13.
15 Taim man i bin mekim sin, i gat narapela as na beten em i bikpela samting. Disaipel Jems i stori long man husat i mas kisim helpim, olsem: “Em i mas singautim ol hetman bilong sios i kam long em. Na . . . ol i mas prea long God i ken mekim em i kamap orait gen. . . . Orait Bikpela bai i mekim orait dispela sikman na kirapim em gen.” (Jems 5:14, 15) Tru tumas, long rot bilong prea man yet i mas tokaut long Jehova long sin bilong em, na tu, em i ken askim ol hetman long mekim prea bilong helpim em. Dispela bai helpim em long pas gut gen wantaim God.
Ol Bekim Bilong Ol Beten
16, 17. (a) Olsem wanem Jehova i save bekim ol beten? (b) Wanem ol ekspiriens i soim olsem pasin bilong beten na wok bilong autim tok i save poroman wantaim?
16 Olsem wanem yumi kisim ol bekim bilong ol beten? Sampela bekim yumi kisim kwiktaim na bekim i stap ples klia. (2 King 20:1-6) Sampela bekim bai kamap bihain, na i hatwok liklik long luksave olsem wanem God i bekim. Olsem tok piksa bilong Jisas long meri wanpis i soim, planti taim meri hia i kam long jas, na yumi tu i mas beten long God planti taim long wanpela samting. (Luk 18:1-8) Tasol yumi ken bilip olsem taim prea bilong yumi i stret wantaim laik bilong God, Jehova i no inap tokim yumi olsem: “Yu no ken givim hatwok long mi.”—Luk 11:5-9.
17 Planti taim ol manmeri bilong Jehova i bin lukim Jehova i bekim ol beten bilong ol. Dispela i kamap ples klia long wok autim tok bilong yumi. Olsem: Tupela sista Kristen long Filipins i wok long tilim ol buk na nius bilong Baibel long wanpela hap i stap longwe. Taim ol i givim wanpela liklik nius long wanpela meri, em i kirap long krai. Em i tok: “Long nait mi bin beten askim God long salim wanpela man long skulim mi long Baibel, na mi ting dispela samting i kamap i makim olsem God i bin harim beten bilong mi.” I no longtaim na dispela meri i kirap kam long ol miting long Haus Kingdom. Long narapela hap bilong Saut-is Esia, wanpela brata Kristen i pret liklik long autim tok long wanpela kompaun i gat strongpela sekiuriti. Tasol em i prea long Jehova, strongim bel, na em i go insait long dispela kompaun. Em i paitim dua bilong wanpela flet, na wanpela yangpela meri i opim dua. Taim brata i kamapim as na em i kam lukim em, dispela meri i kirap na krai. Em i tok em i wok long painim ol Witnes Bilong Jehova na em i bin beten askim God long helpim em long painim ol. Brata i amamas long helpim meri hia long bungim ol bratasista bilong kongrigesen i stap long dispela hap.
18. (a) Taim God i harim beten bilong yumi, yumi mas mekim wanem? (b) Yumi ken save tru long wanem samting sapos oltaim yumi save beten?
18 Beten em i wanpela gutpela samting tru. Jehova i redi long putim yau na harim ol beten bilong yumi. (Aisaia 30:18, 19) Tasol yumi mas luksave long olsem wanem Jehova i save harim ol prea bilong yumi. I no olsem olgeta taim em bai bekim long rot yumi ting em bai mekim. Tasol taim yumi luksave olsem em i stiaim yumi, yumi no ken lusim tingting long tok tenkyu na litimapim nem bilong em. (1 Tesalonaika 5:18) Na tu, oltaim tingim tok bilong aposel Pol: “Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela.” Em nau, toktok wantaim God long olgeta taim. Long dispela rot yu bai luksave olsem tok bilong Pol i tru taim em i stori long ol man husat God i bin harim beten bilong ol, em i tok: “Bel isi God i save givim yumi . . . bai i mekim yupela i stap bel isi tru, . . . na bel na tingting bilong yupela bai i stap gut tru.”—Filipai 4:6, 7.
Yu Inap Bekim?
• I gat wanem kain kain beten yumi inap mekim?
• Yumi mas beten olsem wanem?
• Yumi inap prea long wanem ol samting?
• Wanem wok bilong beten taim wanpela i mekim sin pinis?
[Ol Piksa long pes 29]
Ol beten yumi pilim tru long bel i save helpim yumi na yumi no pundaun long ol traim
[Ol Piksa long pes 31]
Long rot bilong beten yumi tok tenkyu long God, tokim em long ol samting yumi wari long en, na askim em long helpim yumi