Yu Tingim Yet?

Olsem wanem? Yu pilim olsem ol tok bilong ol nupela Wastaua i bin helpim gut yu? Sapos olsem, orait yu ken traim ol save yu bin kisim long en, yu tingim yet o nogat:

◻ Armagedon bai i olsem wanem? (KTH 16:​14, 16)

Em i no olsem wanpela pait nuklia i pinisim olgeta samting i stap long graun, na em i no olsem wanpela bikpela bagarap i kamap long pasin bilong ol man long mekim nabaut long ol samting bilong graun, nogat. Em i pait bilong God bilong pinisim olgeta pait bilong graun na olgeta man i save kirapim ol lain long mekim pait. Na em bilong kamapim gutaim tru bilong ol man i laik tumas long i stap isi wantaim ol narapela man. Yu mas wet liklik na em bai kamap. (Habakuk 2:⁠3)​—⁠4/15, pes 17.

◻ Wanem kain bung bilong marit i save givim biknem long Jehova?

Sapos long bung bilong marit tupela nupela marit i tingim ol samting bilong spirit na ol i no tingim ol pasin bilong dispela graun, kain bung olsem bai givim biknem long Jehova. Ol Kristen bai amamas long dispela bung sapos ol i no insait long ol samting bilong dispela graun wantaim ol bilaspasin na giaman bilong en, na ol i no larim bung bilong marit i pasim ol long mekim wok bilong God, na ol i no mekim ol bilaspasin bilong pulim ai bilong ol man.​—⁠4/15, pes 26.

◻ Wanem samting i makim man i gat stretpela pasin?

Man i holimpas stretpela pasin, ol man inap bilip long em, na bikpela samting moa, em God inap bilip long em. Kain man olsem, stretpela bel bilong em i kamap klia long ol pasin em i mekim. Em i no man bilong tupela maus. Em i no save giaman o paulim mani o narapela samting. (2 Korin 4:⁠2)​—⁠5/1, pes 6.

◻ Bilong wanem Jeremaia i tok: “I gutpela sapos ol man i karim hevi taim ol i yangpela yet”? (Krai 3:⁠27)

Sapos man i lain long karim hevi taim em i yangpela yet, dispela bai helpim em long karim ol hevi i kamap taim em i go bikpela. (2 Timoti 3:12) Pasin bilong stap gut long God bai helpim gut yumi na i winim tru pasin bilong bihainim tasol ol narapela bilong abrusim ol hevi inap liklik taim.​—⁠5/1, pes 32.

◻ Long dispela driman samting long bodi bilong Jisas i kamap narapela kain, Moses na Elaija i makim husat?

Long dispela driman samting, Moses na Elaija i olsem piksa bilong ol brata bilong Krais em God i bin makim ol long spirit holi. Tupela wantaim Jisas ol i kamap “wantaim lait bilong God,” na dispela i makim olsem ol Kristen God i bin makim long spirit holi ol bai “kisim biknem” wantaim Jisas long Kingdom bilong heven. (Luk 9:​30, 31; Rom 8:17; 2 Tesalonaika 1:10)​—⁠5/15, pes 12, 14.

◻ Wanem dispela “tok hait bilong God”? (1 Korin 2:⁠7)

Dispela “tok hait bilong God” em ol samting bilong Krais Jisas. (Efesus 1:​9, 10) Em i no tok hait tasol long Jisas em i dispela Pikinini God i tok promis long salim i kam, olsem Mesaia. Em i tok hait bilong wanpela gavman bilong heven, em Kingdom bilong God i stap long han bilong Mesaia. Em i wanpela tok hait tu long ol wok Jisas i mas mekim bilong kamapim laik bilong God.​—⁠6/1, pes 13.

◻ Kristen i mas i gat wanem tingting long i go lapun o sik?

Em i mas tingim ol dispela hevi i olsem samting i givim rot long em long wetim Jehova i helpim em; em i no ken tingim ol dispela hevi i olsem samting bilong pasim em long mekim planti wok bilong Jehova. Em i mas tingim tu olsem, taim God i skelim Kristen​—⁠em i gutpela Kristen o nogat​—⁠God i save tingim bilip na pasin bilong Kristen long laikim tru Em​—⁠God i no save tingim tasol ol wok em Kristen i mekim long autim tok. (Mak 12:​41​-⁠44)​—⁠6/1, pes 26.

◻ Olsem wanem Jehova i kamapim klia gutpela tingting na save bilong em taim em i mekim wok long ol man long raitim Baibel na em i no bin mekim wok long ol ensel?

Sapos ol man bilong graun i no insait long ol dispela tok, ating bai yumi hatwok long kisim gut ol tok bilong Baibel. Na tu, taim ol man i raitim tok bilong Baibel na kamapim ol hevi samting bilong ol, ol man i save pilim tru ol dispela tok na ol i amamas long kaunim.​—⁠6/15, pes 8.

◻ Yumi mas mekim wanem bilong kamapim amamas insait long famili?

Bilong kamapim amamas insait long famili, yumi mas lukim Baibel na bihainim ol lo bilong en, em ol kain lo olsem pasin bilong bosim gut bel, pasin bilong daun long man i gat wok bos, pasin bilong toktok gut wantaim, na pasin sori.​—⁠6/15, pes 23, 24.

◻ Olsem wanem ol wok Jisas i mekim bilong oraitim ol man i narapela kain long ol wok ol man i mekim nau, em ol i tok ol i gat strong bilong oraitim sik?

Ol manmeri i bin no singaut singaut na bel i kirap, nogat, na Jisas tu i no mekim olsem. Na tu, long olgeta taim Jisas i oraitim ol sikman, em i no tok olsem mani ol i givim i no inap, o ol i no gat bilip, olsem na em i no inap oraitim ol.​—⁠7/1, pes 5.

◻ Olsem wanem Jehova i helpim ol lain bilong em long wok wantaim em long kamapim laik bilong em long ol samting bilong nem na Kingdom bilong em?

Namba wan rot bilong Jehova long helpim lain bilong em i olsem: Em i givim tok i tru long yumi. Namba 2: Em i givim spirit holi long yumi. Namba 3: Yumi gat wanpela bikpela lain brata i stap long olgeta hap, na yumi ken bung wantaim oganaisesen bilong Jehova bilong lotu long em.​—⁠7/1, pes 19, 20.

◻ Wanem nambawan bikpela samting ol papamama inap givim long pikinini bilong ol?

Nambawan bikpela samting ol papamama inap givim long pikinini i olsem: Ol i ken makim gutpela pasin bilong laikim tru ol narapela. Na bikpela samting tru, ol pikinini i mas lukim na harim papamama bilong ol i kamapim bel bilong ol olsem ol i laikim tru God na ol i kamapim dispela long olgeta samting ol i mekim.​—⁠7/15, pes 21.

◻ Wanem sampela bikpela samting inap mekim famili-stadi i kamap gutpela?

Famili-stadi i mas kamap long olgeta wik. Yu mas makim wanpela taim stret bilong mekim famili-stadi. (Efesus 5:​15-17) Taim yu mekim famili-stadi, mekim long pasin i save kirapim tru tingting bilong ol pikinini na i kirapim ol long pilim tru. Bilong ol pikinini i ken amamas long famili-stadi, ol i mas insait long en.​—⁠8/1, pes 26, 28.