Kisim Bek Ol Man—Olsem Wanem Long Dispela Tok?

‘GOD i kisim bek yu pinis?’ Planti man i kamapim dispela askim ol i pilim olsem God i kisim bek ol, long wanem, ol i ‘kisim Jisas pinis olsem Man bilong kisim bek ol.’ Tasol sampela man i ting i gat kain kain rot bilong bringim ol i go long laip, na sapos ‘Jisas i stap long bel bilong yu,’ orait ol samting yu bilip long en o wanem wanem misin yu insait long en, dispela i no bikpela samting.

Baibel i tok, God i laik “kisim bek olgeta [kain] manmeri.” (1 Timoti 2:​3, 4) Olsem na olgeta manmeri i bilip long rot bilong God long kisim bek ol man, God i gat laik long kisim bek ol. Tasol olsem wanem long dispela tok, kisim bek ol man? Yu ting God bai kisim bek yu, maski yu no mekim wanpela wok o yu mekim liklik hap wok tasol?

Insait bilong dispela tok “kisim bek ol man” i olsem “pasin bilong abrusim bagarap.” Olsem na em i no makim olsem tingting bilong man i stap isi na em tasol, nogat. Em i makim olsem man i abrusim bagarap taim dispela pasin nogut bilong nau i pinis, na bihain em i abrusim i dai yet! Tasol God bai kisim bek husat? Bilong bekim dispela askim, gutpela sapos yumi skelim ol tok long dispela samting Krais Jisas i bin lainim ol man long en. Ating bai yu kirap nogut long sampela tok mipela i kamapim.

Olgeta Lotu i Rot Bilong God Long Kisim Bek Ol Man?

Wanpela taim, Jisas i toktok wantaim wanpela meri Samaria. Maski em i no wanpela Juda, em i bilip stret olsem Mesaia bai kam, “em dispela man God i makim bilong kisim bek ol manmeri bilong en.” (Jon 4:​25) Olsem wanem? Dispela kain bilip em inap na bai God i kisim em bek? Nogat, i no inap, long wanem, Jisas i tokaut strong long dispela meri: ‘Yu save lotu long samting yu no save long en.’ Jisas i save, bilong God i ken kisim bek dispela meri, meri hia i mas stretim pasin bilong em long lotuim God. Olsem na Jisas i tok: “Tasol taim i laik kamap, na nau i kamap pinis, na olgeta man i laik lotu tru bai ol i lotu long Papa long strong bilong Holi Spirit na long pasin i tru. Na Papa i laikim tumas bai ol kain man olsem i mas lotu long em.”​—⁠Jon 4:​22, 23.

I gat narapela taim na Jisas i kamapim tingting bilong em long wok bilong kisim bek ol man; em long taim em i toktok wantaim ol Farisi, em wanpela lain i gat nem insait long lotu Juda. Ol Farisi i bin kamapim wanpela kain pasin bilong lotu na ol i bilip olsem God i orait long en. Tasol Jisas i tokim ol: “Yupela i man bilong giaman. Profet Aisaia i bin makim tru pasin bilong yupela taim em i tok olsem, ‘Ol dispela lain manmeri ol i save litimapim nem bilong mi long maus bilong ol, tasol bel na tingting bilong ol i stap longwe tru long mi. Ol i save autim lo bilong ol man tasol na tok, “Dispela em i tok bilong God.” Olsem na ol i lotu nating long mi.’ ”​—⁠Matyu 15:​7-9.

Olsem wanem long planti lotu long nau i tok ol i bilip long Krais? Yu ting Jisas i orait long olgeta i ken i stap olsem rot tru bilong bringim man i go long laip? Yumi inap save long bekim bilong dispela askim, long wanem, Jisas i tok klia: “Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom. Long de bilong bikpela kot bilong God, planti manmeri bai i tokim mi olsem, ‘Bikpela, Bikpela, mipela i bin mekim wok profet long nem bilong yu. Long nem bilong yu mipela i bin rausim ol spirit nogut. Long nem bilong yu mipela i bin wokim planti mirakel.’ Na long dispela taim mi bai tokaut long ol olsem, ‘Mi no save liklik long yupela. Yupela ol man bilong mekim pasin nogut, yupela klia long mi.’ ”​—⁠Matyu 7:​21-​23.

Mas Kisim Stretpela Save Long Jisas

Dispela tok bilong Jisas i makim olsem planti man i givim bel long lotu ol i no “bihainim laik bilong Papa.” Orait man i mas mekim wanem na bai God i kisim bek em tru tru? Namba Wan Timoti 2:⁠3, 4 i tok: “[God] i laik kisim bek olgeta manmeri, bai ol i ken save long as bilong tok tru.”​—⁠Skelim wantaim Kolosi 1:​9, 10.

Yumi mas kisim dispela kain save sapos yumi laik bai God i kisim bek yumi. Taim wanpela woda bilong Rom i askim aposel Pol na poroman bilong em, Sailas, olsem em i mas mekim wanem na bai God i kisim bek em, ol i tok: “Yu mas bilip long Bikpela Jisas, na bai God i kisim bek yu wantaim ol lain bilong yu.” (Aposel 16:​30, 31) Bilong God i ken kisim bek dispela woda wantaim lain bilong em, ol i mas pilim wanpela samting long bel bilong ol na em tasol? Nogat, i no olsem, long wanem, bilong ol i ken “bilip long Bikpela Jisas,” ol i mas i gat sampela save long Jisas em i husat, na ol wok em i bin mekim, na ol samting em i bin lainim ol man long en.

Olsem: Jisas i bin lainim ol man long wanpela gavman bilong heven bai kamap​—⁠em “kingdom bilong God.” (Luk 4:​43) Na em i kamapim ol lo long ol stretpela pasin ol Kristen i mas bihainim. (Matyu, sapta 5-7) Em i tokim ol disaipel long ol i mas i stap olsem wanem long ol samting bilong politik. (Jon 15:19) Em i kamapim wanpela wok bilong skulim ol man long olgeta hap bilong graun, na em i tokim lain bilong em long mekim dispela wok. (Matyu 24:14; Aposel 1:⁠8) Tru tumas, bilong ol i ken ‘bilip long Jisas,’ ol i mas save gut long planti samting! Long dispela as Pol tupela Sailas i “autim tok bilong Bikpela long [woda] na long ol lain bilong em” paslain long taim ol dispela nupela bilipman i kisim baptais.​—⁠Aposel 16:​32, 33.

Mas Kisim Stretpela Save Long God Tu

Bilong bilip tru long Jisas, yumi mas lotu long dispela God em Jisas yet i save lotu long en. Jisas i beten olsem: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”​—⁠Jon 17:⁠3.

Taim Pikinini bilong God i mekim wok bilong em long graun, olgeta taim em i save stiaim tingting bilong ol man i go long Papa bilong em​—⁠long em yet, nogat. I no gat wanpela taim na em i tok em yet i God i Gat Olgeta Strong. (Jon 12:​49, 50) Planti taim Jisas i tok em i stap aninit long Papa bilong em. (Luk 22:​41, 42; Jon 5:​19) Jisas i tok: “Papa i stap namba wan tru na i winim mi.” (Jon 14:28) Olsem wanem? Misin bilong yu i bin lainim yu long ol dispela tok? O ol i bin lainim yu olsem Jisas yet em i God i Gat Olgeta Strong? Bilong God i ken kisim bek yu, yu mas i gat stretpela save long dispela samting.

Long Beten Bilong Bikpela, Jisas i tokim ol disaipel bilong em long beten olsem: “Nem bilong yu i mas i stap holi.” (Matyu 6:⁠9) Klostu olgeta Baibel i haitim nem bilong God; ol i raitim olsem “Bikpela.” Tasol long ol olpela rait bilong “Olpela Testamen,” nem bilong God i stap olsem 6,000 taim! Song 83:18 i tok: “Bai ol i ken save tru, yu wanpela tasol, yu Bikpela [“nem bilong yu Jehova,” NW], na yu God Antap Tru, na yu save bosim olgeta hap bilong graun.” Olsem wanem? Misin bilong yu i bin lainim yu long mekim wok long nem bilong God, Jehova? Sapos nogat, yu inap lus long kisim laip, long wanem, “olgeta manmeri i singaut long Bikpela [“Jehova,” NW] long helpim ol, em bai i kisim bek ol”!​—⁠Aposel 2:​21; skelim wantaim Joel 2:​32.

Long Spirit na Long Pasin i Tru

Na tu, Krais Jisas i bin stiaim tingting bilong ol man i go long Tok Bilong God, em Baibel. Taim em i kamapim tingting bilong God long sampela tok, planti taim em i tok: “Buk bilong God i tok.” (Matyu 4:​4, 7, 10; 11:10; 21:13) Long nait paslain long taim em i dai, Jisas i tingim ol disaipel na em i beten olsem: “Tok bilong yu i tru olgeta, na mi laik bai yu mekim tok tru bilong yu i wok insait long bel bilong ol.”​—⁠Jon 17:⁠17.

Olsem na narapela samting yumi mas mekim na bai God i kisim bek yumi, em yumi mas save long ol tok bilong Baibel. (2 Timoti 3:​16) Baibel tasol i bekim ol askim olsem: I stap bilong yumi i gat wanem as bilong en? Bilong wanem God i bin larim pasin nogut i stap longtaim? Wanem samting i painim man i dai pinis? Tru God i save givim pen long man long bikpaia? God i gat wanem laik long dispela graun?a Sapos yumi no gat stretpela save long ol dispela samting, yumi no inap lotu tru long God, long wanem, Jisas i tok: “Olgeta man i laik lotu tru bai ol i lotu long Papa long strong bilong Holi Spirit na long pasin i tru.”​—⁠Jon 4:​23.

Bilip i Kirapim Yumi Long Mekim Wok

Bilong God i ken kisim bek ol man, ol i no ken kisim save na em tasol. Stretpela save bilong God bai kirapim ol man i gat gutpela bel na bai ol i bilip. (Rom 10:​10, 17; Hibru 11:⁠6) Dispela kain bilip bai kirapim ol long mekim wok. Baibel i tok: “Yupela i mas senisim tingting nogut bilong yupela, na tanim bel, na bai God i rausim ol sin bilong yupela.”​—⁠Aposel 3:​19.

Em nau, bilong God i ken kisim bek yumi, yumi mas bihainim ol lo bilong God long ol samting bilong stretpela pasin. Tok Bilong God inap helpim ol man long lusim kain kain pasin bilong giaman, em longtaim pinis ol i bin bihainim, na i kirapim ol long mekim tok tru na bihainim stretpela pasin. (Taitus 2:​10) Ol i lusim pasin i gat sem, olsem pasin sodom, bagarapim marit, pasin pamuk, na ol i stap stret. (1 Korin 6:​9-​11) Tasol bel i no kirapim ol nating na ol i lusim ol dispela pasin nogut inap liklik hap taim tasol, nogat; ol i lusim olgeta, long wanem, ol i bin stadi gut long Tok Bilong God na ol i bihainim.​—⁠Efesus 4:​22-​24.

Bihain, pasin bilong laikim tru God na tenkyu long em i save kirapim man i gat gutpela bel na em i dediket long God na kisim baptais long wara bilong makim dispela samting. (Matyu 28:​19, 20; Rom 12:⁠1) Long ai bilong God ol Kristen i baptais pinis ol i stap olsem man em God i kisim bek ol pinis. (1 Pita 3:​21) Taim God i pinisim ol pasin nogut bilong nau, em bai kisim bek ol tru tru​—⁠em bai lukautim ol na ol bai abrusim bagarap long taim bilong dispela bikpela hevi.​—⁠KTH 7:​9, 14.

Kisim Bek Ol Man​—⁠Em Inap Mekim Wanem Long Yu?

Dispela tok yumi stori pinis long en i kamapim klia olsem, bilong God i ken kisim bek yumi, yumi no ken ‘kisim Bikpela Jisas long bel bilong yumi’ na em tasol, nogat. Yumi mas kisim stretpela save bilong God Jehova na Krais Jisas na senisim sampela pasin bilong yumi. Ating yu pilim olsem em i hatwok tru long mekim olsem, tasol ol Witnes Bilong Jehova bai amamas long helpim yu long mekim ol dispela samting. Long rot bilong Baibel-stadi​—⁠no gat pe​—⁠ol i ken helpim yu long wokabaut long rot i bringim man long laip oltaim.b

De bilong God long mekim kot i kam klostu pinis, olsem na yu mas hariap na mekim dispela samting! Nau em i taim bilong bihainim tok bilong profet Sefanaia olsem: “Nogut belhat bilong Bikpela i kamap na kukim yupela olsem paia. Yupela ol manmeri i no save bikhet na sakim tok bilong Bikpela, yupela i mas i kam long em. Yupela i mas daunim yupela yet na mekim pasin i stret. Sapos yupela i mekim olsem, orait taim Bikpela i belhat na bekim pe nogut long ol manmeri, yupela bai i no inap bagarap.”​—⁠Sefanaia 2:​2, 3.

[Ol Futnot]

[Blok long pes 6]

God Bai Kisim Bek Ol Man i . . .

◻ Kisim stretpela save long God na Jisas.​—⁠Jon 17:⁠3.

◻ Bilip.​—⁠Rom 10:17; Hibru 11:⁠6.

◻ Tanim bel na baut.​—⁠Aposel 3:​19; Efesus 4:​22-​24.

◻ Dediket na baptais.​—⁠Matyu 16:24; 28:​19, 20.

◻ Wok yet long autim tok.​—⁠Matyu 24:14; Rom 10:⁠10.

[Ol Piksa long pes 7]

Stadi long Baibel, bihainim ol tok yumi lainim, dediket, na baptais, em ol samting yumi mas mekim na bai God i kisim bek yumi