Ol Man i Askim
Olsem Wanem? Ol Witnes Bilong Jehova i Bilip Olsem God Bai Kisim Bek Ol Tasol?
Ol Witnes Bilong Jehova i ting olsem ol i painim pinis lotu i tru. Sapos ol i no ting olsem, ol bai senisim ol bilip bilong ol. Olsem ol man bilong planti narapela lotu i bilip, ol Witnes Bilong Jehova i bilip na wet long God bai kisim bek ol. Tasol ol i bilip tu olsem em i no wok bilong ol long skelim olsem God bai kisim bek husat. God tasol em i Jas. Em yet bai makim.—Song 50:6.
Tok Bilong God i kamapim klia olsem ol man em God bai kisim bek ol, ol i gat laik long dispela samting i kamap, tasol dispela i no inap, ol i mas bihainim tu tok bilong Man Bilong Kisim Bek ol. Yumi ken tok piksa olsem: Wanpela man i wokabaut long bikbus na i paul long rot. Em i gat bikpela laik long painim rot bilong i kam ausait. Olsem wanem? Em bai bagarap o abrusim bagarap? Pasin em i mekim taim wanpela man i kam helpim em bai makim wanem samting bai painim em. Ating em i gat pasin antap na em i no laik narapela i helpim em. O em i gat pasin daun na i larim narapela i helpim em na em i abrusim bagarap.
Olsem tasol, ol man i bihainim tok bilong Man Bilong Helpim ol, em God Jehova, ol bai abrusim bagarap. Pasin bilong God long kisim bek ol man, em wanpela presen i kam long em, tasol i no olgeta man bai kisim dispela presen. Pikinini Bilong God, em Jisas, i tok: “Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.”—Matyu 7:21.
Ol Witnes Bilong Jehova i bilip olsem God i save kisim bek ol manmeri i bilip long ofa bilong Jisas bilong baim bek ol man na ol i bihainim tru olgeta samting Jisas i skulim ol man long en. (Aposel 4:10-12) Tingim tripela bikpela samting Baibel i kolim em ol man i mas mekim bilong God i ken kisim bek ol.
(1) Jisas i tokim ol wanwok bilong em olsem: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Gutpela pasin bilong Jisas yet long givim laip bilong em bilong helpim ol narapela man, dispela i kamapim klia olsem pasin laikim em i bikpela samting. Ol manmeri husat i laikim ol narapela man, ol i kamapim pasin i bikpela samting bilong God i ken kisim bek ol.
(2) Jisas i beten long Papa bilong em olsem: “Mi bin kamapim nem bilong yu long ol.” (Jon 17:26) Jisas i save olsem nem bilong God, em Jehova, em i bikpela samting tru long Papa bilong em. Jisas i beten long nem bilong Papa bilong em “i mas i stap holi.” (Matyu 6:9) Bilong mekim holi nem bilong God, man i mas save long dispela nem na mekim ol samting bilong soim olsem dispela nem em i bikpela samting tru na i holi. Olsem Jisas, ol man i laik bai God i kisim bek ol, ol i mas yusim nem bilong God. Ol i mas skulim tu ol narapela man long nem bilong God na ol pasin bilong em. (Matyu 28:19, 20) Ol man i kolim nem bilong God, em bai kisim bek ol dispela man tasol.—Rom 10:13.
(3) Jisas i tokim Pontius Pailat olsem: “Kingdom bilong mi em i no bilong dispela graun.” (Jon 18:36) Long nau, sampela manmeri tasol i bilip long Kingdom Bilong God, o gavman, em Jisas i stap King bilong en. Ol i bilip long ol oganaisesen bilong ol man. Tasol ol man em God bai kisim bek ol, ol i sapotim Kingdom Bilong God na ol i tokim ol narapela man long olsem wanem Kingdom bai i helpim ol man i stap gut long God.—Matyu 4:17.
Taim ol disaipel bilong Jisas i kisim save long sampela samting ol i mas mekim bilong God i ken kisim bek ol, ol i askim: “Husat inap kisim laip i stap gut oltaim?” Jisas i bekim tok olsem: “Samting man i no inap mekim, em God inap mekim.” (Luk 18:18-30) Ol Witnes Bilong Jehova i wok strong long winim ol dispela mak na bai God i ken kisim bek ol. Ol i wok strong long helpim ol narapela tu na bai God i ken kisim bek ol.