Ripot Long Wok Bilong Kingdom
Tok Bilong God i Gat Strong Long Mekim Man i Kamap Klin
OL ripot i tokaut olsem planti man bilong kisim drak bipo, ol i kirap kisim gen drak taim ol i lusim haus sik bilong skulim ol man bambai ol i no ken kisim drak. Tasol Tok Bilong God inap kamapim samting ol dispela kain haus sik i save hatwok long mekim. (Hibru 4:12) Tok Bilong God na spirit bilong em i bin helpim planti long lusim pasin bilong kisim drak na bihainim dispela tok: “Yumi mas rausim olgeta pasin doti bilong bodi na bilong spirit, na yumi mas kamap klin olgeta long ai bilong God. Na yumi mas pret na aninit long God na yumi mas givim yumi yet olgeta long God na bihainim tru pasin holi oltaim.”—2 Korin 7:1.
Stori i kam long Mianma i kamapim klia dispela samting. Wanpela man i kalabus tru long kisim drak inap planti yia i stori olsem: “Mi kisim pasin bilong kalabus long kisim drak taim mi yangpela yet. Planti taim mi traim long lusim drak, tasol mi no inap. Mi kirap long stil bambai mi ken kisim yet drak. Long dispela as, long 1988, mi go kalabus inap wanpela yia.
“Taim mi lusim haus kalabus, mi kirap bung gen wantaim ol olpela poroman bilong mi. I no longtaim na mi kirap gen long kisim drak. Famili bilong mi i lukim dispela pasin mi mekim long bagarapim mi yet na ol i no pas moa wantaim mi. Na tu, pasin bikhet bilong mi i mekim na planti long dispela hap i pret long mi, na ol tu i kirap abrusim mi.
“Orait wanpela taim samting nogut i painim mi—mi kisim planti drak tumas. Ol i salim mi i go kalabus gen, na mi stap inap 3-pela yia. Maski ples kalabus i no gutpela, mi strong na mi stap laip yet.
“Taim mi pinis kalabus na kam bek long haus, mi askim famili bilong mi long lusim tingting long rong mi mekim long pastaim. Ol i kisim mi bek, tasol ol poroman i grisim mi gen long mekim ol pasin nogut mi bin mekim bipo.
“Bihain tumbuna meri bilong mi i tokim wanpela pasto bilong ples olsem mi mas i go long wanpela skul bilong Baibel. Pasto i wanbel long dispela tok. Tasol taim mi no go yet long dispela skul, liklik mama bilong mi, em wanpela Witnes Bilong Jehova, em i tok, sapos mi laik lain gut long Baibel, orait mi mas stadi wantaim ol Witnes.
“Mi go long Haus Kingdom na ol i kisim mi i go sekanim wanpela man na em i orait long stadi long Baibel wantaim mi. Planti ol i kam tok gude long mi na ol i tok amamas long mi i kam long miting.
“Taim mi kirap stadi long Baibel na go long ol miting Kristen, mi laik go klostu long God na dispela i senisim laik bilong mi long kisim drak. Mi wok long kamap strong na wanpela yia bihain mi dediketim laip bilong mi long God Jehova, na mi kisim baptais long wara bilong makim dispela dediket bilong mi.
“I no longtaim i go pinis, taim mi autim tok long haus bilong ol man, mi bungim wanpela olpela poroman mi save kisim drak wantaim em. Em i kirap nogut tru long mi bin senisim pasin bilong mi hariap tru. Dispela i opim rot bilong mi long autim tok, na mi inap toktok long em long ol gutpela samting Kingdom bai kamapim.
“Nau mi painim tru as bilong i stap bilong mi. Mi tenkyu long God i bin helpim mi na ol tok bilong Baibel i stretim mi. Nau mi inap helpim ol narapela long lusim pasin nogut bilong kisim drak.”