Ripot Long Wok Bilong Kingdom
Winim Ol Hevi Long “Ples i Narapela Kain Tru”
APOSEL Pol i askim ol Kristen bilong bipo long Korin olsem: “Sapos biugel i no krai stret, husat bai i redi long pait? Yupela tu i olsem tasol. Sapos yupela i mekim tok long narapela tok ples ol man i no save long en, olsem wanem bai ol i save as bilong dispela tok?”—1 Korin 14:8, 9.
Long Papua Niugini, em sampela taim ol i kolim olsem Ples i Narapela Kain Tru, i gat kain kain hevi ol Witnes Bilong Jehova i mas winim taim ol i autim tok bilong Baibel na ol i laik kamapim klia ol tok. Ol i save autim tok long ol man em ol i gat 700 narapela narapela tok ples na ol i gat kain kain pasin bilong ples. I gat hevi bilong wokabaut long ol bikpela maunten, no gat rot, na pasin raskol tu i go bikpela. I no ol dispela hevi tasol i painim ol Witnes—sampela lain bilong ol narapela lotu i save birua long ol, na sampela taim ol bikman bilong skul tu i birua long ol.
Tasol ol gutpela save bilong Baibel na planti buk samting ol i kisim long tok ples bilong ol long mekim Baibel-stadi, dispela i helpim ol Witnes long autim klia gutnius olsem biugel i krai stret. Planti man i save harim tok, olsem ol ripot daunbilo i kamapim:
• Long kirap bilong nupela yia bilong skul, wanpela tisa i laik save bilong wanem ol pikinini bilong ol Witnes Bilong Jehova i no save salut long plak o mekim singsing bilong litimapim kantri. Em i givim dispela askim long Maiola, em wanpela sumatin i gat 13 krismas na i baptais pinis. Maiola i kamapim ol tok bilong Baibel long dispela samting na em i bekim stret dispela askim. Tisa i orait long dispela bekim, long wanem, bekim i kam long Baibel. Tisa i kamapim dispela bekim bilong sumatin long ol narapela tisa bilong skul.
Orait bihain, taim tisa i givim wok long ol sumatim long raitim ol stori long skul, Maiola i raitim stori bilong God Triwan. Em i kisim bikpela mak long stori em i raitim, winim ol narapela long klas, na tisa i askim em long em i kisim we ol dispela tok. Maiola i soim em long buk Yu Inap i Stap Oltaim Long Paradais Long Graun long tok Inglis. Tisa i kirap soim dispela buk long olgeta insait long klas, na planti i laik kisim wanpela bilong ol yet. Long de bihain long en, Maiola i tilim 14 buk na 7-pela magasin long ol wanskul bilong em, na em i kirapim Baibel-stadi wantaim 3-pela bilong ol. Maiola i putim mak em i laik winim, olsem mekim wok bilong autim tok long olgeta de.
• Kirap long 1973 samting, ol man i birua long wanpela grup bilong ol Witnes Bilong Jehova long wanpela ples long nambis klostu long Pot Mosbi. Tasol long nau, ol Witnes i kisim helpim long wanpela lain ol i no bin ting ol inap kisim helpim long en. Wanpela taim, bisop bilong Yunaitet Sios long dispela ples, em wanpela man bilong Papua Niugini na em i bin skul long narapela kantri, em i singautim ol man i sindaun long haus lotu long givim sampela askim long em. Wanpela man i askim olsem: “I gat tupela lotu long ples bilong mipela—Yunaitet Sios na ol Witnes Bilong Jehova. Mipela mas mekim wanem long taim ol Witnes i kam long haus bilong mipela?” Bisop i pasim maus inap longtaim liklik, na nau em i tok: “Sori, mi no save bai mi tok wanem long yupela. I no longtaim na tupela yangpela Witnes i bin kam long haus bilong mi. Ol i givim wanpela askim long mi, na maski mi bin skul long yunivesiti, mi no save long bekim bilong dispela askim. Tasol ol i no hatwok, ol i soim mi long bekim bilong dispela askim i stap long Baibel. Olsem na mi no inap tokim yupela long samting yupela i mas mekim—yupela yet i ken tingim. Yupela no ken harim sapos yupela i no laik, tasol no ken kros wantaim ol o paitim ol.”
Bihain wanpela wasman sekit bilong Sosaiti Was Taua i go lukim dispela grup, na em i tok: “Klostu olgeta man long dispela ples i bin harim tok bilong ol Witnes taim ol i autim tok. Sampela i bin singautim ol Witnes i go insait long haus bilong ol. Long nau em i gutpela ples bilong autim tok.”