Jehova i Bosim Ol Man Long Pasin Sori
LONG bipo yet na i kam inap nau, planti hetman i no bin sori liklik long ol man i karim bikpela pen na hevi na i stap aninit long ol. Tasol Jehova i narapela kain bos—em i makim wanpela lain bilong em yet, em Israel, na em i bosim dispela lain long pasin sori.
Taim ol Israel i stap wokboi yet long Isip na ol i singaut long Jehova i ken helpim ol, em i harim. “Long taim ol i karim pen na hevi, Bikpela tu i bin karim pen na hevi wantaim ol. Bel bilong en i bin sori tumas long ol na em i bin marimari long ol, olsem na em yet i bin . . . kisim bek ol.” (Aisaia 63:9) Jehova i kisim bek ol Israel, na wokim mirakel na givim kaikai long ol, na bringim ol i go long wanpela kantri i bilong ol yet.
Gutpela pasin sori bilong Jehova i kamap ples klia tu long ol lo em i givim long dispela lain. Em i tokim ol Israel long ol i mas mekim pasin sori long ol pikinini, papamama bilong ol i dai pinis, na long ol meri, man bilong ol i dai pinis, na long ol man bilong ol narapela lain i sindaun wantaim ol. Na ol i mas mekim stretpela pasin long ol man em hap skin bilong ol i bagarap.
Na Lo i tok ol i mas mekim pasin sori long ol man i sot long ol samting. Taim ol i kisim kaikai long gaden bilong ol, ol i mas larim hap kaikai i stap bilong ol rabisman i ken kisim. Long yia Sabat, em namba 7 yia, ol i mas mekim i dai dinau bilong ol man i gat dinau long ol. Olgeta hap graun ol Israel i bin kisim long ol lain tumbuna na ol i mas baim i go long ol narapela, ol dispela man i mas bekim bek long ol long namba 50 yia. Wanpela buk (Ancient Israel—Its Life and Institutions) i tok: “Long Israel bipo i no gat sampela lain ol narapela i tingim ol i olsem ol pipia lain tasol, olsem nau yumi lukim.” “Taim lain Israel i stap nupela yet, olgeta Israel i gat wankain sindaun liklik.”—Wok Pris 25:10; Lo 15:12-14; 24:17-22; 27:18.
Bihainim Pasin Sori Bilong Jehova
Pasin sori bilong Jehova i save kirapim ol wokboi bilong em long mekim wankain pasin. Olsem: Sampela king long bipo, taim ol i kamap king ol i kilim i dai famili bilong king i bin stap pastaim. Tasol wokboi bilong Jehova, em Devit, em i no bihainim dispela pasin. Taim King Sol i dai, Devit i lukautim Mefiboset, tumbuna pikinini bilong Sol na man bilong kisim olgeta samting bilong Sol. Em i sori long Mefiboset, “olsem na em i no kisim Mefiboset, pikinini man bilong Jonatan na tumbuna pikinini bilong Sol, na givim long ol Gibeon. Nogat.”—2 Samuel 21:7.
I no gat narapela man i bin bihainim pasin sori bilong Jehova olsem Jisas i bin mekim. Planti mirakel em i wokim, pasin sori i kirapim em long mekim. Wanpela taim wanpela man i gat sik lepra em i tokim em: “Sapos yu laik, yu inap long mekim mi i kamap klin long ai bilong God.” Jisas i sori tru na i putim han long em na em i tok: “Mi laik. Yu kamap klin.” (Mak 1:40-42) Narapela taim, bikpela lain manmeri ol i bihainim Jisas. Maski ol i mekim bikpela pairap, Jisas i harim tupela man i aipas ol i singaut long em olsem: “ ‘Yu Pikinini Bilong Devit, yu mas sori long mitupela.’ . . . Jisas i sori long tupela, na em i putim han long ai bilong tupela, na wantu tasol ai bilong tupela i orait na tupela i lukluk gen.”—Matyu 20:29-34.
Taim Jisas i lukim planti manmeri tumas, dispela i no mekim na em i no pilim moa hevi bilong ol, nogat. Wanpela taim em i tok, “mi sori long dispela ol manmeri”—inap longtaim liklik ol i no bin kaikai. Olsem na em i wokim mirakel na givim kaikai long ol. (Mak 8:1-8) Taim Jisas i raun long ol hap, em i lainim ol bikpela lain manmeri, na tu, em i save lukim ol samting ol i sot long en tu. (Matyu 9:35, 36) Bihain long wanpela raun olsem, Jisas wantaim ol disaipel bilong em ol i no gat taim bilong malolo o kaikai liklik. Baibel i tok: “Ol i kisim bot, na ol i go long wanpela hap i no gat man. Ol tasol i go. Tasol planti manmeri i lukim ol i go, na ol i luksave long ol. Olsem na ol manmeri bilong olgeta taun i ran i go long dispela hap ol lain bilong Jisas i laik i go long en, na ol i kamap paslain long Jisas. Olsem na taim Jisas i go sua em i lukim bikpela lain manmeri i stap. Na em i sori tru long ol, long wanem, ol i olsem ol sipsip i no gat wasman. Na em i stat long givim planti tok long ol.”—Mak 6:31-34.
Tru, Jisas i sori long ol man i gat sik na ol man i stap rabis, tasol em i sori tu long ol man i stap rabis long ol samting bilong spirit. Ol bikman bilong ol i bin daunim ol tru, olsem na Jisas i “sori tru long ol.” Wanpela tok Grik ol i tanim olsem “sori tru” em i makim “bel i pilim tru.” Tru tumas, bel bilong Jisas i sori tru long ol man!
Pasin Sori Namel Long Ol Hatpela Man
Nau Krais Jisas i stap King bilong Kingdom bilong Jehova long heven. Olsem God i bin mekim long Israel bilong bipo, long nau tu God i save bosim lain bilong em long pasin sori. “Bikpela I Gat Olgeta Strong em i tok olsem, ‘Dispela ol lain bai i stap lain bilong mi tasol. Long dispela bikpela De mi bin makim, bai ol dispela lain i stap manmeri tru bilong mi. Na bai mi marimari [olsem sori] long ol.’ ”—Malakai 3:17.
Sapos yumi laik bai Jehova i mekim pasin sori long yumi, yumi mas bihainim ol pasin bilong em. Tru, yumi stap namel long ol man i givim bel long lukautim gutpela sindaun na ol gutpela samting bilong ol yet na ol i no tingting tumas long helpim ol man i gat hevi. Planti taim ol bikman bilong kampani i wok long kisim bikpela winmani long rot bilong sakim ol lo em ol i bin putim bilong lukautim ol wokman na ol man bilong baim ol samting. Long 2 Timoti 3:1-4, Baibel i stori stret long pasin bilong ol man long taim bilong yumi, em kain pasin olsem i bin bagarapim pasin sori long bel bilong planti manmeri.
Tasol ating yumi inap painim sampela rot bilong mekim pasin sori long ol narapela, a? Olsem wanem? Yumi inap tokim ol man i gat hevi olsem yumi laik helpim ol? I gat sampela sikman em yumi ken go lukim ol? Yumi inap strongim ol man i bel hevi, olsem Baibel i tok: “Strongim bel bilong ol man i save pret na . . . helpim ol man i no strong”?—1 Tesalonaika 5:14.
Pasin bilong sori bai helpim yumi tu na bai yumi no kros taim ol narapela i mekim pasin kranki. Baibel i tok: “Yupela i mas rausim olgeta pasin bilong bel nogut na kros na belhat na bikmaus na tok bilas, na olgeta kain pasin nogut. Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol, olsem God i lusim sin bilong yupela long nem bilong Krais.”—Efesus 4:31, 32.
Na pasin bilong sori bai helpim yumi na bai yumi no mekim wok nogut long strong yumi holim bilong bosim ol man. Baibel i tok: “Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela.” (Kolosi 3:12) Pasin bilong daunim yumi yet inap helpim yumi long pilim hevi bilong ol man yumi gat wok long bosim ol. Bilong mekim pasin sori long ol narapela, yumi mas mekim pasin daun na isi long ol—yumi no ken mekim pasin olsem hatpela man. Tru, yumi laik stretim gut ol wok, tasol nogut yumi mekim pasin long ol narapela olsem ol i wanpela hap nating bilong wanpela masin. Na tu, insait long famili, man marit i gat pasin sori em i mas tingim skin bilong meri bilong em i no strong tumas. (1 Pita 3:7) Sapos yumi tingim gutpela pasin bilong Jisas long mekim pasin sori, dispela bai helpim yumi long mekim ol dispela samting.
Taim Jisas i mekim wok bilong em long graun em i pilim tru hevi bilong ol man, olsem na yumi ken save, long nau, na long bihain tu, em bai mekim wok king long pasin sori. Song 72 i bin tok profet long em olsem: “King i ken stretim gut hevi bilong ol rabisman, na em i ken helpim ol man i sot long ol samting. Na em i ken daunim ol man i laik mekim nogut long ol arapela man. Em bai i stap king na bosim olgeta manmeri long hap bilong solwara i stap klostu na i go inap long solwara i stap longwe. Na mak bilong graun bilong en i ken stat long wara Yufretis na i go inap long olgeta hap bilong graun. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.”—Song 72:4, 8, 13.
Baibel i tok profet olsem: “Long stretpela pasin bilong skelim kot, em bai i harim wari bilong ol rabisman na em bai i helpim ol tarangu, ol arapela i daunim ol na mekim nogut long ol. . . . Ol man nogut bilong bikhet bai i dai.” Dispela tok profet i stori tu olsem, ol man i olsem wel animal, pasin bilong sampela bai senis, na bihain em i tok profet moa olsem: “Long olgeta ples antap long maunten bilong Bikpela, olgeta samting bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.” (Aisaia 11:4-9) Em nau, dispela tok profet i tok olsem bai i gat wanpela lain i kamap long olgeta hap bilong graun em ol i save tru long Jehova na bihainim ol gutpela pasin sori bilong em!