“Yu Amamas Long Ol Samting Mi Mekim o Nogat?”
“Yu kam wantaim mi na bai yu save, mi strong long bihainim Bikpela tasol.”—2 KING 10:16.
1, 2. (a) Olsem wanem pasin bilong lotu long Israel i go nogut olgeta? (b) Long yia 905 B.C.E., wanem sampela bikpela senis tru i laik kamap long Israel?
LONG yia 905 B.C.E. wanpela bikpela senis i kamap long Israel. Inap wan handet yia paslain long dispela taim, Solomon i bin lusim Jehova na kisim ol narapela god, na long dispela as Jehova i mekim na lain Israel i bruk long tupela lain. (1 King 11:9-13) Pikinini man bilong Solomon, em Rehoboam, em i bosim lain Juda long hap bilong saut, na King Jeroboam bilong lain Efraim i bosim lain Israel long hap bilong not. Tasol sori tru, taim ol i bruk nupela yet, samting nogut i kamap. Jeroboam i no laik bai lain bilong em ol i go long hap bilong saut bilong lotu long haus bilong God, nogut ol i kisim tingting long go bek long lain bilong Devit. Olsem na em i kamapim pasin bilong lotuim bulmakau long Israel, na dispela pasin bilong lotuim god giaman em i stap planti yia long dispela lain i stap long hap bilong not.—1 King 12:26-33.
2 Tasol dispela pasin i go nogut moa taim pikinini bilong Omri, em Ahap, i kamap king. Meri bilong em Jesebel, em i no bilong lain Israel, em i kirapim pasin bilong lotuim Bal na em i kilim i dai ol profet bilong Jehova. Profet Elaija i givim strongpela tok lukaut long Ahap, tasol em i no mekim wanpela samting bilong pasim meri bilong em. Orait long yia 905 B.C.E., Ahap i dai pinis, na pikinini bilong em, Joram, i stap king. Nau em i taim bilong rausim ol samting nogut long graun bilong Israel. Senis bilong Elaija, em Elisa, i toksave long kepten bilong ami, em Jehu, olsem Jehova i makim em long kamap king long Israel bihain long Joram. Jehu i kisim wanem wok? Em i mas kilim i dai lain bilong Ahap em ol i bin mekim planti rong, na dispela i olsem bekim bilong blut bilong ol profet em Jesebel i bin kapsaitim!—2 King 9:1-10.
3, 4. Olsem wanem Jonadap i kamapim bel bilong em olsem em i wanbel wantaim Jehu?
3 Jehu i bihainim tok bilong God na em i kilim i dai dispela meri nogut Jesebel, na bihain long en em i kirap kilim i dai lain bilong Ahap bambai em i ken rausim ol samting nogut long Israel. (2 King 9:15–10:14, 17) Orait nau em i bungim wanpela man i wanbel long wok em i mekim. “Em i bungim Jonadap, pikinini man bilong Rekap. Jehu i givim gude long em na i tokim em olsem, ‘Mi laikim tru tingting bilong yu. Na yu olsem wanem, yu amamas long ol samting mi mekim o nogat?’ Na Jonadap i tokim Jehu olsem, ‘Yes, mi wanbel wantaim yu.’ Orait na Jehu i tok, ‘Gutpela. Sapos olsem, han bilong yu i kam, yumi sekan.’ Orait Jehu i holim han bilong Jonadap na i pulim em i kam antap long karis. Na Jehu i tokim em olsem, ‘Yu kam wantaim mi na bai yu save, mi strong long bihainim Bikpela tasol.’ Jonadap i orait long dispela, na ol i ran long karis i go long Samaria.”—2 King 10:15, 16.
4 Jonadap i no wanpela man bilong Israel. Tasol em i save lotuim Jehova, olsem nem bilong em i makim (insait bilong en i olsem “Jehova i Orait Long Mekim,” “Jehova i Stretpela Man” o “Jehova i Save Givim Planti Samting Long Ol Man”). (Jeremaia 35:6) Na yumi save, em i gat bikpela laik tru long lukim Jehu i “strong long bihainim Bikpela tasol.” Olsem wanem yumi save long dispela? Long wanem, em i no bungim nating dispela man God i makim pinis olsem king bilong Israel, nogat. Jonadap i kam bilong bungim em, na long dispela taim Jehu i kilim i dai pinis Jesebel wantaim ol narapela long lain bilong Ahap. Taim Jonadap i go antap pinis long karis bilong Jehu, em i save pinis long samting i kamap. Em i kamapim klia bel bilong em, olsem em i laik helpim Jehu—na Jehova tu—long dispela pait i stap namel long trupela lotu na lotu giaman.
Jehu Bilong Nau na Jonadap Bilong Nau
5. (a) Wanem sampela senis liklik taim bai kamap long olgeta man bilong graun? (b) Husat dispela Man i Winim Jehu? Husat ol i stap olsem maus bilong em long graun?
5 Long nau, bikpela senis tru liklik taim bai painim olgeta manmeri bilong graun, olsem i bin painim Israel long yia 905 B.C.E. Taim i klostu pinis na Jehova bai rausim olgeta samting nogut long graun em Satan i bin kamapim, na lotu giaman tu. Husat dispela Jehu bilong nau? Em Krais Jisas tasol, em dispela man i gat wanpela tok profet i tok long em, olsem: “Yu strongpela king. Yu gat planti bilas, na biknem bilong yu i antap tumas. Yu mas pasim bainat na redi long pait. Yu nambawan king i gat biknem. Yu sindaun long hos na yu go long pait na winim pait. Yu laik pait bai ol man i no inap daunim tok tru. Na yu pait bilong helpim ol man bai ol i ken wokabaut stret.” (Song 45:3, 4) I gat wanpela lain long graun i olsem maus bilong em, em “lain Israel tru bilong God,” olsem ol Kristen God i bin makim, em ol “i save bihainim ol lo bilong God, na ol i save autim tok bilong Jisas.” (Galesia 6:16; KTH 12:17) Kirap long yia 1922 na bihain long en, ol dispela brata bilong Jisas ol i no bin pret long tokaut long ol samting Jehova bai mekim taim em i kamapim kot bilong em.—Aisaia 61:1, 2; KTH 8:7–9:21; 16:2-21.
6. Husat ol manmeri bilong olgeta lain ol i kam bilong helpim ol Kristen God i bin makim? Ol i mekim wanem na i olsem ol i go antap long karis bilong Man i Winim Jehu?
6 Ol dispela Kristen God i bin makim, i no ol tasol i mekim olsem. Olsem Jonadap i bin kam bilong bungim Jehu, olsem tasol planti manmeri bilong olgeta lain ol i kam bilong helpim Jisas, em Man i Winim Jehu, na ol mausman bilong em long graun, bilong sambai long trupela lotu. (Sekaraia 8:23) Jisas i kolim ol olsem “ol arapela sipsip” bilong em, na long 1932 ol Kristen God i bin makim ol i luksave olsem ol dispela manmeri i olsem Jonadap bilong bipo, na dispela Jehu bilong nau i singautim ol pinis long “kam antap long karis” bilong em. (Jon 10:16) Ol i mekim olsem wanem? Ol i “bihainim ol lo bilong God” na ol i wok wantaim lain God i bin makim long “autim tok bilong Jisas.” Long nau wanpela hap bilong dispela wok em wok bilong autim gutnius bilong Kingdom bilong God i kamap pinis na Jisas i stap King bilong en. (Mak 13:10) Long 1935, ol i luksave olsem ol dispela “Jonadap” em dispela lain “planti manmeri tru” em Kamapim Tok Hait 7:9-17 i stori long en.
7. Olsem wanem ol Kristen bilong nau i kamapim bel bilong ol olsem ol i wanbel yet wantaim Jisas?
7 Kirap long 1935 samting, dispela bikpela lain wantaim ol brata bilong ol em God i bin makim, ol i bin strongim bel na ol i kamapim long ples klia olsem ol i helpim trupela lotu. Long sampela kantri long Isten na Westen Yurop, na Esia, na Afrika, planti ol i bin dai bilong holimpas bilip bilong ol. (Luk 9:23, 24) Long sampela kantri ol man i bin kalabusim ol, na ol i bung na paitim ol, na mekim ol narapela samting nogut long ol. (2 Timoti 3:12) Ol i bin kamapim klia tru olsem ol i lain bilong holimpas bilip! Na Ripot Bilong Yia Bilong Wok Bilong 1997 i soim yumi olsem ol i strong yet long mekim wok bilong God, maski wanem kain hevi i painim ol. Ol i “wanbel” yet wantaim Jisas. Dispela i kamap klia long 1997, taim 5,599,931 pablisa bilong Kingdom—klostu olgeta em ol “Jonadap”—ol i lusim 1,179,735,841 aua long wok bilong autim tok bilong Jisas.
Ol i Wok Strong Yet Long Autim Tok
8 Jehu i gat nem long givim siksti stret long draivim karis bilong em—em wanpela mak olsem Jehu i strong long mekim wok bilong em. (2 King 9:20) Baibel i tok, Man i Winim Jehu, em Jisas, em i “wok strong” long mekim wok bilong em. (Song 69:9) Olsem na yumi no kirap nogut long ol Kristen tru bilong nau i gat nem olsem ol lain i strong tru long mekim wok bilong ol. Insait long kongrigesen na long ausait tu, ol i “strong long autim tok . . . maski sapos ol man i redi long harim tok o ol i no redi.” (2 Timoti 4:2) Pasin bilong ol long wok strong i kamap klia long ol mun olsem Mas, Epril na Me bilong 1997, bihain long taim wanpela tok i kamap long Wok Kingdom Bilong Yumi bilong kirapim planti brata sista long mekim wok painia haptaim sapos ol inap. Long ol wan wan kantri ol i putim mak long namba ol i laik winim, olsem hamas ol bai insait long dispela wok. Orait wanem samting i kamap? Planti brens ol i winim dispela mak ol i bin putim. Ekwado i putim mak olsem 4,000, tasol long mun Mas i gat 6,936 painia haptaim. Long Japan i gat 104,215 ol i mekim dispela wok insait long dispela 3-pela mun. Long Sambia ol i bin putim mak olsem 6,000, tasol long Mas i gat 6,414 painia haptaim; 6,532 long Epril; na 7,695 long Me. Long olgeta hap bilong graun, ol painia haptaim na ol painia oltaim ol inap olsem 1,110,251, em i antap long namba bilong 1996 inap 34.2 pesen!—Rom 10:10.
9. Ol Witnes Bilong Jehova i save go long haus bilong ol man, na ol i mekim wanem samting moa bilong painim ol man na tokim ol long gutnius?
9 Aposel Pol i tokim ol elda long Efesus: “Mi no surik long autim olkain gutpela tok inap long helpim yupela. Na long ol bung bilong ol manmeri na long olgeta haus bilong yupela tu, mi bin skulim yupela.” (Aposel 20:20) Ol Witnes Bilong Jehova long nau ol i bihainim pasin bilong Pol na ol i wok strong long autim gutnius long haus bilong ol man. Tasol sampela taim i hatwok long painim ol man long haus bilong ol. Olsem na “wokboi i gat gutpela tingting” i laik kirapim ol pablisa bilong Kingdom long autim tok long ol man i stap long ples ol i wok bisnis long en, na long ol rot, long nambis, long ol pak—long wanem wanem hap ol inap painim sampela man long en. (Matyu 24:45-47) Na gutpela samting tru i kamap long dispela wok.
10, 11. Ol pablisa long tupela kantri ol i bin mekim wanem bilong painim ol man i laik harim gutnius, em ol i no inap painim ol dispela man sapos ol i go long haus bilong ol?
10 Long Kopenhagen, long hap bilong Denmak, wanpela liklik lain pablisa i autim tok long ol rot ausait long ol ples bilong kisim tren. Kirap long mun Janueri i go inap long Jun, ol i tilim 4,733 nius, na ol i bin toktok wantaim planti manmeri, na ol i go bek na lukim planti. Sampela pablisa long dispela kantri ol i save kisim ol nupela nius i go long sampela stua long olgeta taim. Long wanpela taun i gat wanpela bikpela maket i save op long olgeta Fraide, na planti tausen manmeri ol i save kam raun long en. Olsem na kongrigesen i stretim rot bambai ol i ken autim tok long dispela ples maket long olgeta wik. Long wanpela hap ol pablisa i save wokim ol liklik mekpas long sampela nius samting i gat sampela stori i gutpela tru long ol tisa i kaunim, na ol i save givim long ol skul.
11 Long Hawaii tu ol i wok strong long painim ol manmeri ol i no inap bungim ol long haus bilong ol. Sampela hap em ol ples ol manmeri i save stap long en (olsem ol rot, pak, ples bilong putim ol ka, ples bilong kisim bas), long hap i gat ol bisnis long en, long hap bilong ol stua na ples balus, autim tok long rot bilong telefon, autim tok taim ol i sindaun long bas, na insait long banis bilong ol skul olsem yunivesiti samting. Kongrigesen i save skelim gut hamas Witnes bai go long ol wan wan hap, na ol dispela Witnes i mas lain gut pastaim long mekim dispela wok. Ol ripot i tokaut olsem ol i stretim rot bilong mekim wankain wok olsem dispela long planti kantri. Olsem na ol Witnes i save bungim sampela manmeri i laik harim gutnius, em ol i no inap bungim ol dispela lain taim ol i autim tok long ol haus.
Sanap Strong
12, 13. (a) Long 1997, Satan i mekim wanem kain pasin bilong biruaim ol Witnes Bilong Jehova? (b) Long wanpela kantri, ol tok giaman bilong bagarapim wok bilong ol Witnes i kamapim wanem gutpela samting?
12 Long sampela kantri long 1997, sampela lain i bin sutim ol tok giaman nogut tru long ol Witnes Bilong Jehova, na ating ol i mekim olsem bambai ol i gat rot long kisim ol Witnes i go long kot. Tasol ol Witnes i no surik liklik! (Song 112:7, 8) Ol i tingim beten bilong man bilong raitim Song: “Ol bikhetman i bin mekim planti tok giaman long mi. Tasol mi no gat narapela tingting. Mi bihainim olgeta lo bilong yu tasol.” (Song 119:69) Ol dispela tok giaman ol i bin mekim long ol nius samting em i makim olsem ol lain bilong dispela graun i birua long ol Kristen tru, olsem Jisas i bin tok profet long en. (Matyu 24:9) Na sampela taim dispela wok bilong ol birua i no kamapim samting ol i laikim. Wanpela man long Beljam i bin kaunim stori long wanpela nius, em ol i toknogutim ol Witnes. Dispela man i kirap nogut long ol dispela tok ol i mekim bilong bagarapim nem bilong ol Witnes, olsem na long Sande bihain long en em i go long wanpela miting i kamap long wanpela Haus Kingdom. Em i stretim rot bambai ol Witnes i ken stadi wantaim em long Baibel, na em i wok long kamap strong hariap. Pastaim dispela man em i insait long wanpela bikhetlain. Taim em i stadi long Baibel, dispela i helpim em long stretim wokabaut bilong em, na ol man long hap bilong em ol i lukim pasin bilong em i senis. Yumi save, man i bin raitim dispela tok bilong bagarapim nem bilong ol Witnes, em i no bin ting kain samting olsem bai kamap!
13 Sampela man i gat stretpela bel ol i bin tokaut olsem dispela pasin bilong sutim tok giaman long ol Witnes bilong bagarapim wok bilong ol em i no stret. Wanpela man namel long ol, bipo em i wanpela praim-minista, na em i tokaut olsem em i tingim bikpela wok ol Witnes Bilong Jehova i bin mekim na em i amamas tru long ol. Na wanpela bikman bilong gavman i raitim tok olsem: “Maski sampela taim ol i mekim ol tok bilas long ol [Witnes Bilong Jehova], mi ting gavman i no ken pret liklik long dispela lain bai mekim nogut long en, nogat. Ol i save laikim tru pasin bilong i stap isi wantaim ol man, na ol i man bilong wok, na ol i save daun long gavman.” Tru tumas, tok bilong aposel Pita i stret tru, em i tok: “Yupela i mas wokabaut stret namel long ol haiden. Na sapos ol i tok nogut long yupela, bihain ol bai i lukim gutpela pasin bilong yupela, na ol bai i litimapim nem bilong God long dispela de em bai i kam bilong kotim ol manmeri.”—1 Pita 2:12.
Planti Ol i Kam Long Memorial
14. Stori long sampela gutpela ripot long hamas manmeri ol i bin bung long Memorial long 1997.
14 I stret tru long ol manmeri i autim tok bilong Jisas ol i mas ting olsem Memorial bilong tingim indai bilong em i wanpela bikpela taim tru insait long yia. Long 1997, i gat 14,322,226 ol i bung long Mas 23 bilong mekim Memorial. Dispela namba i antap long namba bilong 1996, winim 1,400,000. (Luk 22:14-20) Long planti kantri, namba bilong ol manmeri i bung long Memorial i winim tru namba bilong ol pablisa bilong Kingdom, na dispela i makim olsem lain pablisa inap i go bikpela tru long bihain. Olsem: Long Haiti long 1997, i gat 10,621 pablisa, tasol 67,259 ol i bung long Memorial. Yu ken skelim ripot bilong yia long pes 18 i go inap 21 na bai yu save, i gat hamas ol narapela kantri em namba bilong ol manmeri i bin kam long Memorial i winim tru namba bilong ol pablisa.
15. Long sampela kantri, olsem wanem ol brata bilong yumi i bin winim sampela bikpela hevi bambai ol inap mekim Memorial?
15 Sampela i gat hatwok long kam long Memorial. Long Albenia i gat pait insait long kantri na i tambu long raun bihain long 7 klok long nait. Long 115 liklik grup i stap long Albenia, ol i kirapim bung bilong Memorial long 5:45 long apinun. San i go daun long 6:08 long apinun, na dispela i makim de Nisan 14 i kirap. Long 6:15 long apinun ol i kirap salim bret na wain bilong Memorial i go long ol manmeri i stap long dispela bung. Planti grup ol i mekim laspela beten long 6:30, na ol i go hariap long haus paslain long 7 klok. Tasol maski dispela hevi i stap, i gat 3,154 ol i bung long Memorial, na dispela i antap tru long namba bilong ol pablisa, em ol inap olsem 1,090. Long wanpela kantri long Afrika, i gat pait i kamap insait long kantri na ol brata sista i no inap bung long Haus Kingdom, olsem na tupela elda i pasim tok long go long haus bilong namba 3 elda na stretim rot bilong bung long ol liklik grup na mekim Memorial. Bilong kamap long dispela haus, tupela elda hia ol i mas brukim wanpela baret. Tasol i gat pait i stap long dispela hap, na ol paitman i holim gan na i sutim ol man i laik brukim dispela baret. Wanpela elda i ran siksti i go na brukim baret. Orait namba tu i wok long brukim baret na em i harim gan i pairap. Kwiktaim em i slip long graun na em i wokabaut isi long han lek na kamap gut, na ol katres i sut i go nabaut antap long het bilong em. Miting bilong ol dispela elda i kamap gut na ol i stretim rot bilong helpim kongrigesen.
‘Ol i Bilong Olgeta Lain na Kantri na Tok Ples’
16. Lain wokboi i gat gutpela tingting i bin mekim wanem bambai gutnius i ken i go long ol liklik lain i gat tok ples bilong ol yet?
16 Aposel Jon i tok, ol dispela planti manmeri tru ol i “bilong olgeta lain man na bilong olgeta kantri na bilong olgeta kain skin na bilong olgeta tok ples.” (KTH 7:9) Olsem na Lain Bilong Bosim Ol Witnes Bilong Jehova i save stretim rot bilong wokim ol buk na nius samting long planti tok ples, na olgeta taim ol i wokim long sampela tok ples moa—sampela em tok ples bilong ol lain i stap longwe tru insait long bus samting, na sampela lain i olsem liklik lain tasol. Olsem: Long Mosambik ol i kamapim wanpela liklik nius, Gutpela Sindaun Long Nupela Taim, long 5-pela tok ples moa. Long Nikaragua, ol i kamapim buklet Stap Amamas Oltaim Long Graun! long tok ples Miskito—em namba wan samting Sosaiti Was Taua i bin wokim long dispela tok ples. Planti Indian bilong lain Miskito ol i amamas tru long kisim dispela buklet taim ol i lukim olsem em i stap long tok ples bilong ol yet. Long 1997, Sosaiti i orait long wokim ol buk na nius samting long 25 tok ples moa, na ol i wokim olsem 1 bilion nius.
17. Long Korea ol i helpim ol lain i save mekim wanem kain tok? Olsem wanem ol video-kaset i bin helpim dispela lain?
17 Long Korea Sosaiti i helpim wanpela lain i gat narapela tok ples. Long 1997 ol i wokim namba wan kibung bilong ol manmeri i save mekim tok long han long tok ples Korea. I gat 15 kongrigesen long Korea ol i mekim tok long han, na ol dispela kongrigesen i gat 543 pablisa, tasol i gat 1,174 ol i kam long dispela kibung, na 21 ol i kisim baptais. Bilong helpim ol yaupas i no inap kisim gut tok bilong man o tok ol i raitim, Sosaiti i wok long kamapim ol buk samting long ol video-kaset long 13 tok ples ol i save mekim long han. Olsem na ol i helpim ol yaupas tu long “kaunim” na stadi long gutnius, na gutpela samting i kamap. Long Yunaitet Stets, pastaim ol yaupas i mas lusim 5-pela yia samting inap long ol i ken winim mak bilong kisim baptais. Tasol nau i gat sampela video ol i mekim tok long han long tok bilong ol yaupas bilong Amerika, olsem na sampela yaupas ol inap winim mak bilong kisim baptais insait long wanpela yia samting.
‘Stap Insait Long Karis’
18. Taim Jehu i bungim Jonadap, orait nau Jehu i kirap mekim wanem wok?
18 Long yia 905 B.C.E., taim Jonadap i bungim Jehu na i go antap long karis bilong em, nau Jehu i kirap mekim wok bilong em long pinisim ol lotu giaman. Em i singautim olgeta man i save lotuim Bal: “Yumi mas makim wanpela de bilong mekim bikpela lotu long god Bal.” Orait nau em i salim tok i go long olgeta hap bilong Israel na bai i no gat wanpela man bilong lotuim Bal i no kisim dispela toksave. Taim planti manmeri tru ol i kam bung insait long bikpela haus lotu bilong dispela god giaman, Jehu i was gut, nogut sampela man bilong lotuim Jehova i stap insait. Orait bihain Jehu wantaim ol soldia bilong em ol i kilim i dai ol man bilong lotuim Bal. “Olsem na Jehu i pinisim pasin bilong lotu long god Bal na ol Israel i no moa lotu long em.”—2 King 10:20-28.
19. Yumi tingim ol samting liklik taim bai painim olgeta man bilong graun, olsem na yumi mas i gat wanem kain tingting na pasin? Yumi mas wok strong long mekim wanem wok?
19 Long nau, laspela kot bilong olgeta lotu giaman i klostu pinis. Ol ensel i stiaim ol Kristen na ol i wok long autim gutnius long olgeta lain bilong graun, na ol i tokim ol long pret long God na lusim ol lotu giaman. (KTH 14:6-8; 18:2, 4) Ol i tokim ol man i gat pasin daun long ol i mas daun long Kingdom bilong God i stap long han bilong King em Jehova i bin makim, em Krais Jisas. (KTH 12:10) Nau long dispela bikpela taim tru, yumi no ken lusim pasin bilong givim bel long mekim wok bilong yumi—yumi mas sanap strong long helpim trupela lotu.
20. Bai yu strong long mekim wanem long yia bilong wok bilong 1998?
20 Wanpela taim King Devit i gat bikpela hevi na em i beten olsem: “God, long bel bilong mi, mi bilip strong long yu. Yes, mi bilip olgeta long yu. Na bai mi singim song bilong litimapim nem bilong yu. . . . Bai mi go long olgeta manmeri na litimapim nem bilong yu.” (Song 57:7, 9) Orait yumi tu i mas bilip strong. Long yia bilong wok bilong 1997, maski i gat planti hevi tru, bikpela singaut i kamap bilong litimapim nem bilong God Jehova. Yumi laik bai wankain singaut, o bikpela singaut moa yet, i kamap long dispela yia bilong wok. Na yumi laik wok yet long mekim olsem, maski Satan i mekim kain kain samting bilong mekim yumi i bel hevi, o em i mekim ol samting bilong biruaim yumi. Yumi laik kamapim long ples klia olsem yumi wanbel wantaim Man i Winim Jehu, em Krais Jisas, na bai yumi givim bel olgeta long bihainim tok em man bilong raitim song i givim long yumi: “Yupela stretpela manmeri, yupela i mas belgut na amamas long olgeta gutpela samting Bikpela i mekim. Yupela olgeta lain manmeri i stretpela long ai bilong God, yupela i mas amamas na singaut.”—Song 32:11.
Yu Inap Stori Long Dispela?
◻ Wanem ol senis i kamap long Israel long yia 905 B.C.E.?
◻ Jehu bilong nau em i husat? Olsem wanem dispela lain “planti manmeri tru” i kamapim klia olsem ol i wanbel wantaim em?
◻ Wanem ol samting long ripot bilong yia i kamapim pasin bilong ol Witnes Bilong Jehova long wok strong long yia bilong wok bilong 1997?
◻ Maski Satan i mekim wanem bilong biruaim yumi, bai yumi kamapim wanem tingting na pasin long yia bilong wok bilong 1998?
8. Olsem wanem ol Witnes Bilong Jehova i kamapim klia olsem ol i strong long helpim trupela lotu?
[Sat long pes 18-21]
RIPOT BILONG WOK BILONG OL WITNES BILONG JEHOVA LONG 1997
(Bilong save ol dispela rait i stap we long pes, lukim buk o magasin.)
[Piksa long pes 15]
Planti manmeri moa yet i bin kam long Memorial na dispela i makim olsem lain pablisa inap i go bikpela tru long bihain
[Piksa long pes 16]
Olsem Jonadap i bin helpim Jehu, olsem tasol dispela lain “planti manmeri tru” bilong nau ol i save helpim Man i Winim Jehu, em Krais Jisas, wantaim ol brata bilong em God i bin makim