Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w98 3/15 p. 24-25
  • Samting Ol i Mekim i No Givim Biknem Long Ol

No gat vidio bilong dispela seksen.

Sori, popaia kamap long lodim vidio.

  • Samting Ol i Mekim i No Givim Biknem Long Ol
  • Wastaua i Tokaut Long Kingdom Bilong Jehova—1998
  • Ol Liklik Het Tok
  • Wankain Infomesen
  • Wok Bilong Ol i Lus Nating
  • Nimrot​—⁠Wanpela Bikhetman
  • Ol Man i Wokim Bikpela Taua
    Baibel Stori Buk Bilong Mi
  • Wai na Yumi Nidim Kingdom Bilong God?
    Wastaua i Tokaut Long Kingdom Bilong Jehova Bilong Pablik)—2020
  • Sampela Bikpela Tok Bilong Buk Stat—Namba Wan
    Wastaua i Tokaut Long Kingdom Bilong Jehova—2004
Wastaua i Tokaut Long Kingdom Bilong Jehova—1998
w98 3/15 p. 24-25

Samting Ol i Mekim i No Givim Biknem Long Ol

BAIBEL i no kolim nem bilong ol man i wokim taua bilong Babel. Baibel i tok: “Ol i tok, ‘Nau yumi mas wokim wanpela bikpela taun bilong yumi yet, na wanpela longpela taua insait long en. Dispela taua bai i go antap inap long skai. Olsem na bai ol manmeri i lukim dispela wok, na ol i litimapim nem bilong yumi. Na bai yumi no ken bruk nabaut na i go i stap long narapela narapela hap bilong graun.’ ”​—⁠Stat 11:⁠4.

Dispela tok “ol” i makim husat? Dispela samting ol i mekim i bin kamap olsem 200 yia bihain long Bikpela Tait. Noa, em i gat 800 krismas long dispela taim, em i sindaun namel long planti tausen tumbuna pikinini bilong em. Olgeta i mekim wanpela tok ples tasol na ol i sindaun wantaim klostu long hap em Noa na ol pikinini man bilong em i bin sindaun long en bihain long Bikpela Tait. (Stat 11:⁠1) Bihain liklik, sampela ol i raun nabaut na ol i kamap long hap bilong sankamap “long wanpela ples daun long hap bilong Babilonia.”​—⁠Stat 11:⁠2.

Wok Bilong Ol i Lus Nating

Taim dispela lain i kamap pinis long dispela ples daun, ol i kisim tingting long bikhet long God. Ol i bikhet olsem wanem? Em olsem: Taim God Jehova i tokim namba wan man na meri long ol i mas “kamap planti na i go sindaun long olgeta hap bilong graun,” em nau, em i tokaut long laik bilong em. (Stat 1:​28) Taim Bikpela Tait i pinis, em i mekim wankain tok long Noa na ol pikinini man bilong em. God i tokim ol: “Nau yupela i mas karim planti pikinini, bai ol lain pikinini bilong yupela i kamap planti na pulapim olgeta hap bilong graun.” (Stat 9:⁠7) Tasol dispela lain i sakim dispela tok bilong Jehova, na ol i kirap na wokim wanpela taun na bai ol i no ken “bruk nabaut na i go i stap long narapela narapela hap bilong graun.”

Na tu, dispela lain i kirap long wokim wanpela longpela taua na bai ol man i lukim dispela wok i ken “litimapim nem” bilong ol. Ol i gat tingting long pinisim dispela taua, tasol ol i no pinisim. Baibel i tok, Jehova i paulim tok ples bilong ol na bai narapela i no inap save long toktok bilong narapela. Long dispela rot Jehova “i mekim ol lain bilong ol i bruk nabaut, na ol i go i stap nabaut long olgeta hap bilong graun, na ol i no moa wokim dispela taun.”​—⁠Stat 11:​7, 8.

Samting i kamapim klia olsem wok bilong ol i lus nating, i olsem: Dispela taua ol i wokim i no “litimapim nem bilong ol,” olsem givim biknem long ol. Long nau i no gat wanpela man i save long nem bilong ol​—⁠nem bilong ol i no stap long ol stori bilong bipo. Tasol olsem wanem long Nimrot, em tumbuna pikinini bilong Noa? Em i gopas bilong ol man i mekim dispela pasin bikhet long God, na ol man long planti hap ol i save long nem bilong em, a?

Nimrot​—⁠Wanpela Bikhetman

Tru tumas, Nimrot em dispela man i bin kirapim dispela lain long bikhet long God. Stat sapta 10 i tok, em i “bikhet long Jehova na em i strongpela man bilong raunim ol animal.” (Stat 10:⁠9, NW) Na Baibel i tok tu olsem “em i namba wan man bilong graun long kamap strongpela hetman.” (Stat 10:⁠8) Nimrot em i man bilong pait na bagarapim man. Taim Bikpela Tait i pinis, em i namba wan man long kamap king​—⁠em i makim em yet long i stap olsem king. Na tu, Nimrot em i man bilong wokim ol taun. Baibel i tok em i kirapim 8-pela taun, wanpela bilong ol em Babel.​—⁠Stat 10:​10-​12.

Em nau, yumi ken save olsem Nimrot​—⁠em wanpela birua bilong God, na king bilong Babel, na man bilong wokim ol taun​—⁠em i insait long wok bilong wokim taua bilong Babel. Olsem wanem? Dispela wok em i mekim i givim biknem long em? Wanpela man bilong hap bilong Is, em E. F. C. Rosenmüller, em i tok: “Dispela nem ol i givim long Nimrot i kam long wanpela tok Hibru [ma·radhʹ] na i makim olsem ‘em i bikhet,’ ‘em i lusim God.’ ” Na Rosenmüller i tok moa olsem, “ol man bilong Is i save givim nem long ol bikman bilong ol taim ol i dai pinis, na dispela i helpim yumi long save olsem wanem na planti taim nem bilong ol i stret wantaim ol samting ol i bin mekim.”

Sampela saveman i wanbel long ting olsem taim mama i karim Nimrot, em i no kisim dispela nem Nimrot. Ol i ting olsem, bihain, taim em i kamapim pasin bilong em olsem em i man bilong bikhet, em nau, ol man i kirap na givim dispela nem long em. Wanpela saveman olsem, em C. F. Keil, em i tok: “Dispela nem Nimrot i kam long tok [ma·radhʹ], olsem ‘mipela bai bikhet,’ na i makim wanpela taim em i bin pait na bikhet long God. Dispela nem i makim stret pasin bilong em, olsem na yumi ken save, ol wanlain bilong em, ol tasol i bin givim dispela nem long em, na i bin kamap olsem wanpela nem tru bilong em.” Long wanpela liklik tok i stap daunbilo, Keil i kamapim tok bilong Jacob Perizonius, em wanpela man bilong raitim stori bilong ol samting i bin kamap bipo, olsem: “Dispela man [Nimrot] em i man bilong raunim ol animal na i gat planti man i bihainim em, na mi ting olsem bilong kirapim sampela man moa long bikhet long God, em i save kolim dispela tok ‘nimrot, nimrot,’ olsem ‘Yumi bikhet! Yumi bikhet!’ Olsem na bihain, sampela man, na Moses tu, ol i givim dispela nem long em olsem wanpela nem tru.”

Em nau, ol samting Nimrot i mekim i no givim biknem long em. Nem tru em i kisim taim mama i karim em, ol man i no save long dispela. Dispela nem, na nem bilong ol man i bihainim em, ol i no stap long ol buk i stori long ol samting i bin kamap bipo. Na tu, Nimrot i no kamapim ol pikinini bilong kisim nem bilong em. Em i no kisim biknem; em i kisim nem olsem wanpela man nogut. Dispela nem Nimrot i makim em olsem wanpela bikhetman i laik daunim wok bilong God Jehova, tasol em i lus tru.

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim