Aninit long wok bos bilong God, olgeta samting em i wokim i bin stap wanbel na bel isi

Wai na Yumi Nidim Kingdom Bilong God?

Kirap long taim bilong namba wan man na meri, Krieta bilong yumi, nem bilong em Jehova, em wanpela tasol i stap Bos. Em i mekim wok bos long pasin laikim. Em i wokim naispela ples—em gaden long Iden—na bai ol man i ken stap long en. Na em i kamapim planti kaikai bilong ol. Na tu, em i givim wok em ol man bai amamas long mekim. (Stat 1:28, 29; 2:8, 15) Ol man inap i stap bel isi sapos ol i bin stap yet aninit long wok bos bilong God i gat pasin laikim.

Adam i holim prut tambu em Iv i givim long em. — Fes man na meri i bin sakim God olsem Bosman bilong ol

Baibel i tok wanpela bikhet ensel, bihain ol i kolim em Satan, i salensim rait bilong God long mekim wok bos. Em i tok ol man inap i stap amamas tru na ol i no nidim God long stiaim na bosim ol. Sori tru, fes papamama bilong yumi, Adam na Iv, i bihainim tok giaman bilong Satan na bikhet long wok bos bilong God.—Stat 3:1-6; Revelesen 12:9.

Adam na Iv i sakim God olsem Bosman bilong ol, ol i no stap moa long dispela ples Paradais na ol i lus long kisim laip oltaim na ol i no gat gutpela helt. (Stat 3:17-19) Disisen bilong ol i givim hevi tu long ol pikinini em bihain ol bai kamapim. Baibel i tok Adam i bin mekim sin, olsem na “sin i kamap long graun. Na sin i bringim dai i kam.” (Rom 5:12) Sin i kamapim narapela bikpela hevi: “Man i bin bosim man na i bringim hevi tasol long em.” (Eklisiastis 8:9) Yumi ken tok, taim ol man i bosim ol yet, oltaim hevi bai kamap.

WOK BOS BILONG OL MAN I KIRAP

Long pasin antap Nimrot i sanap i stap. Long baksait, ol man i wok long wokim haus. — Nimrot i bikhet long Jehova

Fes man i mekim wok bos long graun em Baibel i stori long en em Nimrot. Em i bikhet long wok bos bilong Jehova. Kirap long taim bilong Nimrot na i kam, ol bikman i mekim wok nogut long namba bilong ol. Klostu 3,000 yia i go pinis, King Solomon i tok: “Mi lukim aiwara bilong ol man em ol arapela i daunim ol, na i no gat man bilong mekim gut bel bilong ol. Na ol man i gat pawa i save daunim ol.”—Eklisiastis 4:1.

Ol dispela pasin i stap long nau tu. Long 2009, wanpela nius bilong Yunaitet Nesen i tok wok bos nogut i wok long go bikpela na “dispela em wanpela bikpela risen na pasin nogut i pulap long graun.”

TAIM BILONG MEKIM SAMTING!

Yumi nidim ol gutpela bosman na gutpela gavman long bosim graun. Na em samting Krieta bilong yumi i tok promis long en!

Ol piksa: Ol hevi em wok bos bilong ol man i kamapim. 1. Wanpela meri Esia i sindaun long graun i doti long strit na karim pikinini bilong em i wok long krai. 2. Lapun man i sik na slip long bet long haus sik. 3. Ol soldia i sut long gan bilong ol long ples bilong pait. 4. Ol man bilong protes i singaut bikmaus na holim ol sain. 5. Wanpela meri na pikinini meri bilong em i sanap ausait long haus bilong ol, ol i lukim olsem glas long fran dua bilong ol i bruk. 6. Wanpela taun em smok i karamapim i pulap long ol longpela paip bilong smok na ol paua lain. — Maski ol gavman bilong ol man i mekim gutpela wok bos, ol i no inap stretim ol bikpela hevi bilong ol man

God i kamapim wanpela Kingdom, o gavman, we bai senisim olgeta wok bos bilong ol man, na “em wanpela tasol bai stap oltaim oltaim.” (Daniel 2:44) Em dispela Kingdom we planti man i wok long beten long en. (Matyu 6:9, 10) Tasol God yet i no inap mekim wok bos long dispela gavman, nogat. Em i bin makim wanpela husat i bin stap olsem man long graun long kamap King. God i makim husat?