Bihainim Dediket Kristen Long Pasin Bilong i Stap Fri
“Sapos Spirit bilong Bikpela i stap long wanpela man, orait i no gat wanpela samting i pasim dispela man. Nogat. Em i stap fri.”—2 KORIN 3:17.
1. Ol Witnes Bilong Jehova ol i dediket long husat? Bilong wanem ol i save mekim wok long sampela sosaiti em gavman i orait long en?
OL WITNES BILONG JEHOVA i bilip olsem lotu bilong ol bai i stap oltaim oltaim. Olsem na ol i tingting long mekim wok bilong God long ‘spirit na long pasin i tru’ i go inap long olgeta taim bihain. (Jon 4:23, 24) Ol dispela Kristen ol i stap fri long makim wanem rot ol yet i laik bihainim, na ol i dediketim laip bilong ol olgeta long God Jehova na ol i strong long bihainim dediket bilong ol. Olsem na ol i wetim Tok Bilong God na spirit holi bilong em i helpim ol long mekim olsem. Taim ol i givim bel olgeta long bihainim dediket Kristen bilong ol long pasin bilong i stap fri em God i save givim, ol Witnes i save daun long wok bilong “ol gavman,” na long pasin i stret ol i save mekim wok long ol kot bilong graun na ol narapela samting gavman i putim bilong helpim ol man. (Rom 13:1; Jems 1:25) Olsem: Ol Witnes i save mekim wok long Sosaiti Was Taua—em wanpela bilong planti sosaiti bilong ol i stap long ol narapela narapela hap—bambai wok bilong ol i stret long ai bilong gavman na ol inap mekim gut wok bilong helpim ol man, na bikpela samting moa, ol inap helpim ol man long ol samting bilong spirit. Tasol ol Witnes i dediket long God—ol i no dediket long wanpela sosaiti—na dediket bilong ol long Jehova em bai stap oltaim oltaim.
2. Bilong wanem ol Witnes Bilong Jehova i amamas na pilim tru wok bilong Sosaiti Was Taua na ol narapela sosaiti olsem?
2 Ol Witnes Bilong Jehova em ol wokman i dediket long God, olsem na ol i gat wok long bihainim tok bilong Jisas, em i tok: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol.” (Matyu 28:19, 20) Dispela wok bai go inap long taim dispela pasin bilong graun i pinis, long wanem, Jisas i tok tu olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:3, 14) Long olgeta yia, ol haus faktori bilong Sosaiti Was Taua bilong prinim ol buk samting, na ol narapela sosaiti bilong ol olsem dispela, ol i save wokim planti milion Baibel, buk, buklet, na nius bilong ol Witnes Bilong Jehova bambai ol i ken mekim wok long ol dispela samting bilong autim tok long olgeta hap bilong graun. Olsem na ol dispela sosaiti i gat bikpela wok tru long helpim ol wokman bilong God i dediket pinis long em bambai ol i ken bihainim gut dediket bilong ol long i stap bilong ol.
3. Bipo ol Witnes Bilong Jehova i save kolim dispela tok “Sosaiti” bilong makim wanem samting?
3 Ating sampela bai tok, pasin bilong ol Witnes long toktok long Sosaiti Was Taua—em planti taim ol i save kolim olsem “Sosaiti” tasol—dispela i makim olsem ol i no ting em i samting bilong mekim wok long en tasol na bai wok bilong ol i stret long ai bilong gavman. Olsem wanem? Ol i tingim Sosaiti Was Taua yet i gat wok long stretim tok long olgeta samting bilong lotu bilong ol? Buk Jehovah’s Witnesses—Proclaimers of God’s Kingdom i kamapim klia dispela samting na i tok: “Taim Wastaua [Jun 1, 1938, tok Inglis] i toktok long ‘Sosaiti,’ dispela i no makim wanpela sosaiti ol i mekim wok long en na bai gavman i orait long wok bilong ol; dispela tok i makim lain Kristen God i bin makim, em ol yet i bin kamapim dispela Sosaiti Was Taua na ol i mekim wok long en.”a Olsem na dispela tok ‘Sosaiti’ i makim “wokboi i gat gutpela tingting.” (Matyu 24:45) Ol Witnes i tingim dispela samting taim ol i bin kolim dispela tok “Sosaiti.” Tasol Sosaiti Was Taua na “wokboi i gat gutpela tingting,” ol i no wankain. Ol Witnes yet i makim ol dairekta bilong Sosaiti Was Taua, tasol long rot bilong spirit holi Jehova i save makim ol Witnes em ol i insait long lain ‘gutpela wokboi.’
4. (a) Planti Witnes i save mekim wanem kain tok na bai ol man i no kisim kranki tok bilong ol? (b) Bilong wanem yumi mas bihainim stretpela tingting long pasin bilong kolim ol kain tok olsem?
4 Ol Witnes Bilong Jehova i save tingting gut taim ol i toktok wantaim ol man, nogut ol dispela man i kisim kranki tok bilong ol. Planti Witnes i no save tok, “Sosaiti i skulim ol man olsem,” ol i save kolim kain tok olsem, “Baibel i tok,” o ol i save tok, “long tingting bilong mi Baibel i skulim ol man olsem.” Long dispela rot ol i kamapim klia olsem olgeta wan wan Witnes i bin pasim tok long bel bilong ol olsem ol i bilip long ol tok bilong Baibel, na tu, ol i no givim tingting kranki long ol man olsem ol Witnes i bihainim tok bilong wanpela lain bilong lotu. Tasol pasin bilong kolim ol dispela tok olsem nau yumi kamapim, yumi no ken larim dispela i kamap olsem samting bilong tok pait long en. Yumi laik kolim stret na bai ol man i no Witnes i no kisim kranki dispela tok. Olsem na yumi mas bihainim stretpela tingting bilong Kristen long dispela samting. Baibel i tok yumi “no ken tok pait long ol liklik samting nating.” (2 Timoti 2:14, 15) Na Baibel i tok tu olsem: “Sapos yupela i mekim tok long narapela tok ples ol man i no save long en, olsem wanem bai ol i save as bilong dispela tok?”—1 Korin 14:9.
Spirit Bilong God i Mekim na Yumi No Gat Wok Long Planti Lo
5. Wanem insait bilong tok bilong 1 Korin 10:23?
5 Aposel Pol i tok: “ ‘Olgeta samting i orait long yumi mekim,’ tasol i no olgeta samting i save helpim yumi long i stap gut.” Na em i tok moa: “ ‘Olgeta samting i orait long yumi mekim,’ tasol i no olgeta samting i save mekim yumi i kamap strongpela Kristen.” (1 Korin 10:23) Pol i no laik tok, i orait long yumi mekim ol samting Baibel i tambuim, nogat. Bipo God i bin givim olsem 600 lo long lain Israel, na taim yumi tingim ol dispela planti lo yumi ken save, i no gat planti lo i bosim i stap bilong ol Kristen. Olsem na long planti samting ol wan wan Kristen i mas bihainim maus bilong bel. Man i dediket pinis long Jehova, spirit bilong God i save stiaim em, na dispela i mekim na em i stap fri. Kristen i pilim gut tok i tru na putim long bel bilong em, olsem na em i save bihainim maus bilong bel em Baibel i skulim pinis, na em i larim God i stiaim em long rot bilong spirit holi. Dispela i helpim Kristen long skelim gut wanem samting bai helpim em yet na ol narapela long “kamap strongpela Kristen” na helpim ol long “i stap gut.” Em i save, olgeta samting em i tingting pinis long mekim, dispela inap helpim em long pas gut wantaim dispela God em i bin dediket long em o pasim rot bilong em long mekim olsem.
6. Long ol miting Kristen, olsem wanem yumi inap kamapim klia olsem bel bilong yumi i pilim gut tok i tru?
6 Taim Witnes i bekim tok long miting, dispela i save kamapim long ples klia olsem bel bilong em i pilim gut tok i tru o nogat. Pastaim em i save kaunim o kolim tasol ol tok i stap long buk o nius. Tasol bihain, taim em i wok long kamap strong liklik, em bai kamapim ol tok na bilip bilong Baibel long tok bilong em yet. Long dispela rot em i kamapim klia olsem em i wok long kisim pasin bilong wokim gut tingting bilong em na em i no kolim nating ol tok ol narapela i bin mekim. Taim em i kamapim ol tok i stap long tingting bilong em na em i kolim long tok bilong em yet, na em i kamapim ol stretpela tok i tru long pasin i makim olsem bel bilong em i pilim tru, dispela bai givim amamas long em na i soim olsem em i bilip tru long dispela tok.—Saveman 12:10; skelim wantaim Rom 14:5b.
7. Ol wokman bilong Jehova ol i bin pasim tok long bel long bihainim wanem pasin?
7 Ol Witnes Bilong Jehova i laikim tumas God na ol narapela man, na dispela yet i kirapim ol long mekim ol samting. (Matyu 22:36-40) Tru, pasin olsem bilong Krais long laikim tru ol man, dispela i mekim na ol i pas gut wantaim olsem wanpela bikpela lain brata i stap long olgeta hap. (Kolosi 3:14; 1 Pita 5:9) Tasol olgeta wan wan i stap fri long tingim ol samting ol yet i laik mekim, na ol i bin pasim tok long bel bilong ol long autim gutnius bilong Kingdom bilong God long ol man, na no ken insait long ol samting bilong wok politik, na klia long blut, na abrusim sampela kain amamas, na bihainim ol lo bilong Baibel long i stap bilong ol. I no gat wanpela lain i bin subim ol long pasim dispela tok long bel bilong ol, nogat. Ol man i laik kamap Witnes ol yet i bin tingting long bihainim kain rot olsem long i stap bilong ol, taim ol i no kirap yet long dediket long God.
Lain Bilong Bosim Ol Kristen i Mas Skelim Wok Bilong Ol?
8 Baibel i kamapim klia olsem God i no save subim ol Kristen tru long mekim wok bilong em. Baibel i tok: “Sapos Spirit bilong Bikpela i stap long wanpela man, orait i no gat wanpela samting i pasim dispela man. Nogat. Em i stap fri.” (2 Korin 3:17) Tasol sapos olsem, orait olsem wanem na i mas i gat wanpela “wokboi i gat gutpela tingting” na wanpela lain insait long en i bosim wok bilong ol Kristen?—Matyu 24:45-47.
9, 10. (a) Lo bilong Baibel long wok bos, olsem wanem em i stret long kongrigesen Kristen? (b) Bilong bihainim dispela lo long wok bos, ol Kristen long taim bilong ol aposel ol i mas mekim wanem?
9 Bilong bekim dispela askim, yumi mas tingim wanpela lo bilong Baibel long wok bos. (1 Korin 11:3) Efesus 5:21-24 i tok Krais “em i het bilong sios,” olsem kongrigesen, na dispela kongrigesen “i stap aninit” long em. Ol Witnes Bilong Jehova i bilip olsem dispela lain wokboi i gat gutpela tingting em ol brata spirit bilong Jisas. (Hibru 2:10-13) Krais i bin makim dispela lain wokboi i gat gutpela tingting long givim kaikai bilong spirit long lain bilong God “long taim bikman i makim.” Nau long taim bilong las de, Krais i bin makim dispela wokboi bilong “bosim olgeta samting bilong en.” Olsem na olgeta man i tok ol i Kristen, ol i mas tingim namba dispela wokboi i holim na ol i mas daun long en.
10 Wok bos em i bilong helpim lain bilong God long holimpas pasin wanbel na ol “i mas bihainim stret ol gutpela pasin bilong lotu,” olsem olgeta samting i mas wok stret. (1 Korin 14:40) Bilong mekim olsem long taim bilong ol aposel, sampela Kristen God i bin makim, em ol i bilong lain wokboi i gat gutpela tingting, ol i kisim wok olsem mausman bilong olgeta Kristen insait long dispela lain wokboi. Ol samting i kamap bihain i kamapim klia olsem Jehova i amamas long wok dispela lain i mekim long taim bilong ol aposel long bosim wok bilong ol Kristen, na em i mekim wok bilong ol i kamap gutpela. Ol Kristen long taim bilong ol aposel ol i amamas long i stap aninit long dispela pasin. Yes, ol i tenkyu tru long ol gutpela samting i kamap long dispela pasin bilong bosim lotu Kristen.—Aposel 15:1-32.
11. Yumi mas ting olsem wanem long Lain Bilong Bosim Ol Witnes long nau?
11 Dispela kain pasin i stap yet na yumi inap lukim ol gutpela samting bilong en. Nau long dispela taim, Lain Bilong Bosim Ol Witnes Bilong Jehova i gat 10-pela Kristen God i bin makim, em ol i stap insait long en, na olgeta wantaim i bin mekim wok Kristen inap planti planti yia. Long ol samting bilong spirit ol i save soim rot long ol Witnes Bilong Jehova, wankain olsem lain bilong bosim ol Kristen bilong pastaim ol i bin mekim. (Aposel 16:4) Olsem ol dispela Kristen bilong pastaim, ol Witnes i amamas long wetim ol brata bilong Lain Bilong Bosim Ol Witnes i givim ol tok long ol em Baibel i as bilong en, bilong soim rot long ol na stiaim ol long ol samting bilong lotu. Tru, olgeta wan wan bilong dispela lain Bilong Bosim Ol Witnes ol i wokboi bilong Jehova na Krais, wankain olsem ol wanlain Kristen bilong ol, tasol Baibel i tokim yumi: “Ol lida bilong yupela ol i laik helpim yupela, na ol i save was long yupela oltaim. Na bihain bai ol i mas tokim God long olgeta wok ol i bin mekim. Olsem na yupela i mas bihainim tok bilong ol na i stap aninit long ol. Sapos yupela i mekim olsem, orait ol bai i amamas na mekim wok bilong ol, na ol bai i no inap bel hevi. Sapos ol i bel hevi long lukautim yupela, dispela bai i no helpim yupela.”—Hibru 13:17.
12. Husat bai skelim wok bilong olgeta wan wan Kristen?
12 Orait yumi laik save, dispela namba bilong bosim wok em Baibel i bin makim bilong Lain Bilong Bosim Ol Witnes, em i makim olsem dispela lain yet bai skelim wok bilong olgeta wan wan Witnes Bilong Jehova? Pol i no bin tok olsem. Em i tokim ol Kristen long Rom: “Yu, bilong wanem yu skelim pasin bilong brata bilong yu na tok nogut long em? Na yu, bilong wanem yu tok bilas long brata bilong yu? Yupela i save, bai yumi olgeta i sanap long kot bilong God. Yumi olgeta wan wan bai yumi mas tokim God long as bilong olgeta pasin yumi bin mekim.”—Rom 14:10-12.
13. Bilong wanem ol Witnes i save putim ripot bilong wok autim tok ol i mekim?
13 Tasol olgeta wan wan Witnes i mas putim ripot bilong wok autim tok ol i mekim, laka? Em i stret, tasol wanpela buk bilong ol Witnes i kamapim as bilong dispela samting na i tok: “Lain bilong Krais Jisas long bipo ol i amamas long harim ripot bilong wok autim tok. (Mak 6:30) Dispela wok i bin i go bikpela, na ol i raitim na bungim ripot bilong dispela wok, na ol ekspiriens bilong ol man i autim gutpela tok. . . . (Ap. 2:5-11, 41, 47; 6:7; 1:15; 4:4) . . . Ating ol dispela gutpela wokman Kristen i bin amamas long harim ripot long wok i go bikpela! . . . Na long nau tu oganaisesen bilong Jehova i gat ol ripot bilong wok autim tok em yumi mekim bilong truim tok bilong Matyu 24:14.”
14 Lain Bilong Bosim Ol Witnes em i wanpela gutpela samting God i bin givim long yumi na ol i stap olsem gutpela piksa bilong ol man i bilip, na ol inap tru long yumi ken bihainim pasin bilong ol. (Filipai 3:17; Hibru 13:7) Ol i save stap gut long Krais na bihainim em olsem nambawan piksa bilong ol, olsem na ol inap mekim wankain tok olsem Pol i bin mekim, em i tok: “Mi no tok olsem mipela i bosim bilip bilong yupela. Nogat. Long bilip yupela i sanap strong pinis. Mipela i save wok wantaim bilong kamapim amamas bilong yupela.” (2 Korin 1:24) Lain Bilong Bosim Ol Witnes ol i save lukim sampela kain pasin samting i kamap na nau ol i tokaut olsem sapos yumi bihainim ol tok bilong Baibel dispela bai helpim yumi, na ol i tokim yumi long olsem wanem yumi ken bihainim ol lo bilong Baibel, na ol i givim toksave long yumi long ol samting i stap hait na ol inap bagarapim yumi, na ol i givim ol gutpela tok long ol wanwok Kristen bilong strongim bel bilong ol. Long dispela rot ol i mekim gut wok Kristen bilong ol long lukautim lain bilong God, na helpim ol long i stap amamas, na strongim bilip bilong ol bambai ol inap sanap strong.—1 Korin 4:1, 2; Taitus 1:7-9.
14, 15. (a) Olsem wanem 2 Korin 1:24 i stret long Lain Bilong Bosim Ol Witnes? (b) Olgeta wan wan Kristen yet i mas skelim wanem samting taim ol i pasim tok long mekim wanpela samting?
15 Sapos wanpela Witnes i mas skelim sampela samting em i mas mekim na em i tingim sampela tok bilong Baibel em Lain Bilong Bosim Ol Witnes i bin mekim na em i bihainim dispela tok, em i mekim long laik bilong em yet, long wanem, em yet i bin stadi long Baibel na dispela i mekim na em i bilip tru olsem dispela em i stretpela rot bilong bihainim. Baibel i stiaim olgeta wan wan Witnes long bihainim ol tok bilong Baibel em Lain Bilong Bosim Ol Witnes i givim long ol, long wanem, ol i save, ol samting ol i tingting pinis long mekim, dispela inap helpim ol long pas gut wantaim dispela God ol i bin dediket long em o pasim rot bilong ol long mekim olsem.—1 Tesalonaika 2:13.
Ol Sumatin na Soldia
16. Tru, ol man yet inap makim wanem pasin ol i laik bihainim, olsem na bilong wanem ol i rausim sampela Witnes long kongrigesen?
16 Tasol sapos ol man yet inap makim wanem pasin ol i laik bihainim, bilong wanem ol i rausim sampela Witnes Bilong Jehova long kongrigesen? I no gat wanpela man i makim long laik bilong em yet long wanem kain rong ol i rausim man long kongrigesen, nogat. Baibel i tok ol i mas mekim olsem taim wanpela insait long kongrigesen i mekim bikpela rong na em i no tanim bel—olsem ol rong em Namba Wan Korin sapta 5 i stori long en. Tru, ol inap rausim wanpela Kristen long kongrigesen, long wanem, em i bin mekim pasin pamuk, tasol ol i mekim olsem taim dispela Kristen i sakim ol tok ol wasman i gat pasin sori i givim long em bilong helpim em. Na i no ol Witnes Bilong Jehova tasol ol i save bihainim dispela pasin Kristen long rausim man i mekim rong. Wanpela buk (The Encyclopedia of Religion) i tok: “Sapos sampela man bilong wanpela lain i no laik bihainim ol lo bilong dispela lain na pasin bilong ol inap bagarapim ol manmeri bilong dispela lain, orait i stret dispela lain i ken mekim ol samting bilong lukautim ol narapela manmeri insait long dispela lain. Long ol lain bilong lotu i gat wanpela samting i strongim dispela pasin—planti ol i bilip olsem ol tambu ol i putim long man [olsem rausim em long lotu] i save mekim na em i no stap gut long ai bilong God.”
17, 18. Bilong save olsem i stret long rausim man, yumi ken mekim wanem tok piksa?
17 Ol Witnes Bilong Jehova em ol sumatin bilong Baibel. (Josua 1:8; Song 1:2; Aposel 17:11) Lain Bilong Bosim Ol Witnes i putim wanpela program bilong skulim ol man long Baibel, na yumi ken tok ol samting bilong dispela skul i kain olsem program em lain bilong edukesen i putim long ol skul. Lain bilong edukesen i no as bilong ol samting em skul i lainim ol sumatin long en, tasol dispela lain yet i save wokim dispela program, na makim wanem kain pasin ol skul i mas bihainim bilong skulim ol sumatin, na kolim ol narapela samting ol skul i mas bihainim. Sapos wanpela sumatin i bikhet na i no laik bihainim lo bilong dispela skul, na pasin bilong em i givim hatwok long ol narapela sumatin, o em i bagarapim nem bilong skul, orait lain bilong edukesen inap rausim em. I stret long dispela lain i ken mekim olsem bilong helpim ol narapela sumatin long skul.
18 Ol Witnes Bilong Jehova ol i olsem soldia bilong Krais Jisas, na Baibel i tok ol i mas mekim gutpela pait bilong bilip. (1 Timoti 6:12, NW; 2 Timoti 2:3) Tasol sapos planti taim wanpela Kristen i mekim sampela pasin i no stret long wanpela soldia Kristen, orait God i no ken amamas long em. Soldia Kristen i stap fri long makim wanem rot em yet i laik bihainim, olsem na em inap mekim samting em i laikim, tasol em i mas karim hevi bilong dispela pasin em yet i bin tingting long mekim. Pol i tok: “Yu save long pasin bilong ol soldia. Taim ol i mekim wok soldia, ol i no save holim ol arapela kain wok wantaim. Nogat. Ol i save mekim gutpela wok soldia tasol, bai ofisa bilong ol i ken laikim wok bilong ol. Na man i ran long resis, em i mas bihainim lo bilong resis. Sapos nogat, em bai i no inap kisim prais bilong man i win.” (2 Timoti 2:4, 5) Lain Bilong Bosim Ol Witnes, na ol narapela strongpela Kristen tu, ol i save bihainim laik bilong Gopas bilong ol, em Krais Jisas, na ol i save bihainim “lo bilong resis” bambai ol inap winim prais, em laip i stap oltaim oltaim.—Jon 17:3; KTH 2:10.
19. Yumi skelim pinis ol samting bilong dediket Kristen, olsem na yumi inap save tru long wanem samting?
19 Ol samting i kamapim long ples klia olsem ol Witnes Bilong Jehova em ol wokman bilong God—ol i no wokboi bilong ol man. Ol i Kristen i dediket pinis na Krais i bin mekim ol i kamap fri, olsem na ol i larim spirit bilong God na Tok bilong em i bosim i stap bilong ol, na long pasin wanbel ol i save wok wantaim ol brata bilong ol insait long kongrigesen bilong God. (Song 133:1) Ol dispela samting ol i mekim i stap ples klia na dispela inap helpim ol man na bai ol i no gat tupela tingting moa long as bilong dispela strong ol Witnes i holim. Ol inap mekim singsing wantaim man bilong raitim Song, olsem: “God tasol i save was long mi na banisim mi. Olsem na mi save bilip long em. Bikpela i save helpim mi, olsem na mi amamas moa long em, na mi singim ol song bilong litimapim nem bilong em.”—Song 28:7.
[Futnot]
a Sosaiti Wastaua bilong Nu Yok i wokim long 1993.
Bai Yu Bekim Olsem Wanem?
◻ Sosaiti Was Taua na ol kain sosaiti olsem em gavman i orait long ol, ol i save helpim ol Witnes Bilong Jehova olsem wanem?
◻ Lain Bilong Bosim Ol Witnes Bilong Jehova i save helpim ol Kristen olsem wanem?
◻ Bilong wanem ol Witnes i save putim ripot bilong wok autim tok ol i mekim?
◻ Wanem taim i stret long rausim wanpela Kristen i dediket pinis?
8. I gat wanem askim yumi mas klia gut long bekim bilong en?
[Piksa long pes 19]
Wok bilong lain bilong bosim ol Kristen long taim bilong ol aposel i helpim ol long i stap wanbel long bilip
[Piksa long pes 23]
Krais i mekim yumi i stap fri, na long olgeta hap ol Witnes Bilong Jehova i amamas long dispela samting