Wanem Samting Bai Painim Yu Long Bihain?

SAPOS God i Gat Olgeta Strong em i save long olgeta samting, ol samting i bin kamap bipo, long nau, na long bihain, orait ating olgeta samting i mas kamap stret olsem God i save em bai kamap, a? Sapos God i save pinis na makim pinis wanem wanem rot olgeta wan wan man i mas bihainim na wanem samting tru i mas painim ol long bihain, yu ting yumi stap fri long tingim wanem rot yumi laik bihainim na makim wanem samting bai painim yumi long bihain? Ating nogat, a?

Inap planti handet yia ol man i bin tok pait long ol dispela askim. Dispela tok pait i bin brukim ol bikpela lotu na i wok yet long mekim. Olsem wanem? Pasin bilong God long save long wanem samting bai kamap bihain, dispela i stret wantaim pasin bilong ol man em ol i stap fri long tingim wanem rot ol i laik bihainim? Bai yumi kisim we ol bekim?

Planti milion manmeri long olgeta hap bilong graun ol bai wanbel long tok olsem, God i bin givim tok long yumi long rot bilong buk bilong em, em ol mausman bilong em, olsem ol profet, i bin kamapim. Yumi ken tingim buk Koran, em i kolim ol tok bilong dispela buk olsem God i as bilong en: Taurāh (Tora, Lo, olsem ol faipela buk bilong Moses), Zabūr (ol Song), na Injīl (Gutnius, Ol Skripsa Grik, olsem “Nupela Testamen”), na sampela tok moa God i bin givim long ol profet bilong Israel.

Ol Skripsa Grik i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi.” (2 Timoti 3:​16) Olsem na ol tok bilong givim save o bilong soim rot long yumi em i mas kam long God yet. Bai yumi bihainim gutpela tingting sapos yumi skelim ol tok ol profet bilong God long bipo tru i bin raitim, a? Ol i tok wanem long i stap bilong yumi bihain?

Baibel i Kolim Ol Samting Bai Kamap

Ol man i kaunim buk bilong God, em Baibel, ol i save i gat planti handet tok profet long en. Ol samting i bin kamap bipo, olsem Babilon i bagarap, na ol i wokim gen Jerusalem (500 i go inap 400 B.C.E. samting), na kantri bilong Midia na Persia na kantri Grik i kamap strong na bihain strong bilong ol king bilong ol i pinis, Baibel i bin tok profet long ol dispela samting na i kolim ol liklik liklik samting bilong en. (Aisaia 13:​17-​19; 44:⁠24–​45:1; Daniel 8:​1-7, 20-​22) Ol tok profet olsem i bin kamap tru, na dispela em wanpela bikpela as bilong makim olsem Baibel em i Tok Bilong God, long wanem, God tasol inap makim na save long ol samting bai kamap bihain. Olsem na tru tumas Baibel i kolim ol samting i no kamap yet.

God yet i tok: “Mi wanpela tasol mi God, . . . na i no gat narapela god olsem mi i stap. Taim wanpela samting i no kamap yet, mi save tokaut long dispela samting bai i kamap na bai i go pinis olsem wanem. Bipo yet mi bin tok long ol samting bai i kamap, na bihain ol dispela samting i kamap tru olsem mi bin tok. Sapos mi laik mekim wanpela samting, orait mi save mekim tasol. Na i no gat wanpela samting inap pasim mi long mekim dispela samting. . . . Ol samting mi makim pinis bilong mekim, em bai mi mekim.” (Aisaia 46:​9-​11; 55:​10, 11) God i tokim ol profet bilong em bilong bipo olsem nem bilong em Jehova, na insait bilong en, “Em i Mekim i Kamap.”a (Stat 12:​7, 8; Kisim Bek 3:​13-​15; Song 83:​18, NW) God yet i kamapim long ples klia olsem em i Man bilong truim ol tok bilong em, na Man bilong mekim ol samting i kamap olsem em i makim pinis.

God i save long wanem samting bai kamap bihain, na em i mekim wok long dispela save bilong kamapim laik bilong em. Planti taim em i bin mekim wok long dispela save long tokim ol man nogut olsem bagarap bai painim ol na ol wokboi bilong em inap wetim God i kisim bek ol. Tasol olsem wanem? God i mekim wok long dispela save na bai em i ken save long olgeta samting bai kamap bihain? I gat sampela tok long Baibel i makim olsem i gat sampela samting bilong bihain God i no laik save long en pastaim?

God i Save Long Olgeta Samting Bai Kamap?

Ol man i gat dispela bilip ol i ting olsem, sapos God i gat strong bilong makim na save long ol samting bai kamap bihain, orait em i mas save long olgeta samting bai kamap, na ol samting olgeta wan wan man bai mekim bihain. Tasol olsem wanem? Dispela tingting bilong ol i stret? Tok God i kamapim long Baibel i makim olsem i no stret.

Olsem: Baibel i tok, “God i traim Abraham”​—⁠em i tokim em long kilim i dai pikinini bilong em, Aisak, olsem ofa em paia i kukim olgeta. Taim Abraham i kisim naip na i laik kilim Aisak olsem ofa, God i pasim em long mekim na i tok: “Yu gat dispela wanpela pikinini tasol, na yu no pasim em. Nogat. Yu redi tasol long givim em long God. Olsem na [“nau,” NW] mi save, yu man bilong aninit long God.” (Stat 22:​1-​12) Yu ting God bai mekim dispela tok, ‘nau mi save,’ sapos em i save pastaim olsem Abraham bai bihainim tok na mekim dispela samting? Na yu ting dispela traim bai i stret tru?

Na tu, ol profet bilong bipo ol i tokaut olsem planti taim God i tok em i “sori tumas” long samting em i bin mekim o em i tingting long mekim. Olsem: God i tok em i “sori tumas [tok Hibru na·chamʹ] long em i bin mekim Sol i kamap king bilong Israel.” (1 Samuel 15:​11, 35; skelim wantaim Jeremaia 18:​7-​10; Jona 3:​10.) God i gutpela olgeta, olsem na ol dispela ves i no makim God i bin popaia long makim Sol long kamap namba wan king bilong Israel, nogat. Ol dispela ves i makim olsem God i sori tumas olsem Sol i no stap gut long Em na i sakim tok. Sapos God i bin save pastaim long ol samting Sol bai mekim, ating i no stret em i tok em i sori tumas, a?

Wanpela tok i wankain olsem dispela em i stap long hap bilong Baibel i stori long taim bilong Noa na i tok: “Bikpela i ting i gutpela sapos em i no bin wokim ol manmeri. Na em i bel hevi tru. Orait na em i tok, ‘Bai mi pinisim olgeta manmeri mi bin wokim . . . Mi ting i gutpela sapos mi no bin wokim ol.’ ” (Stat 6:​6, 7) Dispela tok tu i makim olsem God i no makim pinis ol samting ol man bai mekim. God i sori tumas na i ting i gutpela em i no bin wokim ol manmeri, na em i bel hevi tu, long wanem, pasin nogut bilong ol man i kamap bikpela tru​—⁠tasol i no olsem em i popaia long wokim ol man, nogat. Man bilong wokim yumi em i sori tumas olsem nau em i mas bagarapim ol manmeri, tasol Noa na famili bilong em nogat. God i tok: “Mi no save amamas long taim ol man bilong mekim sin, ol i dai.”​—⁠Esekiel 33:11; skelim wantaim Lo 32:​4, 5.

Orait, taim Adam i no mekim yet sin, na ol hevi bilong dispela sin i no painim yet ol man, yu ting God i save pinis na makim pinis dispela samting bai kamap? Yumi tingim ol samting yumi bin stori long en na yumi ken tok nogat. Na tu, sapos God i save pastaim long ol dispela samting, bai em i kamap as bilong sin taim em i wokim man, na bai em yet i as bilong ol pasin nogut na hevi i painim ol man. Tasol yumi save, dispela i no stret wantaim ol tok God i kamapim long Baibel i stori long em yet. Em i God bilong sori na God bilong mekim stretpela kot; em i nolaik tru long pasin nogut.​—⁠Song 33:5; Sindaun 15:9; 1 Jon 4:⁠8.

Tupela Samting Inap Painim Man

Baibel i no tok God i makim pinis ol samting i mas painim yumi wan wan. Samting Baibel i tokaut long en i olsem: God i tok pinis i gat tupela samting tasol inap painim man long bihain. Na God i larim olgeta man wan wan i tingim wanem rot ol yet i laik bihainim. Long bipo tru profet Moses i tokim ol Israel: “I gat rot bilong i stap gut na rot bilong i dai. . . . Orait nau yupela i mas makim wanem rot yupela i laik bihainim. . . . Tasol mi laikim yupela i mas bihainim rot bilong i stap gut. Yupela i mas laikim tru God, Bikpela bilong yumi, na yupela i mas harim tok bilong en na bel tru long em oltaim. Olsem na bai yupela na ol lain pikinini bilong yupela inap i stap longpela taim.” (Lo 30:​19, 20) Jisas, em profet bilong God, em i toksave olsem: “Yupela i mas i go insait long liklik dua. Dua i go long ples bilong lus, em i bikpela, na rot i go long dispela ples em i op tumas na em i isi long bihainim. Na planti manmeri i save bihainim dispela rot. Tasol dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.” (Matyu 7:​13, 14) I gat tupela rot, olsem tupela samting inap painim yumi. Ol samting yumi yet i mekim, dispela i makim samting bai painim yumi bihain. Man i bihainim tok bilong God, em bai kisim laip; man i sakim tok bilong em, em bai dai.​—⁠Rom 6:​23.

God “i tok strong long olgeta man long olgeta ples i mas tanim bel. Em i makim pinis wanpela de bilong em bai i kotim ol manmeri. Na long stretpela pasin bilong en, em bai i skelim pasin bilong olgeta manmeri bilong graun.” (Aposel 17:​30, 31) Long taim bilong Noa klostu olgeta manmeri long laik bilong ol yet ol i sakim tok bilong God na kisim bagarap, na long nau tu, klostu olgeta manmeri i no bihainim ol lo bilong God. Tasol God i no makim pinis husat bai bagarap na husat bai stap laip. Baibel i tok, “em i no laik bai wanpela man i lus. Em i laik bai olgeta man i mas tanim bel.” (2 Pita 3:⁠9) Ol man i man nogut tru, ol tu inap tanim bel, na kamap man bilong bihainim tok, na senisim pasin bilong ol inap long God i ken orait long ol.​—⁠Aisaia 1:​18-​20; 55:​6, 7; Esekiel 33:​14-​16; Rom 2:​4-8.

God i tok promis pinis olsem ol man i bihainim tok, ol inap kisim laip oltaim long Paradais i gat bel isi i stap long en, na i no gat pasin nogut, na pait na bagarapim man, na i no gat hangre moa, o pen na hevi, na sik, na dai. (Song 37:​9-​11; 46:9; Aisaia 2:4; 11:​6-9; 25:​6-8; 35:​5, 6; KTH 21:⁠4) Ol man i dai pinis ol bai kirap bek na ol bai gat rot long mekim wok bilong God.​—⁠Daniel 12:2; Jon 5:​28, 29.

Man bilong raitim Song i tok: “Tingting long man i no gat asua long wanpela samting, na lukim stretpela man. Man i save sindaun isi wantaim ol arapela manmeri, lain bilong en bai i stap oltaim. Tasol Bikpela i save bagarapim tru ol man bilong mekim sin. Ol lain tumbuna pikinini bilong ol bai i lus olgeta.” (Song 37:​37, 38) Wanem samting bai painim yu long bihain? Em samting bilong yu yet. Lain i wokim dispela nius bai amamas long helpim yu long kisim sampela save moa bambai yu inap kisim gutpela sindaun long bihain na i stap amamas.

[Futnot]

[Rait long pes 6]

God i save long ol samting bai kamap bihain na em i mekim wok long dispela strong bilong kamapim laik bilong em

[Rait long pes 8]

God “i no laik bai wanpela man i lus. Em i laik bai olgeta man i mas tanim bel.” 2 Pita 3:9

[Piksa long pes 7]

Sapos God i save pastaim olsem Abraham bai orait long kilim i dai pikinini bilong em olsem ofa, yu ting bai dispela traim i olsem wanpela traim tru?