Yu Tingim Yet?
Olsem wanem? Yu pilim olsem ol tok bilong ol nupela Wastaua i bin helpim gut yu? Sapos olsem, orait yu laik traim ol save yu bin kisim long en, yu tingim yet o nogat?
◻ “De bilong Bikpela” na “de bilong Jehova” i narapela narapela olsem wanem? (KTH 1:10; Joel 2:11, NW)
Long “de bilong Bikpela” i gat truim bilong 16 samting olsem driman, em Kamapim Tok Hait Sapta 1 i go Sapta 22 i toktok long en na ol samting bai kamap olsem Jisas i bin tok profet long en bilong bekim askim bilong ol aposel, em ol i laik save long mak bilong makim olsem em i kam i stap pinis. Orait nau bikpela samting tru bilong de bilong Bikpela em bai kamap, em bikpela de bilong Jehova bai kamap bilong givim strafe long ol lain nogut bilong Satan ol i stap long graun. (Matyu 24:3-14; Luk 21:11)—12/15, pes 11.
◻ Wanem sampela gutpela samting tru bilong Baibel Makarios?
Long Baibel em Makarios i bin tanim, nem Jehova i kamap olsem 3,500 taim. Wanpela saveman bilong ol buk lotu bilong Rasia i tok: “Baibel bilong em i bihainim gut tok bilong Baibel Hibru, na tok bilong en i no paul liklik, na tok i stret tru wantaim ol samting em i stori long en.”—12/15, pes 27.
◻ Dispela “tok tru” em Jisas i tok bai i mekim yumi kamap fri, em wanem samting? (Jon 8:32)
Dispela “tok tru” Jisas i stori long en, em i makim ol tok i givim save long yumi long laik bilong God, na ol narapela tok tu God i bin kirapim ol man long raitim na i stap long Baibel.—1/1, pes 3.
◻ Husat ol i olsem Jehu na Jonadap long nau?
Jehu i makim Krais Jisas, na i gat wanpela lain long graun i olsem maus bilong em, em “lain Israel tru bilong God,” olsem ol Kristen God i bin makim. (Galesia 6:16; KTH 12:17) Olsem Jonadap i bin kam bilong bungim Jehu, olsem tasol “planti manmeri” bilong olgeta lain ol i kam bilong helpim ol mausman bilong Jisas long graun. (KTH 7:9, 10; 2 King 10:15)—1/1, pes 13.
◻ Wanem insait bilong dispela tok ‘wokabaut wantaim God’? (Stat 5:24; 6:9)
Dispela tok i makim olsem, ol kain man olsem Enok na Noa ol i bihainim pasin i kamapim long ples klia olsem ol i bilip strong long God. Ol i mekim ol samting Jehova i tokim ol long mekim, na ol samting ol i mekim long i stap bilong ol i stret wantaim ol save ol i kisim long em taim ol i skelim ol pasin em i bin mekim long ol man.—1/15, pes 13.
◻ Bilong wanem man i mas stretim gut ol samting, nogut dai i painim em?
Taim man i stretim ol samting olsem, i olsem em i givim wanpela presen long famili bilong em. Em i soim olsem yu laikim tru ol. Dispela samting yu mekim bai kamapim klia olsem yu gat laik long ‘lukautim ol wanblut tru bilong yu’ maski yu no stap moa wantaim ol. (1 Timoti 5:8)—1/15, pes 22.
◻ “Olpela kontrak” i kamapim wanem samting? (2 Korin 3:14)
Em i gat sampela samting long en i olsem piksa bilong nupela kontrak, na i kolim ol ofa ol Israel i mas mekim long olgeta taim, na dispela i kamapim long ples klia olsem ol man i mas i gat wanpela samting bilong kisim bek ol long sin na indai. Em i olsem “waspapa bilong [ol], bilong bringim [ol] i kam long Krais.” (Galesia 3:24)—2/1, pes 14.
◻ Olsem wanem yumi ken tok, nupela kontrak i bilong stap oltaim? (Hibru 13:20)
Namba wan samting i olsem: Nupela kontrak i no olsem kontrak bilong Lo—i no gat narapela kontrak bai senisim. Namba 2 samting i olsem: Ol samting i kamap long wok bilong nupela kontrak ol bai stap oltaim. Na namba 3 samting i olsem: Ol arapela sipsip bai wok yet long kisim ol gutpela samting long wok bilong nupela kontrak long Taim Bilong Wan Tausen Yia Bilong Krais i Stap King.—2/1, pes 22.
◻ Taim man i tok tenkyu, wanem gutpela samting i save kamap?
Em i pilim tru gutpela samting ol narapela i bin mekim bilong helpim em na em i tok tenkyu na dispela i helpim em long stap amamas na bel isi. (Skelim wantaim Sindaun 15:13, 15.) Pasin bilong tenkyu long narapela em i save helpim man na em i no bel nogut na kros na tingting nogut long narapela.—2/15, pes 4.
◻ Ol man spirit holi bilong God i bin mekim ol i kamap pikinini bilong em, ol i go insait long wanem kontrak?
Long Nupela kontrak. Dispela kontrak em Jehova i mekim wantaim ol Israel bilong spirit, na em i kontrak bilong Kingdom, na Jisas i bin mekim dispela kontrak wantaim ol disaipel bilong em. (Luk 22:20, 28-30)—2/15, pes 16.
◻ Wanem tripela bikpela bung ol Israel i mas i go long en?
Ol Bikpela De Bilong Bret i No Gat Yis, dispela i kamap bihain stret long Pasova bilong Nisan 14; Bikpela De Bilong Amamas Long Kisim Kaikai Long Gaden i kamap long de namba 50 bihain long Nisan 16; Ol Bikpela De Bilong i Stap Long Haus Win i save kamap long namba 7 mun. (Lo 16:1-15)—3/1, pes 8, 9.
◻ Bilong wanem em i gutpela samting long go long ol bung Kristen?
Jisas i tok: “Sapos tupela o tripela man i kam bung long nem bilong mi, orait mi yet mi stap namel long ol.” (Matyu 18:20; 28:20) Wanpela bikpela rot bilong givim kaikai bilong spirit long yumi em long rot bilong ol miting bilong kongrigesen na ol bikpela bung. (Matyu 24:45)—3/1, pes 14.
◻ Dispela nem Nimrot i kamap olsem wanem?
Sampela saveman i wanbel long ting olsem taim mama i karim Nimrot, em i no kisim dispela nem Nimrot. Ol i ting olsem, bihain, taim em i kamapim pasin bilong em olsem em i man bilong bikhet, em nau, ol man i kirap na givim dispela nem long em.—3/15, pes 25.
◻ Olsem wanem famili i bikpela samting long ol man?
Famili em i bikpela samting long ol man. Ol samting i bin kamap bipo i kamapim klia olsem taim ol famili i wok long bagarap, strong bilong ol lain na kantri i wok long pinis, olsem na famili i mekim na ol lain manmeri i stap strong na ol pikinini na ol lain i kamap bihain ol inap i stap gut.—4/1, pes 6.
◻ Wanem tripela samting i makim olsem Baibel em i tok bilong God?
(1) Em i stret wantaim ol tok bilong saiens, (2) ol lo bilong en i no bilong helpim ol man bilong bipo tasol—em i bilong helpim ol man bilong nau tu, (3) i gat sampela tok profet bilong en i bin kamap tru, na ol samting i bin kamap bipo i kamapim klia dispela samting.—4/1, pes 15.