Yupela Bai “Mekim Wok Bilong Mi Olsem Ol Pris”

1, 2. God i mas mekim wanem bilong lukautim pikinini bilong meri? Bilong wanem?

NAMBA 1 tok profet long Baibel i bikpela samting tru, long wanem, em i stori long hau Jehova bai kamapim samting em i tingting pinis long mekim. Taim God i mekim tok promis long gaden Iden, em i tok: “Mi bai kamapim pasin birua namel long yu [Satan] na meri, na namel long pikinini bilong yu na pikinini bilong meri.” Dispela pasin birua bai bikpela inap long wanem mak? Jehova i tok: “Em [pikinini bilong meri] bai krungutim het bilong yu [Satan], na yu bai kaikaim lek bilong em.” (Stt. 3:15, NW) Bikpela pasin birua bai stap namel long snek na meri, olsem na Satan bai wok strong tru long bagarapim na pinisim pikinini bilong meri.

² Man bilong raitim song i tingim ol manmeri bilong God, olsem na em i beten na tokim God olsem: “Lukim. Ol birua bilong yu i kirapim pait. Ol man i no laikim yu ol i bikhet long yu. Ol i hait na pasim tok bilong mekim nogut long ol manmeri bilong yu. Yu save lukautim gut ol dispela manmeri, tasol ol birua i kibung bilong bagarapim ol. Ol i tok olsem, ‘Goan, yumi pinisim tru ol Israel.’” (Sng. 83:2-4) God i mas lukautim gut lain famili we pikinini bilong meri bai kamap long en na bai i no gat wanpela samting i ken bagarapim na pinisim dispela lain. Olsem na Jehova i mekim sampela moa kontrak we bai opim rot long em inap kamapim samting em i tingting pinis long mekim.

KONTRAK I LUKAUTIM PIKININI

3, 4. (a) God i mekim kontrak bilong Lo long wanem taim? (b) Lain Israel i wanbel long mekim wanem? (c) Olsem wanem kontrak bilong Lo i lukautim lain Israel?

³ Taim lain tumbuna pikinini bilong Abraham, Aisak, na Jekop i kamap planti na namba bilong ol i winim sampela milion, Jehova i mekim ol i kamap wanpela kantri, em kantri bilong lain Israel bilong bipo. Long rot bilong Moses, Jehova i givim Lo long lain Israel na long dispela rot em i mekim kontrak wantaim ol, na ol i wanbel long bihainim dispela kontrak. Baibel i tok: “[Moses] i kisim buk bilong kontrak, ol tok bilong Bikpela i stap long en, na em i ritim long ol manmeri. Ol i harim na ol i tok, ‘Mipela bai bihainim stret olgeta tok bilong Bikpela.’ Orait Moses i kisim dispela blut [bilong bulmakau ol i kilim bilong mekim ofa] i stap long ol dis na tromoi i go antap long ol manmeri. Na em i tok, ‘Dispela blut i strongim kontrak Bikpela i mekim wantaim yupela. Na ol dispela lo i as bilong kontrak.’”—Kis. 24:3-8.

⁴ God i mekim kontrak bilong Lo long maunten Sainai long 1513 B.C.E. Long rot bilong dispela kontrak, God i makim lain Israel bilong bipo long kamap lain manmeri bilong em yet. Long dispela taim, Jehova i kamap ‘king bilong ol na givim ol lo long ol na bosim ol.’ (Ais. 33:22) Histori bilong lain Israel i skulim yumi long ol gutpela samting inap kamap sapos yumi bihainim ol stretpela lo bilong God, na ol hevi inap kamap sapos yumi sakim ol dispela lo. Lo i tambuim pasin bilong maritim ol haiden na pasin bilong lotuim ol god giaman, olsem na Lo i lukautim gut lain famili bilong Abraham na bai ol i no ken bihainim ol pasin nogut.—Kis. 20:4-6; 34:12-16.

5. (a) Kontrak bilong Lo i opim rot long lain Israel inap kisim wanem gutpela blesing? (b) Bilong wanem God i sakim lain Israel?

⁵ Kontrak bilong Lo i opim rot long wanpela lain inap mekim wok pris, na dispela i olsem piksa bilong bikpela samting moa bai kamap long bihain. (Hib. 7:11; 10:1) Long rot bilong dispela kontrak, lain Israel i kisim gutpela blesing tru long ol inap ‘mekim wok olsem ol pris’ sapos ol i bihainim gut ol lo bilong Jehova. (Ritim Kisim Bek 19:5, 6.) Tasol lain Israel i no bihainim tok bilong dispela kontrak. Mesaia em i nambawan hap bilong pikinini bilong Abraham, tasol taim em i kamap long lain Israel, ol i sakim em na ol i no amamas long em. Olsem na God i sakim dispela lain.

6. Lo i bin inapim wanem wok?

⁶ Lain Israel i no stap gut long Jehova, olsem na i no gat rot long olgeta long lain bilong ol inap mekim wok pris. Tasol dispela i no makim olsem Lo i no inapim wok bilong en, nogat. Lo i mekim wok bilong lukautim pikinini bilong meri na stiaim ol man i go long Mesaia. Taim Krais i kamap na ol man i luksave long em, i olsem Lo i inapim wok bilong en. Baibel i tok: “Lo i pinis long Krais.” (Rom 10:4) Tasol askim i stap yet olsem: Husat lain bai mekim wok olsem ol pris? Orait, God Jehova i wokim narapela kontrak bilong kamapim wanpela nupela lain.

NUPELA LAIN I KAMAP

7. Long rot bilong Jeremaia, Jehova i tok profet olsem nupela kontrak bai kamapim wanem ol samting?

⁷ Paslain yet long Jehova i pinisim kontrak bilong Lo, em i tok profet long rot bilong Jeremaia olsem Em bai mekim “nupela kontrak” wantaim lain Israel. (Ritim Jeremaia 31:31-33.) Dispela kontrak i no wankain olsem kontrak bilong Lo, long wanem, em bai opim rot long God inap lusim sin bilong ol man, na i no gat wok long givim ol animal olsem ofa. Hau bai dispela kontrak i kamapim ol dispela samting?

8, 9. (a) Taim Jisas i kapsaitim blut bilong em, dispela blut i mekim wanem ol wok? (b) Long rot bilong nupela kontrak, ol lain insait long en inap kisim wanem blesing? (Lukim piksa long kirap bilong stadi.)

⁸ Planti handret yia bihain, Jisas i kamapim bung bilong Kaikai Bilong Bikpela long Nisan 14, 33 C.E. Taim Jisas i stori long kap wain, em i tokim 11-pela gutpela aposel bilong em olsem: “Dispela kap i makim nupela kontrak mi mekim long rot bilong blut bilong mi. Dispela blut bai kapsait bilong helpim yupela.” (Luk 22:20) Long Gutnius em Matyu i bin raitim, em i kolim tok Jisas i mekim long kap wain, olsem: “Dispela i makim ‘blut bilong mi bilong kontrak.’ Dispela blut bai kapsait bilong lusim sin bilong planti manmeri.”—Mat. 26:27, 28.

⁹ Taim Jisas i kapsaitim blut bilong em, dispela i strongim nupela kontrak. Na tu, dispela blut i opim rot long God i ken lusim sin bilong yumi inap oltaim oltaim. Jisas yet i no mekim dispela nupela kontrak. Jisas i no gat sin, olsem na i no gat wok long God i lusim sin bilong em. Taim Jisas i kapsaitim blut bilong em, dispela blut i olsem pe, na God inap yusim dispela pe long helpim ol lain tumbuna pikinini bilong Adam. Na tu, em inap kapsaitim holi spirit long sampela manmeri bilong graun na em inap adoptim ol “olsem pikinini bilong em.” (Ritim Rom 8:14-17.) Long ai bilong God, ol i no gat sin; ol i olsem Jisas, em i Pikinini Bilong God na em i no gat sin. Ol dispela Kristen em God i bin makim, ol bai “kamap wanlain wantaim Krais” na ol bai ‘mekim wok olsem ol pris.’ Ol bai kisim blesing em lain Israel bilong bipo husat i stap aninit long Lo inap long kisim. Aposel Pita i stori long wok em ol wanwok bilong Krais bai mekim, na em i tok: “Yupela i ‘wanpela lain God i makim, yupela ol pris i mekim wok king, yupela wanpela lain holi, yupela ol manmeri bilong God stret. Na yupela i ken tokaut long olgeta hap long ol gutpela pasin’ bilong dispela man i bin singautim yupela long lusim tudak na kam insait long gutpela lait bilong em.” (1 Pita 2:9) Nupela kontrak i mekim bikpela wok tru! Dispela kontrak i opim rot long ol disaipel bilong Jisas inap kamap nambatu hap bilong pikinini bilong Abraham.

NUPELA KONTRAK I KIRAP MEKIM WOK

10. (a) Nupela kontrak i kirap mekim wok long wanem taim? (b) Bilong wanem na paslain yet dispela kontrak i no kirap long mekim wok?

¹⁰ Nupela kontrak i kirap long mekim wok long wanem taim? Long laspela nait bilong Jisas long dispela graun, em i bin kolim dispela kontrak, tasol long dispela taim, nupela kontrak i no kirap yet long mekim wok. Jisas i mas kapsaitim blut bilong em pastaim, na em i mas givim pe bilong dispela blut long Jehova long heven. Na tu, God bai kapsaitim holi spirit long ol lain husat bai “kamap wanlain wantaim Krais.” Olsem na nupela kontrak i kirap long Pentikos bilong yia 33 C.E. taim ol gutpela disaipel bilong Jisas i kisim holi spirit.

11. (a) Olsem wanem nupela kontrak i opim rot long ol Juda na ol man bilong ol narapela lain long kamap hap lain bilong lain Israel bilong God? (b) Hamas man bai insait long nupela kontrak?

¹¹ Taim Jehova i tokaut long rot bilong Jeremaia olsem Em bai wokim nupela kontrak wantaim lain Israel, dispela i makim olsem olpela kontrak bilong Lo “i no gat wok moa,” tasol dispela kontrak i stap yet i go inap long nupela kontrak i kirap long mekim wok. (Hib. 8:13) Taim nupela kontrak i kirap long mekim wok, God i holim wankain tingting long ol Juda na ol manmeri bilong ol narapela lain husat i kamap bilipman na ol i no bin katim skin, long wanem, “pasin bilong [ol] long katim skin em samting bilong bel na i kamap long rot bilong holi spirit, na i no long rot bilong wanpela lo ol i raitim.” (Rom 2:29) Taim God i wokim nupela kontrak wantaim ol, em bai putim ol lo bilong em “long tingting bilong ol na bai [em i] raitim long bel bilong ol.” (Hib. 8:10) Namba bilong lain insait long nupela kontrak em inap olsem 144,000, na ol bai stap olsem nupela lain, em “lain Israel bilong God.”—Gal. 6:16; Rev. 14:1, 4.

12. Wanem ol samting i wankain namel long kontrak bilong Lo na nupela kontrak?

¹² Wanem ol samting i wankain namel long kontrak bilong Lo na nupela kontrak? Kontrak bilong Lo i bin stap namel long Jehova na lain Israel bilong bipo; nupela kontrak i stap namel long Jehova na lain Israel bilong God. Moses i bin stap olsem namelman bilong olpela kontrak; Jisas i stap olsem Namelman bilong nupela kontrak. Blut bilong animal i bin strongim olpela kontrak; blut bilong Jisas i bin strongim nupela kontrak. Insait long kontrak bilong Lo, Moses i bin stiaim lain Israel bilong bipo; insait long nupela kontrak, Jisas i stap olsem Het bilong kongrigesen na em i stiaim lain Israel bilong God.—Efe. 1:22.

13, 14. (a) Olsem wanem nupela kontrak i helpim wok bilong Kingdom? (b) Wanem samting bai opim rot na lain Israel bilong God inap mekim wok king wantaim Krais long heven?

¹³ Nupela kontrak i helpim wok bilong Kingdom, long wanem, em i opim rot long God inap makim wanpela lain long kamap lain bilong em yet na ol inap mekim wok king na wok pris long Kingdom bilong heven. Dispela lain i stap olsem nambatu hap bilong pikinini bilong Abraham. (Gal. 3:29) Olsem na nupela kontrak i strongim tru kontrak namel long God na Abraham.

¹⁴ Long sait bilong wok bai kamap long Kingdom, i gat wanpela samting moa em yumi mas save long en. Nupela kontrak i opim rot long God inap makim wanpela lain long stap olsem lain Israel bilong God, na ol inap “kamap wanlain wantaim Krais.” Tasol i mas i gat wanpela kontrak we i opim rot long ol inap stap wantaim Jisas long Kingdom bilong em na mekim wok olsem ol king na ol pris long heven.

KONTRAK BILONG MEKIM WOK KING WANTAIM KRAIS

15. Jisas yet i bin mekim wanem kontrak wantaim ol gutpela aposel?

¹⁵ Taim Jisas i kirapim pinis Kaikai Bilong Bikpela, em i mekim kontrak wantaim ol gutpela disaipel bilong em, na dispela kontrak em kontrak bilong Kingdom. (Ritim Luk 22:28-30.) Jehova yet i bin mekim ol narapela kontrak, tasol long kontrak bilong Kingdom, Jisas yet i mekim dispela kontrak wantaim ol disaipel em God i makim ol long holi spirit. Jisas i tok: “Mi mekim kontrak wantaim yupela . . . olsem Papa i bin mekim wanpela kontrak wantaim mi.” Taim Jisas i mekim dispela tok, em i tingim kontrak em Jehova i bin mekim wantaim em, olsem em bai “stap pris inap oltaim oltaim, wankain olsem Melkisedek.”—Hib. 5:5, 6.

16. Aninit long kontrak bilong Kingdom, wanem gutpela blesing bai painim ol Kristen em God i bin makim?

¹⁶ Ol 11-pela aposel i bin ‘pas wantaim’ Jisas ‘taim ol traim i painim em.’ Kontrak bilong Kingdom i strongim ol long bilip olsem ol bai stap wantaim em long heven na sindaun long ol sia king na mekim wok king na wok pris. Tasol i no dispela 11-pela aposel tasol bai kisim dispela blesing, nogat. Jisas i bin kamap long aposel Jon long rot bilong wanpela visen na em i tok: “Man i winim pait, mi bai orait long em i sindaun wantaim mi long sia king bilong mi. Wankain olsem mi tu mi bin winim pait na sindaun wantaim Papa bilong mi long sia king bilong em.” (Rev. 3:21) Dispela i soim olsem Jisas i bin mekim kontrak bilong Kingdom wantaim lain 144,000 Kristen em God i bin makim ol long holi spirit. (Rev. 5:9, 10; 7:4) Dispela kontrak i opim rot long ol inap mekim wok king wantaim Jisas long heven. Dispela i wankain olsem wanpela meri i kamap long famili i gat biknem, na em bai maritim wanpela king na em tu bai mekim wok bos wantaim man bilong em. Baibel i kolim ol Kristen em God i bin makim olsem “meri” bilong Krais, “klinpela yangpela meri,” na em bai maritim Krais.—Rev. 19:7, 8; 21:9; 2 Kor. 11:2.

BILIP STRONG LONG KINGDOM BILONG GOD

17, 18. (a) Yumi bin skelim 6-pela kontrak we i helpim wok bilong Kingdom. Stori long ol dispela kontrak. (b) Bilong wanem yumi mas bilip strong long Kingdom?

¹⁷ Long dispela 2-pela stadi, yumi bin stori long ol kontrak na yumi bin kisim save long wanpela o sampela wok we bai kamap long Kingdom. (Lukim sat “God Bai Kamapim Samting Em i Tingting Pinis Long Mekim.”) Dispela i soim klia olsem ol kontrak i strongim tru wok bilong Kingdom. Olsem na yumi mas bilip tru long Kingdom Bilong Mesaia. God bai yusim dispela Kingdom long kamapim samting em i tingting pinis long mekim bilong helpim dispela graun na ol manmeri.—Rev. 11:15.

¹⁸ Yu ting i stret long kisim 2-pela tingting long ol gutpela wok em Kingdom bai mekim bilong helpim olgeta lain man? Yumi mas bilip tru olsem Kingdom Bilong God tasol em rot bilong pinisim olgeta hevi bilong yumi. Yumi mas givim bel tru long autim dispela tok i tru long ol narapela!—Mat. 24:14.