Lukaut Long Ol Man Bilong Tok Bilas!
Long nau i gat planti tok profet ol man i autim, na wok bisnis bilong autim tok profet i kamap bikpela tru. Wanpela nius (The Daily Telegraph) bilong Landon i tok: ‘Yia 2000 i wok long i kam klostu tru, na samting i narapela kain i kamap. Planti tausen manmeri long olgeta hap bilong graun ol i ting olsem samting i nogut tru na i narapela kain bai kamap bihain.’ Tasol planti man i ting olsem bipo tu ol man i gat dispela bikpela laik long save long ol samting bai kamap bihain, tasol samting ol i bin wet long en i no kamap.
BIHAIN long yia 1800, planti man i save raun long karis em hos i pulim, olsem na wanpela man i autim tok profet olsem: Bihain, pekpek bilong ol hos bai pulap long ol biktaun long Yurop. Yumi save pinis dispela tok profet i no kamap tru. Olsem na taim wanpela nius (The Times) bilong Landon i laik stori olsem planti tok profet i no kamap tru, nius i tok: “Stori bilong ol man long ol samting bai kamap bihain em pipia nating tasol olsem pekpek bilong ol hos.”
Na sampela man ol i tok bilas long ol man i tokaut olsem bagarap inap kamap. Olsem: Wanpela profesa bilong wok bisnis long wanpela yunivesiti long Amerika, em i sutim tok long ol man i save tokaut strong long pasin bilong man long bagarapim graun, na em i tokim ol long betim mani long dispela tok olsem pasin bilong bagarapim graun bai go bikpela o nogat. Wanpela nius (New Scientist) i kamapim tok bilong dispela profesa olsem: ‘I stap bilong ol man i wok long kamap gutpela, na em bai wok long kamap gutpela moa yet i go inap long olgeta taim bihain.’
Namel long ol dispela tok pait, planti man i bilip olsem olgeta samting bai i stap olsem tasol. Ol i tok bilas long God bai kam na pinisim wok nogut bilong ol man bilong graun—olsem na ol i bihainim wankain tingting bilong ol man bilong tok bilas i bin stap long taim bilong ol aposel.
Yu Ting Olgeta Samting i Stap Olsem Tasol?
Aposel Kristen Pita i raitim namba tu pas bilong em long yia 64 C.E. samting, na em i toksave olsem: “Long taim bilong las de, ol man bilong tok bilas bai i kamap, na ol bai i bihainim laik nogut bilong bel bilong ol. Bai ol i tok bilas.”—2 Pita 3:3.
Ol man bilong tok bilas i laik bai samting ol i tok bilas long en i ken kamap olsem samting bilong lap nogut long en. Man i putim yau long tok bilas bilong ol, ating em i go insait long umben bilong ol—ol man bilong tok bilas i laik bai em i kisim wankain tingting olsem bilong ol. Sampela man bilong tok bilas em Pita i stori long ol, ating ol i kain man olsem; ol i “bihainim laik nogut bilong bel bilong ol.” Taim Pita i mekim dispela toksave, em i bihainim pasin bilong dabolim tok. Em i tok, “ol man bilong tok bilas bai i kamap, na . . . tok bilas.”
Ol dispela man bilong tok bilas long taim bilong ol aposel, ol i gat tok long “kam bek” bilong Krais, na ol i tok: “Em i bin tok olsem em bai i kam bek gen, a? Orait em i stap we? Em i no inap i kam. Taim ol tumbuna i dai, na i kam inap long nau, olgeta samting i stap wankain olsem bipo tru, taim graun i kamap.” (2 Pita 3:4) Long ai bilong ol, olgeta samting i stap olsem tasol. Tasol long yia 33 C.E., Jisas i bin tok profet olsem bikpela bagarap bai painim biktaun Jerusalem. Em i tok: “Bihain wanpela taim bai i kamap, na ol birua bilong yu bai i kam hipim graun raunim bikpela banis bilong yu. Na ol bai i banisim yu tru long olgeta hap. Na ol bai i brukim yu na bagarapim yu tru, yu wantaim ol pikinini bilong yu i stap insait long yu. Na ol bai i no larim wanpela ston bilong yu i stap antap long narapela ston.” Ol man i tok bilas long dispela tok lukaut ol i popaia stret! Long 70 C.E., ol ami bilong Rom i kam na banisim Jerusalem na bagarapim dispela taun, na planti manmeri i stap insait long Jerusalem ol i dai. I gat wanem as na klostu olgeta man bilong dispela taun ol i no tingim dispela bagarap bai painim ol? Long wanem, ol i no bin pilim gut long tingting olsem God i bin kam na skelim pasin bilong ol long rot bilong Pikinini bilong em, Jisas.—Luk 19:43, 44.
Aposel Pita i tok wanpela taim bai kamap bihain na God i Gat Olgeta Strong em bai kam na pinisim wok nogut bilong ol man bilong graun. Pita i toksave olsem: “De bilong Bikpela bai i kamap wantu tasol olsem ol stilman i save kam.” (2 Pita 3:10) Long dispela taim, God bai rausim ol man nogut long olgeta hap bilong graun na lukautim ol man em i skelim ol pinis na em i tok ol i stretpela man. Planti taim dispela nius i tok, “kam bek” bilong Krais Jisas i kirap pinis long 1914. Tasol wok bilong em olsem Man God i makim bilong givim strafe long ol man, dispela wok i no kamap yet; em bai kamap bihain. Olsem na yumi long nau i mas tingim moa yet dispela tok bilong Pita em i tok yumi mas lukaut long ol man bilong tok bilas.
Ating longtaim pinis yu bin wet long God i kam na pinisim wok nogut bilong ol man bilong graun. Wanem samting bai helpim yu long wet yet na bai yu no les na kamap abus bilong ol man i tok bilas? Plis kaunim stori i kamap bihain long dispela.
[Rait long pes 4]
“Bihain wanpela taim bai i kamap, na ol birua bilong yu bai . . . banisim yu tru long olgeta hap. . . . Na ol bai i no larim wanpela ston bilong yu i stap antap long narapela ston.” Dispela tok lukaut i no samting bilong tok bilas long en. Ol ami bilong Rom i bagarapim Jerusalem, na planti manmeri i dai.