Yu Save Amamas Long Oganaisesen Bilong Jehova?
“Bikpela i tok olsem, ‘Heven em i sia king bilong mi na graun em i ples mi putim lek bilong mi antap long en.’ ”—AISAIA 66:1.
1, 2. (a) Yu inap lukim wanem samting long ai bilong yu na i makim olsem oganaisesen bilong Jehova i stap? (b) Jehova i save sindaun we?
YU BILIP olsem Jehova i gat wanpela oganaisesen i stap? Sapos olsem, orait i gat wanem as na yu bilip olsem? Ating bai yu bekim tok olsem: ‘Mipela i gat wanpela Haus Kingdom. Mipela i gat wanpela kongrigesen i wok gut na i gat wanpela lain elda bilong en. Mipela i gat wanpela wasman sekit ol i bin makim na em i save kam lukim mipela oltaim. Mipela save go long ol liklik na bikpela kibung em ol i bin stretim gut ol wok bilong en. Mipela i gat wanpela brens-ofis bilong Sosaiti Was Taua i stap long kantri bilong mipela. Em nau, ol dispela samting na planti samting moa i kamapim klia olsem Jehova i gat wanpela oganaisesen i wok i stap.’
2 Tru, ol dispela samting i makim olsem wanpela oganaisesen i stap. Tasol sapos yumi luksave olsem i gat dispela oganaisesen i stap hia long graun na em tasol, orait yumi no klia gut long oganaisesen bilong Jehova. Jehova i bin tokim Aisaia, graun em i ples bilong putim lek bilong Em tasol, tasol heven em sia king bilong Em. (Aisaia 66:1) Jehova i toktok long wanem “heven”? Yu ting em i toktok long ples antap em win i save raun long en? O yu ting em i toktok long skai i stap antap, o long ol narapela kain samting i stap laip antap? Aisaia i toktok long Jehova i ‘stap long ples bilong em long heven, em dispela ples bikpela lait na strong bilong en i pulap long en,’ na man bilong raitim Song i tok dispela heven em “ples bilong em.” Olsem na dispela tok “heven” long Aisaia 66:1 em ples ol spirit i stap long en na yumi ol man i no inap lukim, na Jehova i stap Nambawan Bos tru long dispela ples.—Aisaia 63:15; Song 33:13, 14.
3. Olsem wanem yumi inap daunim pasin bilong tupela tingting?
3 Olsem na sapos yumi laik tru long klia gut long oganaisesen bilong Jehova na amamas long en, yumi mas tingim heven. Em nau, sampela bai i gat hatwok long mekim olsem. Yumi no inap lukim oganaisesen bilong Jehova long heven, orait olsem wanem yumi ken save em i stap tru? Ating sampela bai kisim tupela tingting long dispela samting, i olsem ol i wokabaut long wanpela rot i tudak, na ol bai tingting, ‘Olsem wanem mipela inap save tru tru?’ Orait, olsem wanem bilip inap daunim dispela pasin bilong tupela tingting? Tupela bikpela rot em yumi mas stadi strong long Tok Bilong God na go oltaim long ol miting Kristen na mekim sampela tok insait long ol dispela miting. Em nau, dispela lait bilong tok i tru bai rausim tudak, olsem dispela tupela tingting bilong yumi. I gat sampela wokboi moa bilong God em ol i bin kisim tupela tingting, olsem ol i no bilip strong. Yumi ken tingim stori bilong wokboi bilong Elisa taim king bilong Siria i kam pait long lain Israel.—Skelim wantaim Jon 20:24-29; Jems 1:5-8.
Man i Bin Lukim Bikpela Lain Bilong Heven
4, 5. (a) Wanem wanpela hevi bilong wokboi bilong Elisa? (b) Taim Elisa i beten, Jehova i mekim wanem?
4 Long nait king bilong Siria i salim wanpela bikpela lain soldia i kam long Dotan bilong holimpas Elisa. Orait long moningtaim tru wokboi bilong Elisa i kirap na em i go ausait na sanap antap long rup bilong haus; long hap bilong Midel-Is ol i save wokim rup i stret olgeta olsem plua bilong haus. Ating wokboi i laik kisim gutpela kolwin na em i mekim olsem, tasol em i kirap nogut tru long samting em i lukim! Wanpela bikpela lain ami bilong Siria wantaim ol hos na karis bilong pait ol i banisim taun, na ol i wet long holimpas profet bilong God. Wokboi i singaut long Elisa olsem: “Bikman, ol Siria i banisim yumi pinis. Nau bai yumi mekim wanem?” Long pasin bilong bel isi na bilip, Elisa i tokim em: “Maski pret. I tru ol i gat planti soldia, tasol yumi gat bikpela lain moa bilong helpim yumi.” Ating wokboi i tingting, ‘Ol i stap we? Mi no inap lukim ol!’ Sampela taim ating yumi tu i gat wankain hevi—yumi no lukim long tingting bilong yumi dispela bikpela lain i stap long heven.—2 King 6:8-16; Efesus 1:18.
5 Elisa i beten askim God long opim ai bilong wokboi bilong em. Orait nau wanem samting i kamap? Wantu “Bikpela i opim ai bilong dispela wokman na wokman i lukim ol hos na karis i inapim dispela maunten Elisa i stap long en. Ol dispela hos na karis i wankain olsem paia stret.” (2 King 6:17) Yes, em i lukim bikpela lain long heven, em ol ensel i olsem bikpela lain ami na ol i wet long helpim na lukautim wokboi bilong God. Nau em inap pilim tru olsem i gat wanem as na Elisa i bilip strong.
6. Olsem wanem yumi inap save gut long oganaisesen bilong Jehova long heven?
6 Olsem wanem long yumi? Ating sampela taim yumi hatwok long pilim gut sampela samting i wankain olsem samting wokboi bilong Elisa i no bin pilim? Taim yumi lukim olsem sampela hevi i laik painim yumi o wok Kristen bilong yumi long sampela kantri, yumi save lukim dispela hevi tasol, olsem samting i stap long graun? Sapos olsem, orait yu ting bai God i givim wanpela samting olsem driman long yumi bilong givim save long yumi? Nogat, long wanem, yumi gat wanpela samting em Elisa i no gat—yumi gat wanpela buk, em Baibel, i gat planti samting olsem driman long en, na em inap givim tingting na save long yumi long ol samting bilong dispela oganaisesen i stap long heven. Na dispela Baibel em spirit holi bilong God i bin kamapim, em i kolim ol lo bilong stiaim tingting bambai yumi ken stretim tingting na wokabaut bilong yumi. Tasol yumi mas wok strong long painim gutpela tingting i save pilim gut ol samting, na wok long kisim pasin bilong amamas long ol samting Jehova i bin putim bilong bosim ol wok samting bilong em. Bilong mekim olsem, yumi mas stadi, na beten, na tingim tingim long bel ol dispela tok yumi stadi long en.—Rom 12:12; Filipai 4:6; 2 Timoti 3:15-17.
Stadi Bilong Lukim Long Tingting
7. (a) Sampela man i gat wanem hevi long stadi long Baibel? (b) Taim yumi wok strong long stadi, bilong wanem dispela i gutpela?
7 Stadi em i wanpela samting em planti man i no amamas long mekim; planti man olsem, taim ol i bin stap long skul ol i no amamas long stadi, o bipo ol i no gat rot bilong stadi. Tasol sapos yumi laik lukim gut long tingting na amamas long oganaisesen bilong Jehova, yumi mas wok long kisim laik long stadi. Olsem wanem? Yu inap amamas long kaikai sampela gutpela kaikai sapos yu no bin redim pastaim? Ol man bilong kukim kaikai ol i save, bilong wokim wanpela gutpela kaikai, ol i mas mekim planti wok pastaim bilong redim ol samting. Tasol insait long 30 minit samting ol man i daunim pinis dispela kaikai. Tasol stadi i no olsem. Taim yumi stadi, em inap helpim yumi long olgeta yia yumi stap laip. Isi isi yumi inap kisim laik long stadi taim yumi lukim olsem yumi wok long kamap strong long dispela rot. Aposel Pol i tok stret taim em i tok yumi mas was gut long pasin bilong yumi yet na long wok yumi mekim bilong skulim ol man, na yumi mas wok yet long kaunim tok bilong God long ol man. Tru, long olgeta taim yumi mas taitim bun long mekim olsem, tasol dispela inap helpim yumi i go inap oltaim oltaim.—1 Timoti 4:13-16.
8. Buk Sindaun i laik kirapim yumi long kisim wanem kain tingting?
8 Wanpela saveman bilong bipo yet em i bin tok: “Pikinini, yu mas harim tok bilong mi na putim gut long tingting bilong yu. Yu mas putim yau gut long olgeta tok i save givim yu gutpela tingting. Na yu mas wok strong long kisim gutpela save. Na yu mas askim gutpela tingting na save long kam long yu, olsem yu singautim wanpela man i kam bilong helpim yu. Na yu mas wok hat long painim gutpela tingting, olsem man i wok long painim silva ol i bin haitim insait long graun na olsem man i wok long painim mani samting ol i bin haitim. Sapos yu mekim ol dispela samting, orait bai yu save tru long pasin bilong stap aninit long Bikpela, na bai yu save gut long God.”—Sindaun 2:1-5.
9. (a) Skelim gutpela pe samting bilong gol wantaim “save” yumi kisim long God. (b) Yumi mas i gat wanem ol tul bambai yumi ken kisim stretpela save?
9 Olsem wanem? Yu luksave long husat i gat wok long mekim olsem? Dispela tok “yu mas,” em i kamap planti taim. Na tingim dispela tok, ‘Yu mas wok hat long painim gutpela tingting, olsem man i wok long painim mani samting ol i bin haitim.’ Tingim ol man bilong wok long main—inap planti handet yia pinis ol i wok long digim graun bilong painim silva na gol long hap bilong Bolivia, Meksiko, Saut Afrika na sampela kantri moa. Ol i wok strong tru, na ol i mekim wok long ol ain na savol bilong kamautim ol ston ol bai kisim silva na gol long en. Ol i tingim gol i gutpela samting tru, olsem na long wanpela main long Kalifonia, Yunaitet Stets, ol i wokim ol hul i go insait long graun na sapos yumi bungim olgeta wantaim ol inap olsem 591 kilomita, na ol i go daun stret insait long graun inap olsem 1.5 kilomita—ol i mekim olsem bilong painim gol tasol. Tasol olsem wanem? Yu inap kaikai gol? Yu inap dring gol? Sapos yu stap long ples wesan nating na yu no gat kaikai na wara na yu laik i dai, gol bai strongim yu na bai yu no ken bagarap? Nogat. Pe bilong gol em samting ol man tasol i tingim na makim, na strong bilong en inap senis senis long ol wan wan de, olsem yumi save lukim long ol wok bilong skelim strong bilong mani. Tasol sampela man ol i bin dai bilong kisim gol. Orait tingim: Yumi mas wok strong i go inap wanem mak bambai yumi ken kisim gol bilong spirit, em dispela “save” yumi kisim long God? Tingim dispela samting: Yumi inap save gut long Bikpela King bilong heven na graun, na oganaisesen bilong em, na ol laik bilong em! Bilong kisim dispela save, yumi inap mekim wok long ol ain na savol bilong spirit. Em ol buk na nius i kamapim ol tok bilong Baibel na ol i helpim yumi long stadi na glasim gut ol tok bilong Jehova long Baibel na pilim gut insait bilong ol dispela tok.—Jop 28:12-19.
Wok Long Painim Gutpela Tingting
10. Long driman Daniel i lukim wanem samting?
10 Orait nau yumi ken wok long mekim samting olsem digim graun i go daun bambai yumi ken kirap long kisim save long oganaisesen bilong Jehova long heven. Bilong kisim wanpela gutpela tingting tru bilong helpim yumi, yumi ken lukim tok bilong Baibel i stori long wanpela driman bilong Daniel long Man bilong bipo bipo yet em i sindaun long sia king bilong em. Daniel i tok: “Mi lukim ol i kisim ol sia king i kam na putim i stap. Na wanpela man bilong bipo bipo yet i kam sindaun long wanpela sia king. Ol klos bilong en i waitpela tru olsem ais, na gras bilong het bilong en i wait moa yet olsem gras bilong sipsip. Dispela sia king i gat wil na paia i lait bikpela long olgeta hap bilong sia, na i sut i go nabaut. I gat planti tausen . . . i mekim wok bilong dispela Man, na planti milion . . . i sanap klostu long em. Na sampela i opim ol buk, bilong kirapim kot.” (Daniel 7:9, 10) Husat ol dispela planti tausen ol i mekim wok bilong Jehova? Blok i stap long namel bilong pes long Baibel New World Translation, em yumi ken mekim wok long en olsem “ain” na “savol,” em i kamapim ol skripsa olsem Song 68:17 na Hibru 1:14. Em nau, ol dispela lain i mekim wok bilong Jehova em ol ensel bilong heven!
11. Olsem wanem driman bilong Daniel i helpim yumi long kisim gut tok bilong Elisa?
11 Long stori bilong Daniel, em i no tok em i bin lukim olgeta gutpela ensel bilong God, nogat. Ating i gat planti milion moa. Tasol nau yumi inap pilim tru olsem i gat as na Elisa inap tok: “Ol i gat planti soldia, tasol yumi gat bikpela lain moa bilong helpim yumi.” Ami bilong king bilong Asiria i gat ol bikhetlain ensel, olsem ol spirit nogut, bilong helpim ol, tasol ami bilong Jehova long heven i bikpela lain moa yet!—Song 34:7; 91:11.
12. Olsem wanem yu inap kisim sampela save moa long ol ensel?
12 Ating yu laik kisim sampela save moa long ol dispela ensel, olsem taim ol i mekim wok bilong Jehova ol i mekim wanem kain wok. Sapos yumi skelim tok Grik bilong dispela tok “ensel,” yumi inap save olsem ol i gat wok bilong bringim tok, long wanem, wanpela insait bilong dispela tok Grik i olsem “man bilong bringim tok.” Tasol i no dispela wok tasol ol i mekim—ol i gat planti wok moa. Tasol bilong save long ol dispela narapela wok bilong ol, yu mas wok long digim hul i go daun. Sapos yu gat buk Insight on the Scriptures, yu inap stadi long wanpela tok, nem bilong en “Angels,” o yu ken lukim sampela Wastaua bilong bipo i stori long ol ensel. Bai yu kirap nogut long ol save yu kisim long ol dispela wokman bilong God long heven na bai yu pilim tru gutpela helpim ol i givim long yumi. (KTH 14:6, 7) Tasol insait long oganaisesen bilong Jehova long heven, i gat sampela spirit ol i holim sampela bikpela wok.
Samting Aisaia i Bin Lukim
13, 14. Aisaia i lukim wanem samting long driman? Dispela i mekim wanem long em?
13 Orait nau yumi ken skelim gut driman bilong Aisaia, olsem yumi digim graun i go daun. Taim yu kaunim sapta 6, ves 1 i go inap 7, bai yu kirap nogut long dispela tok. Aisaia i tok em i “lukim Bikpela i sindaun i stap long sia king bilong en,” na “bikpela lain ensel [olsem ol serafim] i raunim em i stap.” Ol i tokaut long biknem bilong Jehova, na ol i litimapim pasin holi bilong em. Taim yu kaunim dispela stori, bel bilong yu i mas pilim tru. Na dispela i mekim wanem long Aisaia yet? Em i tok: “Mi pret na mi singaut olsem, ‘Tru tumas, bai mi bagarap. Oltaim maus bilong mi i save mekim toktok nogut tasol. Na mi stap wantaim ol manmeri i save mekim toktok nogut. Mi man bilong sin, na nau mi lukim pinis dispela King, em Bikpela I Gat Olgeta Strong [“Jehova bilong ol bikpela lain ami,” NW].’ ” Man! Em i pilim tru dispela samting em i bin lukim! Olsem wanem long yu? Yu pilim tru?
14 Orait, olsem wanem Aisaia inap lukim bikpela lait bilong Jehova na em i no kisim bagarap long en? Em i tok wanpela serafim i kam helpim em na i tok: “Nau sin bilong yu i pinis na yu kamap klin.” (Aisaia 6:7) Aisaia inap bilip long marimari bilong God na putim yau long tok bilong Jehova. Orait yu laik save long sampela samting moa bilong ol dispela spirit ol i gat bikpela namba? Sapos olsem, orait yu mas mekim wanem? Yu mas wok strong long kisim sampela save moa long ol, olsem man i digim graun i go daun. Wanpela tul yu ken mekim wok long en, em Watch Tower Publications Index, na lukim ol narapela buk samting em i makim bilong yumi ken lukim na kisim sampela save moa.
Esekiel i Lukim Wanem Samting?
15. Wanem samting i makim olsem yumi inap bilip tru long driman bilong Esekiel?
15 Orait nau yumi stori long narapela kain spirit God i bin wokim. Esekiel i bin kisim wanpela driman taim em i stap kalabus yet long Babilon. Opim Baibel bilong yu long Esekiel sapta 1, ves 1 i go inap ves 3. I gat wanem tok bilong kirapim dispela stori? Yu ting em i tok, ‘Wanpela taim long bipo yet, long wanpela longwe ples . . . ’? Nogat, dispela i no wanpela stori nating i kamap long tingting bilong ol man. Ves 1 i tok: “Mi Esekiel, mi stap wantaim ol Juda, klostu long wara Kebar, long kantri Babilon. Ol Babilon i bin kalabusim mipela na kisim mipela i kam long dispela hap. Na long de namba 5 bilong namba 4 mun bilong namba 30 yia, heven i op na mi lukim God long ol samting olsem driman.” Yu lukim wanem samting long dispela ves? Em i kolim de na mun na yia stret na em i kolim wanpela ples stret. Ol dispela samting i makim namba 5 yia em King Jehoiakin i stap kalabus long Babilon, olsem yia 613 B.C.E.
16. Esekiel i lukim wanem samting?
16 Strong bilong Jehova i kam long Esekiel, na long samting olsem driman em i kirap lukim Jehova i sindaun long sia king long wanpela traipela karis long heven i gat ol wil long en i traipela nogut tru, na long ain i stap long arere bilong olgeta wil i gat planti ai i stap. Wanpela samting yumi tingim long dispela driman i olsem: I gat 4-pela samting olsem man, na olgeta wan wan i sanap klostu long ol wan wan wil. Ol dispela 4-pela samting i olsem: “Bodi bilong ol i olsem bodi bilong man, tasol olgeta wan wan i gat 4-pela pes na 4-pela wing. . . . Olgeta wan wan i gat 4-pela kain pes. Pes long hap i kam i olsem pes bilong man, na pes long han sut i olsem pes bilong laion. Na pes long han kais i olsem pes bilong bulmakau, na pes long baksait i olsem pes bilong bikpela tarangau.”—Esekiel 1:5, 6, 10.
17. Fopela pes bilong ol serap i makim wanem samting?
17 Ol dispela samting i stap laip ol i wanem samting? Esekiel yet i tok ol i ensel serap. (Esekiel 10:1-3, 14, NW) Bilong wanem ol i gat 4-pela pes? Bilong makim 4-pela pasin bilong Bikpela King Jehova. Pes bilong tarangau i makim gutpela tingting na save bilong Jehova, i olsem em inap lukim ol samting i stap longwe. (Jop 39:27-29) Na pes bilong bulmakau i makim wanem samting? Bulmakau man i gat bikpela strong tru long nek na sol bilong en, olsem na i gat wanpela bulmakau man bilong pait em i bin litimapim wanpela hos wantaim man i sindaun long en na tromoi tupela i go antap. Em nau, bulmakau man i makim strong bilong Jehova, em i gat olgeta strong. Long Baibel, laion i makim pasin bilong sanap strong na i no pret long mekim stretpela kot. Orait laspela em pes bilong man, em i makim stret pasin sori bilong God, long wanem, long olgeta samting i stap long graun, ol man tasol inap skelim gut long tingting na kamapim dispela pasin.—Matyu 22:37, 39; 1 Jon 4:8.
18. Olsem wanem aposel Jon i helpim yumi long kisim sampela tingting moa long oganaisesen bilong heven?
18 I gat sampela samting moa olsem driman i helpim yumi long save gut long oganaisesen bilong Jehova. Sampela em ol driman Jon i bin kisim na em i stori long en long buk Kamapim Tok Hait long Baibel. Olsem Esekiel i bin lukim, Jon tu i lukim Jehova i sindaun long wanpela sia king i lait bikpela tru na ol ensel ol i kolim serap ol i sanap klostu long en. Ol dispela serap i mekim wanem? Ol i mekim wankain tok olsem ol serafim i tokaut long en long Aisaia sapta 6, na ol i tok: “Bikpela, em God I Gat Olgeta Strong, em i holi, em i holi, em i holi. Bipo em i stap, na nau em i stap, na bihain bai em i kam.” (KTH 4:6-8) Na Jon i lukim wanpela pikinini sipsip i sanap klostu long sia king. Dispela pikinini sipsip i makim husat? Em dispela Pikinini Sipsip Bilong God, em Krais Jisas.—KTH 5:13, 14.
19. Long tingting bilong yu, yu bin lukim wanem samting long oganaisesen bilong Jehova long rot bilong dispela stadi?
19 Olsem na long rot bilong ol dispela samting olsem driman, yumi bin lukim wanem samting long tingting bilong yumi? Yumi lukim olsem Jehova i sindaun long sia king bilong em long oganaisesen bilong heven, na Pikinini Sipsip, Krais Jisas, em dispela Tok, o Logos, i stap wantaim Jehova. Na tu, yumi bin lukim wanpela bikpela lain ensel long heven, sampela em ol serafim na serap. Olgeta i insait long wanpela bikpela oganaisesen i stap wanbel na i mekim laik bilong Jehova. Wanpela laik bilong em, em wok bilong autim gutnius long olgeta hap bilong graun nau long dispela taim bilong las de.—Mak 13:10; Jon 1:1-3; KTH 14:6, 7.
20. Stori i kamap bihain long dispela em bai bekim wanem askim?
20 Na tu, i gat ol Witnes Bilong Jehova long graun na ol i save bung long ol Haus Kingdom bambai ol i ken lain long mekim laik bilong Bikpela King. Em nau, yumi inap pilim tru olsem i gat bikpela lain moa yet i stap wantaim yumi, winim tru ol lain i stap wantaim Satan na ol lain i birua long tok i tru. Tasol i gat wanpela askim i stap yet: Olsem wanem oganaisesen bilong heven em i samting bilong dispela wok bilong autim gutnius bilong Kingdom? Stori i kamap bihain long dispela em bai skelim dispela askim na sampela samting moa.
Ol Askim Bilong Tingim Gen
◻ Bilong amamas long oganaisesen bilong Jehova, yumi mas lukim wanem samting long tingting?
◻ Wanem samting i bin painim wokboi bilong Elisa? Profet i strongim bel bilong em olsem wanem?
◻ Yumi mas ting olsem wanem long stadi?
◻ Daniel na Aisaia na Esekiel i stori olsem wanem long ol samting bilong oganaisesen bilong heven?
[Piksa long pes 13]
Taim yumi stadi, dispela i save helpim yumi inap longtaim, winim wanpela kaikai yumi bin redim gut
[Piksa long pes 15]
Taim Elisa i beten, Jehova i givim driman long em na em i lukim ol bikpela lain ensel long heven