Em Nau—Stretpela Pasin i Kamap Bilong Helpim Olgeta Man
‘Mipela bai wok long bihainim sampela nupela rot bilong putim yau taim ol man i kamapim tingting bilong ol—long tok bilong ol man i gat hevi, na bilong ol man i tingting planti, na bilong ol man i ting i no gat rot long ol narapela i putim yau long tok bilong ol. Olsem na mipela i mas kirap na bihainim ol tok bilong konstitusen na bai dispela samting i ken kamap, olsem: Taim mama i karim ol, olgeta man i gat nem long ai bilong God, na olsem tasol, taim mama i karim ol, olgeta i mas i gat nem long ai bilong ol man tu.’—Presiden bilong Yunaitet Stets, em Richard Milhous Nixon, em i mekim dispela tok taim em i kisim wok presiden long Janueri 20, 1969.
TAIM ol man i kisim wok olsem king o presiden o praim-minista, ol i save mekim planti tok long stretpela pasin. Richard Nixon, bipo em presiden bilong Yunaitet Stets, em tu i bin mekim olsem. Tasol gutpela toktok bilong em i lus nating taim yumi skelim wantaim sampela samting em i bin mekim. Tru, Nixon i bin tok promis long “bihainim ol tok bilong as lo,” tasol bihain, em yet em i brukim lo na kot i tok em i gat asua, na em i mas lusim wok presiden. Inap 30 yia bihain long dispela, ‘ol man i gat hevi, na ol man i tingting planti, na ol man i ting i no gat rot,’ ol dispela man i strong yet long narapela i mas putim yau long tok bilong ol.
Tasol wok bilong putim yau na helpim ol man ol i kamapim hevi bilong ol, em i gat hatwok long en, olsem planti bikman i gat laik long helpim ol narapela ol i kisim save pinis. ‘Stretpela pasin bilong helpim olgeta man’ i no bin kamap. Tasol long planti handet yia i go pinis, i gat wanpela tok promis i bin kamap na yumi mas tingim—em wanpela tok promis i narapela kain na i samting bilong stretpela pasin.
Long rot bilong profet Aisaia, God i tokim lain bilong Em olsem em bai salim wanpela “wokman” long ol—em wanpela wokman em yet bai makim. Jehova i tokim ol: “Mi putim pinis spirit bilong mi long em, na em bai i bringim stretpela pasin tasol long olgeta lain manmeri.” (Aisaia 42:1-3) I no gat wanpela bikman bilong graun i ken mekim kain tokaut olsem bilong bringim stretpela pasin i kam long olgeta lain na i stap oltaim. Orait, yu ting yumi inap bilip tru long dispela tok promis God i bin mekim? Yu ting dispela gutpela samting tru inap kamap?
Wanpela Promis Yumi Inap Bilip Long En
Bilong wanpela tok promis i ken kamap tru, man i mekim dispela tok promis i mas inap long truim. Man i bin mekim dispela tok promis em God i Gat Olgeta Strong—em i tokaut olsem “wokman” bilong em bai kamapim stretpela pasin long olgeta hap bilong graun. Jehova i no wankain olsem ol bikman bilong politik—em i no mekim nating ol tok promis, nogat. Baibel i tokim yumi: “God i no inap tru long giaman.” (Hibru 6:18) Na God i tokaut strong olsem: “Samting mi tingting pinis long mekim, em bai mi mekim.”—Aisaia 14:24.
Dispela “wokman” God i makim pinis, em Krais Jisas, na ol samting em i bin mekim i strongim bilip bilong yumi long dispela tok promis. Man i laik kamapim stretpela pasin, em yet i mas laikim tru stretpela pasin na bihainim. Olgeta samting Jisas i mekim taim em i stap long graun i kamapim klia olsem em i man bilong ‘laikim stretpela pasin, na em i no laikim tru pasin nogut.’ (Hibru 1:9) Ol tok em i mekim, na pasin em i bihainim, na i dai bilong em tu, ol dispela samting i kamapim klia olsem em i stretpela man. Taim Jisas i dai, wanpela ofisa bilong ami bilong Rom, em i bin lukim Jisas i sanap long kot na lukim ol i kilim em i dai, em i pilim tru ol samting i bin kamap na em i tok: “Dispela man em i stretpela man, na em i no bin mekim rong.”—Luk 23:47.
Jisas yet i bihainim pasin i stret, na tu, em i sakim pasin i no stret em planti man i stap long taim bilong em ol i bihainim. Tasol em i no mekim olsem long rot bilong daunim gavman, nogat; olgeta man i gat laik long harim, em i skulim ol long stretpela pasin. Bikpela tok Jisas i mekim antap long maunten i kamapim klia ol man i mas mekim wanem bilong bihainim stretpela pasin na mekim stretpela kot.—Matyu, sapta 5-7.
Jisas i bihainim ol tok em i autim. Em i no daunim ol man i gat sik lepra, em ol man i no laik go klostu long ol. Em i toktok wantaim ol, holim ol, na oraitim sik bilong ol tu. (Mak 1:40-42) Olgeta man em i bungim, em sampela ol i rabisman na man i no gat helpim, ol i bikpela samting long em. (Matyu 9:36) Em i tokim ol: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.”—Matyu 11:28.
Na bikpela samting tru, Jisas i no larim pasin i no stret i bagarapim gutpela pasin bilong em o mekim em i bel nogut. I no gat wanpela taim em i bekim nogut long ol man. (1 Pita 2:22, 23) Maski em i kisim bikpela pen tru, em i beten askim Papa bilong em i stap long heven long lusim rong bilong ol soldia i bin nilim em long pos. Em i tok: “Papa, yu ken lusim sin bilong ol. Ol i no save long dispela samting ol i mekim.” (Luk 23:34) Em nau, Jisas i kamapim “stretpela pasin long olgeta lain manmeri.” (Matyu 12:18) Pasin bilong Pikinini bilong God yet em i nambawan bikpela samting bilong kamapim klia olsem God i gat bikpela laik long kamapim stretpela pasin long olgeta hap bilong graun.
Yumi Inap Daunim Pasin i No Stret
I gat sampela man long nau ol tu i kamapim long ples klia olsem yumi inap daunim pasin i no stret. Lain Witnes Bilong Jehova, na olgeta wan wan bilong dispela lain, ol i wok strong long daunim pasin bilong tingting nogut long man bilong narapela lain, na pasin bilong tingim sampela na sampela nogat, na pasin bilong biruaim man bilong narapela skin, na pait na bagarapim man. Tingim stori daunbilo i kamapim klia dispela samting.
Pedroa i ting pasin bilong mekim pait na daunim gavman em tasol i rot bilong kamapim stretpela pasin long Bask, em wanpela hap bilong Spen em i sindaun long en. Bilong mekim olsem, em i kamap memba bilong wanpela lain paitman na long Frans ol i skulim em long mekim dispela wok. Taim em i skul pinis, ol i tokim em long kamapim wanpela lain paitman na pairapim wanpela polis-barek. Lain bilong em i wok long redim bom na ol polis i kam na holim em. Em i stap 18 mun long haus kalabus, tasol maski em i kalabus, em i mekim yet ol wok bilong helpim lain politik bilong em, na bilong mekim olsem, sampela taim em i stap tambu long kaikai na wanpela taim em i katim rop bilong blut long han bilong em.
Pedro i ting olsem em i pait bilong daunim pasin bilong mekim nogut long ol narapela. Bihain em i kisim save long Jehova na long ol samting Em i laik mekim. Taim Pedro i stap yet long kalabus, meri bilong em i kirap mekim stadi Baibel wantaim ol Witnes Bilong Jehova, na taim Pedro i lusim pinis kalabus, meri i singautim em long kam long wanpela miting bilong ol. Em i amamas tru long dispela miting, olsem na em i tok em i laik mekim stadi Baibel, na dispela stadi i kirapim em long mekim planti bikpela samting bilong senisim tru tingting na pasin bilong em. Bihain, long 1989, Pedro wantaim meri bilong em i kisim baptais.
Pedro i tok: “Mi tenkyu long Jehova olsem mi no bin kilim i dai wanpela man long ol dispela yia mi mekim wok olsem paitman. Nau mi mekim wok long bainat bilong spirit holi bilong God, em Baibel, bilong givim tok bilong bel isi na stretpela pasin tru long ol man—em gutnius bilong Kingdom bilong God.” I no longtaim i go pinis na Pedro, nau em i wanpela elda bilong ol Witnes Bilong Jehova, em i go long dispela polis-barek bipo em i laik bagarapim. Tasol long dispela taim, em i go bilong autim tok bilong bel isi long ol famili i sindaun long dispela hap.
Ol Witnes Bilong Jehova i save mekim planti senis long i stap bilong ol, long wanem, ol i laik tru bai stretpela pasin i mas kamap long graun. (2 Pita 3:13) Tru, ol i bilip strong long tok promis bilong God olsem em yet bai kamapim dispela gutpela samting, tasol ol i save ol yet i gat wok long mekim stretpela pasin long ol narapela. Baibel i tokaut klia olsem God i laik bai yumi mas mekim olsem.
Bihainim Stretpela Pasin
Tru, taim pasin i no stret i painim yumi, ating yumi laik singaut olsem: “God i save mekim stretpela pasin. Tasol mipela i no lukim em i mekim dispela kain pasin.” Ol Juda i stap long taim bilong Malakai ol i save tokaut olsem. (Malakai 2:17) Olsem wanem? God i ting ol i tok stret? Nogat. Dispela toktok bilong ol i mekim na em i “les,” long wanem, ol yet i save mekim nogut long meri bilong ol i kamap lapun pinis—long liklik samting tasol ol i katim marit bilong ol. Jehova i kamapim klia olsem em i tingim ‘ol dispela meri ol man i bin maritim taim ol i yangpela yet na ol i bin promis long ai bilong God bai ol i no ken lusim ol. Tasol ol i brukim dispela promis.’—Malakai 2:14.
Sapos yumi yet i mekim pasin i no stret, yu ting i gat as na yumi ken toktok planti long pasin i no stret em narapela i mekim long yumi? Nogat, a? Tasol sapos yumi wok long bihainim pasin bilong Jisas na rausim long bel pasin bilong tingting nogut long ol man bilong narapela lain na pasin bilong birua long ol man bilong narapela skin, na yumi laikim olgeta man, maski ol i bilong wanem lain, na yumi no bekim nogut long narapela, orait long dispela rot yumi kamapim klia olsem yumi laikim tru stretpela pasin.
Bilong ol man i ken mekim stretpela pasin long yumi, Baibel i tok yumi yet i mas “bihainim stretpela pasin.” (Hosea 10:12) Maski samting yumi mekim bilong daunim pasin i no stret em i olsem liklik samting tasol, olgeta wan wan samting yumi yet i mekim em bikpela samting. Olsem Martin Luther King, Jr., i tok long pas (Letter From Birmingham Jail) em i raitim taim em i stap long haus kalabus, “pasin i no stret long wanpela hap em inap daunim stretpela pasin long olgeta hap.” Ol man i wok long “mekim pasin i stret,” God bai makim ol long go insait long nupela taim i gat stretpela pasin long en, klostu nau em bai kamapim.—Sefanaia 2:3.
Yumi no ken tingim ol tok promis ol man bilong graun i bin mekim na long dispela as yumi ting stretpela pasin bai kamap long graun, nogat. Tasol yumi inap bilip tru long tok bilong gutpela Man bilong wokim yumi. Olsem na Jisas i tokim lain bilong em long ol i mas wok long beten long Kingdom bilong God i mas i kam. (Matyu 6:9, 10) Jisas, em man God i bin makim bilong kamap King bilong dispela Kingdom, em bai “helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.”—Song 72:12, 13.
Em nau, pasin i no stret bai pinis. Wok king Krais bai mekim long olgeta hap bilong graun, dispela bai daunim pasin i no stret i go inap oltaim oltaim, olsem God i tok promis long yumi long maus bilong profet Jeremaia, olsem: “Mi makim pinis wanpela taim na bai mi inapim dispela promis mi bin mekim . . . Long dispela taim bai mi mekim wanpela gutpela man tru i kamap long lain bilong Devit . . . Dispela man bai i mekim gutpela na stretpela pasin tru long olgeta manmeri.”—Jeremaia 33:14, 15.
[Futnot]
a I no nem tru bilong em.