Ol i Mekim Laik Bilong Jehova

Jisas i Stap Wantaim Ol Pikinini

TRI na hap yia bilong Jisas long mekim wok autim tok i laik pinis. I no longtaim na em bai i go insait long Jerusalem na karim bikpela pen na hevi na bai em i dai. Em i save pinis long ol samting bai painim em bihain, na em i tokim ol disaipel bilong em: “Ol bai i putim Pikinini Bilong Man long han bilong ol man, na ol bai i kilim em i dai.”​—⁠Mak 9:​31.

Yumi save, Jisas i no laik lusim nating olgeta wan wan de, wan wan aua, na olgeta liklik hap taim i stap yet. Em i gat wok yet long helpim ol disaipel. Jisas i lukim olsem ol i mas kisim strongpela tok long ol i mas mekim pasin daun na i no ken mekim pasin inap pundaunim ol narapela. (Mak 9:​35-37, 42-48) Na ol i mas kisim tu ol tok long marit, katim marit, na pasin bilong stap singel. (Matyu 19:​3-12) Jisas i save olsem i no longtaim na em bai i dai, olsem na em i bin toktok wantaim ol disaipel bilong em na em i mekim hariap. Jisas i tingim taim bilong em i bikpela samting​—⁠olsem na yumi kirap nogut long samting nau Jisas i mekim.

Jisas i Amamas Long Ol Pikinini i Kam Long Em

Stori long Baibel i tok: “Ol manmeri i bringim ol liklik pikinini i kam long Jisas. Ol i laik bai em i putim han long ol.” Taim ol disaipel i lukim olsem, kwiktaim ol i krosim ol manmeri. Ating ol i ting olsem Jisas em i bikman o em i gat planti wok tumas na em i no gat taim long toktok wantaim ol pikinini. Ating ol disaipel i bin kirap nogut tru taim Jisas i krosim ol yet! Em i tokim ol: “Larim ol pikinini i kam long mi. Yupela i no ken pasim ol. Nogat. Kingdom bilong God em i bilong kain man olsem ol dispela pikinini.” Na Jisas i tok moa: “Mi tok tru long yupela, sapos wanpela man i no kisim kingdom bilong God olsem ol liklik pikinini i save kisim, em i no inap i go insait long en. Nogat tru.”​—⁠Mak 10:​13-15.

Jisas i lukim ol pikinini i gat ol gutpela pasin. Ol i save laik long kisim save long ol samting na ol i save bilip long ol man. Ol i save kisim ol tok papamama i tokim ol long en na sampela taim ol i save sambai long papamama long ai bilong ol narapela pikinini. Ol man i laik i go insait long kingdom bilong God ol i mas i gat kain pasin olsem bilong ol pikinini long kisim kwik ol tok na ol i mas i gat pasin daun. Olsem Jisas i tok, ‘kingdom bilong God i bilong ol kain man olsem.’​—⁠Skelim wantaim Matyu 18:​1-5.

Tasol i no olsem Jisas i mekim wok long ol dispela liklik pikinini bilong mekim tok piksa tasol, nogat. Dispela stori i kamapim klia olsem em i save laik tru long i stap wantaim ol pikinini. Mak i stori olsem Jisas i “holim ol pikinini long han bilong en, na i putim han antap long ol, na em i askim God long mekim gut long ol.” (Mak 10:16) Mak tasol i stori gut olsem Jisas i “holim ol pikinini long han bilong en.”a Olsem na Jisas i no “putim han” tasol long ol dispela pikinini olsem ol papamama i ting em bai mekim​—⁠em i “holim ol.”

Taim Jisas i “putim han” antap long ol pikinini, dispela i makim wanem samting? Dispela i no makim olsem em i mekim wanpela pasin bilong lotu, kain olsem givim baptais, nogat. Tru, sampela taim dispela i olsem mak bilong makim ol man bilong mekim wanpela wok, na sampela taim dispela i makim olsem ol i blesim wanpela man. (Stat 48:14; Aposel 6:6) Olsem na ating samting Jisas i mekim i makim olsem em i blesim ol dispela pikinini.

Maski dispela i makim wanem samting, Mak i mekim wok long wanpela tok i strong liklik long dispela tok “blesing” (ka·teu·lo·geʹo), bilong strongim tok. Na dispela i makim olsem Jisas i givim bel tru long mekim gut long ol pikinini, na em i mekim long pasin isi na gutpela pasin. Em nau, Jisas i no ting olsem ol pikinini i pulim nating taim bilong em na ol i givim hatwok long em.

Dispela i Lainim Yumi Long Wanem Samting?

Pasin Jisas i mekim long ol pikinini na ol bikpela manmeri i no pretim ol o daunim ol. Wanpela buk bilong helpim yumi long save gut long dispela stori i tok: “Ating pes bilong em i mas lait na em i amamas na lap.” Olsem na i no hatwok long ol manmeri i gat kain kain krismas i stap klostu long em. Yumi ken tingim pasin Jisas i mekim long ol na yumi ken askim yumi yet olsem, ‘Olsem wanem? Ol narapela i no hatwok long kam long mi?’ ‘Olsem wanem? Mi gat planti wok tumas na mi no gat taim long tingim ol narapela?’ Pasin bilong tingim laik bilong ol narapela, em bai kirapim yumi long lusim hap taim bilong yumi long tingim ol, olsem Jisas i bin mekim. Ol narapela bai lukim olsem yumi save tingim ol na ol bai kam long yumi bilong kisim helpim.​—⁠Sindaun 11:⁠25.

Olsem stori bilong Mak i kamapim, Jisas i amamas long stap wantaim ol pikinini. Na ating em i save lusim hap taim long lukim ol pikinini i pilai, long wanem, long wanpela tok piksa em i bin stori long pilai ol pikinini i save mekim. (Matyu 11:​16-​19) Ating sampela bilong ol dispela pikinini em Jisas i blesim ol, ol i liklik tumas na ol i no inap pilim olsem Jisas em i wanem kain man na em i lainim ol long wanem samting. Tasol dispela i no mekim na Jisas i pilim olsem em i lusim nating taim bilong em. Em i stap wantaim ol pikinini, long wanem, em i laikim ol. Yumi ken ting planti bilong ol dispela pikinini em Jisas i bungim ol taim em i mekim wok autim tok, dispela pasin em i mekim i kirapim ol na bihain ol i kamap disaipel bilong em.

Jisas i bin lusim hap taim wantaim ol pikinini long taim nogut long dispela laspela wik bilong em i stap long graun, na yumi tu inap lusim hap taim wantaim ol pikinini maski yumi gat planti wok tru. Yumi mas tingim tru ol man em ol i mas kisim sampela helpim, olsem ol pikinini man na pikinini meri i no gat papamama. Na tru tumas, olgeta pikinini i save kamap strong taim ol man i tingim ol, na em i laik bilong Jehova olsem yumi mas laikim tru ol na helpim ol sapos yumi inap.​—⁠Song 10:⁠14.

[Futnot]