Wokabaut Wantaim God—Na Tingting Long Bihain Bihain
“Mipela bai wokabaut long nem bilong Jehova, em God bilong mipela, inap long taim bihain bihain, i go inap oltaim oltaim.”—MAIKA 4:5, NW.
GOD JEHOVA i no bin kamap nupela long wanpela taim. I stret Baibel i kolim em olsem “Man bilong bipo bipo yet,” long wanem, em i bin i stap long taim bipo bipo tru, i no gat kirap bilong dispela taim. (Daniel 7:9, 13) Na Jehova bai stap oltaim oltaim long bihain tu. Em wanpela tasol em i ‘King bilong oltaim.’ (KTH 10:6; 15:3, NW) Na long ai bilong em, wan tausen yia em i “olsem wanpela de tasol, na dispela taim i go pinis kwiktaim tumas, olsem asde tasol.”—Song 90:4.
2. (a) Wanem laik bilong God long ol manmeri i save bihainim tok bilong em? (b) Yumi mas putim ol laik na tingting bilong yumi i go long wanem samting?
2 Man bilong givim laip long yumi em i save stap oltaim, olsem na em inap givim laip oltaim long Paradais long namba wan man na meri, em Adam na Iv. Tasol Adam i no bihainim tok bilong God, olsem na em i no inap kisim laip i stap oltaim, na em i givim sin na dai long ol pikinini bilong em. (Rom 5:12) Tasol pasin bikhet bilong Adam i no pasim God long kamapim laik bilong em bilong pastaim tru. Em laik bilong Jehova long ol manmeri i save bihainim tok bilong em ol bai stap oltaim oltaim, na em bai kamapim tru dispela laik bilong em. (Aisaia 55:11) Olsem na long olgeta samting yumi laik mekim, i stret tru long yumi putim tingting bilong yumi i go long mekim wok bilong em, na tingting long bihain bihain i go inap oltaim oltaim. Tru, yumi mas tingim gut “de bilong Jehova,” tasol yumi no ken lusim tingting long mak yumi laik winim, olsem yumi bai wokabaut wantaim God i go inap oltaim oltaim.—2 Pita 3:12, NW.
Jehova i Save Mekim Ol Samting Long Taim Em i Bin Makim
3. Olsem wanem yumi save, Jehova i gat taim stret bilong kamapim ol laik bilong em?
3 Yumi ol manmeri i wokabaut wantaim God, yumi gat bikpela laik tru long em bai kamapim laik bilong em. Yumi save, Jehova em i Man bilong bihainim stret taim, na yumi bilip tru olsem em i no save lus long kamapim ol laik bilong em long taim stret em i bin makim. Olsem: “Long taim stret God i bin makim, em i salim Pikinini bilong en i kam.” (Galesia 4:4) God i bin tokim aposel Jon olsem “taim i laik kamap” bilong truim ol samting em i bin lukim olsem piksa bilong ol samting bai kamap bihain. (KTH 1:1-3) I gat “taim bilong ol man i dai pinis ol i mas kamap long kot.” (KTH 11:18) Winim 1,900 yia i go pinis, spirit holi i bin kirapim aposel Pol long tok olsem God “i makim pinis wanpela de bilong em bai i kotim ol manmeri. Na long stretpela pasin bilong en, em bai i skelim pasin bilong olgeta manmeri bilong graun.”—Aposel 17:31.
4. Olsem wanem yumi save, Jehova i gat laik long pinisim dispela pasin nogut i stap long graun?
4 Jehova bai pinisim dispela pasin nogut i stap long graun, long wanem, ol man bilong dispela taim ol i wok long bagarapim nem bilong em. Ol man nogut i bin kamap planti. (Song 92:7) Long ol tok na pasin bilong ol, ol i mekim nogut long God, na bel bilong em i save bagarap stret taim em i lukim ol i toknogutim ol wokboi bilong em na mekim nogut long ol. (Sekaraia 2:8) Olsem na Jehova i putim tok pinis olsem liklik taim nau na em bai pinisim oganaisesen bilong Satan olgeta! God i tingim pinis taim stret bilong dispela samting bai kamap, na truim bilong ol tok profet bilong Baibel i kamapim klia olsem nau yumi stap long “taim bilong las de.” (Daniel 12:4) Liklik taim nau na God bai kirap na mekim ol samting bilong mekim gut long olgeta man i save laikim tumas em.
5. Lot na Habakuk i ting olsem wanem long ol pasin nogut ol i stap namel long en?
5 Ol wokboi bilong Jehova long bipo ol i laik tru long lukim ol pasin nogut i pinis. Stretpela man Lot “em i lukim ol kain kain pasin pamuk samting bilong ol dispela man nogut na em i bel hevi tru.” (2 Pita 2:7) Profet Habakuk i stap namel long ol man i mekim ol pasin nogut na em i krai long God olsem: “Bikpela, planti taim mi singaut long yu. Wanem taim bai yu harim singaut bilong mi na yu helpim mipela, na ol dispela samting nogut i kamap long mipela i no ken bagarapim mipela? Mi lukim planti hevi i kamap long ol manmeri. Bilong wanem yu larim ol dispela hevi i kamap? Olsem wanem na yu lukim ol dispela samting nogut i kamap long ol manmeri na yu no mekim wanpela samting? Long olgeta hap mi lukim ol i bagarapim ol manmeri na ol samting bilong ol. Na ol man i save kros na pait nabaut.”—Habakuk 1:2, 3.
6 Hap tok Jehova i bekim long Habakuk i olsem: “Taim bilong ol dispela samting i mas kamap, em i no yet. . . . Tasol i no longtaim na dispela samting mi laik soim yu long en, em bai i kamap. Yu ting bai em i no inap kamap kwik, tasol yu mas wet liklik na em bai i kamap.” (Habakuk 2:3) Em nau, God i tokaut olsem, long “taim bilong ol dispela samting i mas kamap,” em bai kirap pinisim pasin nogut. Tru, i olsem em i no kirap kwik na mekim, tasol em bai kamapim tru laik bilong em—em i no inap lus long mekim!—2 Pita 3:9.
Wok Strong Long Mekim Wok Bilong God
7 Bilong wok strong tru long wokabaut wantaim God, yu ting yumi mas save long taim stret Jehova bai kirap mekim ol samting? Nogat. Yumi ken tingim sampela samting olsem: Jisas i gat laik tru long save, wanem taim God bai kamapim laik bilong em long graun olsem i stap long heven. Krais i bin skulim ol disaipel long beten olsem: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:9, 10) Jisas i save God bai mekim tru ol dispela samting em i bin beten long en, tasol em i no save long taim stret God bai mekim olsem. Long bikpela tok profet em i mekim long pinis bilong dispela pasin bilong nau, em i tok: “I no gat wanpela man i save wanem de na wanem aua dispela ol samting bai i kamap. Ol ensel long heven i no save, na Pikinini tu em i no save. Papa wanpela tasol em i save.” (Matyu 24:36) Krais Jisas i gat bikpela wok tru long ol samting God i laik mekim bilong kamapim laik bilong em, olsem na em bai insait long wok bilong bagarapim ol birua bilong Papa bilong em long heven. Tasol taim Jisas i stap long graun, em yet i no save wanem taim God bai kirap mekim dispela samting. Orait yu ting dispela i mekim na em i no wok strong tumas long mekim wok bilong Jehova? Nogat tru! Taim ol disaipel i lukim Jisas i wok strong long rausim ol man bilong wok bisnis long tempel, “ol i tingim wanpela tok i stap long buk bilong God. Dispela tok i olsem, ‘Mi laikim tru haus bilong yu, olsem na mi wok strong long mekim dispela haus i stap gut.’ ” (Jon 2:17; Song 69:9) Long olgeta de Jisas i mekim dispela wok God i bin salim em long mekim, na em i wok strong tru long mekim na em i no slek liklik. Na taim em i mekim wok bilong God, em i tingting long bihain bihain i go inap oltaim oltaim.
8 Na i wankain tu long ol disaipel bilong Krais. Taim Jisas i laik go antap long heven, em i bung wantaim ol. Baibel i tok: “Long dispela taim ol aposel i bung wantaim, na ol i askim em, ‘Bikpela, ating nau long dispela taim bai yu mekim kantri Israel i kamap strong gen na i gat king i bosim em, o nogat?’ ” Ol i wankain olsem Bikpela bilong ol—ol i laik tru long Kingdom i mas i kam. Tasol Jisas i bekim tok long ol olsem: “Em i no samting bilong yupela bai yupela i save long ol taim na ol de Papa i makim. Nogat. Em yet i bosim dispela ol samting. Tasol bihain Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.”—Aposel 1:6-8.
8, 9. Taim ol disaipel i askim Jisas olsem em bai kamapim gen Kingdom long Israel o nogat, em i tok wanem long ol? Taim ol i harim dispela tok, ol i mekim wanem?
9 Baibel i no makim olsem ol disaipel i bel hevi long dispela tok Jisas i givim long ol. Ol i wok strong tru long wok bilong autim tok. Insait long sampela wik, ol manmeri long olgeta hap bilong Jerusalem i harim pinis tok bilong ol. (Aposel 5:28) Na insait long 30 yia, ol i autim tok i go long planti hap moa, olsem na Pol inap tok, ol i bin autim gutnius “long olgeta manmeri i stap long graun.” (Kolosi 1:23) Tru, Jisas i no kamapim gen Kingdom long Israel olsem ol disaipel i ting bai em i mekim, na Kingdom i no kamap long heven long taim bilong ol, tasol ol i wok strong yet long mekim wok bilong Jehova na ol i tingting long bihain bihain i go inap oltaim oltaim.
Skelim Gut Bel Bilong Yumi
10. Yumi no save wanem taim God bai pinisim ol pasin bilong graun em Satan i bosim, na dispela i givim rot long yumi long kamapim klia wanem samting?
10 Ol wokboi bilong Jehova long nau tu ol i laik tru long lukim dispela pasin nogut bilong graun i pinis. Tasol yumi no tingting tasol long abrusim bagarap na go insait long nupela taim God i tok promis long kamapim, nogat. Bikpela tingting bilong yumi, em yumi laik bai nem bilong Jehova i stap holi na em bai kamapim long ples klia olsem em i Nambawan Bos bilong heven na graun. Olsem na yumi amamas long God i no bin tokim yumi long ‘de na aua’ em i bin makim bilong pinisim ol pasin bilong dispela graun bilong Satan. Dispela i givim rot long yumi long kamapim klia olsem yumi strong long wokabaut wantaim God inap oltaim oltaim, long wanem, yumi laikim em tru, na i no olsem yumi tingim skin bilong yumi yet na ol samting bilong helpim yumi long nau tasol.
11, 12. Wanem tok i kamap long pasin bilong Jop long i stap gut long God? Olsem wanem dispela em i samting bilong yumi tu?
11 Na taim yumi stap gut long God, dispela i helpim wok bilong kamapim klia olsem Satan i tok kranki tru taim em i tok stretpela man Jop—na ol manmeri i kain olsem em—ol i tingim ol yet tasol na ol i mekim wok bilong God. Taim Jehova i tok, wokboi bilong em Jop em wanpela man i no gat asua, na em i stretpela man na man bilong pret long God na i stap aninit long em, Satan i sutim tok long Em olsem: “Yu ting bai Jop i aninit long yu sapos em i no kisim wanpela samting long han bilong yu, a? Mi ting nogat. Long wanem, oltaim yu save lukaut gut long em na long famili bilong en na long olgeta samting bilong en. Oltaim yu save mekim gut long em, na yu bin givim em planti bulmakau moa inap long pulapim olgeta hap bilong kantri em i stap long en. Tasol sapos yu bagarapim na rausim dispela olgeta samting bilong en, orait bai yu lukim em i tok nogut tru long yu.” (Jop 1:8-11) Bikpela hevi i painim Jop, tasol em i stap gut long God, na long dispela rot Jop i kamapim klia olsem dispela tok Satan i sutim long em i giaman tasol.
12 Sapos yumi bihainim rot bilong i stap gut long God olsem Jop i bin mekim, yumi inap kamapim klia olsem Satan i giaman taim em i tok yumi mekim wok bilong God, long wanem, yumi save liklik taim bai em i givim gutpela pe long yumi. Yumi no save wanem taim stret God bai givim strafe bilong kot long ol man nogut, na dispela i givim rot long yumi long kamapim long ples klia olsem yumi laikim tru Jehova na yumi laik wokabaut long rot em i makim i go inap oltaim oltaim. Na dispela i soim olsem yumi stap gut long God na yumi bilip olsem pasin bilong em long mekim ol samting, em i stret tasol. Na tu, taim yumi no save long de na aua, dispela i helpim yumi long was i stap na yumi no slip long ol samting bilong spirit, long wanem, yumi save, pinis bilong dispela pasin nogut bilong graun em bai kamap long taim yumi no tingim, olsem stilman i save kam long nait. (Matyu 24:42-44) Taim yumi wokabaut wantaim Jehova long olgeta de, yumi mekim bel bilong em i amamas, na em inap bekim tok long Satan, em i save sutim tok long Em.—Sindaun 27:11.
Tingting Long Bihain Bihain
13. Baibel i givim wanem tingting long yumi long pasin bilong mekim ol samting bilong helpim sindaun bilong yumi long bihain?
13 Ol man i wokabaut wantaim God ol i save, em i pasin bilong gutpela tingting sapos ol i mekim sampela samting bilong helpim sindaun bilong ol long bihain. Planti man i save, taim ol i lapun bai olkain sik samting i painim ol na skin bilong ol i no strong moa, olsem na taim ol i yangpela yet na ol i gat strong, ol i save wok strong bambai ol i gat mani bilong lukautim ol yet taim ol i go lapun. Tasol olsem wanem long i stap bilong yumi long ol samting bilong spirit long bihain bihain? Dispela em i bikpela samting moa yet, a? Sindaun 21:5 i tok: “Ol man bilong wok ol i save tingting gut na mekim wok, olsem na wok bilong ol i kamap gutpela na ol i gat planti samting. Tasol sapos ol man i hariap tumas long mekim wok, bai wok bilong ol i no kamap gutpela na ol bai i sot long ol samting.” Taim yumi tingim ol samting bai yumi mekim na yumi tingting long bihain bihain i go inap oltaim oltaim, dispela bai helpim yumi tru. Yumi no save wanem taim stret pinis bilong dispela pasin bilong graun bai kamap, olsem na yumi mas tingting long ol samting yumi mas kisim bihain bilong helpim sindaun bilong yumi. Tasol yumi mas bihainim stretpela tingting long dispela samting na yumi mas putim wok bilong God i go pas long ol narapela samting long i stap bilong yumi. Ol man i sot long bilip, ating ol bai ting olsem sapos yumi strong long mekim laik bilong God na yumi putim olsem namba wan samting bilong yumi, yumi no tingim ol samting bilong bihain bihain. Tasol yu ting dispela tingting i stret?
14, 15. (a) Jisas i mekim wanem tok piksa long tingim ol samting bilong helpim sindaun bilong yumi long bihain? (b) Olsem wanem na maniman long tok piksa bilong Jisas i tingim ol samting bilong nau tasol?
14 Jisas i bin mekim wanpela tok piksa em inap givim save long yumi long dispela samting. Em i tok: “Gaden bilong wanpela maniman em i karim planti kaikai. Orait dispela man i ting olsem, ‘Bai mi mekim wanem nau? Mi no gat haus inap long bungim olgeta kaikai bilong mi.’ Na em i tok, ‘Ating bai mi mekim olsem. Bai mi brukim olgeta haus kaikai bilong mi, na wokim ol bikpela bikpela haus. Na bai mi bungim olgeta wit na olgeta gutpela samting bilong mi long ol dispela haus. Na bai mi tok long mi yet olsem. Man, mi win tru ya. Mi gat planti gutpela samting i stap inap long planti yia. Orait nau mi ken i stap malolo. Bai mi sindaun na mekim bikpela kaikai oltaim na amamas i stap.’ Tasol God i tokim em olsem, ‘Yu longlong man tru. Nau long dispela nait tasol bai yu dai. Na olgeta dispela samting yu bin redim i stap, em husat bai i kisim?’ Na Jisas i tok, ‘Dispela kain samting bai i kamap long ol man i hipim hipim planti samting bilong ol yet, tasol ol i stap rabis long ai bilong God.’ ”—Luk 12:16-21.
15 Yu ting Jisas i laik tok, i no stret dispela maniman i wok strong bambai em i gat ol samting bilong lukautim em bihain? Nogat, long wanem, Baibel i tok yumi mas wok strong. (2 Tesalonaika 3:10) Tasol pasin kranki dispela maniman i mekim i olsem: Em i no mekim ol samting bambai em i no ken “i stap rabis long ai bilong God.” Na maski em inap kisim amamas long mani kago bilong em i go inap planti yia, bihain em bai i dai. Em nau, em i tingim ol samting bilong nau tasol, na em i no tingting long bihain bihain i go inap oltaim oltaim.
16. I gat wanem as na yumi inap bilip na wetim Jehova i givim gutpela sindaun long yumi bihain?
16 Taim yumi wokabaut wantaim Jehova na yumi tingting long bihain bihain i go inap oltaim oltaim, dispela i helpim yumi na i makim olsem yumi tingim ol samting bilong bihain bihain. Em i gutpela rot tru bilong mekim ol samting bilong helpim yumi long bihain. Tru, em i pasin bilong gutpela tingting sapos yumi tingim ol samting olsem skul, na wok mani, na wok bilong lukautim famili, tasol yumi no ken lusim tingting olsem: Jehova i no save lusim ol wokboi bilong em ol i stap gut long em. King Devit i mekim singsing olsem: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i singaut long ol arapela man bilong ol i ken helpim ol. Nogat tru.” (Song 37:25) Jisas tu i tokaut olsem, olgeta manmeri em ol i wok long painim Kingdom pastaim na ol i wokabaut long stretpela rot Jehova i makim, em bai lukautim ol long ol samting bilong skin.—Matyu 6:33.
17. Olsem wanem yumi save, pinis i klostu?
17 Tru, yumi mekim wok bilong Jehova na yumi tingting long bihain bihain i go inap oltaim oltaim, tasol yumi tingim yet de bilong Jehova. Truim bilong ol tok profet i kamapim klia tru olsem dispela de i klostu pinis. Long taim bilong yumi i gat ol bikpela bikpela pait, ol bikpela sik, ol guria, kaikai i sot, na ol i bin mekim nogut long ol Kristen tru, na ol i autim gutnius bilong Kingdom long olgeta hap bilong graun. Dispela olgeta samting i olsem mak bilong taim bilong pinis bilong dispela pasin nogut i stap long graun. (Matyu 24:7-14; Luk 21:11) Planti manmeri long graun ol i save “laikim ol yet tasol, na ol i laikim tumas long kisim mani. Ol i litimapim nem bilong ol yet na hambak nabaut, na ol i tok kros na tok nogut long ol arapela. Ol i sakim tok bilong papamama, na ol i no tok tenkyu long ol manmeri i mekim gutpela pasin long ol. Ol i givim baksait long ol pasin bilong God. Ol i no save long pasin bilong i stap pren bilong ol arapela, na taim ol i kros, i no gat rot bilong pinisim kros bilong ol. Ol i tok nogut long ol arapela. Ol i no bosim laik bilong bodi bilong ol, na ol i pait na bagarapim ol man nabaut. Ol i birua long olgeta gutpela pasin. Ol i mekim nogut long ol pren bilong ol yet, na ol i bihainim kwik olgeta kranki tingting bilong ol yet. Ol i tingim ol yet i bikpela man tru. Ol i laikim tumas ol kain kain pasin bilong amamas bilong dispela graun, na ol i no laikim God.” (2 Timoti 3:1-5) Long dispela taim nogut bilong las de, i stap bilong yumi ol wokboi bilong Jehova i gat hatwok long en. Yumi dai tru long lukim dispela de em Kingdom bilong Jehova bai brumim olgeta pasin nogut i go pinis! Tasol nau long dispela taim, yumi mas strong long wokabaut wantaim God na tingting long bihain bihain i go inap oltaim oltaim.
Tingting Long Laip i Stap Oltaim
18, 19. Wanem samting i kamapim klia olsem ol bilipman bilong bipo ol i bin mekim wok bilong God na ol i tingting long bihain bihain i go inap oltaim oltaim?
18 Taim yumi wokabaut wantaim Jehova, yumi mas tingim bilip bilong Abel, Enok, Noa, Abraham, na Sara. Taim Pol i stori pinis long ol, em i tok: “Ol dispela manmeri ol i bilip long God i go inap long taim ol i dai. Taim ol i stap long graun, ol i no kisim ol dispela gutpela samting God i bin promis long givim ol. Nogat. I olsem ol i sanap na lukluk i go long ol dispela samting i stap longwe tru long ol, na ol i amamas long lukim ol. Na ol i no sem long tokaut olsem, ‘Mipela i stap long dispela graun olsem ol manmeri bilong narapela kantri.’ ” (Hibru 11:13) Ol dispela bilipman ol i “laikim tumas long kisim narapela graun, em i gutpela moa yet na i winim tru dispela graun. Em [bilong] heven.” (Hibru 11:16) Ol i bilip na wetim gutpela ples tru aninit long Kingdom bilong God i stap long han bilong Mesaia—em Paradais bai kamap long graun taim Kingdom bilong God i bosim graun.—Hibru 11:39, 40.
19 Profet Maika i kamapim strongpela tingting bilong lain bilong Jehova long lotuim God i go inap oltaim oltaim. Em i tok: “Olgeta lain manmeri bai wokabaut long nem bilong god bilong ol yet; tasol mipela bai wokabaut long nem bilong Jehova, em God bilong mipela, inap long taim bihain bihain, i go inap oltaim oltaim.” (Maika 4:5, NW) Maika i stap gut long mekim wok bilong Jehova i go inap long taim em i dai. Yumi save, taim em i kirap bek long nupela taim, dispela profet bai wokabaut yet wantaim God i go inap oltaim oltaim. Em i stap olsem gutpela piksa tru bilong yumi ol manmeri i stap nau long taim bilong pinis!
20. Yumi mas pasim tok long bel olsem yumi bai mekim wanem?
20 Yumi soim olsem yumi laikim tru nem bilong Jehova, na em i amamas long dispela. (Hibru 6:10) Em i save, i hatwok long yumi stap gut long em long dispela graun em Satan i bosim. Pasin bilong “dispela graun bai i pinis,” tasol “man i bihainim tok [olsem mekim laik] bilong God, em bai i stap oltaim.” (1 Jon 2:17; 5:19) Olsem na yumi mas pasim tok long bel olsem yumi bai karim ol hevi bilong olgeta wan wan de, na Jehova bai helpim yumi long karim. Olgeta tingting bilong yumi na i stap bilong yumi, em yumi mas stiaim i go long ol gutpela gutpela samting Papa bilong yumi long heven i tok promis long givim long yumi. Yumi inap kisim ol dispela samting sapos yumi wok yet long wokabaut wantaim God na tingting long bihain bihain i go inap oltaim oltaim.—Jut 20, 21.
Bai Yu Bekim Olsem Wanem?
◻ Wanem laik bilong God long ol manmeri i save bihainim tok bilong em?
◻ Bilong wanem Jehova i no kirap yet long pinisim ol man bilong dispela graun i givim baksait long God?
◻ Tru, yumi no save wanem taim God bai kirap na pinisim ol pasin nogut, tasol bilong wanem yumi no ken larim dispela i mekim na yumi lusim pasin bilong wok strong?
◻ Sapos yumi wokabaut wantaim God na tingting long bihain bihain i go inap oltaim oltaim, dispela bai helpim yumi olsem wanem?
1. I gat wanem as na yumi inap kolim Jehova olsem ‘King bilong oltaim’?
6. Taim Habakuk i beten, Jehova i bekim wanem tok long em? Dispela inap givim wanem save long yumi?
7. Jisas i no bin save wanem taim stret de bilong Jehova bai kamap, tasol em i mekim wok bilong em olsem wanem?
[Piksa long pes 17]
Bilong wokabaut wantaim God, yumi mas wok strong long mekim wok bilong em, olsem ol disaipel bilong Krais long bipo i bin mekim