Litimapim Nem Bilong King Bilong Oltaim!
“Bikpela i stap king inap oltaim oltaim.”—SONG 10:16.
OLTAIM OLTAIM—yu yet yu ting olsem wanem long dispela? Yu ting ol de na yia inap i go i go inap long oltaim oltaim? Yumi save, ol de na yia i bin kamap long olgeta taim bipo, i no gat kirap bilong en. Olsem na i stret yumi ken ting ol de na yia bai kamap inap long oltaim oltaim bihain, no gat pinis bilong en, a? Baibel New World Translation i tok, ol i litimapim nem bilong God “kirap long taim bipo bipo i go inap long taim bihain bihain.” (Song 41:13) Wanem insait bilong dispela tok? Bilong helpim yumi long save long dispela, yumi ken tingim narapela samting i wankain liklik—em ples antap i go i go tasol.
2 Dispela ples antap i bikpela olsem wanem? Em i gat mak bilong arere bilong en o nogat? Bipo yet na i kam inap long 400 yia i go pinis, ol man i bin ting graun bilong yumi i stap namel tru long dispela ples i gat ol sta long en. Orait bihain Galileo i wokim wanpela kompas bilong lukluk long en, na em inap lukim bikpela hap moa bilong ples antap. Nau Galileo inap lukim planti planti sta moa, na em inap soim ol man olsem dispela graun na ol narapela planet (olsem wanpela kain sta) ol i save wokabaut raunim san. Wanpela bikpela lain sta yumi lukim olsem smok long skai, tasol long dispela kompas bilong lukluk long en, Galileo i lukim olsem dispela smok em ol planti planti lain sta, inap olsem wan handet bilion. Insait long ol yia yumi stap laip, yumi no inap kaunim ol wan wan sta i go inap wan handet bilion. Bihain ol saveman bilong glasim ol sta samting ol i painim planti bilion bilion lain sta olsem. Long rot bilong ol strongpela kompas tru ol i wokim long nau, ol i wok long painim yet ol lain sta—ol i go i go tasol. I olsem i no gat arere bilong ples antap. Na i olsem tu long ol de na yia samting—em i go i go tasol, no gat pinis bilong en.
3 Tru, yumi ol man nating bilong graun i no inap save olgeta long samting bilong oltaim oltaim, olsem samting i no gat kirap o pinis bilong en. Tasol i gat wanpela Man i save tru long dispela. Em inap kaunim na kolim nem bilong olgeta planti planti sta i stap long ol bilion bilion lain sta long antap! Dispela man i tok: “Yupela lukluk i go antap long skai na lukim ol sta samting i stap antap. Husat tru i bin wokim ol? Em Bikpela tasol. Ol dispela samting i olsem lain ami bilong Bikpela. Em i save long namba bilong ol, na em i save long nem bilong wan wan bilong ol, na em i save kolim ol long nem bilong ol. Em i gat olgeta strong, olsem na i no gat wanpela bilong ol dispela samting inap lus. Ating yupela i no save, a? Ating yupela i no harim, a? Bikpela em i God bilong i stap oltaim oltaim. Em i mekim i kamap olgeta samting long olgeta hap bilong graun. Na i no gat man inap long save long olgeta tingting bilong em. Strong bilong en i no save slek na pinis.” (Aisaia 40:26, 28) Em i gutpela God tru, a? Tru tumas, yumi mas laik tru long lotuim dispela God!
Jehova “i Stap King Oltaim”
4 Long Song 10:16, Devit i stori long Man bilong wokim olgeta samting, em God, olsem: “Bikpela i stap king inap oltaim oltaim.” Na long Song 29:10 Devit i tok gen olsem: “Em [Jehova] i stap king oltaim.” Yes, Jehova em i King bilong oltaim! Na Devit i tokaut olsem dispela King i gat biknem, em i Man bilong wokim olgeta samting yumi save lukim long ples antap. Long Song 19:1, Devit i tok: “Skai i soim yumi olsem God i nambawan tru. Olgeta samting bilong antap i soim yumi gutpela wok bilong em.” Inap 2,700 yia bihain long taim Devit i mekim dispela tok, wanpela saveman bilong saiens i gat biknem, em Bikman Aisak Niuton, em i mekim wankain tok olsem bilong Devit. Em i tok: “San na ol sta na planet samting bilong antap, em ol i wok gut wantaim, ol inap kamap long wanpela rot tasol, olsem long laik na wok king bilong wanpela man i gat bikpela save na strong.”
5 Taim yumi kisim save olsem Bikpela King Jehova i bikpela tumas na ‘heven i no bikpela ples inap long em i stap long en,’ na yumi save, Jehova i stap oltaim oltaim, dispela save i mas kirapim yumi long daunim yumi yet na i stap aninit long em! (1 King 8:27) Olsem Aisaia 45:18 i tok, Jehova i bin “wokim skai na graun,” na em i save long planti samting tru em ol man bilong graun i no inap save long en. Long 1 Korin 1:19, Jehova i tok: “Bai mi rausim save bilong ol man i gat gutpela tingting na bai mi pinisim save bilong ol saveman.” Na long 1 Ko 1 ves 20, aposel Pol i tok: “Orait nau bai yumi tok wanem long ol gutpela tingting na save bilong ol saveman bilong dispela graun? Bai yumi tok wanem long ol man i save tumas long lo bilong Moses? Na long ol man i save tumas long pait long toktok? God i bin mekim olgeta save bilong ol man bilong dispela graun i kamap olsem kranki toktok tasol.” Na long 1 Ko sapta 3, ves 19, Pol i tok moa olsem: “Gutpela save bilong dispela graun em i olsem longlong pasin tasol long ai bilong God.”
6 Ol sta samting i stap antap, ol tu i samting God i bin wokim, olsem King Solomon i tok: “God i makim taim bilong olgeta samting i kamap, na ol i kamap long gutpela taim tru bilong ol. Na tu em i kirapim tingting bilong yumi na yumi laik save long ol samting i bin kamap bipo na long olgeta samting i laik kamap bihain. Tasol God i no larim yumi i save tru long olgeta samting em yet i mekim long bipo yet i go inap long bihain tru.” (Saveman 3:11) Tru tumas, God i bin putim tingting long bel bilong yumi na yumi laik save long ol samting bilong bipo na bilong taim bihain bihain, olsem bilong oltaim oltaim. Tasol yu ting yumi ol man inap kisim dispela save?
Gutpela Laip Tru Yumi Inap Kisim
7 Krais Jisas i bin beten long Jehova olsem: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Olsem wanem yumi inap kisim dispela save? Yumi mas stadi long Tok Bilong God, em Baibel. Long dispela rot yumi inap kisim stretpela save long ol gutpela gutpela samting God i laik mekim na ol samting em i laik mekim long rot bilong Pikinini bilong em, bambai yumi ken kisim laip i stap oltaim long Paradais long graun. Dispela em i “laip tru,” olsem 1 Timoti 6:19 i tok long en. Dispela bai i stret wantaim tok bilong Efesus 3:11, em i tok: “Bipo yet God i tingting long mekim ol dispela samting, na nau long wok bilong Krais Jisas, Bikpela bilong yumi, em i mekim pinis.”
8 Em nau, yumi ol sinman bilong graun inap kisim laip i stap oltaim sapos yumi larim God i skulim yumi na yumi bilip long ofa Jisas i mekim bilong baim bek yumi. God bai i skulim yumi i go inap wanem taim? Inap long oltaim oltaim bihain, dispela Man bilong wokim yumi em bai i skulim yumi long ol gutpela tingting na save bilong em. Gutpela save bilong Jehova i no gat pinis bilong en. Aposel Pol i save long dispela na em i tok: “Olaman! Ol gutpela pasin bilong God na tingting na save bilong en i pulap tru, na i daun tumas olsem solwara! Yumi man i no inap tru long painim as bilong olgeta tingting bilong en. Yumi no inap tru long bihainim olgeta rot bilong en.” (Rom 11:33) Olsem na 1 Timoti 1:17 i kolim Jehova olsem “King bilong olgeta taim”!
Save Bilong Jehova Long Wokim Ol Samting
9 Tingim gutpela ples em King bilong oltaim i bin givim long yumi ol manmeri. Song 115:16 i tok: “Heven em i ples bilong God tasol, na em i givim graun long yumi manmeri.” Em i givim gutpela samting tru long yumi, a? Tru tumas! Na yumi pilim tru gutpela wok em i bin mekim bilong redim graun bambai yumi ol man i ken i stap oltaim long en!—Song 107:8.
10 God i bin wokim ol gutpela samting tru long graun insait long ol 6-pela “de” em Stat sapta 1 i stori long en—olgeta wan wan de ol inap olsem sampela tausen yia. Taim God i wokim pinis ol samting, gutpela gras na ol diwai na gutpela plaua i karamapim graun. Na planti milion pis samting i pulap long solwara, na ol gutpela gutpela pisin i flai antap, na ol kain kain animal bilong ples na bilong bus, em olgeta i kamapim ol pikinini i kain olsem ol yet. God i wokim man na meri, na bihain long en Stat 1:31 i tok: “God i lukim olgeta dispela samting i gutpela, na em i amamas tru.” Dispela namba wan man na meri ol i gat gutpela ples tru bilong sindaun long en, a? Taim yumi lukim ol dispela gutpela samting God i wokim, yumi pilim tru gutpela tingting na bikpela save bilong dispela Man i bin wokim olgeta samting, na yumi save tu olsem em i tingim yumi na laikim tru yumi.—Aisaia 45:11, 12, 18.
11 Solomon i bin pilim tru gutpela tingting na save bilong dispela King bilong oltaim. Planti taim em i stori long gutpela tingting na save bilong Man bilong wokim yumi. (Sindaun 1:1, 2; 2:1, 6; 3:13-18) Solomon i tokim yumi olsem “graun i no save senis. Oltaim em i stap olsem tasol.” Em i pilim tru ol gutpela gutpela samting God i wokim, na wok bilong ol klaut bilong ren long givim wara long graun bilong yumi. Olsem na Solomon i tok: “Olgeta wara i save ran i go daun long solwara, tasol solwara i no pulap yet. Bihain, wara i save go bek long het bilong ol wara, na i ran i go daun gen.” (Saveman 1:4, 7) Olsem na taim ren na ol wara i givim wara long graun, bihain ol dispela wara i ran i go long solwara na san i pulim i go antap na ol klaut i kamap na ren i kam daun gen. Yu ting dispela graun na yumi ol manmeri bai stap olsem wanem sapos i no gat dispela pasin bilong klinim wara na givim wara long graun long olgeta taim?
12 Olgeta samting God i wokim ol i wok gut wantaim na yumi pilim tru, olsem na yumi mas mekim ol samting bilong tenkyu long em, olsem King Solomon i tok long pinis bilong Buk Saveman: “Bilong pinisim olgeta toktok, mi laik tok olsem, namba wan samting long laip bilong yumi man i olsem. Yumi mas aninit [olsem pret] long God tasol na bihainim ol lo bilong em. God bai i kotim yumi long olgeta pasin yumi bin mekim, em ol gutpela pasin na ol pasin nogut na ol pasin hait.” (Saveman 12:13, 14) Yumi mas pret long mekim pasin God i no laikim. Yumi mas wok long bihainim ol lo bilong em na i stap aninit long em.
13 Yes, yumi mas laik long litimapim nem bilong King bilong oltaim, long wanem, em i bin wokim ol gutpela samting tru! Song 104:24 i tokaut olsem: “Bikpela, yu bin wokim planti samting. Yu gat bikpela save na yu wokim olgeta dispela samting. Ol samting yu bin wokim i pulap tru long dispela graun.” Yumi mas amamas na wanbel long laspela tok bilong dispela song Sng 104:35 na tokim yumi yet na ol narapela man olsem: “Mi mas litimapim nem bilong Bikpela. Litimapim nem bilong Bikpela!”
Nambawan Wok Bilong God Long Graun
14 Olgeta samting Jehova i bin wokim i gutpela tru. Tasol nambawan gutpela samting em i bin wokim long graun, em yumi ol manmeri. Long pinis bilong namba 6 de, Jehova i wokim Adam na bihain em i wokim Iv. Tupela i winim tru ol pis na pisin na animal! Tru, God i bin putim save long skin bilong ol dispela animal samting na dispela i bosim ol samting ol i mekim, na i olsem planti ol i gat gutpela tingting. Tasol ol manmeri inap wokim tingting na kisim save, na ol i gat maus bilong bel em inap skelim wanem pasin i stret na wanem pasin i no stret, na ol inap tingim ol samting ol i laik mekim bihain, na ol i gat laik long bel bilong ol long lotuim wanpela samting. Ol dispela samting i bin kamap olsem wanem? Ol man i no bin kamap long rot bilong ol animal, olsem stori bilong evolusen i tok; God i wokim ol man i kamap olsem em yet. Olsem na ol man tasol inap bihainim ol pasin bilong Man i bin wokim yumi. Jehova i tok long em yet olsem: “Mi God na mi as bilong marimari na sori. Na mi no save belhat kwik. Mi save laikim tru olgeta manmeri, na mi save bihainim olgeta tok bilong mi.”—Kisim Bek 34:6.
15 Yumi mas litimapim nem bilong Jehova na tenkyu long em, long wanem, em i bin wokim skin bilong yumi i nambawan tru. Blut i save ran long olgeta rop bilong blut insait long skin bilong yumi wanpela taim long olgeta wan wan minit, na dispela i mekim na yumi stap laip. Olsem Lo 12:23 i tok, “blut em i as bilong laip,” na laip bilong yumi em i gutpela samting tru long ai bilong Jehova. Yumi gat ol strongpela bun, na ol gutpela masol, na ol rop wailis i wok gut, na kru bilong yumi i winim tru kru bilong ol animal, na em inap bungim bikpela save moa yet, winim tru wanpela kompyuta i traipela olsem wanpela longpela haus i go antap tru. Taim yu tingim dispela samting, ating dispela i mekim na yu daunim yu yet, a? Na i stret yu mekim olsem. (Sindaun 22:4) Na tingim dispela tu: Yumi gat wetlewa, na nek bilong toktok, na tang, na tit, na maus, na ol dispela samting i save wok gut wantaim na yumi ol manmeri inap mekim toktok long planti tausen tok ples. Devit i mekim wanpela song i stret tru long Jehova, olsem: “Olgeta samting yu wokim i narakain na i nambawan tru. Mi save gut long dispela samting na mi pilim tru.” (Song 139:14) Yumi mas litimapim nem bilong Jehova olsem Devit i bin mekim na yumi mas tenkyu long Em, em i bin wokim yumi gutpela tru na em i God bilong yumi!
16 Long yia 1750 samting, Josep Heiden i bin raitim wanpela gutpela singsing bilong litimapim nem bilong Jehova. Dispela singsing i tok: “Yupela olgeta gutpela samting God i bin wokim, yupela tenkyu long Em! Mekim singsing bilong givim biknem long Em, mekim singsing bilong litimapim nem bilong Em, mekim gut Nem bilong Em na litimapim! Oltaim oltaim yumi mas litimapim nem bilong Jehova. Tru tumas, yumi mas mekim olsem!” Na i gat planti tok long Buk Song i gutpela moa yet, olsem wanpela tok i kamap 4-pela taim long Song 107 ves 8, 15, 21, 31, em wanpela singaut i go long yumi, em i tok: “Ol i mas tenkyu tru long Bikpela, oltaim em i save sori long ol, na em i mekim gutpela wok tru bilong helpim ol.” Olsem wanem long yu? Yu save tenkyu long Jehova na litimapim nem bilong em? Yu mas mekim olsem, long wanem, Jehova, em King bilong oltaim, em i As bilong olgeta gutpela gutpela samting.
Ol Wok i Bikpela Moa Yet
17 Insait long 6 tausen yia i go pinis, King bilong oltaim em i bin kirapim sampela bikpela wok moa yet. Laspela buk bilong Baibel, em Kamapim Tok Hait 15:3, 4, i stori long ol lain long heven i bin winim pait na daunim strong bilong ol ensel nogut i stap birua bilong ol: “Ol i singim song bilong Moses, em wokman bilong God, na song bilong Pikinini Sipsip. Dispela song i olsem, ‘Bikpela, yu God I Gat Olgeta Strong, yu save mekim ol narakain strongpela wok, na taim mipela i lukim mipela i save kirap nogut tru. King bilong olgeta lain manmeri, ol pasin bilong yu ol i stret na i tru olgeta. Bikpela, yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu. Olgeta lain man bai i kam na lotu long yu. Long wanem, stretpela pasin bilong yu i kamap ples klia pinis.’ ” Bilong wanem ol i kolim dispela song olsem ‘song bilong Moses na bilong Pikinini Sipsip’? Orait yumi ken stori long dispela samting na bai yumi save.
18 Inap 3,500 yia samting bipo, taim ol ami bilong king bilong Isip i bagarap long solwara Retsi, ol Israel i mekim singsing bilong tok tenkyu long Jehova na litimapim nem bilong em. Kisim Bek 15:1, 18 i tok olsem: “Long dispela taim Moses wantaim ol Israel i singim wanpela song long Bikpela olsem, ‘Nau bai mi singim song long Bikpela, long wanem, em i winim bikpela pait tru. Em i tromoi ol hos wantaim ol man i sindaun long ol hos i go insait long solwara. Bikpela, yu bai stap king oltaim oltaim.’ ” Stretpela pasin bilong dispela King bilong oltaim i kamap ples klia long taim em i mekim kot long ol birua i sakim wok king bilong em na em i bagarapim ol.
19 Bilong wanem Jehova i mas mekim olsem? Long gaden Iden Snek i pulim tupela tumbuna bilong yumi bilong pastaim tru long mekim sin. Dispela i mekim na sin i stap long skin bilong olgeta manmeri. Tasol kwiktaim King bilong oltaim i tingim laik bilong em bilong pastaim na kwiktaim em i kirap mekim ol samting i olsem rot bilong rausim ol birua bilong em long bihain na kamapim bek Paradais long graun. King bilong oltaim i kamapim lain Israel na em i givim Lo long ol na bai dispela i ken i stap olsem piksa bilong ol samting em bai mekim bilong kamapim dispela laik bilong em.—Galesia 3:24.
20 Tasol bihain Israel yet i lusim God, na bihain moa ol i mekim samting nogut tru—ol hetman bilong ol i putim Pikinini bilong God yet long han bilong ol Rom bilong givim bikpela pen nogut tru long em na kilim em i dai. (Aposel 10:39; Filipai 2:8) Tasol Jisas i stap gut long God i go inap long taim em i dai, olsem “Pikinini Sipsip Bilong God” ol i kilim olsem ofa; olsem na God i gat rot long bekim tok long Satan—em Birua bilong God bilong bipo yet—em Satan i bin tok, sapos bikpela traim i painim ol man, i no gat wanpela bai i stap gut long God. (Jon 1:29, 36; Jop 1:9-12; 27:5) Planti milion manmeri ol i pret long God na ol i bihainim pasin bilong Jisas long i stap gut long God, maski sin bilong Adam i stap long skin bilong ol na Satan i putim bikpela hevi long ol.—1 Pita 1:18, 19; 2:19, 21.
21 Nau taim i kamap pinis bilong Jehova i givim pe long ol man i stap gut long em, na em bai mekim kot long olgeta man i birua long tok i tru na stretpela pasin. (Aposel 17:29-31) Dispela bai kamap olsem wanem? Bai yumi toktok long dispela samting long stori i kamap bihain long dispela.
Blok Bilong Rivyu
◻ Bilong wanem i stret Baibel i kolim Jehova olsem “King bilong olgeta taim”?
◻ Olsem wanem gutpela tingting na save bilong Jehova i kamap ples klia long ol samting em i bin wokim?
◻ Olsem wanem yumi save, ol man i nambawan gutpela samting tru God i bin wokim?
◻ Wanem ol bikpela wok i kamap na ol i mekim ‘song bilong Moses na bilong Pikinini Sipsip’?
[Askim Bilong Stadi]
1. Yumi tingim ol de na yia i go inap oltaim oltaim na yumi gat wanem ol askim long dispela?
2, 3. (a) Yumi gat wanem ol askim long bikpela ples antap na dispela i helpim yumi long save liklik long samting bilong oltaim oltaim? (b) Bilong wanem yumi mas laik tru long lotuim King bilong oltaim?
4. (a) Devit i tok wanem long King bilong oltaim? (b) Wanpela saveman i gat biknem tru long wok saiens em i tok ples antap na graun i kamap olsem wanem?
5. Aisaia na Pol i tok wanem long As bilong gutpela tingting na save?
6. Tok bilong Saveman 3:11 long samting bilong “bipo yet i go inap long bihain tru,” dispela i makim wanem samting?
7, 8. (a) Wanem gutpela samting tru inap painim ol man long bihain? Ol inap kisim dispela samting olsem wanem? (b) Bilong wanem yumi amamas long God bai skulim yumi i go inap oltaim oltaim?
9, 10. (a) Jehova i bin mekim wanem ol gutpela wok tru bilong redim graun na givim long ol man olsem presen? (b) Olsem wanem gutpela tingting na bikpela save bilong Jehova i kamap ples klia long ol samting em i bin wokim? (Lukim blok.)
11. Solomon i tok wanem long gutpela tingting na save bilong Jehova long wokim ol samting?
12, 13. Olsem wanem yumi ken kamapim klia olsem yumi tenkyu long God long ol gutpela samting em i bin wokim?
14. Ol man God i bin wokim, olsem wanem ol i winim tru ol animal?
15. Bilong wanem yumi mas mekim pasin daun na litimapim nem bilong Jehova?
16. Wanpela man i gat biknem long musik em i raitim wanem singsing bilong litimapim nem bilong Jehova? Yumi mas bihainim wanem singaut?
17. Olsem wanem ‘song bilong Moses na bilong Pikinini Sipsip’ i litimapim nem bilong Jehova?
18. Wanpela singsing long Kisim Bek sapta 15 i kolim wanem bikpela wok tru i bin kamap?
19, 20. (a) Bilong wanem Jehova i bin kamapim lain Israel? (b) Pikinini Sipsip na sampela moa ol i mekim wanem na God i gat rot long bekim tok long Satan?
21. Long stori i kamap bihain long dispela bai yumi toktok long wanem samting i stret wantaim tok bilong Aposel 17:29-31?
[Blok long pes 12]
Gutpela Tingting na Save Bilong Jehova
Gutpela tingting na save bilong King bilong oltaim i kamap ples klia long ol samting em i bin wokim long graun. Agur i tok: “Tok bilong God i tru olgeta. Olgeta samting em i tok long mekim, em i save kamap tru. Na em i save banisim gut olgeta man i go long em, olsem hap plang i haitim soldia long taim bilong pait.” (Sindaun 30:5) Orait nau Agur i stori long planti samting i gat laip em God i bin wokim, ol bikpela samting na ol liklik samting. Long ves 24 i go inap 28, em i stori long “4-pela kain animal na binatang i liklik, tasol ol i gat gutpela tingting tru.” Em ol anis, na mumut, na grasopa, na liklik palai.
“Ol i gat gutpela tingting tru”—em God i bin wokim ol olsem. Ol i no inap wokim tingting na skelim gut ol samting ol i mas mekim, olsem yumi ol man i save mekim; ol i bihainim save God i bin putim long skin bilong ol. Ating yu kirap nogut long ol samting ol inap mekim, a? Ol i save wok gut tru wantaim. Tingim ol anis—ol i save bung long ol narapela narapela lain, na olgeta wan wan lain i gat kwin bilong ol, na wokboi, na ol anis man. Sampela kain anis ol i save wokim banis na bungim ol liklik waitpela binatang long en, em ol i kolim efit, na ol i lukautim ol olsem lain bulmakau. Ol i save kisim susu long ol dispela binatang, na taim ol i mekim olsem, ol anis i stap olsem soldia ol i rausim ol birua i go. Sindaun 6:6 i tokim yumi olsem: “Yupela ol lesman, . . . yupela go lukim gut pasin bilong ol anis na bai yupela i kamap saveman.” Pasin bilong ol anis i mas kirapim yumi ol man long “wok strong long mekim wok bilong Bikpela.”—1 Korin 15:58.
Ol man i bin wokim ol traipela balus, tasol ol pisin i winim tru ol balus long flai antap, na wanpela liklik pisin tru ol i kolim hamingbet, em hevi bilong en i aninit long 30 gram, em tu i winim ol dispela balus ol man i wokim. Wanpela bikpela smok balus, em Boeing 747, em i mas karim 180,000 lita bensin, na ol pailot samting bilong en i mas lain gut pastaim bambai ol i ken stiaim balus, na ol dispela balus i mas i gat kain kain masin samting bilong helpim ol long brukim biksolwara na bihainim rot ol i mas go long en. Tasol dispela liklik pisin tru ol i kolim hamingbet, em i save mekim wok long liklik gris tasol i stap long skin bilong en, olsem 1 gram tasol, bilong kirap long Not Amerika na flai i go na brukim Pasis Bilong Meksiko na i go kamap long Saut Amerika. Ol i no save karim bikpela bensin, na ol i no save lain long bihainim stret rot, na ol i no gat ol mep na kompyuta! Yu ting ol i bin kamap nating long rot bilong evolusen tasol na ol inap mekim ol dispela samting? Nogat tru! Dispela liklik pisin tru i gat “gutpela tingting tru,” em God Jehova, Man bilong wokim em, i bin putim long skin bilong en.
[Piksa long pes 10]
Ol kain kain samting King bilong oltaim i bin wokim i litimapim nem bilong em
[Piksa long pes 15]
Moses wantaim olgeta Israel ol i mekim singsing amamas taim Jehova i daunim ol birua long solwara Retsi, na olsem tasol bai i gat bikpela amamas i kamap taim Armagedon i pinis