Ol Wok Bilong Bikpela Man i Bin Wokim Yumi
TAIM ol man i lukim ol traipela baret na maunten ston long Arisona o Hawaii, o ol traipela wara i kalap na i go daun moa, olsem Iguasu na Naiagra, na ol traipela maunten i go antap na ol baret bilong en i daun moa na solwara i ran long en, olsem long Nowe o Nu Silan, ol i kirap nogut tru long ol dispela gutpela samting ol i lukim! Tasol yu ting ol dispela gutpela samting i kamap nating tasol? Nogat tru! Em ol gutpela wok bilong Bikpela Man i bin wokim olgeta samting, em gutpela Papa bilong yumi long heven. King Solomon i bin tok long em olsem: “God i makim taim bilong olgeta samting i kamap, na ol i kamap long gutpela taim tru bilong ol. Na tu em i kirapim tingting bilong yumi na yumi laik save long ol samting i bin kamap bipo na long olgeta samting i laik kamap bihain. Tasol God i no larim yumi save tru long olgeta samting em yet i mekim long bipo yet i go inap long bihain tru.” (Saveman 3:11) Tru tumas, yumi mas i stap oltaim oltaim bilong save long olgeta gutpela samting God i bin wokim long antap na long graun!
Em nau, yumi amamas tru long dispela Bikpela Man i bin wokim olgeta samting! Nau long “taim bilong las de” dispela God i gat olgeta strong em “i bin autim tok long yumi long maus bilong Pikinini Man bilong em.” (Hibru 1:2) Dispela Pikinini bilong God, em Jisas, em i bin amamas tru long olgeta gutpela samting Papa bilong em i bin wokim. Planti taim em i bin tokaut long ol dispela samting taim em i kamapim klia laik bilong God, na taim em i laik strongim bel bilong ol man em i autim tok long ol. (Matyu 6:28-30; Jon 4:35, 36) Planti man “i bilip,” ol i pilim tru olsem olgeta gutpela samting ol i lukim long antap na long graun, em “God em i mekim . . . i kamap long tok bilong em yet.” (Hibru 11:3) Olgeta wokabaut bilong yumi i mas kamapim klia dispela bilip bilong yumi.—Jems 2:14, 26.
Tru tumas, olgeta samting God i bin wokim i gutpela tru. Ol i kamapim long ples klia bikpela save na strong na stretpela pasin na pasin sori bilong em. Taim em i putim graun, em i slipim liklik, na taim graun i wokabaut na raunim san, ol man em God i bin tingting long kamapim ol inap amamas long ol kain kain taim bilong yia, olsem God i tok: “Bai i gat taim bilong planim kaikai na taim bilong kamautim kaikai. Bai i gat taim bilong kol na taim bilong ples i hat. Bai i gat taim bilong san na taim bilong ren. Bai i gat san na nait. Dispela olgeta kain taim bai i no ken pinis long taim graun i stap yet.” (Stat 8:22) Na God i putim ol kain kain gutpela ain insait long graun, na em i putim planti wara long graun bilong helpim ol samting i gat laip long graun na ol i ken i stap.
Kirap long namba wan de i go inap namba 6 de (olgeta wan wan de i gat wan tausen yia bilong en), God i wok long redim dispela graun bambai ol man i ken i stap long en. Olgeta samting, olsem lait bilong helpim yumi long lukluk, na win yumi save pulim, na graun bilong yumi ken i stap long en, na ol diwai na sayor samting, na san na nait, na ol pis na pisin na animal—olgeta dispela samting God i bin wokim bilong helpim ol man long i stap amamas. (Stat 1:2-25) Olsem na yumi inap mekim wankain tok olsem man bilong raitim Song long Baibel: “Bikpela, yu bin wokim planti samting. Yu gat bikpela save na yu wokim olgeta dispela samting. Ol samting yu bin wokim i pulap tru long dispela graun.”—Song 104:24.
Bikpela Samting Tru God i Wokim
Taim namba 6 “de” i laik pinis God i wokim man, na bihain em i wokim meri, olsem poroman bilong man. Em nambawan gutpela samting tru God i bin wokim bilong pinisim ol wok bilong em long graun! Song 115:16 i tok: “Heven em i ples bilong God tasol, na em i givim graun long yumi manmeri.” Jehova i wokim yumi man bambai yumi ken amamas long ol narapela samting em i bin wokim long graun, na yumi ken amamas long en. Yumi ken amamas tru long gutpela ai bilong yumi—em i winim tru ol gutpela kamera—em inap lukim ol gutpela gutpela samting i stap long graun na ol i gat kala kala. Na yumi gat yau—em i winim tru ol masin olsem spika—na yumi inap harim toktok bilong man na gutpela musik na gutpela krai bilong ol pisin. Na yumi gat maus bilong toktok na bilong pilim swit bilong kaikai, na yumi inap harim gutpela smel bilong kaikai. Na yumi gat han tu bilong mekim ol gutpela wok long en. Olsem na yumi mas tenkyu tru long Bikpela Man i bin wokim yumi, olsem man bilong raitim Song i bin mekim: “Yu bin wokim olgeta hap bilong bodi bilong mi . . . i nambawan tru. Mi save gut long dispela samting na mi pilim tru.”—Song 139:13, 14.
Gutpela Pasin Sori Bilong God
Man bilong raitim Song em i tok: “Yumi mas tenkyu long Bikpela [Jehova], long wanem, em i save mekim gutpela pasin long yumi. Oltaim oltaim em i save laikim yumi moa yet.” (Song 136:1-4) Long nau, pasin sori bilong em i kirapim em long mekim ol gutpela gutpela samting i winim tru ol dispela wok em i bin mekim bipo. Tru em i malolo long wokim ol samting yumi inap lukim, tasol em i wokim sampela samting bilong spirit. Em i mekim olsem bilong bekim tok long wanpela man i bin sutim tok nogut long em.
God i bin putim namba wan man na meri long wanpela gutpela ples paradais, em Iden. Tasol wanpela bikhet ensel, em Satan, em i laik litimapim em yet olsem wanpela god, na em i pulim tupela long bikhet long Jehova. Olsem na God i makim tupela bilong i dai, na yumi ol pikinini bilong ol, em yumi olgeta man bilong graun, yumi kisim sin long tupela na yumi save dai. (Song 51:5) Stori bilong Jop long Baibel i makim olsem Satan i sutim tok long God na i tok, i no gat wanpela man inap holimpas bilip na stap gut long God sapos traim i painim em. (Jop 1:7-12; 2:2-5, 9, 10; 27:5) Jisas em i nambawan olgeta, na em i makim rot yumi ken bihainim bilong holimpas bilip na stap gut long God.—1 Pita 2:21-23.
Olsem na Jisas inap tok, “Hetman [Satan] i save bosim dispela graun . . . i no gat strong bilong mekim wanpela samting long mi.” (Jon 14:30) Tasol i kam inap nau, “graun olgeta em i stap aninit long strong bilong Satan.” (1 Jon 5:19) Jehova i givim bikpela hap taim long Satan, olsem 6,000 yia, bilong truim tok bilong em olsem em yet inap bosim gut graun, na i no stret long Jehova i stap King. Tasol Satan i pundaun tru long mekim dispela wok, na ol hevi na pasin nogut i stap long graun i kamapim klia dispela samting! Tasol liklik taim nau na God Jehova bai pinisim olgeta manmeri bilong graun em ol i mekim pasin nogut, na em yet bai bosim graun. Em nau, ol manmeri i laik tumas long i stap isi aninit long wanpela stretpela gavman, ol bai amamas tru!—Song 37:9-11; 83:17, 18.
Na sori bilong God bai kamap ples klia moa yet, olsem Jisas i tok long Jon 3:16: “God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” Tasol bilong mekim olsem, God i mas wokim sampela nupela samting. Em wanem ol samting? Olsem wanem ol bai helpim ol man i gat planti hevi? Stori i kam bihain long dispela bai tokim yumi long ol dispela samting.