Taitus—‘Em i Wanwok Bilong Mi Long Wok Bilong Helpim Yupela’

SAMPELA taim ol hevi i bin kamap insait long kongrigesen Kristen bilong pastaim. Ol i mas stretim ol dispela hevi, na bilong mekim olsem ol i mas i gat strongpela bel na bihainim tok. Wanpela man i bin stretim sampela hevi olsem, em Taitus. Em i bin mekim wok wantaim aposel Pol, na em i wok strong long helpim ol man long mekim ol samting long pasin Jehova i makim. Olsem na Pol i tokim ol Kristen long Korin olsem Taitus em i wanpela ‘wanwok bilong em long wok bilong helpim ol.’​—⁠2 Korin 8:​23.

Taitus em i husat? Em i bin mekim wanem wok bilong stretim ol hevi? Na taim yumi tingim ol pasin bilong em, dispela inap helpim yumi olsem wanem?

Tok Bilong Pasin Bilong Katim Skin

Taitus em i wanpela Grik ol i no bin katim skin bilong em. (Galesia 2:⁠3)a Pol i tokim em, “yu pikinini tru bilong mi, na yu gat wankain bilip olsem mipela olgeta,” olsem na ating Taitus em i wanpela pikinini bilong dispela aposel long spirit. (Taitus 1:4; skelim wantaim 1 Timoti 1:⁠2.) Taitus i bin stap wantaim Pol, Barnabas, na sampela bilong Antiok, Siria, taim ol i go long Jerusalem long yia 49 C.E. samting bilong toktok long tok i bin kamap long pasin bilong katim skin.​​—⁠Aposel 15:​1, 2; Galesia 2:⁠1.

Long Jerusalem ol i bin bung na toktok long ol man bilong ol narapela lain i no bin katim skin ol i tanim bel, olsem na sampela i ting Pol i bin kisim Taitus i go wantaim ol bilong kamapim klia olsem God i laikim ol Juda na ol man i no Juda, maski ol i bin katim skin o nogat. Sampela bilong kongrigesen long Jerusalem, taim ol i no kamap Kristen yet ol i stap Farisi, olsem na ol i tok, ol man bilong ol narapela lain i tanim bel ol i mas katim skin na bihainim Lo Bilong Moses. Tasol ol narapela i sakim dispela tok bilong ol. Sapos ol i subim Taitus na sampela moa bilong ol narapela lain long katim skin, dispela bai makim olsem ol i sakim dispela bilip olsem ol inap kisim laip oltaim long marimari bilong Jehova tasol na long bilip bilong ol long Krais Jisas​—⁠long dispela rot tasol God bai kisim bek ol man, na i no long rot bilong bihainim Lo Bilong Moses. Na sapos ol i subim ol long katim skin, dispela bai sakim ol samting i kamapim klia olsem ol man bilong narapela lain i bin kisim spirit holi bilong God.​​—⁠Aposel 15:​5-​12.

Em i Go Long Korin

Taim ol i stretim pinis dispela tok long pasin bilong katim skin, ol i givim namba long Pol na Barnabas long go long ol man bilong ol narapela lain na autim tok long ol. Na ol i laik bai tupela i helpim ol rabisman tu. (Galesia 2:​9, 10) Taim Baibel i stori long Taitus 6-pela yia bihain long dispela, em i stap long Korin olsem wokman Pol i bin salim bilong stretim wok long bungim mani bilong helpim ol manmeri bilong God. Taim Taitus i wok long mekim olsem, i gat narapela hevi i kamap.

Pas Pol i raitim long ol Korin i kamapim klia olsem pastaim em i bin tokim ol long ol “i no ken stap wantaim ol man bilong mekim pasin pamuk.” I gat wanpela man bilong mekim pasin pamuk na em i no tanim bel, na Pol i tok ol i mas rausim dispela man i stap namel long ol. Yes, Pol i raitim pas long ol i gat strongpela tok long en, na taim em i mekim olsem, em i “krai planti wantaim.” (1 Korin 5:​9-​13; 2 Korin 2:⁠4) Insait long dispela taim, Pol i salim Taitus i go long Korin bilong wok wantaim ol long bungim mani bilong helpim ol Kristen Juda i sot long ol samting. Na tu, ating Pol i salim em i go bilong save ol Korin ol i gat wanem tingting long dispela tok long pas bilong Pol.​—⁠2 Korin 8:​1-6.

Ol Korin bai mekim wanem taim ol i kaunim dispela tok bilong Pol? Pol i laik save, olsem na ating em i tokim Taitus long go long Korin na salim tok i kam bek hariap​—⁠ating Taitus i lusim Efesus na brukim solwara Ijien na kamap long Korin. Sapos em i mekim pinis dispela wok paslain long taim bilong bikpela kol na ol sip i no raun moa (long Novemba samting), orait Taitus inap kalap long sip na go long Troas, o wokabaut long longwe rot long hap bilong Helespon. Ating Pol i kamap hariap long Troas, em ples ol i bin pasim tok long bung long en, long wanem, ol man bilong wokim ol samting long silva ol i bin kamapim pait na Pol i bin lusim Efesus hariap. Em i wet i stap long Troas, na bihain liklik, em i save olsem Taitus i no ken kam long rot bilong sip. Olsem na Pol i kirap na wokabaut i go bambai em i ken bungim em long rot. Taim Pol i kamap long hap bilong Yurop, em i wokabaut long rot ol i kolim Via Egnatia, na bihain em i bungim Taitus long Masedonia. Pol i amamas tru taim em i harim tok olsem ol Korin i stap gut. Kongrigesen i bihainim gut ol tok em i bin raitim long ol.​​—⁠2 Korin 2:​12, 13; 7:​5-7.

Ating Pol i bin tingting planti, ol Korin bai mekim wanem long dispela man em i bin salim i go long ol, tasol God i bin helpim Taitus long inapim wok bilong em. Taim Taitus i kam pinis long ol, ol i “pret na guria” na ol i kisim em. (2 Korin 7:​8-​15) Wanpela saveman bilong Baibel, em W. D. Thomas, em i tok: ‘Yumi ken ting olsem Taitus i no daunim strong bilong tok em Pol i bin givim long ol Korin, nogat; em i toktok gut wantaim ol na em i no skrapim bel bilong ol. Em i tok, Pol i bin givim dispela tok long ol, long wanem, em i laik bai ol i stap gut long ol samting bilong spirit.’ Ol Kristen long Korin i redi long bihainim tok na senisim pasin bilong ol na dispela i kirapim Taitus long laikim tru ol. Gutpela pasin bilong ol i bin strongim bel bilong em.

Olsem wanem long dispela narapela wok Taitus i mas mekim long Korin​—⁠em i mas stretim wok long bungim mani bilong helpim ol manmeri long Judia? Ol tok bilong 2 Korin i kamapim klia olsem Taitus i bin mekim dispela wok tu. Ating Pol i raitim dispela pas long Masedonia long 55 C.E., bihain liklik long taim Pol i bungim Taitus. Taitus i bin kirapim wok bilong bungim mani, na Pol i tok em bai salim Taitus i go bek wantaim tupela helpim, em Pol i no kolim nem bilong ol, na bai Taitus i ken inapim dispela wok em i bin kirapim. Taitus i gat bikpela laik long helpim ol Korin, olsem na em i amamas tru long go bek. Taim em i go bek long Korin, ating em i kisim namba tu pas Pol i bin raitim i go long ol Korin.​​—⁠2 Korin 8:​6, 17, 18, 22.

Taitus i gat save long stretim wok, na tu, pasin bilong em i gutpela, olsem na Pol inap givim wok long em bilong stretim gut ol hevi i bin kamap. Em i gat strongpela bel na em i stap strong. Pol i ting Taitus inap stretim ol hevi em ol man ol i kolim olsem ol “namba wan aposel” i save kamapim. (2 Korin 11:⁠5) Narapela bikpela wok Taitus i mekim na Baibel i stori long en, em i kamapim klia olsem dispela tok long pasin bilong Taitus em i stret.

Long Ailan Krit

Ating namel long yia 61 na 64 C.E., Pol i raitim pas long Taitus​—⁠long dispela taim Taitus i stap long ailan Krit long solwara Mediterenian. Pol i bin lusim em i stap long dispela hap bambai em i ken “stretim olgeta hap wok i no stret yet” na long “makim ol hetman bilong sios long olgeta taun.” Planti Krit i gat nem olsem “man bilong giaman tasol. Ol i man nogut tru, olsem ol wel animal. Ol i save tingting tasol long kaikai planti na les nabaut.” Olsem na bilong mekim dispela wok long Krit, Taitus i mas strongim gen bel bilong em na stap strong. (Taitus 1:​5, 10-​12) Em i mas mekim gut dispela wok, long wanem, wok em i mekim inap helpim lotu Kristen long kamap strong long dispela ailan. God i stiaim tingting bilong Pol, na Pol i tokim Taitus long ol mak ol brata i mas inapim bilong kamap elda. Ol Kristen long nau tu ol i mas inapim ol dispela mak bambai ol i ken kamap elda.

Baibel i no tokaut long wanem taim Taitus i lusim Krit. Tasol ating em i stap longtaim liklik inap long Pol i ken askim em long lukautim gut Senas na Apolos na bai ol i no sot long kaikai samting long raun bilong ol. Tasol Taitus i no stap longtaim tumas long dispela ailan. Pol i gat tingting long salim Artemas o Tikikus i go long Krit, na bihain long dispela, Taitus i mas kam long em long Nikopolis​—⁠ating dispela taun i stap long kantri Grik, long hap not-wes.​​—⁠Taitus 3:​12, 13.

Long laspela tok Baibel i mekim long Taitus, yumi kisim save olsem long yia 65 C.E. Pol i salim em i go long narapela hap. Em i go long distrik Dalmesia, long hap is bilong solwara Edriatik, nau yumi kolim Kroesia. (2 Timoti 4:​10) Baibel i no tokaut long wanem wok Taitus i mas mekim long dispela hap, tasol sampela i tok olsem Pol i bin salim em i go bilong stretim sampela wok insait long kongrigesen na long mekim wok misineri. Sapos olsem, orait Taitus bai mekim wankain wok olsem em i bin mekim long Krit.

Yumi amamas tru long yumi gat ol strongpela elda Kristen olsem Taitus! Ol i save gut long ol lo bilong Baibel na ol i strongim bel na bihainim gut ol dispela lo, na dispela i helpim ol kongrigesen long stap gut long ol samting bilong spirit. I gutpela sapos yumi bihainim pasin bilong bilip bilong ol na yumi bihainim pasin bilong Taitus na strongim ol wanlotu bilong yumi long ol samting bilong spirit.​—⁠Hibru 13:⁠7.

[Futnot]

[Piksa long pes 31]

Taitus i gat strongpela bel na em i wanwok bilong Pol long helpim ol Kristen long Korin na long sampela narapela hap