Tingim Gut Haus Bilong God!

“Man bilong graun, yu lukluk gut long olgeta samting mi laik soim yu . . . Bihain yu mas tokim ol Israel long ol samting yu bin lukim.”​—ESEKIEL 40:⁠4.

1. Long 593 B.C.E., lain bilong God i bin stap olsem wanem?

EM YIA 593 B.C.E., na ol Israel i bin stap kalabus inap 14 yia. Ating ol Juda i sindaun long Babilon, ol i ting ples bilong ol em ol i laikim tru, em i longwe tumas. Laspela taim planti bilong ol i bin lukim Jerusalem, ol birua i kukim long paia, na strongpela banis bilong en i bruk olgeta, na ol gutpela haus bilong en i bagarap. Haus bilong Jehova​—⁠bipo em nambawan bikpela samting bilong dispela taun, winim ol narapela samting bilong en, na em tasol i ples ol manmeri i ken bung long en bilong lotu tru long God​—⁠nau em i bagarap. Nau ol Israel bai stap kalabus yet inap planti yia. Ol i mas wet inap 56 yia na ol i ken lusim Babilon olsem Jehova i tok promis long en.​—⁠Jeremaia 29:⁠10.

2. Taim Esekiel i tingting bek long haus bilong God long Jerusalem, bilong wanem dispela bai mekim em i bel hevi?

² Ating gutpela profet Esekiel i bel hevi long tingim haus bilong God i bagarap i stap longwe long Babilon inap sampela handet kilomita, na ol wel animal i raun long dispela haus i stap nating. (Jeremaia 9:11) Papa bilong em, Busi, em i bin mekim wok pris long Jerusalem. (Esekiel 1:⁠3) Esekiel bai kisim dispela gutpela wok tu, tasol long yia 617 B.C.E. taim em i yangpela yet, ol Babilon i kisim em i go kalabus wantaim ol Juda i gat namba. Nau em i gat 50 krismas, olsem na ating em i save em i no inap lukim Jerusalem gen o helpim wok bilong sanapim gen haus bilong God long en. Olsem na yumi ken save, taim God i givim driman long Esekiel na em i lukim wanpela naispela haus bilong God, dispela i bikpela samting tru long em!

3. (a) I gat wanem as na Esekiel i kisim driman long haus bilong God? (b) Wanem 4-pela bikpela hap bilong dispela driman?

³ Dispela driman i gat planti samting long en, na 9-pela sapta long Buk Esekiel i stori long en, na driman i givim wanpela gutpela tok promis bilong God long ol Juda i stap kalabus na i strongim bilip bilong ol. Lotu i tru bai kamap bek! Long ol handet handet yia bihain long dispela taim i kam inap long taim bilong yumi tu, dispela driman i bin strongim bel bilong ol man i laikim tumas Jehova. Olsem wanem driman i mekim olsem? Orait, yumi ken skelim as bilong driman bilong Esekiel na ol samting dispela bai mekim long ol Israel i stap kalabus. Driman i gat 4-pela bikpela hap bilong en, olsem: haus bilong God, lain pris, hetman, na kantri.

Ol i Sanapim Gen Haus Bilong God

⁴ Pastaim, Esekiel i kamap long “wanpela maunten i antap tumas.” Long maunten long hap bilong saut i gat wanpela traipela haus bilong God i stap, olsem wanpela taun i gat banis. Wanpela ensel i “lait olsem bras,” em i kisim profet Esekiel i go raun long olgeta hap bilong en. (Esekiel 40:​2, 3) Long driman, Esekiel i lukim ensel i metaim gut 6-pela dua bilong banis em ol i wankain tasol na ol i gat rum bilong ol man i was long banis, na bikpela ples bung na namba 2 ples bung, na ol rum kaikai, na alta, na haus bilong God i gat Rum Holi na Rum Holi Tru.

5. (a) Jehova i givim wanem tok long Esekiel bilong strongim bel bilong em? (b) Ol dispela “king bilong ol i dai” na ol i mas rausim long haus bilong God, ol i bin makim wanem samting? Bilong wanem dispela i bikpela samting?

⁵ Orait, nau Jehova yet i kamap long dispela driman. Em i go insait long haus bilong em na tokim Esekiel Em bai sindaun long en. Tasol Jehova i tok haus bilong em i mas kamap klin, na em i tok: “Nau ol Israel i no ken lotu moa long ol giaman god, na ol i no ken larim ol king bilong ol i dai klostu long haus bilong mi. Sapos ol i bihainim tok bilong mi, bai mi stap wantaim ol oltaim.” (Esekiel 43:​2-4, 7, 9) Dispela tok “ol king bilong ol i dai,” i olsem ol piksa bilong ol god giaman. Ol hetman bilong Jerusalem na ol lain bilong en, ol i bikhet na bagarapim haus bilong God long ol piksa bilong ol god giaman, na ol i mekim ol i kamap olsem king bilong ol. (Skelim wantaim Amos 5:26.) Ol i no god o king i gat laip, nogat; ol i samting i no gat laip na ol i samting doti long ai bilong Jehova. Ol i mas rausim ol dispela samting long haus bilong God.​—⁠Wok Pris 26:30; Jeremaia 16:⁠18.

6. Pasin bilong metaim haus bilong God i bin makim wanem samting?

⁶ Wanem insait bilong dispela hap bilong driman? Em i kamapim klia long ol Juda i stap kalabus, olsem lotu i tru bai kamap bek long haus bilong God. Na pasin bilong metaim haus bilong God, dispela i makim olsem God bai truim dispela driman. (Skelim wantaim Jeremaia 31:​39, 40; Sekaraia 2:​2-8.) Olgeta samting bilong ol god giaman, ol bai rausim olgeta. Jehova bai mekim gut gen long haus bilong em.

Lain Pris na Hetman

7. Yumi kisim wanem save long ol Livai na ol pris?

⁷ God i mas klinim na stretim lain pris tu. Em bai krosim ol Livai i bin lotuim ol god giaman, tasol em bai mekim gutpela tok amamas na givim gutpela pe long ol pikinini man bilong Sadok em ol i wok pris, long wanem, ol i bin stap klin.a Dispela tupela lain wantaim bai kisim wok long haus bilong God em bai kamapim bek, tasol olgeta wan wan i mas stap gut long God sapos ol i laik mekim dispela wok. Na tu, Jehova i tok: “Ol pris i mas skulim ol manmeri bilong mi long wanem ol samting i bilong mi yet na wanem ol samting i no bilong mi. Na tu ol i mas skulim ol long wanem samting i klin long ai bilong mi na wanem samting i doti long ai bilong mi.” (Esekiel 44:​10-16, 23) Olsem na wok bilong lain pris bai kamap bek na ol pris i bin stap gut long God, ol bai kisim gutpela pe.

8. (a) Husat ol i hetman long lain Israel bilong bipo? (b) Long driman bilong Esekiel, hetman i mekim wok long lotu i tru long wanem ol rot?

⁸ Dispela driman i stori tu long wanpela man ol i kolim em olsem hetman. Kirap long taim bilong Moses, lain Israel i gat ol hetman. Long tok Hibru dispela tok hetman em na·siʼʹ, na dispela tok inap makim hetman bilong wanpela bikpela famili, o wanpela lain, o wanpela kantri tu. Long driman bilong Esekiel, God i krosim lain hetman i bosim Israel, long wanem, ol i mekim nogut long ol manmeri, na God i kirapim ol long mekim stretpela pasin na stretpela kot long ol manmeri. Maski hetman em i no bilong lain pris, em i mekim bikpela wok long lotu i tru. Em i kam insait long bikpela ples bung wantaim ol lain i no save mekim wok pris, na bihain em i lusim dispela ples wantaim ol. Na em i sindaun long dua bilong banis long hap sankamap, na em i givim sampela ofa long ol manmeri bilong ol i ken wokim ofa long God. (Esekiel 44:​2, 3; 45:​8-12, 17) Olsem na dispela driman i helpim lain bilong Esekiel long save, ol Israel bai kamap gen olsem lain bilong God na ol bai kisim ol gutpela hetman bilong bosim ol, em ol man ol bai helpim lain pris long stretim wok bilong lain bilong God, na ol bai stap olsem gutpela piksa long ol samting bilong spirit.

Kantri

9. (a) Olsem wanem ol i mas brukim graun? Tasol husat i no ken kisim hap graun? (b) Graun holi i makim wanem samting? Wanem ol samting i stap long en?

⁹ Orait, long driman bilong Esekiel em i lukim olgeta graun bilong Israel. Ol bai brukim dispela graun na ol wan wan lain bilong Israel bai kisim hap graun bilong ol yet. Hetman tu bai kisim hap graun. Tasol ol pris nogat, long wanem, Jehova i tok: “Mi yet mi stap olsem gutpela samting ol i kisim bilong holim oltaim.” (Esekiel 44:​10, 28; Namba 18:20) Driman i soim olsem graun bilong hetman bai stap long arere arere bilong wanpela hap graun ol i kolim graun holi. Mak bilong dispela hap graun i skwe na ol i brukim i go 3-pela hap​—⁠long not em bilong ol Livai em ol i bin tanim bel, na long namel em bilong ol pris, na long saut em bilong taun na graun bilong en bilong kamapim kaikai. Haus bilong Jehova bai stap long hap graun bilong ol pris, namel stret long dispela hap ol i kolim graun holi.​—⁠Esekiel 45:​1-7.

10. Ol gutpela Juda i stap kalabus ol i ting olsem wanem long dispela tok profet long brukim graun?

¹⁰ Ating ol dispela samting long driman i mekim gut tru bel bilong ol dispela lain i stap kalabus! Olgeta wan wan famili bai kisim graun bilong ol yet. (Skelim wantaim Maika 4:⁠4.) Haus bilong God i makim lotu i tru bai stap ples klia olsem nambawan bikpela samting bilong ol. Na tingim hetman long dispela driman bilong Esekiel; olsem ol pris, hetman bai sindaun long graun ol manmeri i bin givim olsem kontribusen. (Esekiel 45:16) Olsem na long kantri ol i bin kisim bek, ol manmeri i mas helpim wok bilong ol man Jehova i makim ol bilong i go pas long wok na bihainim tok bilong ol. Dispela kantri long driman, em i makim ol samting i wok stret, na ol i wok gut wantaim, na ol i stap bel isi.

¹¹ Olsem wanem? Jehova bai mekim gut long kantri bilong ol? Tok profet i bekim dispela askim long wanpela gutpela tok. Kirap long haus bilong God wanpela wara i ran, na taim em i ran i go em i wok long i go braitpela. Taim wara i kamap long raunwara Detsi, em i bikpela wara tru. Dispela wara i mekim gut wara bilong Detsi, na nau wara bilong en i kamap gutpela na planti pis i pulap long en. Ol man i stap long nambis bilong en na mekim bikpela wok bisnis long kisim pis. Arere arere long wara i gat planti diwai i karim kaikai long olgeta taim, em ol kaikai bilong strongim skin na oraitim sik bilong ol man.​—⁠Esekiel 47:​1-12.

11, 12. (a) Olsem wanem Jehova i tok profet long lain bilong em olsem em bai mekim gut long kantri ol i kisim bek? (b) Ol diwai arere arere long wara i makim wanem samting?

¹² Long lain i stap kalabus, dispela tok promis i strongim ol tok profet bilong bipo i stori long ol Juda bai go bek long ples bilong ol, em ol tok profet i bikpela samting long ol. Planti taim ol profet bilong Jehova i bin stori olsem ol manmeri bai sindaun gen long Israel olsem ol i sindaun long wanpela paradais. Planti tok profet i stori long ol ples nating bai kamap olsem ol gutpela ples tru i gat ol samting i stap laip long en. (Aisaia 35:​1, 6, 7; 51:3; Esekiel 36:35; 37:​1-14) Olsem na ol manmeri inap bilip olsem ol gutpela blesing bilong Jehova bilong givim laip long ol samting bai kamap olsem wanpela wara i kirap long haus bilong God em i kamapim bek. Em nau, wanpela lain i bin dai long ol samting bilong spirit bai kirap gen na bilip. Dispela lain God i bin kisim bek ol, God bai mekim gut long ol na kamapim ol man i save tingim ol samting bilong spirit​—⁠em ol stretpela man i save sanap strong olsem ol dispela diwai arere arere long wara long driman; em ol man i go pas long wokim gen ol samting long graun i bagarap. Aisaia tu i bin raitim tok olsem ol man bai sanap strong olsem ‘ol bikpela diwai’ na ol bai “wokim gen ol taun bipo i bin bagarap.”​—⁠Aisaia 61:​3, 4.

Truim Bilong Driman Bai Kamap Long Wanem Taim?

13. (a) Olsem wanem na Jehova i mekim gut long lain bilong em long rot bilong ‘ol bikpela diwai’? (b) Tok profet long raunwara Detsi i kamap tru olsem wanem?

¹³ Olsem wanem? Ol lain i bin stap kalabus na nau ol i kam bek long ples, ol i bel hevi? Nogat tru! Long yia 537 B.C.E., liklik hap lain bilong Israel ol i kam bek long ples bilong ol, em ples ol i laikim tumas. Bihain, ol man i sanap strong olsem ‘ol bikpela diwai,’ olsem Esra, em man bilong raitim raitim ol tok bilong Baibel, na profet Hagai na profet Sekaraia, na Hetpris Josua, ol i soim rot long ol Israel na ol i wokim gen ol taun na ples ol birua i bin bagarapim na ol i bin stap nating inap longpela taim. Ol hetman, olsem Nehemia na Serubabel, ol i bin bosim Israel long pasin i stret. Ol i wokim gen haus bilong Jehova, na ol samting em i bin givim bilong helpim ol long stap laip​—⁠ol blesing ol bai kisim sapos ol i bihainim kontrak bilong em​—⁠ol i kamap gen olsem wara i ran. (Lo 30:19; Aisaia 48:​17-20) Wanpela blesing, em ol i kisim save. Lain pris i kirap gen na mekim wok, na ol pris i skulim ol manmeri long Lo. (Malakai 2:⁠7) Em nau, ol manmeri i kamap strong gen long spirit na ol i kamap gen olsem ol gutpela wokman bilong Jehova i karim kaikai, em raunwara Detsi i olsem piksa long dispela samting. Pastaim i no gat wanpela samting i stap laip long dispela raunwara, tasol bihain wara i kamap gutpela na i gat planti pis long en, na ol man i wok bisnis long kisim pis.

14. Bilong wanem tok profet bilong Esekiel i gat wanpela truim bilong en i winim ol samting i bin kamap bihain long ol Juda i lusim pinis kalabus long Babilon na go bek long ples?

¹⁴ Olsem wanem? Ol dispela samting tasol i olsem truim bilong driman bilong Esekiel? Nogat; driman i makim samting i bikpela moa. Tingim: Ol i no inap wokim haus bilong God olsem Esekiel i bin lukim. Tru, ol Juda i ting dispela driman i bikpela samting na ol i bin wokim sampela samting i wankain olsem driman i makim.b Tasol haus bilong God long driman em i bikpela tumas na em i no inap sanap long maunten Moria tu, em ples bipo haus bilong God i bin sanap long en. Na tu, dispela haus bilong God Esekiel i lukim, em i no stap insait long taun, nogat; em i stap longwe liklik long narapela hap graun. Tasol namba 2 haus bilong God ol Israel i bin wokim, ol i wokim antap long ples namba wan haus i bin sanap long en bipo​—⁠em long taun Jerusalem. (Esra 1:​1, 2) Na tu, i no gat wanpela wara tru tru i bin kirap long haus bilong God long Jerusalem na ran i go, nogat. Olsem na ol Israel bilong bipo ol i bin lukim hap truim tasol bilong dispela tok profet bilong Esekiel. Dispela i makim olsem, dispela driman i mas i gat bikpela truim bilong en long ol samting bilong spirit.

15. (a) Bikpela haus spirit bilong Jehova i kirap mekim wok long wanem taim? (b) Wanem samting i makim olsem driman bilong Esekiel i no bin kamap tru taim Jisas i stap long graun?

¹⁵ Olsem na yumi mas painim bikpela truim bilong driman bilong Esekiel long bikpela haus spirit bilong Jehova, em aposel Pol i stori planti long en long Buk Hibru. Dispela haus bilong Jehova em i kirap mekim wok taim God i bin makim Krais Jisas olsem Hetpris bilong en long yia 29 C.E. Tasol olsem wanem? Truim bilong driman bilong Esekiel i bin kamap long taim bilong Jisas? Nogat. Jisas, olsem Hetpris, em i truim ol samting em Bikpela De Bilong God i Tekewe Sin Bilong Ol Manmeri i makim taim em i kisim baptais, na em i dai olsem ofa, na em i go insait long Rum Tambu Tru, em heven yet. (Hibru 9:24) Tasol driman bilong Esekiel i no stori liklik long hetpris o long Bikpela De Bilong God i Tekewe Sin Bilong Ol Manmeri. Olsem na ating dispela driman i no makim ol samting i kamap long taim bilong ol aposel. Orait, em i makim wanem taim?

¹⁶ Bilong bekim dispela askim, yumi ken tingim gen dispela driman. Esekiel i tok: “Long ol samting olsem driman God i bringim mi i go long graun bilong Israel na putim mi long wanpela maunten i antap tumas. Na mi lukluk i go long hap saut na mi lukim ol haus i stap na i luk olsem wanpela taun.” (Esekiel 40:⁠2) Em i driman long “wanpela maunten i antap tumas,” na dispela i kirapim yumi long tingim tok bilong Maika 4:​1: “Wanpela taim bai i kamap bihain na dispela maunten, haus bilong Bikpela i sanap long en, bai i stap antap tru na i winim olgeta arapela maunten. Na planti lain manmeri bai i kam bung long en.” Truim bilong dispela tok profet bai kamap long wanem taim? Maika 4:5 i tok, truim bilong en bai kirap taim ol kantri i lotuim yet ol god giaman. Yumi save, dispela “taim bai i kamap bihain,” em dispela taim nau yumi stap long en, na lotu i tru i mas i go antap, na kamap bek long ples tru bilong en long i stap bilong ol wokman bilong God.

17. Olsem wanem tok profet long Malakai 3:​1-5 i save helpim yumi long makim taim haus spirit bilong God long driman bilong Esekiel i kamap klin?

¹⁷ Wanem samting i mekim na lotu i tru inap kamap bek olsem? Tingim: Bikpela samting long driman bilong Esekiel, em taim Jehova i kam long haus bilong em na em i strong long ol i mas rausim ol piksa bilong ol god giaman i stap long en. Haus spirit bilong God i kamap klin long wanem taim? Long Malakai 3:​1-5, Jehova i tok profet long wanpela taim em bai ‘kam na stap long haus bilong em’ na ensel bilong “autim tok bilong kontrak,” em Krais Jisas, em bai kam wantaim em. Em bai kam bilong mekim wanem? “Em bai i kam olsem paia i hat tru na i save kukim silva na gol bilong rausim pipia bilong en. Na em i olsem strongpela sop bilong wasim laplap samting i doti tru.” God i kirap stretim na klinim lain bilong em long taim bilong Namba Wan Pait. Dispela i mekim na wanem samting i kamap? Kirap long 1919 i kam inap nau, Jehova i sindaun long haus bilong em na em i mekim gut long kantri spirit bilong lain bilong em. (Aisaia 66:⁠8) Olsem na yumi ken tok, dispela tok profet bilong Esekiel long haus bilong God, bikpela truim bilong en i mas kamap long taim bilong las de.

18. Laspela truim long haus bilong God bai kamap long wanem taim?

¹⁸ Olsem ol narapela tok profet long ol samting bai kamap gutpela gen, driman bilong Esekiel i gat narapela truim bilong en bai kamap, em laspela truim bilong en, long Paradais. Long dispela taim tasol, ol samting God i putim bilong lotuim em, ol bai helpim ol manmeri i gat stretpela bel na ol bai kisim ol gutpela samting long en. Long dispela taim Krais bai mekim wok long pe bilong ofa bilong em, na lain pris bilong em long heven, em lain 144,000, ol bai wok wantaim em long dispela wok. Olgeta manmeri i stap gut aninit long wok king bilong Krais, ol bai kamap gutpela olgeta. (KTH 20:​5, 6) Tasol nambawan bikpela truim bilong driman bilong Esekiel bai i no kamap long Paradais. Bilong wanem yumi ken tok olsem?

Driman i Makim Taim Bilong Yumi Long Nau

¹⁹ Esekiel em i lukim wanpela haus lotu i mas kamap klin​—⁠ol i mas rausim ol piksa bilong ol god giaman na ol i no ken mekim moa pasin pamuk bilong spirit. (Esekiel 43:​7-9) Dispela i no inap tru makim lotu bilong Jehova long Paradais. Na tu, ol pris long driman, ol i makim lain pris God i makim long spirit holi taim ol i stap yet long graun; em i no makim dispela lain taim ol i kirap bek na kisim laip long heven o long Taim Bilong Wan Tausen Yia, nogat. Bilong wanem yumi ken tok olsem? Tingim: Long driman, ol pris i mekim wok bilong ol long namba 2 ples bung. Sampela stori long ol Wastaua bilong bipo, ol i bin tokaut olsem dispela ples bung i olsem piksa bilong makim i stap bilong ol nambatu pris bilong Krais long ol samting bilong spirit taim ol i stap yet long graun.c Na tu, driman i kamapim sin na ol pasin kranki bilong ol pris. God i tokim ol long wokim ofa bilong tekewe sin bilong ol yet. Na em i givim tok lukaut long ol, olsem ol bai kisim nogut sapos ol i kamap doti long spirit na long pasin bilong ol. Olsem na dispela ol pris i no olsem piksa bilong ol manmeri God i bin makim na ol i kirap bek pinis na kisim laip long heven, em aposel Pol i stori long ol olsem: “Biugel bai i krai, na ol man i dai pinis bai i kirap, na ol i no inap bagarap moa.” (1 Korin 15:52; Esekiel 44:​21, 22, 25, 27) Ol pris long driman, ol i poromanim ol manmeri na ol yet i mekim wok bilong helpim ol. Dispela i no ken kamap long Paradais, long wanem, long dispela taim lain pris bai stap long heven. Olsem na dispela driman i kamapim klia pasin bilong dispela lain God i bin makim, olsem ol i wok gut wantaim bikpela lain manmeri long graun long nau.​—⁠KTH 7:9; Esekiel 42:⁠14.

19, 20. Bilong wanem bikpela truim bilong dispela driman i mas kamap long nau na em i no ken kamap long Paradais?

²⁰ Olsem na driman bilong Esekiel long haus bilong God i makim ol gutpela samting i kamap taim God i klinim lain bilong em long ol samting bilong spirit, em truim bilong en i wok long kamap long nau. Tasol yu ting olsem wanem long dispela tok? Dispela i no wanpela tok hait bilong lotu ol man i no inap kisim gut, nogat. Dispela driman i bikpela samting long ol wok bilong yu long olgeta wan wan de bilong lotuim Jehova, em wanpela tasol i God tru. Long stori i kamap bihain long dispela bai yumi ken save i gat wanem as na yumi ken tok olsem.

[Ol Futnot]

Yu Tingim Yet?

◻ Wanem namba wan truim bilong driman bilong Esekiel long haus bilong God na lain pris bilong en?

◻ Truim bilong driman bilong Esekiel long pasin bilong brukim graun na givim long ol wan wan lain bilong Israel i bin kamap olsem wanem long bipo?

◻ Taim Jehova i kisim ol Israel bilong bipo i kam bek long ples bilong ol, husat i mekim wok olsem ol gutpela hetman? Husat i mekim wok olsem ol man i sanap strong olsem ‘ol bikpela diwai’?

◻ Bilong wanem bikpela truim bilong driman bilong Esekiel long haus bilong God i mas kamap long taim bilong las de?

4. Taim driman i kirap Esekiel i go we? Em i lukim wanem samting long dispela hap? Husat i kisim em i go raun?

16. Esekiel i driman long wanpela maunten na dispela i kirapim yumi long tingim wanem narapela tok profet? Olsem wanem dispela i helpim yumi long save long taim bikpela truim bilong driman bilong Esekiel bai kamap?