Jehova i Mekim Gut Long “Kantri” Bilong Yumi

“Long olgeta ples wara i ran i go long en, bai olgeta samting i gat laip.”​—⁠ESEKIEL 47:⁠9.

1, 2. (a) Olsem wanem wara i bikpela samting? (b) Long driman bilong Esekiel, tok piksa long wara i makim wanem samting?

WARA i gutpela samting tru. Olgeta samting i stap laip i mas kisim wara. I no gat wanpela bilong yumi inap stap laip longpela taim sapos yumi no kisim wara. Na yumi mas kisim wara bilong klinim ol samting, long wanem, wara inap pinisim na rausim doti bilong ol samting. Olsem na yumi wasim skin bilong yumi long wara, na klos bilong yumi, na kaikai bilong yumi tu. Dispela pasin inap helpim yumi long abrusim bagarap.

² Baibel i save tok piksa long wara bilong makim ol gutpela samting bilong spirit Jehova i save givim bilong helpim yumi long kisim laip. (Jeremaia 2:13; Jon 4:​7-15) Sampela samting olsem, em pasin bilong em long mekim lain bilong em i kamap klin long rot bilong ofa bilong Krais, na save bilong God olsem yumi painim long Baibel. (Efesus 5:​25-27) Long driman bilong Esekiel long haus bilong God, dispela wara i kamap olsem mirakel na i kirap long haus bilong God na ran i go, em i makim ol dispela gutpela samting bilong givim laip. Tasol dispela wara i kirap na ran long wanem taim? Em i makim wanem samting long yumi long nau?

Wara i Ran Long Kantri Ol i Kisim Bek

3. Olsem Esekiel 47:​2-12 i tok, wanem samting i painim Esekiel?

³ Lain bilong Esekiel i stap kalabus long Babilon, olsem na ol i sot tru long ol gutpela samting bilong Jehova. Taim Esekiel i lukim liklik wara i kirap long haus bilong God na ran i go lusim haus, dispela i strongim bel bilong em! Wanpela ensel i bihainim wara i go na long olgeta 500 500 mita em i metaim wara. Pastaim wara i kam antap liklik tasol na karamapim lek bilong Esekiel inap long skru daunbilo. Bihain wara i kam antap inap long skru namel long lek bilong em. Bihain moa, wara i kam antap long skru antap long lek bilong em, na bihain wara i bikpela, olsem na Esekiel i mas subim wara. Wara i givim laip na ol samting i kamap long en. (Esekiel 47:​2-11) Esekiel i harim tok olsem: “Long tupela arere bilong wara . . . olkain gutpela diwai bilong karim kaikai bai i kamap.” (Esekiel 47:12a) Taim bikpela wara i ran i go long raunwara Detsi​—⁠dispela raunwara i no gat wanpela samting i stap laip long en​—⁠ol samting i gat laip i kamap long en! Planti pis i pulap long en, na ol man i mekim bikpela wok bisnis long kisim pis.

⁴ Ating dispela gutpela tok profet i bin helpim ol Juda i stap kalabus long tingim wanpela tok profet Joel i bin raitim sampela handet yia bipo: “Wanpela wara bai i kam ausait long haus bilong Bikpela na i ran i go long Ples Daun Bilong Ol Diwai Akas.”a (Joel 3:18) Tok profet bilong Joel, olsem tok profet bilong Esekiel, em i tok wanpela wara bai kirap long haus bilong God na ran i go long ples drai nating na ol diwai na kaikai samting bai kamap long en.

4, 5. Olsem wanem tok profet bilong Joel long wanpela wara em i wankain long tok profet bilong Esekiel? Bilong wanem dispela em i bikpela samting?

⁵ Inap planti yia Wastaua i tok, truim bilong dispela tok profet bilong Joel em i kamap long taim bilong yumi.b Olsem na yumi ken ting dispela i stret long driman bilong Esekiel tu, em wankain long driman bilong Joel. Long kantri bilong lain bilong God long nau, olsem long Israel bilong bipo, ol samting Jehova i givim bilong mekim gut long ol, ol i bin kamap planti olsem wara i ran.

Planti Blesing i Kamap

6. Pasin bilong tromoi blut long alta long dispela driman i mas kirapim ol Juda long tingim wanem samting?

⁶ Husat i as bilong ol dispela blesing i save kam long lain bilong God? Tingim: Wara i kirap long haus bilong God na ran i go. Na i olsem tu long nau, ol blesing i kam long Jehova long rot bilong bikpela haus spirit bilong em​—⁠em ol samting Jehova i putim bilong stretim rot bambai yumi ken lotu tru long em. Driman bilong Esekiel i skruim hap tok i givim sampela save moa long yumi na i bikpela samting. Long namba 2 ples bung, wara i ran i go na abrusim alta long hap saut bilong en. (Esekiel 47:⁠1) Alta i stap namel tru long haus bilong God long driman. Jehova i tokim Esekiel long olgeta samting bilong alta, na em i tok ol i mas wokim ofa na tromoi blut bilong en long alta. (Esekiel 43:​13-18, 20) Dispela alta i bikpela samting long ol Israel. Moses i bin strongim kontrak bilong ol Israel wantaim Jehova long bipo tru taim em i tromoi blut long alta i stap long as bilong maunten Sainai. (Kisim Bek 24:​4-8) Pasin bilong tromoi blut long alta long dispela driman i mas kirapim ol long tingim taim ol i go bek pinis long kantri bilong ol, Jehova bai mekim gut tru long ol sapos ol i stap gut long kontrak ol i bin wokim wantaim em.​—⁠Lo 28:​1-14.

7. Dispela alta bilong spirit i bikpela samting long ol Kristen bilong nau olsem wanem?

⁷ Na i wankain long nau tu. Lain bilong God i save kisim blesing long rot bilong wanpela kontrak i winim kontrak bilong bipo​—⁠em nupela kontrak. (Jeremaia 31:​31-34) Long bipo tru, blut i bin strongim dispela kontrak tu​—⁠em blut bilong Krais Jisas. (Hibru 9:​15-20) Long nau, maski yumi bilong lain God i makim ol long spirit holi, em ol i insait long nupela kontrak, o yumi bilong lain “arapela sipsip,” em ol bai kisim ol gutpela samting bilong en, dispela alta bilong spirit i bikpela samting long yumi olgeta. Alta i makim ol samting God i laik mekim long rot bilong ofa bilong Krais. (Jon 10:16; Hibru 10:10) Dispela alta long driman i stap namel tru long haus spirit bilong God, na olsem tasol ofa bilong Krais em nambawan bikpela samting long lotu i tru. Ofa bilong Krais i rot bilong God i ken lusim ol sin bilong yumi, olsem na dispela ofa i rot bilong yumi ken wetim ol gutpela samting i kamap bihain. (1 Jon 2:⁠2) Olsem na yumi wok strong long bihainim lo bilong nupela kontrak, em “lo bilong Krais.” (Galesia 6:⁠2) Sapos yumi mekim olsem, ol samting Jehova i bin mekim bambai yumi ken kisim laip, bai yumi kisim.

8. (a) Long haus bilong God long driman, wanem samting i no stap long namba 2 ples bung? (b) Long driman, ol pris long haus bilong God inap mekim wok long wanem samting bilong i stap klin?

⁸ Wanpela samting olsem, em yumi inap stap klin long ai bilong Jehova. Long haus bilong God long driman, wanpela samting i no stap long namba 2 ples bung na dispela samting i bin stap ples klia long ples bung bilong haus lotu sel na long haus lotu Solomon i bin wokim​—⁠em wanpela bikpela tang wara ol pris i bin waswas long en, bihain ol i kolim olsem wanpela raunwara. (Kisim Bek 30:​18-21; 2 Stori 4:​2-6) Orait, long driman bilong Esekiel, ol pris long haus bilong God ol inap mekim wok long wanem samting bilong i stap klin? Ol inap mekim wok long dispela wara i kamap olsem mirakel na i ran i go long namba 2 ples bung, a? Tru tumas, Jehova bai mekim gut long ol inap long ol i ken stap klin o holi long ai bilong em.

9. Olsem wanem lain God i bin makim na ol manmeri bilong bikpela lain, ol i ken stap klin long ai bilong God long nau?

⁹ Olsem long nau tu, Jehova i bin mekim gut tru long lain em i bin makim long spirit holi na ol i stap klin long ai bilong em. Jehova i tingim ol i holi na em i kolim ol olsem stretpela man. (Rom 5:​1, 2) Olsem wanem long ol manmeri bilong bikpela lain, ol lain i no bilong lain pris ol i piksa bilong ol? Ol i lotu long bikpela ples bung, na long driman bilong Esekiel long haus bilong God, wankain wara i ran i go long dispela hap. Olsem na i stret aposel Jon i lukim planti manmeri tru ol i pasim waitpela klinpela klos taim ol i mekim lotu long ples bung bilong haus spirit bilong God! (KTH 7:​9-14) Maski wanem kain hevi i bin painim ol long dispela graun em pasin nogut i pulap long en, ol inap bilip tru olsem sapos ol i bilip long ofa bilong Krais, Jehova bai tingim ol i klin na stret olgeta. Olsem wanem ol i save kamapim bilip bilong ol? Ol i bihainim pasin bilong Jisas na bilip tru long ofa bilong em.​—⁠1 Pita 2:⁠21.

10, 11. Wanpela bikpela samting long dispela tok piksa long wara em i wanem samting? Olsem wanem dispela i stret long wara i kamap bikpela na i daun moa?

¹⁰ Olsem yumi tok pinis, i gat narapela bikpela samting long dispela tok piksa long wara​—⁠em save. Taim Jehova i kisim lain bilong em i go bek long Israel, em i mekim gut long ol long rot bilong lain pris​—⁠ol pris i skulim ol long tok bilong God. (Esekiel 44:23) Na olsem tasol, Jehova i save mekim gut long lain bilong em long nau na ol i kisim planti save long tok i tru bilong Baibel long rot bilong “ol pris bilong lain bilong king.” (1 Pita 2:⁠9) Save long God Jehova, na ol samting em i laik mekim bilong helpim ol manmeri, na long Krais Jisas na Kingdom em Mesaia i bosim, ol dispela save i kamap moa yet long dispela taim bilong las de olsem wara i ran strong. Em i gutpela tru long kisim dispela planti planti kaikai bilong spirit i givim nupela strong long yumi na i olsem tait wara!​—⁠Daniel 12:⁠4.

¹¹ Dispela wara ensel i metaim, isi isi em i bin kamap bikpela wara i daun moa, na olsem tasol ol gutpela blesing bilong laip i kam long Jehova, ol i bin kamap planti moa bilong helpim bikpela lain manmeri ol i kam insait long gutpela kantri bilong yumi, em kantri bilong spirit. Narapela tok profet long ol samting bai kamap gutpela gen i tok: “Ol lain i liklik tru bai ol i kamap planti moa olsem ol manmeri bilong ol bikpela na strongpela kantri. Mi Bikpela, mi tok, ol dispela samting bai i kamap hariap long taim mi makim pinis.” (Aisaia 60:22) Dispela tok i kamap tru pinis​—⁠planti milion manmeri ol i bung wantaim yumi long mekim lotu i tru! Jehova i kamapim planti “wara” bilong helpim olgeta man i kirap na bilip long em. (KTH 22:17) Em i opim rot na oganaisesen bilong em hia long graun i save tilim ol Baibel na ol buk na nius bilong Baibel long olgeta hap bilong graun, long planti handet tok ples. Na oganaisesen i stretim rot na ol miting Kristen na ol kibung ol i kamap long olgeta hap bilong graun inap long ol manmeri i ken kisim gutpela klinpela wara bilong tok i tru. Ol dispela samting bilong spirit i save mekim wanem long ol manmeri?

Wara i Save Givim Laip!

12. (a) Bilong wanem ol diwai long driman bilong Esekiel inap kamapim planti kaikai? (b) Ol dispela diwai i kamapim planti kaikai i makim wanem samting long taim bilong las de?

¹² Dispela wara long driman bilong Esekiel i save givim laip long ol manmeri na strongim skin bilong ol. Taim Esekiel i kisim save long ol diwai bai kamap arere long wara, God i tokim em olsem: “Lip bilong ol dispela diwai bai i no inap drai, na bai ol i karim nupela kaikai long olgeta mun . . . Ol man i ken kaikai ol pikinini bilong ol dispela diwai na kisim ol lip bilong ol bilong mekim orait olkain sik bilong ol.” Bilong wanem ol dispela diwai i kamapim planti kaikai olsem? “Long wanem, ol dispela diwai i stap klostu long dispela wara i kam long haus bilong God.” (Esekiel 47:12b) Ol dispela diwai long driman, ol i makim olgeta samting Jehova i mekim long rot bilong ofa bilong Jisas bilong oraitim bek ol man bambai ol i ken kamap gutpela olgeta na i no gat sin moa. Lain remnan i stap yet long graun long dispela taim nau, ol i go pas long kamapim ol gutpela kaikai bilong spirit bilong helpim ol man long kamap orait gen long ol samting bilong spirit. Taim lain 144,000 olgeta i kisim pinis prais bilong ol long heven, ol gutpela samting em bai kamap long wok pris bilong ol taim ol i wok king wantaim Krais, ol dispela samting bai wok long kamap i go inap bihain bihain, olsem na dai em sin bilong Adam i bin kamapim, em bai pinis olgeta.​—⁠KTH 5:​9, 10; 21:​2-4.

¹³ Dispela wara long driman i ran i go insait long raunwara Detsi i no gat wanpela samting i stap laip long en, na long olgeta hap wara i kamap long en, em i kirapim bek ol samting i dai pinis. Dispela raunwara i makim wanpela ples ol samting i stap long en ol i dai pinis long ol samting bilong spirit. Tasol “long olgeta ples wara i ran i go long en, bai olgeta samting i gat laip.” (Esekiel 47:⁠9) Na i wankain long taim bilong las de, ol manmeri i wok long kirap bek long ol samting bilong spirit long olgeta hap em wara bilong laip i bin kamap long en. Namba wan lain i bin kirap bek long ol samting bilong spirit, em lain remnan long yia 1919. Ol i bin dai long ol samting bilong spirit, tasol God i strongim ol bek, olsem kirapim bek ol. (Esekiel 37:​1-14; KTH 11:​3, 7-12) Bihain, dispela wara em i kamap long ol narapela manmeri i bin dai long ol samting bilong spirit, na ol tu i kirap bek na kamap wanpela bikpela lain bilong ol arapela sipsip i wok long kamap bikpela moa, na ol i laikim tumas Jehova na mekim wok bilong em. Klostu nau, dispela samting i olsem wara bai kamap long planti milion milion manmeri ol bai kirap bek long matmat.

¹⁴ Man i stap strong long spirit em i save mekim bikpela wok. Dispela i kamap ples klia long bikpela wok bisnis ol man bilong kisim pis ol i mekim long nambis bilong raunwara em pastaim i no gat wanpela samting i stap laip long en. Jisas i tokim ol disaipel bilong em olsem: “Bai mi lainim [yupela] long pasin bilong kisim ol manmeri.” (Matyu 4:19) Long taim bilong las de, wok i kirap bilong bungim ol narapela manmeri bilong dispela lain God i bin makim, tasol i no dispela wok tasol i kamap, nogat. Dispela wara bilong givim laip i kirap long haus spirit bilong Jehova, na ol stretpela save long tok bilong Baibel​—⁠em wanpela samting bilong dispela wara bilong laip​—⁠em i save mekim samting long olgeta lain manmeri. Maski dispela bikpela wara i kamap we, ol manmeri i bin dai long ol samting bilong spirit, ol i kamap laip long ol samting bilong spirit.

¹⁵ Tru, i no olgeta manmeri long nau ol i amamas long tok bilong God i save helpim man long i stap laip. Na ol manmeri bai kirap bek long matmat long Taim Bilong Wan Tausen Yia Bilong Krais i Stap King, i no olgeta bai amamas long en. (Aisaia 65:20; KTH 21:⁠8) Ensel i tok, sampela hap bilong raunwara i no kamap gutpela. Wara bilong ol tais i no gat wanpela samting i stap laip long en, ol i ples bilong “kisim sol.” (Esekiel 47:11) I no olgeta manmeri long taim bilong yumi ol i laik kisim dispela wara bilong Jehova, em wara bilong givim laip, nogat. (Aisaia 6:10) Long Armagedon, ol man em long laik bilong ol yet ol i laik stap olsem man i no gat laip na i sik long ol samting bilong spirit, ol bai “kisim sol,” olsem ol bai bagarap inap oltaim oltaim. (KTH 19:​11-21) Tasol ol man i bin wok gut long kisim dispela wara bilong laip, ol inap tingting long abrusim bagarap na lukim laspela truim bilong dispela tok profet.

Wara i Ran Long Paradais

16. Laspela truim long haus bilong God long driman bilong Esekiel bai kamap long wanem taim? Em bai kamap olsem wanem?

¹⁶ Olsem ol narapela tok profet long ol samting bai kamap gutpela gen, laspela truim long haus bilong God long driman bilong Esekiel bai kamap long Taim Bilong Wan Tausen Yia. Long dispela taim lain pris bai ol i no stap moa long graun. “Ol bai i stap pris bilong God na bilong Krais. Na ol bai i stap king wantaim Krais [long heven] long dispela 1,000 yia.” (KTH 20:⁠6) Ol dispela pris long heven bai wok wantaim Krais long mekim bikpela wok long ofa bilong em bilong helpim ol manmeri. Olsem na God bai kisim bek ol stretpela manmeri na ol bai kamap gutpela olgeta!​—⁠Jon 3:⁠17.

¹⁷ Long tok piksa, dispela wara Esekiel i lukim em bai ran olsem wara i gat strongpela marasin long en bilong givim laip. Long dispela taim bikpela truim bai kamap long tok profet bilong Kamapim Tok Hait 22:​1, 2: “Ensel i soim mi wanpela bikpela wara, em wara bilong givim laip, na em i lait tumas olsem glas. Dispela wara i kamap long sia king bilong God wantaim Pikinini Sipsip, na i ran i go namel tru long bikpela rot bilong taun. Long arere bilong wara, long hap i kam na long hap i go, diwai bilong givim laip i stap. Dispela diwai i save karim kaikai 12-pela taim long olgeta yia. Em i karim kaikai long olgeta mun. Na ol lip bilong diwai ol i bilong mekim orait ol manmeri bilong olgeta lain man.”

17, 18. (a) Kamapim Tok Hait 22:​1, 2 i tok wanem long wara bilong givim laip? Bikpela truim bilong dispela driman bai kamap long wanem taim? (b) Long Paradais, bilong wanem wara bilong givim laip bai go bikpela moa?

¹⁸ Long Taim Bilong Wan Tausen Yia, olgeta sik​—⁠sik bilong skin, tingting, na bel​—⁠bai orait bek. Dispela i kamap ples klia long tok piksa long lip bilong ol diwai, ol bai “mekim orait ol manmeri bilong olgeta lain man.” Ol samting Krais na lain 144,000 bai mekim wok long en bilong helpim ol man, dispela bai mekim na “i no gat man . . . bai i tok olsem, ‘Mi gat sik.’ ” (Aisaia 33:24) Na wara bai kamap bikpela moa. Em i mas go braitpela moa na daun moa inap long em i ken helpim planti milion, o planti bilion manmeri em ol bai kirap bek long matmat na dring long dispela gutpela wara bilong givim laip. Long driman, wara i bin oraitim bek raunwara Detsi, na long olgeta hap wara i ran long en, olgeta samting i kisim laip. Long Paradais, ol man na meri bai kisim nambawan laip tru. Dai ol i bin kisim long Adam bai pinis olgeta long skin bilong ol sapos ol i bilip long ol samting ofa bilong Krais i mekim bilong helpim ol. Kamapim Tok Hait 20:12 i tok profet olsem sampela “buk” bai op long dispela taim bilong kamapim sampela save moa bilong skulim ol manmeri i kirap bek long matmat. Sori tru, maski ol i stap long Paradais, sampela bai givim baksait long ol dispela samting bilong oraitim bek ol. Ol dispela bikhetman em ol man i “kisim sol,” olsem ol bai bagarap inap oltaim oltaim.​—⁠KTH 20:⁠15.

¹⁹ Long dispela taim tu, laspela truim bilong wok bilong tilim graun long driman bilong Esekiel bai kamap. Esekiel i lukim ol i tilim stret olgeta hap graun. Olsem na olgeta wan wan Kristen i stap gut long God, em bai kisim wanpela ples bilong em yet long Paradais, olsem samting bilong em yet long holim oltaim. Yumi ken ting, laik bilong yumi long kisim haus bilong yumi yet na sindaun long en na lukautim, em bai kamap tru long pasin i wok stret. (Aisaia 65:21; 1 Korin 14:33) Taun Esekiel i lukim i makim stret wok bos Jehova i laik bai kamap long nupela graun. Lain pris em God i bin makim ol, bai ol i no stap moa long graun. Yumi ken ting olsem, long wanem, long driman taun i sindaun namel long graun nogut i longwe liklik long haus bilong God. (Esekiel 48:​15, NW) Taim lain 144,000 i wok king wantaim Krais long heven, King Krais Jisas bai i gat ol wokman bilong em long graun. Ol manmeri i stap aninit long em hia long graun bai ol i kisim gutpela helpim long lain hetman. Tasol gavman tru i stap long heven, em i no stap long graun. Olgeta manmeri long graun​—⁠lain hetman tu​—⁠bai ol i stap aninit long Kingdom bilong Krais.​—⁠Daniel 2:44; 7:​14, 18, 22.

²⁰ Orait, tingim laspela tok long dispela tok profet bilong Esekiel: “Oltaim bai ol i kolim nem bilong dispela taun olsem, ‘Bikpela [Jehova] I Stap Long Hia.’ ” (Esekiel 48:35) Dispela taun bai i no ken stap bilong givim bikpela namba o strong long ol man, nogat; na taun bai i no ken stap bilong kamapim laik bilong wanpela man, nogat. Em taun bilong Jehova, na long olgeta taim taun bai kamapim tingting bilong em, na gutpela pasin bilong em long mekim stret ol samting. (Jems 3:17) Dispela i mekim gut bel bilong yumi, olsem Jehova bai mekim gut long ol lain manmeri bilong “nupela graun” i go inap oltaim oltaim.​—⁠2 Pita 3:⁠13.

20, 21. (a) Bilong wanem nem bilong taun i stret long en? (b) Tingting yumi bin kisim long driman bilong Esekiel i mas kirapim yumi long givim wanem ol askim long yumi yet?

²¹ Man! Yumi amamas tru long samting bai kamap bihain, a? Olsem na i stret yumi olgeta i askim yumi yet olsem: ‘Mi ting olsem wanem long ol dispela gutpela blesing i kamap ples klia long driman bilong Esekiel? Mi save helpim gut wok ol gutpela wasman i save mekim, em sampela bilong ol i bilong lain remnan na sampela bai insait long lain hetman? Lotu i tru i stap olsem nambawan bikpela samting long mi? Mi save mekim bikpela wok long dispela wara i save ran strong tru long nau?’ Yumi olgeta i mas wok yet long mekim olsem na amamas long ol samting God i givim i go inap oltaim oltaim!

[Ol Futnot]

Bai Yu Bekim Olsem Wanem?

◻ Wara i kirap long haus bilong God na ran i go, dispela i makim wanem samting?

◻ Jehova i bin mekim wanem bilong oraitim bek ol man long rot bilong wara long driman? Bilong wanem wara i go bikpela moa?

◻ Ol diwai i stap arere long wara i makim wanem samting?

◻ Long Taim Bilong Wan Tausen Yia Bilong Krais i Stap King, taun bai makim wanem samting? Bilong wanem nem bilong taun i stret long en?

13. Long taim bilong yumi, wanem wok i bin kamap bilong oraitim bek ol manmeri?

14. Bikpela wok bisnis ol man bilong kisim pis ol i mekim long nambis bilong raunwara Detsi i kamapim klia wanem samting long nau?

15. Wanem samting i makim olsem i no olgeta man bai orait long kisim ol samting God i bin mekim bambai ol i ken kisim laip? Wanem samting bai painim ol dispela man?

19. (a) Wok bilong tilim graun bai kamap tru olsem wanem long Paradais? (b) Wanem samting bai kamap long Paradais olsem taun i makim? (c) Taun i stap longwe liklik long haus bilong God i makim wanem samting?

[Ol Piksa long pes 23]

Wara bilong givim laip, em samting God i bin mekim bambai ol man i ken kisim laip