Ol i Mekim Laik Bilong Jehova
Nambawan Man Tru i Mekim Wanpela Wok Bilong Ol Man Nating
JISAS i save olsem ol laspela aua bilong em wantaim ol aposel em i bikpela samting tru. I no longtaim na ol bai holimpas em, na dispela bai traim bilip bilong em moa yet winim olgeta taim bipo. Na tu, Jisas i save olsem em bai kisim ol bikpela blesing long bihain. Klostu nau em bai i go antap na sindaun long han sut bilong God na em bai kisim “wanpela nem i gutpela tru na i winim olgeta arapela nem. . . . [na] bai olgeta ensel na olgeta man na ol arapela samting i stap long heven na long graun na aninit long graun ol i ken brukim skru long ai bilong Jisas.”—Filipai 2:9, 10.
Tasol pret long indai o amamas bilong em long kisim dispela pe God i bin promis long en, dispela i no pasim em long tingim yet ol aposel bilong em. Bihain Jon i tok long gutnius bilong em olsem: “Em i laikim ol moa yet i go inap long taim em i dai.” (Jon 13:1) Na long ol dispela laspela aua bilong em long stap laip olsem wanpela stretpela man bilong graun, Jisas i lainim ol disaipel bilong em long wanpela bikpela samting.
Em i Skulim Ol Long Pasin Daun
Ol aposel i stap wantaim Jisas long wanpela rum antap long Jerusalem bilong mekim bung bilong Pasova. Bipo, Jisas i bin harim ol i tok pait long husat i namba wan bilong ol. (Matyu 18:1; Mak 9:33, 34) Em i bin toktok wantaim ol na em i wok strong long stretim dispela tingting bilong ol. (Luk 9:46) Tasol nau Jisas i stretim ol long narapela rot bilong strongim ol tok em i bin mekim bipo. Em i no toktok tasol long ol long mekim pasin daun, nogat, em i soim ol long rot bilong mekim.
Jon i tok olsem: “Jisas i kirap na lusim kaikai, na em i rausim longpela klos bilong en, na i kisim wanpela taul na i pasim long bel bilong en. Na em i kapsaitim wara long wanpela dis, na em i stat long wasim lek bilong ol disaipel na mekim drai long taul em i bin pasim long bel bilong en.”—Jon 13:4, 5.
Long hap bilong Midel-Is, ples i hat, na long bipo ol man i save pasim sandel taim ol i wokabaut long ol rot i gat das. Taim ol i kamap long haus bilong wanpela man nating, man bilong haus bai tok gude long ol, na em i givim ol dis i gat wara long en bambai ol man i kam i ken wasim lek bilong ol. Long haus bilong ol maniman, wanpela wokboi nating i save mekim dispela wok bilong wasim lek.—Hetman 19:21; 1 Samuel 25:40-42.
Taim Jisas na ol aposel bilong em i stap long dispela rum antap, i no olsem wanpela man i bin singautim ol. I no gat man bilong givim ol dis long ol, na i no gat wokboi i stap bilong wasim lek bilong ol. Taim Jisas i kirap wasim lek bilong ol, ol aposel i pilim nogut tru long dispela samting. Wanpela Man i nambawan tru namel long ol em i mekim dispela wok bilong ol man nating tasol!
Pastaim Pita i no laik Jisas i wasim lek bilong em. Tasol Jisas i tokim em: “Sapos mi no wasim yu, orait yu no inap i stap wantaim mi.” Taim Jisas i wasim lek bilong olgeta aposel pinis orait em i tok: “Ating yupela i save long as bilong dispela samting mi mekim long yupela? Yupela i save kolim mi Tisa na Bikpela. Na i gutpela yupela i tok olsem. Mi Tisa na mi Bikpela bilong yupela. Mi Bikpela na mi Tisa, na mi wasim lek bilong yupela. Orait yupela tu i mas wasim lek bilong ol arapela man bilong lain bilong yumi. Mi soim pasin long yupela, na yupela tu i mas mekim wankain pasin olsem nau mi mekim long yupela.”—Jon 13:6-15.
I no olsem Jisas i laik kirapim wanpela pasin bilong lotu olsem wasim lek bilong man. Nogat. Em i helpim ol aposel bilong em long kisim wanpela nupela pasin—em pasin daun na ol i mas i gat laik long mekim wok bilong helpim ol brata bilong ol maski em i wanpela wok ol man nating i save mekim. I luk olsem, dispela samting i bin skulim ol gut. Tingim samting i bin kamap long sampela yia bihain taim wanpela askim bilong pasin bilong katim skin i kamap. Tru ol i bin “mekim planti toktok,” tasol ol aposel i bin stap long dispela bung ol i bin mekim pasin daun na harim gut tingting bilong ol narapela. Na tu, i luk olsem man i bin bosim dispela bung em disaipel Jems—na i no wanpela bilong ol aposel. Ol aposel tu i bin stap long dispela bung, olsem na yumi ken ting wanpela bilong ol bai bosim. Tasol nogat. Dispela tok i stap long Buk Aposel i makim olsem ol aposel i bin lain gut tru long mekim pasin daun.—Aposel 15:6-29.
Dispela i Skulim Yumi Long Wanem Samting?
Jisas i wasim lek bilong ol disaipel bilong em, na dispela i skulim yumi tru long mekim pasin daun. Tru tumas, ol Kristen i no ken ting olsem ol i bikpela man na ol narapela i mas mekim wok bilong ol, na ol i no ken tingting long kisim namba na biknem. Ol i mas bihainim pasin bilong Jisas, em “i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri.” (Matyu 20:28) Em nau, ol disaipel bilong Jisas i mas laik long mekim wok i no gat nem bambai narapela i ken helpim narapela.
I gat gutpela as na Pita i tok: “Yupela olgeta i mas bihainim pasin bilong daunim yupela yet na i stap aninit long ol arapela. . . . Yumi save, ‘God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.’ ” (1 Pita 5:5) Long tok Grik, dispela tok i makim olsem man i mas pasim dispela pasin daun olsem wanpela wokboi nating i save pasim longpela klos bilong em taim em i putim laplap bilong wok. Yu ting Pita i mekim wok long dispela tok, long wanem, em i tingim pasin Jisas i bin mekim long pasim taul long namel bilong em na wasim lek bilong ol aposel bilong em? Yumi no save em i bin tingim dispela samting o nogat. Tasol Pita i pilim tru long bel pasin daun Jisas i mekim bilong wasim lek, na olgeta man i bihainim Krais ol tu i mas pilim tru long bel dispela samting.—Kolosi 3:12-14.