Pasin Bilong Tingting Planti No Ken Larim Dispela i Daunim Yu
“YUPELA i no ken tingting tumas long tumora. De tumora em i ken tingting long samting bilong em yet. Hevi bilong wanpela de em inap long dispela de tasol.” (Matyu 6:34) Dispela tok bilong Krais Jisas em inap tru long helpim yumi olgeta i stap nau long dispela taim bilong ol man i save mekim hariap ol samting na bel bilong ol i no stap isi.
Tasol yu ting i gat rot na yumi no ken tingting planti long ol hevi na ol wok samting bilong yumi? Planti milion manmeri ol i save bel hevi, na bel bilong ol i bagarap, na ol i pilim olsem ol i karim bikpela hevi. Long dispela as tasol, lain i wok bisnis long wokim ol strongpela marasin bilong mekim isi bel bilong man ol i save kisim bikpela mani tru.
Kisim Stretpela Tingting
Yumi mas tingting gut na stretim rot bambai yumi inap mekim ol wok bilong yumi na karim ol hevi inap painim yumi, maski yumi mas mekim kwiktaim ol dispela samting o nogat. Baibel i tok sapos yumi laik mekim wanpela bikpela wok, yumi mas “sindaun pastaim na tingim gut pe” bilong mekim dispela samting. (Luk 14:28-30) Olsem: Yumi mas skelim gut ol samting yumi inap mekim, na tingim ol samting inap kamap long dispela wok, na tingim pe bilong en, olsem taim na strong na mani yumi mas tromoi.
Tru, yumi mas tingim gut ol samting inap kamap, tasol yumi no inap long tingim olgeta samting bai kamap. Olsem, ating yu laik tingim ol samting yu ken mekim na bai famili bilong yu i ken stap gut sapos paia i kamap long haus. Ating yu bai baim na putim long haus ol liklik masin i save pairap taim smok i holim, na ol pam i gat marasin long en bilong mekim i dai paia. Na ating yu bai makim sampela hap bilong haus em bai givim rot long famili i ken lusim haus hariap sapos paia i kamap, na mekim traim long pasin bilong lusim haus long ol dispela rot. Tasol olsem wanem pasin bilong tingting gut na redi gut i narapela kain long pasin bilong tingting planti tumas? Pasin bilong tingting planti tumas i olsem yu tingim tingim kain kain samting yu ting em inap kamap, tasol ating em i no ken kamap. Ating bel bilong yu i no stap isi na yu ting i gat sampela samting yu no bin tingting long mekim bilong lukautim famili bilong yu o yu ting ol samting yu mekim pinis i no inap. Sapos yu tingting planti olsem, dispela inap mekim na yu no slip gut.
Moses i Sanap Long Pes Bilong King
God Jehova i tokim Moses long mekim wanpela bikpela wok. Pastaim Moses i mas sanap long ai bilong ol Israel na kirapim ol long bilip olsem Jehova i bin makim em long bringim ol i go lusim Isip. Bihain long dispela, Moses i mas kamap long ai bilong king bilong Isip na tokim em long larim ol Israel i go. Na las tru, Moses i mas bringim dispela bikpela lain, inap sampela milion, i go brukim wanpela ples drai na i go kamap long wanpela kantri i gat ol man i birua long ol. (Kisim Bek 3:1-10) Ating ol dispela samting inap mekim Moses i pret, tasol yu ting Moses i larim dispela i mekim na em i tingting planti tumas?
Yumi save, i gat planti samting Moses i tingting planti long en. Em i tokim Jehova: “Taim mi go kamap long ol Israel bai mi tokim ol olsem, ‘God bilong ol tumbuna bilong yumi i salim mi na mi kam long yupela.’ Na sapos ol i askim mi, ‘Wanem nem bilong en?’, orait bai mi bekim wanem tok long ol?” Jehova i tokim em long tok em i mas bekim long ol. (Kisim Bek 3:13, 14) Na Moses i tingting tu long ol samting inap kamap sapos king i no bilipim tok bilong em. Jehova i bekim gen tok bilong Moses. Na las tru, Moses i tokaut olsem em i “no man bilong toktok gut.” Wanem samting inap helpim em? Jehova i tokim Aron long kamap olsem maus bilong Moses.—Kisim Bek 4:1-5, 10-16.
Moses i save pinis long ol bekim bilong ol askim bilong em, na em i bilip long God, na nau em i kirap mekim olgeta samting Jehova i bin tokim em long mekim. Em i no tingim tingim ol samting inap painim em long taim em i kamap long king na larim dispela i bagarapim bel bilong em, nogat. Moses i “mekim olgeta samting olsem Bikpela i tok.” (Kisim Bek 7:6) Sapos em i bin larim pasin bilong tingting planti tumas i daunim em, ating dispela inap mekim na bai bilip na bel bilong em i no strong moa long inapim em long mekim dispela wok.
Moses i bihainim stretpela tingting long mekim dispela wok bilong em, na em i stap olsem gutpela piksa bilong man i “bosim gut” tingting. (2 Timoti 1:7; Taitus 2:2-6) Sapos Moses i no bin bosim gut tingting, orait dispela bikpela wok em i mas mekim ating em inap daunim em na nau em i no laik kisim dispela wok.
Bosim Gut Tingting Bilong Yu
Taim samting i kamap bilong traim bilip bilong yu, o sampela hevi i painim yu, yu save mekim wanem? Yu save tingting planti na tingting tasol long ol hevi na ol wok yu mas mekim? O yu save kisim stretpela tingting long ol dispela samting? Ating samting yu tingting planti long en, dispela i no inap kamap, olsem na nogut yu tingting planti na bagarapim bel bilong yu, a? Baibel i tok: “Sapos man i save wari oltaim, em bai i bel hevi tru na tingting bilong en bai i bagarap.” (Sindaun 12:25) Planti taim dispela i mekim na man i surikim taim bilong mekim wok—em i no mekim samting em i mas mekim na bihain i no gat rot moa.
Samting i bikpela samting moa i olsem: Pasin bilong tingting planti tumas inap bagarapim yu long ol samting bilong spirit. Tok bilong Krais Jisas i makim olsem pasin bilong bilip long mani, em strong bilong en inap giamanim man, na pasin bilong “tingting planti long ol samting bilong graun,” ol dispela samting ol inap karamapim “gutnius bilong kingdom bilong heven” yumi bin amamas long harim. (Matyu 13:19, 22) Olsem ol rop i gat nil inap pasim rot long ol pikinini kaikai i ken kamap bikpela na karim kaikai, olsem tasol, sapos yumi no bosim gut tingting na yumi tingting planti tumas, dispela inap pasim rot long yumi ken kamap strong long spirit na long kamapim kaikai i litimapim nem bilong God. Dispela samting man i mekim long em yet na i bagarapim em long spirit, dispela i bin pasim sampela long dediket long Jehova. Ol i tingting planti, ‘Olsem wanem sapos mi no bihainim dediket bilong mi?’
Aposel Pol i tok, taim yumi mekim pait bilong spirit, yumi mas wok long ‘kalabusim olgeta tingting bilong yumi, bilong mekim tingting bilong yumi i bihainim laik bilong Krais.’ (2 Korin 10:5) Nambawan birua bilong yumi, em Satan, em bai amamas tru sapos em i gat rot long mekim wok long ol samting yumi save tingting planti long en—em i laik mekim yumi i bel hevi na em i laik bai yumi no stap strong moa long ol samting bilong skin na bel na tingting. Sapos man i gat tupela tingting long sampela samting na em i no was gut, Satan bai mekim wok long dispela samting bilong giamanim em. Olsem na Pol i toksave long ol Kristen olsem ol i no ken “opim dua long Satan.” (Efesus 4:27) Satan em i “giaman god bilong dispela graun” na em i bin ‘pasim tingting bilong ol man i no bilip.’ (2 Korin 4:4) Nogut yumi larim em i bosim tingting bilong yumi, a?
Samting Bilong Helpim Yu
Taim pikinini i gat hevi, em inap go lukim gutpela papa bilong em na papa bai givim gutpela tingting long em na mekim isi bel bilong em. Na olsem tasol, yumi ken beten tokim Papa bilong yumi i stap long heven, em Jehova, long ol hevi bilong yumi. Jehova i tok, olgeta hevi na ol samting yumi tingting planti long en, yumi mas putim long han bilong em. (Song 55:22) Olsem pikinini i no save tingting planti moa long ol hevi bilong em taim papa i givim tok pinis long em bilong strongim em, orait yumi tu, taim yumi putim ol hevi bilong yumi long han bilong Jehova, yumi mas larim ol i stap wantaim em.—Jems 1:6.
Ol samting yumi tingting planti long en, olsem wanem yumi inap putim long han bilong Jehova? Filipai 4:6, 7 i bekim tok olsem: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” Olsem na long rot bilong beten strong, Jehova inap mekim bel bilong yumi i stap isi—bai yumi no tingting planti tumas long ol samting na bagarapim bel bilong yumi.—Jeremaia 17:7, 8; Matyu 6:25-34.
Tasol bilong wok wantaim beten bilong yumi, yumi no ken stap wanpis—long skin o long tingting. (Sindaun 18:1) Yumi mas tingim ol lo bilong Baibel i soim yumi long rot bilong stretim hevi bilong yumi—long dispela rot bai yumi no ting save bilong yumi yet inap helpim yumi. (Sindaun 3:5, 6) Ol yangpela na ol lapun tu, ol i ken lukim Baibel na ol buk bilong Sosaiti Was Taua ol i gat planti tok long en bilong givim gutpela tingting long yumi long pasin bilong skelim ol samting yumi mas mekim na long stretim ol hevi. Na tu, insait long kongrigesen Kristen i gat ol elda i gat gutpela tingting na save na sampela strongpela Kristen moa ol i redi oltaim long toktok wantaim yumi. (Sindaun 11:14; 15:22) Ol man i no insait long hevi bilong yumi na ol i bihainim tingting bilong God long ol samting, ating ol inap helpim yumi long kisim stretpela tingting long ol hevi bilong yumi. Ol i no ken makim ol samting yumi mas mekim, tasol ol inap mekim bikpela wok bilong strongim bel bilong yumi na helpim yumi.
‘Wetim God i Helpim Yu’
Yumi save pinis olsem long olgeta de i gat sampela hevi i save kamap na yumi mas karim o stretim, olsem na nogut yumi tingting planti long samting ating em i no inap kamap. Sapos bel bilong yu i no stap isi na yu tingting planti tumas, orait beten askim Jehova long helpim yu. Lukim Baibel na larim oganaisesen bilong em i soim rot long yu na givim gutpela tingting long yu. Olsem na maski wanem wanem hevi i painim yumi, yumi gat helpim bilong karim dispela hevi.
Bel bilong man i raitim Song i no stap isi, na em i tok: “Bilong wanem mi bel hevi oltaim? Bilong wanem bel bilong mi i kirap nogut? Mi mas bilip long God na wetim em i helpim mi. Em i God bilong mi na i save helpim mi. Olsem na bai mi litimapim nem bilong em gen.” (Song 42:11) Dispela tingting i mas i stap olsem tingting bilong yumi tu.
Em nau, redi long ol samting yu save em bai kamap, na ol samting yu no save em bai kamap, larim dispela i stap long han bilong Jehova. “God i save wari long yupela. Olsem na olgeta hevi yupela i karim, yupela i mas putim long han bilong en.”—1 Pita 5:7.
[Piksa long pes 23]
Olsem wanem? Yu save bihainim pasin bilong Devit na putim ol hevi na ol samting yu tingting planti long en long han bilong Jehova?