Yumi Amamas Long Jehova i Soim Rot Bilong Em Long Yumi
“Pasin bilong God i gutpela tru na i stret olgeta. . . . Tok bilong en em i tru olgeta.”—2 SAMUEL 22:31.
1, 2. (a) Olgeta manmeri i mas i gat wanem samting? (b) I gutpela yumi bihainim pasin bilong husat?
OLGETA manmeri i mas i gat man bilong soim rot long ol. Tru tumas, yumi mas kisim helpim bilong soim rot long yumi. Tru, Jehova i wokim yumi na yumi gat save na maus bilong bel bilong helpim yumi long skelim wanem samting i stret na wanem samting i no stret. Tasol yumi mas lainim maus bilong bel bambai em i ken stiaim gut yumi. (Hibru 5:14) Na tingting bilong yumi i mas kisim stretpela save, na em i mas lain long skelim gut dispela save sapos yumi laik skelim stret ol samting yumi mas mekim. (Sindaun 2:1-5) Tasol maski yumi mekim olsem, sampela samting inap painim yumi na ol samting yumi tingting pinis long mekim i no kamap olsem yumi laikim. (Saveman 9:11) Yumi yet i no inap save gut wanem samting bai painim yumi long bihain.
2 Ol dispela samting na planti samting moa i mekim, na profet Jeremaia i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Krais Jisas, em nambawan man tru i winim olgeta narapela man, em i larim narapela i soim rot long em. Em i tok: “Pikinini em i no inap mekim wanpela samting long tingting bilong em yet. Nogat. Em i mekim tasol ol samting em i lukim Papa i mekim. Olgeta samting Papa i save mekim, em Pikinini tu i save mekim.” (Jon 5:19) Olsem na yumi bihainim savepasin sapos yumi bihainim pasin bilong Jisas na askim Jehova long stiaim wokabaut bilong yumi! King Devit i mekim singsing olsem: “Pasin bilong God i gutpela tru na i stret olgeta. Sapos em i promis long mekim wanpela samting, orait tok bilong en em i tru olgeta. Bikpela i olsem hap plang bilong pait, na em i save lukautim gut olgeta man i go long em na ol i hait long ol birua.” (2 Samuel 22:31) Sapos yumi wok long bihainim rot Jehova i makim na yumi no bihainim save bilong yumi yet, bai yumi kisim helpim i gutpela olgeta bilong soim rot long yumi. Pasin bilong sakim rot God i makim i save kamapim bikpela hevi.
Jehova i Soim Rot
3. Jehova i soim rot long Adam na Iv olsem wanem? Wanem ol samting inap painim tupela?
3 Tingim Adam na Iv. Maski ol i no gat sin, ol i mas i gat man bilong soim rot long ol. Jehova i no larim Adam wanpela tasol i tingim olgeta samting em i mas mekim long gutpela gaden Iden, nogat. God i givim wok long em. Namba wan wok Adam i mas mekim, em long givim nem long ol animal. Bihain, Jehova i tokaut long sampela samting em i laik Adam na Iv i mekim. Ol i mas bosim graun, kamapim planti pikinini na bai ol i ken pulap long graun, na lukautim ol animal. (Stat 1:28) Dispela i bikpela wok tru, tasol samting em bai kamap long en, em wanpela paradais long olgeta hap na ol manmeri i gutpela olgeta ol i pulap long en na ol i stap gut wantaim ol animal. Man! Em wanpela gutpela samting tru! Na tu, taim Adam na Iv i bihainim gut rot Jehova i makim, ol inap toktok wantaim em. (Skelim wantaim Stat 3:8.) Em wanpela gutpela samting tru long i stap pren bilong God long oltaim!
4. Olsem wanem Adam na Iv i kamapim klia olsem ol i no bilip na ol i no stap gut long God? Wanem ol samting nogut i painim ol?
4 Jehova i tambuim namba wan man na meri long kaikai long diwai bilong givim save long samting i gutpela na samting i nogut, em wanpela diwai i stap long Iden, na dispela i givim rot long tupela i ken kamapim olsem ol i bihainim tok bilong Jehova—ol i gat laik long wokabaut long rot Jehova i makim. (Stat 2:17) Tasol i no longtaim na Satan i traim ol olsem ol bai bihainim tok bilong God o nogat. Sapos Adam na Iv i laik bihainim yet tok bilong Jehova, orait taim Satan i kam na mekim ol tok giaman, ol i mas kamapim klia olsem ol i stap gut long Jehova na ol i bilip long ol promis bilong Em. Tasol sori tru, ol i no stap gut long God na ol i no bilip long em. Taim Satan i tokim Iv em i ken bosim wokabaut bilong em yet na em i giaman na tok olsem Jehova em i man bilong tok giaman, dispela i giamanim Iv na em i sakim tok bilong God. Adam i bihainim Iv na mekim sin. (Stat 3:1-6; 1 Timoti 2:14) Taim ol i mekim olsem, ol i lus long planti samting. Sapos ol i bihainim rot Jehova i makim, dispela bai mekim na ol inap kisim bikpela amamas moa taim ol i wok long mekim ol samting bilong kamapim laik bilong em. Tasol nogat. Bel hevi na pen i painim ol i go inap long taim ol i dai.—Stat 3:16-19; 5:1-5.
5. Wanem laik bilong Jehova long bihain? Ol man i stap gut long em, olsem wanem em i save helpim ol long lukim ol dispela laik bilong em i kamap tru?
5 Tasol Jehova i no senisim laik bilong em olsem bihain graun bai kamap wanpela paradais ol manmeri i gutpela olgeta—olsem ol i no gat sin—ol inap sindaun long en. (Song 37:11, 29) Na long olgeta taim em i soim rot i gutpela olgeta long ol man i save wokabaut long rot em i makim na ol i wetim truim bilong dispela tok promis. Yumi ol man i gat yau bilong harim tok, yumi harim nek bilong Jehova i stap baksait long yumi, i ‘tokim yumi long rot yumi mas bihainim.’—Aisaia 30:21.
Sampela i Bin Wokabaut Long Rot Jehova i Makim
6. Husat tupela man long bipo yet ol i bin wokabaut long rot Jehova i makim? Wanem samting bai painim ol?
6 Baibel i tok, sampela tasol bilong ol pikinini bilong Adam na Iv ol i bin wokabaut long rot Jehova i makim. Abel em namba wan bilong ol pikinini bilong tupela long mekim olsem. Maski em i dai taim em i no lapun yet, Jehova i amamas long em, olsem na em bai kirap bek long matmat wantaim ol “stretpela man” long taim God i makim. (Aposel 24:15) Em bai lukim bikpela laik bilong Jehova long dispela graun na long ol manmeri i kamap tru. (Hibru 11:4) Narapela man i bin wokabaut long rot Jehova i makim em Enok. Tok profet bilong em long las de bilong dispela graun i stap long Buk Jut. (Jut 14, 15) Enok tu i dai taim em i no lapun yet. (Stat 5:21-24) Tasol “pasin bilong Enok i gutpela long ai bilong God.” (Hibru 11:5) Wankain olsem Abel, taim em i dai em inap long wetim truim bilong kirap bek, na em bai insait long dispela lain ol bai lukim truim bilong ol samting Jehova i laik mekim.
7. Olsem wanem Noa na famili bilong em ol i kamapim klia olsem ol i stap gut long Jehova na ol i bilip long em?
7 Taim pasin nogut bilong ol man paslain long Bikpela Tait i go bikpela moa, pasin bilong bihainim tok bilong Jehova em i kamap olsem wanpela bikpela traim tru bilong ol man—ol bai stap gut long God o nogat. Klostu long taim ol manmeri long dispela taim ol i laik bagarap, wanpela liklik lain tasol ol i wokabaut long rot Jehova i makim. Noa na famili bilong em ol i harim tok bilong God na ol i bilip long tok bilong em. Ol i mekim gut ol wok God i givim long ol na ol i no larim ol pasin nogut bilong ol man long dispela taim i pulim ol. (Stat 6:5-7, 13-16; Hibru 11:7; 2 Pita 2:5) Yumi ken amamas long ol i bin stap gut long God na ol i bilip na bihainim tok bilong em. Ol i mekim olsem, na ol i abrusim bagarap long taim bilong Bikpela Tait na ol i kamap ol tumbuna bilong yumi.—Stat 6:22; 1 Pita 3:20.
8. Lain Israel i mas mekim wanem bilong wokabaut long rot God i makim?
8 Bihain, Jehova i wokim kontrak wantaim ol tumbuna pikinini bilong gutpela man Jekop, na ol i kamap lain manmeri tru bilong em. (Kisim Bek 19:5, 6) Jehova i soim rot long dispela lain bilong em long rot bilong Lo em Moses i raitim, na lain pris, na ol tok profet bilong soim rot long ol long olgeta taim. Tasol ol Israel yet i mas bihainim dispela rot Jehova i makim. Jehova i tokim profet bilong em long tokaut long ol Israel olsem: “Harim. Mi soim yupela tupela rot bilong yupela i ken bihainim. Narapela em bilong God i mekim gut long yupela na narapela em bilong God i bagarapim yupela. Sapos yupela i bihainim ol lo bilong God, Bikpela bilong yumi, nau mi givim long yupela, orait bai God i mekim gut long yupela. Tasol sapos yupela i lusim rot bilong bihainim lo, na yupela i go lotu long ol giaman god yupela i no bin lotu long ol bipo, orait bai God i bagarapim yupela.”—Lo 11:26-28.
As na Sampela i Lusim Rot Jehova i Makim
9, 10. Ol Israel i stap olsem wanem na ol i mas bilip long Jehova na wok long i stap gut long em?
9 Olsem Adam na Iv, ol Israel i mas bilip long Jehova na stap gut long em bambai ol i ken bihainim yet tok bilong em. Israel em i wanpela liklik lain i stap namel long ol lain bilong bel nogut na pait. Isip na Itiopia i stap long hap bilong saut-wes. Long hap bilong not-is i gat Siria na Asiria. Long ol hap klostu i gat Filistia, Amon, Moap, na Idom. Long narapela narapela taim ol dispela lain i bin birua long ol Israel. Na tu, ol dispela lain i bihainim lotu giaman, olsem ol i lotuim ol god giaman, na lukluk long ol sta bilong kisim save long samting bai kamap bihain, na sampela bilong ol i mekim ol pasin sem nogut tru na pasin nogut bilong kilim i dai ol pikinini olsem ofa. Ol lain i sindaun klostu long ol Israel, ol i ting ol god bilong ol bai helpim ol long kamapim planti pikinini, na long kisim planti kaikai long gaden, na long winim ol pait.
10 Lain Israel tasol i lotuim wanpela God, em Jehova. Em i tok promis olsem, sapos ol i bihainim ol lo bilong em, em bai mekim gut long ol na ol bai kamapim planti pikinini, na planti kaikai moa bai kamap long gaden bilong ol, na ol birua i no ken bagarapim ol. (Lo 28:1-14) Sori tru, planti long lain Israel ol i no laik bihainim ol lo bilong God. Ol Israel i wokabaut long rot Jehova i makim, planti bilong ol i kisim hevi, long wanem, ol i stap gut long God. Na sampela i kisim nogut long han bilong ol wanlain Israel, em ol i givim bikpela pen long ol, toknogutim ol, paitim ol, kalabusim ol, tromoi ston long ol, na kilim ol i dai. (Aposel 7:51, 52; Hibru 11:35-38) Em bikpela traim i painim ol lain i stap gut long God! Tasol bilong wanem planti i lusim rot Jehova i makim? Yumi ken tingim tupela samting i bin kamap long ol Israel na dispela bai helpim yumi long save long tingting kranki bilong ol.
Ahas i No Stap Olsem Gutpela Piksa
11, 12. (a) Taim Asiria i laik kam pait, Ahas i no laik mekim wanem? (b) Ahas i laik kisim helpim long wanem tupela lain?
11 Long yia 761 i go inap long yia 746 B.C.E., Ahas em king bilong Juda long hap bilong saut. Ol manmeri i no stap bel isi taim em i stap king. Wanpela taim, Siria na kingdom bilong Israel long hap bilong not, ol i bung wantaim bilong pait long em, na “king wantaim olgeta manmeri bilong en i pret na ol i guria nogut tru.” (Aisaia 7:1, 2) Tasol taim Jehova i tok em i laik helpim em na em i tokim Ahas long traim strong bilong em, Ahas i no laik tru! (Aisaia 7:10-12) Olsem na Juda i lus long pait na planti bilong ol i go kalabus o kisim bagarap.—2 Stori 28:1-8.
12 Ahas i no laik bilip na askim Jehova long helpim em, tasol em i no surik long askim king bilong Asiria long helpim em. Tasol maski em i mekim olsem, Juda i kisim nogut yet long ol lain i sindaun klostu long en. Taim Asiria tu i birua long Ahas na “wok long mekim nogut long [em],” king i kirap na “mekim ol ofa long ol giaman god bilong ol Siria, em ol dispela lain i bin winim em long pait,” na em i tok: “Ol god bilong ol king bilong Siria i bin helpim ol Siria. Olsem na sapos mi mekim ofa long ol, ating bai ol i helpim mi tu.”—2 Stori 28:20, 23.
13. Ahas i laik bai ol god bilong Siria i helpim em na dispela i kamapim long ples klia wanem samting?
13 Long narapela taim bihain, Jehova i tokaut long Israel olsem: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut. Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.” (Aisaia 48:17, 18) Ahas i singaut long ol god bilong Siria, olsem na em i kamapim long ples klia olsem em i stap longwe long ‘stretpela pasin em i mas bihainim.’ Tingting bilong ol narapela lain i giamanim em tru na em i singaut long ol god giaman bilong ol bambai ol i ken helpim em na kantri i ken stap gut—em i no singaut long Jehova.
14. Bilong wanem i no gat as na Ahas i singaut long ol god giaman i helpim em?
14 Inap longtaim pinis samting i bin kamap ples klia olsem: Ol god bilong ol narapela lain na ol god bilong Siria tu, ol i “giaman god” tasol. (Aisaia 2:8) Paslain long dispela, taim King Devit i mekim wok king, strong bilong Jehova long winim ol god bilong Siria i kamap klia tru taim ol Siria i kamap ol wokman bilong Devit. (1 Stori 18:5, 6) Jehova wanpela tasol, “Bikpela bilong yumi, i winim olgeta kain giaman god na olgeta samting i gat strong. Em i bikpela na strongpela, na olgeta samting i mas pret na aninit long em,” em inap helpim yumi long stap gut tru. (Lo 10:17) Tasol Ahas, em i givim baksait long Jehova na em i singaut long ol god bilong ol narapela lain bambai kantri bilong em i ken stap gut. Em i mekim olsem na bikpela hevi i painim Juda.—2 Stori 28:24, 25.
Ol Juda Wantaim Jeremaia Long Isip
15. Olsem wanem ol Juda i stap long Isip long taim bilong Jeremaia ol i mekim sin?
15 Lain bilong Jehova ol i no stap gut liklik long em, olsem na long 607 B.C.E., Jehova i larim ol Babilon i bagarapim Jerusalem na tempel bilong en. Klostu olgeta bilong lain Israel ol i go kalabus long Babilon. Tasol sampela i stap yet long Jerusalem na wanpela bilong ol em profet Jeremaia. Taim ol i kilim i dai Gavena Gedalia, dispela lain i stap yet long Jerusalem ol i ranawe long Isip na ol i kisim Jeremaia i go wantaim ol. (2 King 25:22-26; Jeremaia 43:5-7) Long dispela hap, ol i kirap mekim ofa long ol god giaman. Jeremaia i bin wok long toktok gut wantaim ol Juda i no stap gut long Jehova, tasol ol i bikhet. Ol i no laik tanim bel na kam long Jehova, na ol i strong olsem ol bai mekim yet ofa bilong smok i gat gutpela smel long “Kwin Bilong Heven.” Bilong wanem? Long wanem, ol yet na ol tumbuna bilong ol, ol i bin mekim olsem long ‘ol taun bilong Juda na long ol rot bilong Jerusalem. Taim ol i bin mekim olsem, ol i gat planti kaikai na ol i stap gut na i no gat wanpela samting nogut i kamap long ol.’ (Jeremaia 44:16, 17) Na ol Juda i tok: “Stat long taim mipela i lusim pasin bilong mekim ol dispela kain ofa long Kwin Bilong Heven, na i kam inap nau, mipela i sot tru long olgeta samting na ol birua i bin kilim mipela i dai na mipela i sot long kaikai na i dai.”—Jeremaia 44:18.
16. Bilong wanem tingting bilong ol Juda i stap long Isip i kranki stret?
16 Man inap tingim ol samting em i laik tingim, na em tasol, a? Olsem wanem? Dispela tok bilong ol i stret o nogat? Ol Juda i bin mekim tru ol ofa long ol god giaman long graun Jehova i bin givim long ol. Sampela taim, olsem long taim bilong Ahas, ol i kisim hevi long dispela pasin bilong ol long lusim Jehova na kisim ol narapela god. Tasol Jehova i no “belhat kwik” long lain i stap insait long kontrak wantaim em. (Kisim Bek 34:6; Song 86:15) Em i salim ol profet bilong em bilong kirapim ol long tanim bel. Taim king i stap gut long Jehova, em i mekim gut long king, na dispela i bin helpim ol manmeri, maski bikpela hap lain bilong ol i no stap gut long Jehova. (2 Stori 20:29-33; 27:1-6) Ol Juda i stap long Isip, ol i kranki stret taim ol i tok ol god giaman bilong ol i bin helpim ol na ol i bin kisim gutpela sindaun long as ples!
17. Bilong wanem lain Juda i raus long graun bilong ol na tempel bilong ol i bagarap?
17 Paslain long yia 607 B.C.E., Jehova i kirapim ol manmeri bilong Juda, olsem: “Yupela i mas bihainim tok bilong mi, na bai mi stap God bilong yupela, na bai yupela i stap lain manmeri bilong mi. Na olgeta pasin mi tokim yupela long bihainim, em yupela i mas bihainim, na bai yupela i ken i stap gut.” (Jeremaia 7:23) Tempel bilong ol Juda i bagarap na ol i raus long graun bilong ol, long wanem, ol i no laik wokabaut long rot Jehova i ‘tokim ol long bihainim.’ Nogut yumi popaia na kisim nogut olsem.
Jehova i Save Mekim Gut Long Ol Lain i Wokabaut Long Rot Em i Makim
18. Ol man i save wokabaut long rot Jehova i makim, ol i mas mekim wanem?
18 Long nau, wankain olsem long bipo, yumi mas stap gut long Jehova bambai yumi ken wokabaut long rot em i makim—yumi mas tingting strong long lotuim em wanpela tasol. Yumi mas bilip long Jehova—yumi mas bilip tru olsem ol tok promis bilong Jehova bai kamap tru. Bilong wokabaut long rot Jehova i makim yumi mas bihainim tok bilong em—olsem bihainim ol lo bilong em na no ken lusim. “God yet i save mekim stretpela pasin tasol, na em i laikim stretpela pasin.”—Song 11:7.
19. Planti long nau ol i save lotuim wanem ol god? Wanem samting i kamap long dispela pasin bilong ol?
19 Ahas i singaut long ol god bilong Siria bambai kantri i ken stap gut. Ol Israel i stap long Isip ol i laik bai “Kwin Bilong Heven”—em wanpela god meri long hap bilong Midel-Is bilong bipo em planti man i lotuim—em i helpim ol long kisim planti samting bilong skin. Long nau, planti god ol i no olsem ol imis tru tru. Jisas i bin mekim tok lukaut long pasin bilong tingting tasol long “mani” na lusim tingting long Jehova. (Matyu 6:24) Aposel Pol i tok “pasin bilong mangal em i wankain olsem pasin bilong lotu long giaman god.” (Kolosi 3:5) Na tu, em i toktok long ol man i save bihainim ol laik bilong bodi bilong ol yet, na “ol dispela laik i stap olsem god bilong ol.” (Filipai 3:19) Tru tumas, mani na ol samting bilong skin, ol i stap olsem namba wan samting ol man long nau i putim olsem god bilong ol. Klostu olgeta man—planti em ol man bilong lotu tu—‘ol i bilip long ol dispela kain samting i save bagarap kwik.’ (1 Timoti 6:17) Planti ol i wok strong tru long kisim ol dispela samting i olsem god bilong ol, na sampela i kisim ol gutpela samting long en—ol i sindaun long ol gutpela gutpela haus, na baim ol samting i gat bikpela pe, na kisim ol gutpela kaikai tru. Tasol i no olgeta man i save holim planti gutpela samting olsem. Na maski sampela i kisim ol dispela samting, bihain ol dispela samting i no save amamasim ol moa. Em ol samting inap bagarap kwik, na samting bilong i stap sotpela taim, na ol i no inapim ol long ol samting bilong spirit.—Matyu 5:3.
20. Yumi mas wok long bihainim wanem gutpela tingting?
20 Tru, yumi mas bihainim gutpela tingting, long wanem, yumi stap long las de bilong pasin bilong dispela graun. Yumi mas mekim sampela samting bilong lukautim famili bilong yumi long ol samting bilong skin. Tasol sapos yumi ting gutpela sindaun, kisim planti mani, o kain samting olsem i bikpela samting, winim pasin bilong mekim wok bilong God, i olsem yumi lotuim god giaman na yumi no wokabaut moa long rot Jehova i makim. (1 Timoti 6:9, 10) Tasol olsem wanem taim sik i painim yumi, o yumi sot long mani samting, o narapela hevi i painim yumi? Nogut yumi olsem ol Juda i bin stap long Isip, em ol i tok ol i mekim wok bilong God na dispela i as bilong ol hevi bilong ol. Nogat. Yumi mas bilip olsem Jehova inap helpim yumi, em samting Ahas i no bin mekim. Stap gut long God Jehova na askim em long soim rot long yu. Bilip tru long em na bihainim dispela rot, na beten askim em long givim strong na gutpela tingting na save long yu bambai yu inap winim ol hevi i painim yu. Orait nau yu mas bilip na wet long Jehova i mekim gut long yu.
21. Ol man i wokabaut long rot Jehova i makim ol i kisim wanem ol gutpela samting?
21 Long taim bilong ol Israel long bipo, Jehova i bin mekim gut tru long ol man i bihainim rot em i makim. King Devit i mekim singsing olsem: “God, ol birua i laik bagarapim mi. Olsem na yu ken stiaim lek bilong mi na bai mi bihainim stretpela pasin bilong yu.” (Song 5:8) Jehova i helpim Devit long winim ol pait taim em i pait long ol lain i stap klostu—em ol lain i mekim nogut long Ahas long bihain. Taim Solomon i mekim wok king, Israel i stap bel isi na sindaun gut. Ol Juda i stap long Isip long bihain, ol i gat laik tru long kisim dispela kain sindaun. Na tu, Jehova i helpim pikinini man bilong Ahas, em Hesekia, long winim pait na daunim strongpela kantri Asiria. (Aisaia 59:1) Tru tumas, Jehova i helpim ol man i stap gut long em, em ol i no “wokabaut long rot bilong ol man bilong mekim sin” na ol i laikim tumas lo bilong em. (Song 1:1, 2) Wankain long nau tu. Tasol olsem wanem long yumi long nau, yumi inap save tru olsem yumi bihainim rot Jehova i makim? Yumi bai toktok long dispela samting long stori i kamap bihain long dispela.
Yu Inap Tingim?
◻ Wanem ol pasin i bikpela samting bambai yumi ken wokabaut long rot Jehova i makim?
◻ Bilong wanem tingting bilong Ahas i no stret?
◻ Ol Juda i stap long Isip, olsem wanem tingting bilong ol i kranki stret?
◻ Olsem wanem yumi ken strongim tingting bilong yumi bambai yumi ken wokabaut long rot Jehova i makim?
[Piksa long pes 13]
Ahas i singaut long ol god bilong Siria long helpim em—em i no singaut long Jehova