Jehova i Laik Bai Yumi Mas Mekim Wanem Samting Long Nau?
“Wanpela maus insait long dispela klaut i tok olsem, ‘Dispela em i Pikinini bilong mi, mi laikim em tumas, na mi amamas long em. Yupela harim tok bilong em.’ ”—MATYU 17:5.
1. Lo i bin inapim wok bilong en long wanem taim?
JEHOVA i bin givim Lo long lain Israel i gat planti hap bilong en. Aposel Pol i tok long ol dispela lo olsem: “Ol i tok long ol samting bilong bodi tasol. God i givim ol dispela lo bilong ol manmeri i ken bihainim i go inap long taim em i stretim olgeta samting.” (Hibru 9:10) Taim Lo i stiaim wanpela liklik hap lain Israel long bilip long Jisas olsem em i Mesaia, o Krais, dispela Lo i bin inapim wok bilong en. Olsem na Pol i tok: “Krais em inapim pinis lo bilong Moses.”—Rom 10:4; Galesia 3:19-25; 4:4, 5.
2. Husat i bin stap aninit long Lo? Long wanem taim ol i no gat wok moa long bihainim Lo?
2 Olsem wanem? Dispela i makim olsem long nau yumi no gat wok moa long bihainim dispela Lo? Klostu olgeta manmeri ol i no bin stap aninit long Lo, olsem man bilong raitim Song i tok: “[Bikpela] i givim tok bilong em long Jekop. Ol dispela tok na lo em i givim long ol Israel. Em i no save mekim olsem long ol arapela lain. Ol i no save [long] ol lo bilong en.” (Song 147:19, 20) Taim God i kamapim nupela kontrak long rot bilong ofa bilong Jisas, lain Israel tu i no gat wok moa long bihainim Lo. (Galesia 3:13; Efesus 2:15; Kolosi 2:13, 14, 16) Olsem na sapos yumi no gat wok moa long bihainim Lo, Jehova i laik bai ol manmeri i laik mekim wok bilong em long nau, ol i mas mekim wanem samting?
Ol Samting Jehova i Laik Bai Yumi Mas Mekim
3, 4. (a) Jehova i laik bai yumi mas mekim wanem samting long nau? (b) Bilong wanem yumi mas bihainim stret pasin bilong Jisas?
3 Insait long laspela yia Jisas i bin mekim wok bilong em long autim tok, aposel Pita, na Jems, na Jon, ol i go wantaim em long wanpela maunten i antap moa, ating em wanpela hap bilong maunten Hermon. Long dispela hap ol i lukim wanpela driman olsem Jisas i kam long bikpela lait na ol i harim nek bilong God yet i tok: “Dispela em i Pikinini bilong mi, mi laikim em tumas, na mi amamas long em. Yupela harim tok bilong em.” (Matyu 17:1-5) Na dispela em samting Jehova i laik bai yumi mekim—yumi mas harim tok bilong Pikinini bilong em na bihainim pasin na tok bilong em. (Matyu 16:24) Olsem na aposel Pita i tok: “Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.”—1 Pita 2:21.
4 Bilong wanem yumi mas bihainim stret pasin bilong Jisas? Long wanem, taim yumi bihainim pasin bilong em, yumi bihainim pasin bilong God Jehova. Jisas i save gut tru long Papa bilong em, long wanem, taim em i no kam yet long graun em i bin stap planti bilion yia wantaim em long heven. (Sindaun 8:22-31; Jon 8:23; 17:5; Kolosi 1:15-17) Taim Jisas i stap long graun, em i bin stap gut long mekim wok bilong Papa bilong em. Em i tok: “Mi save autim olgeta tok olsem Papa i bin soim mi.” Tru tumas, Jisas i bihainim stret pasin bilong Jehova, olsem na em inap tok: “Man i lukim mi, em i lukim Papa.”—Jon 8:28; 14:9.
5 Yumi mas mekim wanem bilong putim gut yau long tok bilong Jisas na bihainim pasin bilong em? Dispela i makim olsem yumi stap aninit long wanpela lo? Aposel Pol i tok: “Mi yet mi no aninit long lo.” Long hia em i toktok long “olpela kontrak,” em kontrak bilong Lo God i mekim wantaim ol Israel. Pol i tokaut olsem, em i “bihainim lo bilong Krais.” (1 Korin 9:20, 21; 2 Korin 3:14) Taim olpela kontrak bilong Lo i pinis, wanpela “nupela kontrak” i kirap mekim wok bilong en na dispela kontrak i gat “lo bilong Krais” i stap long en, na olgeta wokman bilong Jehova long nau ol i mas bihainim dispela lo.—Luk 22:20; Galesia 6:2; Hibru 8:7-13.
6. Yumi ken stori olsem wanem long “lo bilong Krais”? Olsem wanem yumi save bihainim dispela lo?
6 Jehova i no bin raitim dispela “lo bilong Krais” olsem em i bin raitim ol lo insait long olpela kontrak bilong Lo na putim ol wankain lo long wan wan lista bilong ol yet. Dispela nupela lo bilong ol disaipel bilong Krais em i no gat wanpela longpela lista long ol samting ol i mas mekim na ol samting ol i no ken mekim. Tasol long Baibel, Jehova i bin lukautim 4-pela bikpela stori long i stap bilong Pikinini bilong em na ol tok bilong em, na ol dispela stori i stap yet. Na God i bin kirapim sampela disaipel bilong Jisas bilong pastaim long raitim ol lo long pasin ol man i mas mekim, na ol wok bilong kongrigesen, na ol pasin ol wan wan i mas mekim insait long famili, na ol narapela samting. (1 Korin 6:18; 14:26-35; Efesus 5:21-33; Hibru 10:24, 25) Taim yumi bihainim ol pasin na tok bilong Krais Jisas, na yumi bihainim ol gutpela tok bilong ol man i raitim Baibel long taim bilong ol aposel, yumi bihainim “lo bilong Krais.” Jehova i laik bai ol wokboi bilong em long nau ol i mas mekim ol dispela samting.
Pasin Sori Em i Bikpela Samting
7. Taim Jisas i mekim laspela Pasova wantaim ol aposel bilong em, olsem wanem em i kamapim strong bikpela samting bilong lo bilong em?
7 Tru, pasin sori i bin stap olsem bikpela samting insait long Lo, tasol em i olsem nambawan bikpela samting bilong lo bilong Krais. Jisas i kamapim strong dispela samting taim em i bung wantaim ol aposel bilong em bilong mekim kaikai bilong Pasova long yia 33 C.E. Aposel Jon i stori long ol gutpela tok Jisas i bin mekim long dispela nait—inap 28 taim Jisas i toktok long pasin sori. Dispela i kamapim klia long ol aposel bilong em, wanem samting em i bikpela samting long lo bilong em. Jon i kirapim stori bilong em long dispela bikpela nait olsem: “De bilong kaikai abus bilong tingim De God I Larim Ol Israel I Stap Gut [olsem Pasova] em i no kamap yet, na Jisas i save, taim i kamap pinis bilong em i mas lusim dispela graun na i go long Papa. Em i laikim tumas ol manmeri bilong en i stap long dispela graun, na em i laikim ol moa yet i go inap long taim em i dai.”—Jon 13:1.
8. (a) Wanem samting i makim olsem ol aposel i wok long tok pait long wanpela samting? (b) Olsem wanem Jisas i skulim ol aposel bilong em long pasin daun?
8 Jisas i laikim tru ol aposel bilong em, na maski em i bin traim long helpim ol long daunim pasin bilong laikim tumas bikpela namba, ol i gat laik yet long kisim namba. Sampela mun paslain long taim ol i kam long Jerusalem, “ol i bin tok pait long husat em i namba wan bilong ol.” Na paslain liklik long taim ol i kam long Jerusalem bilong mekim Pasova, ol i tok pait gen long husat bai kisim bikpela namba. (Mak 9:33-37; 10:35-45) Samting i kamap bihain liklik long taim ol aposel i kam insait long wanpela rum antap bilong mekim laspela Pasova wantaim, dispela i kamapim olsem dispela hevi i stap yet. Long dispela taim i no gat wanpela i laik mekim dispela wok bilong wasim lek bilong narapela—em wanpela wok ol i save mekim long dispela taim bilong mekim gutpela pasin long man. Bilong skulim ol long pasin daun, Jisas yet i wasim lek bilong ol.—Jon 13:2-15; 1 Timoti 5:9, 10.
9. Olsem wanem Jisas i stretim wanpela hevi i kamap bihain long laspela Pasova?
9 Tasol maski Jisas i skulim ol long mekim pasin daun, bihain long ol i mekim Pasova na Jisas i kirapim Memorial bilong tingim indai bilong em klostu bai kamap, tingim wanem samting i bin kamap gen. Gutnius Luk i raitim i tok: “Ol disaipel i stat long pait long toktok long husat em i namba wan bilong ol.” Tasol Jisas i no belhat long ol aposel na krosim ol, nogat; long gutpela pasin em i givim tok long ol olsem ol i no ken bihainim pasin bilong ol man bilong dispela graun em ol i gat strongpela laik long bosim ol man. (Luk 22:24-27) Nau em i kamapim as tru bilong lo bilong Krais, em i tok: “Mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela.”—Jon 13:34.
10 Bihain, long dispela nait yet, Jisas i tokaut olsem ol disaipel i mas bihainim pasin bilong em long laikim tru ol man na ol i mas mekim i go inap long wanem mak. Em i tok: “Lo bilong mi em i olsem. Yupela wan wan i mas laikim tru ol arapela, long wankain pasin olsem mi bin laikim yupela. Sapos wanpela man i laikim tumas ol pren bilong en na i lusim laip bilong em yet bilong helpim ol, orait dispela pasin bilong laikim ol arapela i winim tru ol arapela pasin bilong laikim ol arapela manmeri.” (Jon 15:12, 13) Olsem wanem? Jisas i laik tok olsem ol disaipel bilong em ol i mas redi long i dai bilong helpim ol wanbilip sapos wanpela samting i kamap na ol i mas mekim olsem? Aposel Jon i kisim dispela tingting, em i wanpela man i bin stap long dispela taim, long wanem, bihain em i tok: “Jisas i lusim laip bilong em yet na i dai bilong helpim yumi, na dispela pasin bilong en i soim yumi pinis long pasin bilong laikim tru ol arapela. Na yumi tu yumi mas lusim laip bilong yumi bilong helpim ol Kristen brata.”—1 Jon 3:16.
11. (a) Olsem wanem yumi inapim tru lo bilong Krais? (b) Jisas i bin mekim wanem na em i stap olsem gutpela piksa?
11 Olsem na yumi no inapim lo bilong Krais sapos yumi skulim tasol ol narapela long en, nogat. Yumi mas wokabaut long wankain pasin olsem Jisas i bin mekim. Tru, taim Jisas i mekim ol tok em i kamapim ol gutpela switpela tok, tasol pasin em i mekim, dispela tu i skulim ol man. Maski Jisas i bin stap olsem strongpela ensel long heven, em i amamas long mekim wok bilong Papa bilong em long graun na long soim yumi long pasin yumi mas mekim. Em i bin mekim pasin daun, na gutpela pasin, na tingim gut ol man, na helpim ol man em hevi i daunim ol na ol i bel hevi. (Matyu 11:28-30; 20:28; Filipai 2:5-8; 1 Jon 3:8) Na Jisas i kirapim ol disaipel bilong em long narapela i mas laikim tru narapela, olsem em i laikim ol.
12. Bilong wanem yumi ken tok olsem lo bilong Krais i no makim olsem yumi no gat wok long laikim tru Jehova?
12 Pasin bilong laikim tru Jehova em i nambawan bikpela lo insait long Lo Bilong Moses, olsem na dispela pasin i gat wanem wok insait long lo bilong Krais? (Matyu 22:37, 38; Galesia 6:2) Yu ting em namba tu bikpela samting? Nogat tru! Pasin bilong laikim tru Jehova na laikim tru narapela em i pas tru wantaim. Yumi no ken laikim tru Jehova sapos yumi no laikim tru brata bilong yumi, long wanem, aposel Jon i tok: “Sapos wanpela man i tok, ‘Mi laikim tru God,’ tasol em i no laikim wanpela bilong ol arapela manmeri bilong God, orait dispela man em i man bilong giaman. I no gat wanpela man i bin lukim God. Olsem na man i no save laikim ol arapela, em ol manmeri em i lukim pinis, em i no inap laikim God em i no bin lukim.”—1 Jon 4:20; skelim wantaim 1 Jon 3:17, 18.
13. Ol disaipel i bihainim nupela lo bilong Jisas na dispela i kamapim wanem samting?
13 Taim Jisas i givim nupela lo long ol disaipel bilong em long laikim tru narapela olsem em i bin laikim ol, em i tokaut long samting dispela bai kamapim. Em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Tetulian, em wanpela man i bin stap olsem 100 yia bihain long taim Jisas i dai, em i tokaut olsem pasin sori bilong ol Kristen bilong pastaim long narapela i laikim tru narapela olsem brata brata i bin kamapim klia dispela samting. Tetulian i kamapim tok bilong sampela man em ol i no Kristen, na ol i tok long ol disaipel bilong Krais olsem: ‘Narapela i laikim tru narapela na i redi long i dai bilong helpim em.’ Yumi ken askim yumi yet olsem: ‘Mi save kamapim kain pasin sori olsem long ol narapela Kristen na dispela i soim olsem mi wanpela disaipel tru bilong Jisas?’
Olsem Wanem Yumi Ken Kamapim Pasin Sori?
14, 15. Wanem samting inap mekim na i hatwok long bihainim lo bilong Krais? Wanem samting inap helpim yumi long bihainim dispela lo?
14 Em i bikpela samting long ol wokboi bilong Jehova i kamapim pasin olsem bilong Krais long laikim tru narapela. Tasol olsem wanem? Yu hatwok long laikim tru ol narapela Kristen em ol i save tingim ol yet tasol? Olsem yumi stori pinis, ol aposel tu i bin tok pait na ol i laik helpim ol yet. (Matyu 20:20-24) Ol Galesia tu i bin kros na pait namel long ol yet. Taim Pol i kamapim pinis olsem pasin bilong laikim tru narapela em inapim Lo, em i givim tok lukaut olsem: “Sapos yupela i kros kros na pait nabaut namel long yupela yet, orait yupela lukaut. Nogut yupela olgeta i lus wantaim.” Taim em i skelim pinis pasin bilong olpela bel wantaim ol gutpela pasin em spirit bilong God i kamapim, em i tok moa olsem: “Yumi no ken litimapim nating nem bilong yumi yet, na yumi no ken sutim bel bilong ol arapela long kirapim pait, na yumi no ken mangal long ol samting bilong ol arapela.” Na aposel i kirapim ol: “Yupela i mas helpim ol arapela long karim hevi bilong ol. Long dispela pasin bai yupela inapim tru lo bilong Krais.”—Galesia 5:14–6:2.
15 Jehova i tok yumi mas bihainim lo bilong Krais, olsem na yu ting em i givim bikpela hatwok tumas long yumi? Tru, ating i hatwok long mekim gutpela pasin long ol man i sutim tok long yumi na bagarapim bel bilong yumi, tasol “God i save laikim [yumi] tru, . . . olsem na [yumi] mas bihainim ol pasin em yet i save mekim. [Yumi] mas wokabaut long pasin bilong laikim tru ol arapela.” (Efesus 5:1, 2) Yumi mas tingim yet gutpela pasin God i bin mekim, olsem taim “yumi stap yet olsem ol manmeri bilong mekim sin, . . . Krais i dai bilong helpim yumi. Long dispela pasin God i bin soim yumi olsem, em i laikim yumi moa yet.” (Rom 5:8) Sapos yumi kirap na helpim ol narapela, na ol man i bin mekim nogut long yumi tu, bai yumi amamas long save olsem yumi bihainim pasin bilong God na lo bilong Krais.
16. Olsem wanem yumi ken kamapim klia olsem yumi laikim tru God na Krais?
16 Yumi mas save olsem yumi kamapim klia pasin sori bilong yumi long pasin yumi mekim, i no long ol tok tasol yumi mekim. Wanpela taim Jisas tu i pilim olsem God i laik bai em i mas mekim wanpela samting em bai hatwok long mekim. Jisas i beten olsem: “Papa, sapos yu laik, yu ken rausim dispela kap long mi.” Tasol kwiktaim Jisas i tok moa: “Tasol yu no ken bihainim laik bilong mi. Nogat. Yu mas bihainim laik bilong yu tasol.” (Luk 22:42) Maski Jisas i karim bikpela pen, em i bihainim laik bilong God. (Hibru 5:7, 8) Sapos yumi bihainim ol lo bilong God, yumi kamapim long ples klia olsem yumi laikim tru em na yumi bilip olsem rot God i makim em i nambawan gutpela rot. Baibel i tok: “Sapos yumi laikim tru God, orait yumi save bihainim ol lo bilong en.” (1 Jon 5:3) Na Jisas i tokim ol aposel bilong em: “Sapos yupela i laikim mi tru, orait yupela bai i bihainim gut ol tok bilong mi.”—Jon 14:15.
17. Jisas i givim wanem bikpela lo long ol disaipel bilong em? Olsem wanem yumi save, yumi mas bihainim dispela lo long nau?
17 Krais i tokim ol disaipel bilong em olsem narapela i mas laikim tru narapela, na em i givim wanem narapela bikpela lo long ol? Em i tokim ol olsem ol i mas mekim wok bilong autim tok, em dispela wok em i bin skulim ol long en. Pita i tok: “Em i tokim mipela long autim tok long ol manmeri.” (Aposel 10:42) Jisas i tokim ol stret olsem: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:19, 20; Aposel 1:8) Jisas i tokaut olsem ol disaipel bilong em long nau, ol tu i mas bihainim ol dispela tok long “taim bilong las de.” Em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Daniel 12:4; Matyu 24:14) Tru tumas, em laik bilong God long yumi autim tok. Tasol sampela inap ting, dispela wok God i laik bai yumi mekim, em i givim bikpela hatwok tumas long yumi. Tasol tru em i givim bikpela hatwok tumas long yumi?
Bilong Wanem i Olsem Hatwok?
18. Sapos yumi mekim ol samting God i laik bai yumi mas mekim na yumi kisim hevi long dispela, yumi no ken lusim tingting long wanem samting?
18 Olsem yumi stori pinis, long bipo yet na i kam inap long nau, Jehova i laik bai ol manmeri i mas bihainim ol narapela narapela lo. God i bin tokim ol long mekim ol narapela narapela samting, na olsem tasol i gat ol narapela narapela kain hevi i painim ol. Ol bikpela hevi tru i bin painim gutpela Pikinini bilong God, na bihain ol i kilim em i dai long wanpela rot nogut tru, long wanem, em i bin mekim ol samting God i laik bai em i mas mekim. Tasol taim yumi kisim hevi, long wanem, yumi mekim ol samting Jehova i laik bai yumi mas mekim, yumi no ken lusim tingting olsem em i no asua bilong God na yumi kisim ol dispela hevi. (Jon 15:18-20; Jems 1:13-15) Satan i bikhet long God na dispela i kamapim sin, na ol hevi na pen, na indai, na dispela man yet i kamapim ol pasin long graun i save givim hatwok long ol wokboi bilong Jehova long mekim ol samting Em i laik bai ol i mas mekim.—Jop 1:6-19; 2:1-8.
19. Bilong wanem i gutpela samting tru long yumi ken mekim ol samting God i tokim yumi long mekim long rot bilong Pikinini bilong em?
19 Long rot bilong Pikinini bilong em, Jehova i tokaut olsem nau long taim bilong pinis, ol wokboi bilong Em ol i mas tokaut long olgeta hap bilong graun olsem Kingdom tasol inap stretim olgeta pen na hevi bilong ol man. Dispela gavman bilong God bai pinisim olgeta hevi bilong graun—pait, pasin raskol, pasin bilong i stap rabis, lapun, sik, na indai. Na tu, Kingdom bai kamapim gutpela ples paradais long graun, na ol daiman bai kirap bek long en. (Matyu 6:9, 10; Luk 23:43, NW; Aposel 24:15; KTH 21:3, 4) Man! Em i wanpela gutpela wok tru long autim gutnius long ol dispela samting, a? Olsem na ol samting Jehova i laik bai yumi mas mekim i no givim hevi long yumi. Satan na ol manmeri bilong dispela graun em i bosim, ol i as na ol man i birua long yumi.
20. Olsem wanem yumi ken winim ol hevi Satan i save kamapim?
20 Olsem wanem yumi ken winim ol hevi Satan i save kamapim? Yumi mas tingim dispela tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Sindaun 27:11) Jisas i lusim gutpela sindaun bilong em long heven na i kam long graun bilong bihainim laik bilong Papa bilong em, na long dispela rot em i helpim Jehova long bekim tok bilas bilong Satan. (Aisaia 53:12; Hibru 10:7) Olsem man bilong graun, Jisas i karim olgeta hevi i painim em, na em i redi long i dai long diwai tu. Sapos yumi bihainim pasin bilong em olsem Man i stap olsem gutpela piksa, yumi tu inap karim ol hevi na mekim ol samting Jehova i laik bai yumi mas mekim.—Hibru 12:1-3.
21. Yu ting olsem wanem long pasin sori Jehova na Pikinini bilong em i save kamapim?
21 Man! God na Pikinini bilong em ol i bin kamapim bikpela pasin sori long yumi! Jisas i givim laip bilong em olsem ofa, na dispela i opim rot long ol man i bihainim tok ol i ken kisim laip oltaim long Paradais. Olsem na yumi no ken larim wanpela samting i daunim dispela gutpela samting yumi wetim. Yumi mas pilim tru samting Jisas i bin mekim bilong helpim yumi—olsem Pol i bin pilim na em i tok: “Mi bilip long Pikinini Bilong God em i bin laikim mi tru na em i lusim laip bilong em yet bilong helpim mi.” (Galesia 2:20) Na yumi mas tenkyu tru long gutpela God bilong yumi, em Jehova, em i no save givim bikpela hatwok tumas long yumi.
Bai Yu Bekim Olsem Wanem?
◻ Jehova i laik bai yumi mas mekim wanem samting long nau?
◻ Long laspela nait Krais i stap wantaim ol aposel bilong em, olsem wanem em i kamapim klia olsem pasin sori em i bikpela samting?
◻ Olsem wanem yumi inap kamapim klia olsem yumi laikim tru God?
◻ Bilong wanem yumi ken tok olsem em i wanpela gutpela samting long mekim ol samting Jehova i laik bai yumi mas mekim?
5. Ol Kristen i stap aninit long wanem lo? Dispela lo i bin kirap mekim wok bilong en long wanem taim?
10. Jisas i givim wanem lo long ol disaipel bilong em? Wanem samting i insait long en?
[Piksa long pes 23]
Jisas i wasim lek bilong ol aposel na dispela i skulim ol long wanem samting?
[Piksa long pes 25]
Maski ol man i birua long yumi, wok bilong autim gutnius em i wanpela gutpela wok