Lo Bilong Pasin Laikim i Stap Long Bel
“Bai mi putim lo bilong mi long tingting bilong ol na bai mi raitim tok bilong lo long bel bilong ol.”—JEREMAIA 31:33.
1, 2. (a) Bai yumi stori long wanem samting long nau? (b) Olsem wanem Jehova i kamapim em yet long maunten Sainai?
LONG tupela stadi paslain long dispela, yumi bin kisim save olsem taim Moses i lusim maunten Sainai na i kam daun pes bilong em i lait na dispela i kamapim glori bilong Jehova. Na tu, yumi bin stori long laplap Moses i bin pasim long pes bilong em. Nau yumi laik stori long wanpela samting moa i hap bilong dispela stori na i gat mining long ol Kristen bilong nau.
2 Taim Moses i stap long maunten, em i bin kisim ol tok bilong Jehova. Ol Israel i bung i stap long as bilong maunten Sainai, ol i bin lukim samting i kamapim tru bikpela strong bilong God yet. “Bikpela klaut i kamap long maunten, na klaut i pairap na lait bilong klaut i sut i go nabaut, na wanpela biugel i krai bikpela moa. Na olgeta manmeri long kem i pret nogut tru na skin bilong ol i guria. . . . Orait Bikpela i stap insait long paia na i kam daun na i stap long maunten Sainai, na bikpela smok i karamapim maunten olgeta. Smok i go antap olsem smok bilong bikpela paia tru, na bikpela guria i kamap long maunten.”—Kisim Bek 19:16-18.
3. Jehova i bin givim Tenpela Lo long ol Israel long wanem rot? Lain Israel i bin kliagut long wanem samting?
3 Jehova i bin toktok wantaim ol manmeri long rot bilong wanpela ensel, na em i givim Tenpela Lo long ol. (Kisim Bek 20:1-17) Olsem na i klia tru olsem ol dispela lo i kam long God i Gat Olgeta Strong. Jehova i bin raitim ol dispela lo long ol hap ston—em dispela tupela hap ston Moses i brukbrukim taim em i lukim ol Israel i wok long lotuim wanpela bulmakau gol. Orait, Jehova i raitim gen ol dispela lo long narapela hap ston. Em long dispela taim, taim Moses i karim dispela tupela hap ston i kam, pes bilong em i lait. Long dispela taim olgeta Israel i kliagut olsem ol dispela lo ol i bikpela samting tru.—Kisim Bek 32:15-19; 34:1, 4, 29, 30.
4. Bilong wanem ol Tenpela Lo i bikpela samting?
4 Ol i putim tupela hap ston em Tenpela Lo i stap long en insait long Bokis Kontrak, i stap insait long Rum Tambu Tru bilong haus lotu sel na bihain long tempel. Ol lo i stap long tupela hap ston i kamapim ol as stiatok bilong Lo Bilong Moses na ol i as bilong pasin tiokratik ol bai bihainim bilong ronim gavman. Ol dispela lo i soim olsem Jehova i pas wantaim ol na Em i bin makim ol olsem lain bilong em.
5. Olsem wanem ol lo God i givim long ol Israel i kamapim pasin laikim bilong em?
5 Ol dispela lo i bin kamapim planti samting long pasin bilong Jehova, bikpela samting em pasin bilong em long laikim tru ol manmeri bilong em. Ol dispela lo i gutpela presen tru long ol man i bihainim tok bilong en! Wanpela saveman i bin tok ol Tenpela Lo i winim tru olgeta lo em ol man i bin kamapim. Jehova i stori long Lo Bilong Moses, na em i tok: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. Olgeta graun na olgeta manmeri i bilong mi, tasol mi bai makim yupela i stap lain manmeri bilong mi stret. Na bai yupela i stap lain manmeri i save mekim wok bilong mi olsem ol pris. Na bai yupela i stap ol manmeri tru bilong mi.”—Kisim Bek 19:5, 6.
Lo Em i Raitim Long Bel
6. Wanem lo em i gutpela moa, winim ol lo i stap long ston?
6 Tru tumas, ol dispela lo bilong God i gutpela tru. Tasol olsem wanem? Yu bin save olsem ol Kristen God i bin makim ol i holim samting i gutpela moa winim ol dispela lo i stap long ston? Jehova i bin tok profet long kamapim wanpela nupela kontrak i no wankain olsem kontrak bilong Lo em i bin mekim wantaim lain Israel. “Bai mi putim lo bilong mi long tingting bilong ol na bai mi raitim tok bilong lo long bel bilong ol.” (Jeremaia 31:31-34) Jisas, em i Namelman bilong nupela kontrak, em yet i no bin raitim ol lo na givim long ol disaipel bilong em. Em i putim lo bilong Jehova long tingting na bel bilong ol long rot bilong ol tok em i mekim na ol pasin em i bihainim.
7. Husat i kisim “lo bilong Krais” pastaim? Husat i kisim bihain?
7 Dispela lo em i “lo bilong Krais.” Pastaim wanpela lain manmeri bilong spirit i bin kisim dispela lo, em “lain Israel tru bilong God,” i no lain Israel bilong skin, em ol tumbuna bilong Jekop. (Galesia 6:2, 16; Rom 2:28, 29) Ol Kristen God i bin makim long holi spirit ol i insait long lain Israel tru bilong God. Bihain wanpela bikpela lain manmeri bilong olgeta hap em ol i laik lotuim Jehova i joinim ol. (KTH 7:9, 10; Sekaraia 8:23) Ol i stap “wanpela lain sipsip” aninit long “wanpela wasman,” na ol i kisim na bihainim “lo bilong Krais,” na ol i larim dispela lo i bosim olgeta samting ol i mekim.—Jon 10:16.
8. Olsem wanem Lo Bilong Moses i narapela kain long lo bilong Krais?
8 Kirap long taim mama i karim ol, lain Israel bilong skin i mas i stap aninit long Lo Bilong Moses. Tasol long laik bilong ol yet ol Kristen i save stap aninit long lo bilong Krais—ol i bilong wanem lain na mama i karim ol we em i no bikpela samting. Ol i kisim save long Jehova na ol pasin bilong em na ol i laik mekim laik bilong em. Lo bilong God i stap long “tingting bilong ol” na i olsem em i raitim dispela lo long “bel bilong ol.” Tru, ol Kristen God i bin makim ol i save olsem ol i gat wok long bihainim tok na God inap givim strafe long ol man i no bihainim tok. Tasol i no long dispela as tasol ol i bihainim tok, nogat. As tru na ol i bihainim tok i olsem: Lo bilong God i stap “long bel bilong ol” na long dispela wankain as ol arapela sipsip tu ol i save bihainim tok bilong God.
Ol Lo Em Pasin Laikim i As Bilong Ol
9. Olsem wanem Jisas i bin soim olsem pasin laikim em i as bilong ol lo bilong Jehova?
9 As bilong olgeta lo bilong Jehova em pasin laikim. Kirap long bipo yet na i go inap olgeta taim bihain pasin laikim em i bikpela samting insait long lotu i tru. Taim ol i askim Jisas wanem lo i namba wan, winim ol narapela, Jisas i bekim olsem: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.” Na namba 2 em: “Yu mas laikim ol wantok olsem yu laikim yu yet.” Na em i tok moa: “Dispela tupela lo i as bilong olgeta tok bilong lo na bilong ol profet.” (Matyu 22:35-40) Long dispela rot Jisas i soim olsem pasin laikim i as bilong Tenpela Lo na olgeta tok i stap long Ol Skripsa Hibru.
10. Olsem wanem yumi save pasin laikim em i as bilong lo bilong Krais?
10 Olsem wanem? Pasin bilong laikim tumas God na ol wantok i as bilong lo i stap long bel bilong ol Kristen? Tru tumas! Pasin bilong laikim tumas God i insait long lo bilong Krais na i gat wanpela nupela lo tu—ol Kristen i mas laikim tru ol arapela Kristen na redi long daunim laik bilong ol yet bilong helpim ol. Ol i mas bihainim pasin laikim Jisas i bin kamapim, na em i redi long givim laip bilong em long helpim ol pren bilong em. Em i bin lainim ol disaipel long laikim God na laikim ol arapela, olsem em i bin laikim ol. Pasin laikim ol i kamapim long ol arapela wanbilip em i nambawan samting ol man i ken lukim bilong luksave long husat i Kristen tru. (Jon 13:34, 35; 15:12, 13) Jisas i bin tokim ol long laikim ol birua bilong ol.—Matyu 5:44.
11. Olsem wanem Jisas i bin kamapim pasin laikim long God na long ol manmeri?
11 Jisas i stap gutpela piksa tru long pasin bilong kamapim pasin laikim. Taim em i stap olsem wanpela strongpela spirit long heven, em i amamas long mekim ol samting bilong kamapim laik bilong Papa bilong em hia long graun. Em i bin givim laip bilong em bai ol narapela manmeri inap kisim laip oltaim, na tu, em i soim ol manmeri long ol pasin ol i mas bihainim long laip bilong ol. Em i gat pasin daun, em i mekim gut long ol man, em i tingim gut ol man na em i helpim ol man i karim hevi. Na em i tokim ol long ol tok “i save givim laip i stap gut oltaim oltaim” long ol, em i no les long helpim ol narapela long kisim save long Jehova.—Jon 6:68.
12. Bilong wanem i stret yumi tok dispela tupela pasin, pasin bilong laikim tumas God na laikim tumas ol narapela manmeri, i pas gut tru wantaim?
12 Dispela tupela pasin, em pasin bilong laikim tumas God na laikim tru ol wantok, tupela pasin i pas gut tru wantaim. Aposel Jon i bin tok: “Pasin bilong laikim ol arapela em i pasin bilong God. . . . Sapos wanpela man i tok, ‘Mi laikim tru God,’ tasol em i no laikim wanpela bilong ol arapela manmeri bilong God, orait dispela man em i man bilong giaman. I no gat wanpela man i bin lukim God. Olsem na man i no save laikim ol arapela, em ol manmeri em i lukim pinis, em i no inap laikim God em i no bin lukim.” (1 Jon 4:7, 20) Jehova em i as tru bilong pasin laikim na pasin bilong em i makim stret tru pasin laikim. Pasin laikim i save bosim olgeta samting em i mekim. Yumi save kamapim pasin laikim, long wanem, God i wokim yumi i kamap olsem em yet. (Stat 1:27) Taim yumi kamapim pasin laikim long ol wantok, i olsem yumi soim olsem yumi laikim God.
Sapos Yumi Laikim Tru God Bai Yumi Bihainim Tok
13. Sapos yumi bai laikim tumas God, orait yumi mas mekim wanem samting pastaim?
13 Olsem wanem yumi inap laikim tru God, em yumi no inap lukim em? Nambawan bikpela samting em yumi mas kisim save long em. Yumi no inap laikim na trastim wanpela man yumi no save long en. Olsem na Tok Bilong God i save kirapim yumi long kisim save long God long rot bilong ritim Baibel, beten, na poroman wantaim ol manmeri husat i save pinis long em na laikim em pinis. (Song 1:1, 2; Filipai 4:6; Hibru 10:25) Fopela Gutnius i gutpela tru long helpim yumi, long wanem, ol i kamapim ol pasin bilong Jehova long rot bilong ol samting Jisas Krais i bin mekim long laip na wok autim tok bilong em. Laik bilong yumi long bihainim tok bilong God na bihainim pasin bilong em i go bikpela taim yumi wok long kisim save long em na pilim tru pasin laikim em i mekim long yumi. Tru tumas, bilong laikim tumas God yumi mas bihainim tok.
14. Bilong wanem i stret yumi ken tok ol lo bilong God i no save givim hevi long yumi?
14 Taim yumi laikim ol narapela, yumi save long ol samting ol i laikim na ol samting ol i no laikim, na dispela i bosim pasin yumi mekim long ol. Yumi no laik mekim samting em ol man yumi laikim i no amamas long en. Aposel Jon i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” (1 Jon 5:3) Ol i no givim hevi long yumi, na ol i no planti tumas. Pasin laikim i save stiaim yumi. Yumi no gat wok long tingim wanpela traipela lista bilong ol lo bilong stiaim yumi long olgeta liklik samting yumi mekim, nogat. Pasin bilong yumi long laikim God i save stiaim yumi. Sapos yumi laikim tru God, orait yumi kisim amamas long mekim laik bilong em. Long dispela rot God i orait long yumi, na yumi helpim yumi yet—olgeta taim tok bilong em i save helpim yumi.—Aisaia 48:17.
15. Wanem samting bai kirapim yumi long bihainim pasin bilong Jehova? Stori long dispela samting.
15 Yumi laikim tumas God na dispela i kirapim yumi long bihainim ol pasin bilong em. Taim yumi laikim narapela man, yumi laikim ol pasin bilong em na yumi laik kamap wankain olsem em. Tingim pasin bilong Jehova na Jisas long pas gut wantaim. Ol i bin i stap wantaim long heven inap planti bilion yia. Gutpela pasin laikim tru i stap namel long tupela. Pasin bilong Jisas i makim gut tru pasin bilong Papa bilong em, olsem na Jisas inap tokim ol disaipel olsem: “Man i lukim mi, em i lukim Papa.” (Jon 14:9) Taim yumi kisim save na amamas long Jehova na Pikinini bilong em, dispela i kirapim yumi long bihainim pasin bilong ol. Pasin bilong yumi long laikim Jehova, wantaim helpim bilong holi spirit bilong em, bai helpim yumi long rausim “olgeta pasin bilong olpela bel, na . . . kamap nupela man.”—Kolosi 3:9, 10; Galesia 5:22, 23.
Pasin Laikim i Wok i Stap
16. Olsem wanem wok bilong yumi long autim tok na lainim ol man i kamapim pasin bilong laikim God na laikim ol narapela manmeri?
16 Yumi ol Kristen, yumi laikim God na ol wantok, na yumi larim dispela i kirapim yumi long insait long wok autim tok bilong Kingdom na kamapim ol disaipel. Taim yumi mekim olsem, yumi amamasim God Jehova, husat “i laik kisim bek olgeta manmeri, bai ol i ken save long as bilong tok tru.” (1 Timoti 2:3, 4) Long dispela rot yumi ken kisim amamas long helpim ol narapela long raitim lo bilong Krais long bel bilong ol. Na yumi amamas long lukim ol pasin bilong ol i senis na ol i kamapim ol pasin bilong Jehova. (2 Korin 3:18) Tru tumas, pasin bilong helpim ol narapela long save long God em i nambawan gutpela presen yumi inap givim long ol. Ol man i kamap pren bilong Jehova ol inap amamas long stap pren bilong em inap oltaim oltaim.
17. Bilong wanem em i savetingting long kisim pasin bilong laikim God na ol narapela manmeri na no ken laikim ol mani kago?
17 Yumi stap long taim we ol man i tingim na laikim tru ol mani kago samting. Tasol ol mani kago i no save stap oltaim. Ol man inap stilim o ol inap bagarap. (Matyu 6:19) Baibel i tok lukaut long yumi olsem: “Dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.” (1 Jon 2:16, 17) Yes, Jehova bai stap oltaim, na ol man i laikim em tumas na mekim wok bilong em, ol tu bai i stap oltaim. Olsem na em i gutpela tingting long kisim pasin bilong laikim God na ol manmeri, na no ken wok long kisim ol samting bilong dispela graun, em ol samting i no inap i stap longpela taim.
18. Olsem wanem wanpela misineri i bin kamapim pasin laikim na redi long daunim laik bilong em yet bilong helpim ol narapela?
18 Ol man i wok long bihainim pasin laikim ol i save litimapim nem bilong Jehova. Tingim Sonia, wanpela misineri long Senegal. Em i bin stadi wantaim wanpela meri nem bilong em Heidi. Heidi i kisim jem HIV long man bilong em, em man i no wanpela Witnes. Bihain long man bilong em i dai pinis, Heidi i kisim baptais, tasol i no longtaim na helt bilong em i bagarap, em i gat AIDS na em i go stap long haus sik. Sonia i tok: “Ol haus sik lain i traim bes bilong ol, tasol haus sik i no gat planti wokman. Ol bratasista bilong kongrigesen i volantia long helpim long lukautim em long haus sik. Long namba tu nait em i slip long haus sik, mi bin slip long wanpela mat klostu long bet bilong em na mi helpim long lukautim em i go inap em i dai. Dokta i lukautim haus sik i tok: ‘Bikpela hevi bilong mipela i olsem, ol wanblut stret bilong sikman i save lusim ol taim ol i save wanblut i gat AIDS. Yu no wanblut, yu no bilong seim kantri, na yu nogat wankain kala skin, so wai na yu stap hia maski yu inap kisim sik?’ Mi autim tingting bilong mi olsem, Heidi em i susa tru bilong mi, mitupela i pas gut wantaim kain olsem mitupela i gat wanpela mama na papa. Olsem na mi bin pas gut wantaim nupela susa bilong mi, na mi bin amamas long lukautim em.” Na Sonia i no bin kisim sik samting taim em i lukautim Heidi.
19. Yumi gat lo bilong God long bel bilong yumi, olsem na yumi mas mekim wanem?
19 I gat planti wokboi bilong Jehova i bin kamapim pasin laikim tru na redi long daunim laik bilong ol yet bilong helpim ol narapela. I no gat ol lo ol i raitim long wanpela buk samting bilong makim husat ol i manmeri bilong God long nau, nogat. Yumi lukim truim bilong tok i stap long Hibru 8:10: “Dispela nupela kontrak mi laik mekim wantaim ol manmeri bilong Israel, em i olsem. Bai mi putim olgeta lo bilong mi long tingting bilong ol, na bai mi raitim tok bilong mi long bel bilong ol. Na bai mi stap God bilong ol, na bai ol i stap lain manmeri bilong mi.” Oltaim yumi laik pilim tru dispela lo bilong pasin laikim Jehova i bin raitim long bel bilong yumi, na kamapim dispela pasin long olgeta taim yumi gat rot long kamapim.
20. Bilong wanem lo bilong Krais em i wanpela gutpela samting i dia tumas?
20 Yumi lotuim God wantaim lain brata long olgeta hap em ol i kamapim dispela kain pasin laikim, na em i samting bilong amamas tru long en! Olgeta man i gat lo bilong Krais long bel bilong ol i gat wanpela samting i dia tumas long nau long dispela graun we ol man i no save kamapim pasin laikim. Ol i amamas long pasin laikim bilong Jehova, na tu, ol i amamas long strongpela pasin laikim i stap namel long lain brata. “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut.” Maski ol Witnes Bilong Jehova i sindaun long planti kantri, mekim kain kain tok ples, na ol i gat narapela narapela pasin bilong ples, olgeta i amamas long i stap wanbel long lotu. Dispela pasin wanbel i mekim na Jehova i orait long ol. Man bilong raitim song i tok: “Long dispela ples [namel long wanpela lain we pasin laikim i mekim ol i stap wanbel] Bikpela i save mekim gut tru long ol man i stap wanbel. Em i givim ol laip bilong i stap gut oltaim oltaim.”—Song 133:1-3.
Yu Inap Bekim?
• Tenpela Lo ol i bikpela samting olsem wanem?
• Wanem dispela ol lo i stap long bel bilong ol man?
• Wanem wok bilong pasin laikim insait long “lo bilong Krais”?
• Yumi ken kamapim pasin bilong yumi long laikim tru God na laikim tru ol wantok long wanem ol rot?
[Piksa long pes 25]
Ol Israel i gat ol lo i stap long ol ston
[Ol Piksa long pes 26]
Lo bilong God i stap long bel bilong ol Kristen
[Piksa long pes 28]
Sonia wantaim wanpela liklik meri bilong Senegal long 2004 kibung distrik