Sapta 24

Yumi Aninit Long Tenpela Lo o Nogat?

1. Moses i bin kisim wanem lo na givim long ol manmeri?

GOD JEHOVA i laik bai yumi bihainim wanem ol lo? Ating yumi mas bihainim ol dispela lo Baibel i kolim “lo bilong Moses?” (1 King 2:3, NW; Taitas 3:9) Baibel i kolim tu olsem “lo bilong Jehova,” long wanem Moses em i rot tasol bilong givim long ol man.—1 Kronikel 16:40, NW.

2. I gat wanem ol samting i insait long dispela lo?

² Insait long lo bilong Moses i gat planti liklik lo, winim 600; tasol i gat 10-pela bikpela lo, olsem Moses i tok: “Em [Jehova] i tokim yupela long bihainim 10-pela lo; na em i bin raitim long tupela hap ston.” (Diuteronomi 4:13, NW; Eksodas 31:18) Tasol dispela Lo wantaim ol Tenpela Lo bilong en, Jehova i givim long husat? Yu ting em i givim long olgeta man bilong graun? Wanem wok bilong dispela Lo?

EM BILONG ISREL TASOL, BILONG MEKIM WANPELA BIKPELA WOK

3. Olsem wanem yumi save God i givim dispela Lo long lain Isrel tasol?

³ Jehova i no givim dispela Lo long olgeta man bilong graun. Nogat. Jehova i mekim kontrak wantaim ol tumbuna pikinini bilong Jekop, em ol i kamap lain Isrel. Jehova i givim ol lo bilong em long dispela lain tasol. Baibel i tokaut klia long dispela samting long Diuteronomi 5:1-3 na Sam 147:19, 20.

4. Bilong wanem God i givim dispela Lo long lain Isrel?

⁴ Pol i askim olsem: “Bilong wanem lo i stap?” Yes, bilong wanem Jehova i givim lo long lain Isrel? Pol i tok: “God i laik bai as bilong sin em i kamap ples klia, olsem na em i skruim lo i kam bihain. Na lo em i bilong i stap inap long dispela pikinini bai i kamap, bipo God i givim promis long em. . . . Lo em i olsem waspapa bilong yumi, bilong bringim yumi i kam long Krais.” (Galesia 3:19-24) Bikpela wok bilong dispela Lo em i bilong lukautim na soim rot long lain Isrel bambai ol i ken redi na wetim Krais, na taim em i kamap ol i ken bilip long em. Ol ofa Lo i makim i kirapim ol Isrel long tingim sin bilong ol na i mas i gat Man bilong kisim bek ol.—Hibru 10:1-4.

“LO I PINIS LONG KRAIS”

5. Taim Krais i kam na em i dai bilong helpim yumi, olsem wanem long dispela Lo?

⁵ Dispela Man bilong kisim bek ol, em Krais Jisas, olsem ensel i tok taim Maria i karim em. (Luk 2:8-14) Olsem na taim Krais i kam na i givim gutpela skin bilong em olsem ofa, orait, olsem wanem long dispela Lo? Em i tekewe. Olsem Pol i tok, “Yumi no i stap aninit long waspapa moa.” (Galesia 3:25) Taim dispela Lo i tekewe, hevi bilong en tu i tekewe. Long wanem dispela Lo i bin mekim sin bilong ol Isrel i kamap ples klia, na ol i no inap bihainim tru dispela Lo, olsem na ol i kamap olsem “man bilong lus.” Tasol “bilong helpim yumi, Krais yet em i kisim dispela nem ‘man bilong lus,’ na em i baim bek yumi.” (Galesia 3:10-14) Olsem na “lo i pinis long Krais.”—Rom 10:4; 6:14.

6. ( a) Taim Lo i pinis, dispela i mekim wanem long ol Isrel na ol man bilong ol narapela lain? (b) Long dispela taim Jehova i mekim wanem long dispela Lo?

⁶ Lo em i olsem “banis” i sanap namel long ol Isrel na ol narapela lain ol i no aninit long dispela Lo. Tasol taim Krais i givim skin bilong em olsem ofa, em i “rausim pinis lo wantaim olgeta hap tok . . . bilong en. Em i mekim olsem bilong . . . bungim tupela lain [ em lain Isrel na ol narapela lain] long wanpela bodi.” (Efesas 2:11-18) Baibel i stori long dispela samting God i mekim long lo bilong Moses, em i tok: “God em i bin tekewe olgeta rong bilong yumi. Olgeta hap rait bilong lo [ em Tenpela Lo tu] em i laik daunim yumi, [long wanem, em i kamapim sin bilong ol Isrel] em God i rausim. Dispela rait em i pasim yumi long kot, tasol God i nilim long diwai . . . na i pinisim olgeta.” (Kolosi 2:13,14) Olsem na gutpela ofa bilong Krais i pinisim dispela Lo.

7, 8. Olsem wanem yumi save, Lo i no gat tupela hap bilong en?

⁷ Tasol sampela man i tok Lo i gat tupela hap bilong en, olsem: Wanpela hap em ol Tenpela Lo, na wanpela hap em ol narapela lo. Ol i tok, ol dispela narapela lo i pinis, tasol Tenpela Lo i stap yet. Tasol dispela tok bilong ol i no stret. Taim Jisas i stap long maunten na givim tok long ol man, em i kolim sampela tok bilong Tenpela Lo na sampela tok bilong ol narapela lo bilong Moses. Jisas i no brukim dispela lo bilong Moses i go long tupela hap. Nogat. Olsem na yumi save, lo bilong Moses i no gat tupela hap bilong en.—Matyu 5:21-42.

⁸ Na yumi ken lukim rait bilong Pol tu, em i tok: “Lo i no pasim yumi moa.” Tasol olsem wanem? Ating ol narapela lo tasol i pinis na ol Juda i aninit yet long Tenpela Lo? Nogat. Long wanem, Pol i tok moa olsem: “Sapos lo i no bin soim sin long mi, orait mi no inap save long en. I olsem: Lo i tok, ‘Yu no ken mangal long samting bilong narapela man.’ Sapos lo i no tok olsem, orait mi no inap save long pasin bilong mangal.” (Rom 7:6, 7; Eksodas 20:17) Dispela lo, “Yu no ken mangal,” em i namba 10 bilong ol Tenpela Lo. Olsem na yumi save, Tenpela Lo tu i pinis na i no pasim moa ol Isrel.

9. Olsem wanem yumi save, Sabat bilong olgeta wik tu i pinis?

⁹ Orait, olsem wanem long lo bilong Sabat, em namba 4 lo? Em tu i tekewe pinis? Yes, em tu. Yumi ken lukim tok bilong Baibel long Galesia 4:8-11 na Kolosi 2:16, 17 na yumi save, dispela lo bilong tingim de Sabat, na sampela bikpela de moa insait long yia, ol Kristen i no aninit moa long dispela lo. Na yumi ken lukim narapela tok bilong Baibel tu long Rom 14:5 na yumi ken save, lo bilong Sabat i no wanpela lo ol Kristen i mas bihainim.

LO BILONG OL KRISTEN

10. (a) Ol Kristen i aninit long wanem ol lo? (b) Planti bilong ol dispela lo ol i kisim we? Bilong wanem i stret ol i kisim olsem?

¹⁰ Tru, ol Kristen i no aninit long Tenpela Lo. Tasol olsem wanem? I gat sampela lo ol i mas bihainim? I gat. Jisas i kirapim “nupela kontrak,” as bilong en em gutpela ofa bilong em, i winim olgeta ofa bilong animal. Ol Kristen i aninit long dispela nupela kontrak na ol lo Kristen. (Hibru 8:7 -13; Luk 22:20) Planti bilong ol dispela lo bipo ol i insait long lo bilong Moses na yumi no ken kirap nogut long dispela samting. Long wanem, taim wanpela nupela gavman i kamap long wanpela ples, sampela taim dispela gavman i pinisim o senisim as lo bilong olpela gavman, tasol em i holim yet sampela lo bilong en. Orait, i wankain tu long lo bilong Moses; dispela lo i pinis, tasol sampela lo na tok bilong en bilong stiaim tingting bilong yumi, lotu Kristen i kisim.

11. Wanem sampela lo na tok bilong ol Kristen i kain olsem Tenpela Lo?

¹¹ Yu ken save long dispela samting taim yu kaunim Tenpela Lo i stap long pes 203, na skelim wantaim ol dispela lo na bilip bilong ol Kristen, olsem: “Yu mas lotu long [Jehova] tasol. Em i God bilong yu.” (Matyu 4:10; 1 Korin 10:20-22) “Yupela i mas givim baksait long olgeta god giaman.” (1 Jon 5:21; 1 Korin 10:14) “Papa bilong mipela, yu stap long heven, nem bilong yu i mas i stap holi [no ken kolim nating o bagarapim].” (Matyu 6:9) “Yupela pikinini, yupela i mas bihainim tok bilong papamama bilong yupela.” (Efesas 6:1, 2) Na Baibel i tok klia long kilim man i dai, pamuk na bagarapim marit, stil, giaman, mangal, ol dispela samting tu i gat rong na ol Kristen i no ken mekim.—Revelesen 21:8; 1 Jon 3:15; Hibru 13:4; 1 Tesalonaika 4:3-7; Efesas 4:25, 28; 1 Korin 6:9-11; Luk 12:15; Kolosi 3:5.

12. Ol Kristen i no aninit long lo bilong Sabat, tasol sapos ol i bihainim as bilong dispela lo, bai ol i mekim wanem?

¹² Tru God i no tok ol Kristen i mas bihainim lo bilong Sabat. Tasol dispela lo inap lainim yumi long sampela samting. Long de Sabat ol Isrel i malolo long wok bilong skin. Ol Kristen tu i mas malolo; tasol malolo bilong ol i bilong spirit, olsem: ol i bilip na bihainim tok bilong God, olsem na ol i no wok moa long kamapim stretpela pasin bilong ol yet; ol i no bihainim moa laik bilong ol yet tasol. (Hibru 4:10) Tasol dispela malolo bilong ol Kristen i no bilong wanpela de tasol long olgeta wik. Nogat. Ol i mas malolo olsem long olgeta de. Ol Isrel i bihainim lo bilong Sabat, em dispela lo i makim wanpela de long olgeta wik bilong mekim wok bilong God na lotuim em. Dispela lo i lukautim ol Isrel bambai ol i no ken wok tasol long helpim skin bilong ol yet. Yumi no aninit long dispela lo, tasol sapos yumi bihainim as bilong en, orait, long olgeta de bai yumi tingim God na yumi no ken tingting tumas long kisim ol samting bilong skin.

13. (a) Ol Kristen i mas inapim tru wanem lo? Ol inapim olsem wanem? (b) Wanem bikpela lo Jisas i givim long ol Kristen? (c) Wanem lo em i as bilong olgeta lo bilong Moses?

¹³ Olsem na ol Kristen i no gat wok long bihainim Tenpela Lo. Ol i mas “inapim tru lo bilong Krais.” (Galesia 6:2) Jisas i bin givim planti tok long yumi, na sapos yumi bihainim ol dispela tok, em yumi inapim tru lo bilong em. Na wanpela bikpela lo bilong Jisas, em olsem: Yumi mas laikim tru narapela man. (Matyu 22:36-40; Jon 13:34, 35) Ol Kristen i mas bihainim dispela lo. Dispela lo em i as bilong olgeta lo bilong Moses, olsem Baibel i tok: “olgeta lo i stap insait long dispela wanpela tok tasol: ‘Yu mas laikim ol arapela man olsem yu laikim yu yet.’ ”—Galesia 5:13, 14; Rom 13:8-10.

14. (a) Sapos yumi kisim save na bihainim ol tok bilong God i as bilong lo bilong Moses, dispela bai helpim yumi olsem wanem? (b) Sapos yumi givim bel long Jehova, dispela bai kirapim yumi long mekim wanem?

¹⁴ Lo bilong Moses wantaim Tenpela Lo bilong en, ol i stretpela lo bilong God. Tru, long nau yumi no aninit long dispela lo, tasol ol tok bilong God i as bilong en em inap helpim yet yumi. Sapos yumi kisim save long ol dispela tok na bihainim, bai yumi pilim tru bikpela save bilong dispela Man bilong givim lo, em God Jehova. Tasol bikpela samting tru, em yumi mas kisim save long ol lo na tok bilong lotu Kristen na yumi mas bihainim. Sapos yumi givim bel long Jehova, dispela bai kirapim yumi long mekim olgeta samting em i tok yumi mas mekim long nau.—1 Jon 5:3.

[Blok long pes 203]

TENPELA LO

1. “Mi yet mi Bikpela, mi God bilong yupela. . . . Yupela mas bihainim mi wanpela tasol. Yupela no ken bihainim ol god giaman.

2. “Yupela no ken wokim wanpela god giaman, na yupela no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela no ken brukim skru long wanpela god giaman o piksa na lotuim em, . . .

3. “Yupela no ken kolim nating nem bilong mi [Jehova], Bikpela bilong yupela. . . .

4. “Yupela mas tingim gut de Sabat na makim olsem de bilong mi yet. Yupela i gat 6-pela de bilong mekim wok insait long wanpela wik. Tasol de namba 7 em i bilong mi God, Bikpela bilong yupela. Em i de bilong malolo na long de Sabat yupela no ken mekim wok. Yupela wantaim ol pikinini bilong yupela . . .

5. “Yupela mas aninit long papamama bilong yupela na bihainim tok bilong ol. Sapos yupela mekim olsem, bai . . . yupela ken i stap longtaim long dispela graun . . .

6. “Yupela no ken kilim manmeri i dai.

7. “Yupela no ken trabel long meri o man marit.

8. “Yupela no ken stil.

9. “Yupela no ken giaman na kotim nating arapela manmeri.

10. “Yupela no ken mangalim haus bilong narapela man. Na yupela no ken aigris long meri bilong narapela man. Na yupela no ken mangalim wokboi o wokmeri bilong en o bulmakau o donki o olgeta arapela samting bilong en tu.”—Eksodas 20:2-17.

[Ol Piksa long pes 204, 205]

Lo i olsem banis i stap namel long ol Isrel na ol narapela lain