Yu Save Laikim Tru Tok Bilong God?
“Mi laikim tru lo bilong yu. Mi save tingting long en long san na long nait.”—SONG 119:97.
1. Wanem wanpela rot em ol man i save pret long God ol i ken kamapim olsem ol i laikim tru Tok Bilong God?
PLANTI milion man na meri ol i gat wanpela Baibel bilong ol yet. Tasol maski man i gat Baibel, dispela i no makim olsem em i laikim tru Tok Bilong God. Sapos man i no save kaunim Tok Bilong God, yu ting em inap tok em i save laikim tru? Nogat tru! Tasol sampela man bipo ol i no bin tingim Baibel liklik, nau ol i save kaunim long olgeta de. Ol i lain pinis long laikim tru Tok Bilong God, na olsem man bilong raitim Song i mekim, ol i save tingting long Tok Bilong God “long san na long nait.”—Song 119:97.
2. Wanem samting i mekim na wanpela Witnes Bilong Jehova i stap strong long bilip long taim bilong bikpela hevi?
2 Wanpela man i bin lain long laikim tru Tok Bilong God, em Nasho Dori. Em wantaim sampela wanbilip i bin karim bikpela hevi inap planti yia long mekim wok bilong Jehova long kantri bilong em, Albenia. Insait long ol dispela yia, i gat tambu long ol Witnes Bilong Jehova, na ol dispela gutpela Kristen ol i no kisim planti buk samting bilong Baibel. Tasol bilip bilong Brata Dori i stap strong. Olsem wanem bilip bilong em i stap strong olsem? Em i tok: “Mi makim taim bilong kaunim Baibel inap wanpela aua samting long olgeta de, na mi mekim olsem inap 60 yia. Tasol bihain ai bilong mi i go nogut.” Bipo i no gat Baibel olgeta long tok ples Albenia—nau tasol ol inap kisim. Tasol Brata Dori i bin lain long tok Grik taim em i pikinini yet, olsem na em i kaunim Baibel long dispela tok ples. Pasin bilong kaunim Baibel long olgeta de i bin strongim Brata Dori long karim ol kain kain hevi, na dispela pasin inap strongim yumi tu long mekim olsem.
“Laikim Tumas” Tok Bilong God
3. Ol Kristen i mas wok long kisim wanem kain tingting long Tok Bilong God?
3 Aposel Pita i tok: “Yumi save, nupela pikinini em i save laikim tumas susu. Olsem tasol yupela i mas laikim tumas long kisim gutpela susu i kam long God, na i no gat samting nogut i stap long en.” (1 Pita 2:2) Liklik pikinini i save laikim tumas long kisim susu bilong mama, na olsem tasol ol Kristen i pilim olsem ol i mas kisim ol samting bilong spirit, ol i save laikim tumas long kaunim Tok Bilong God. Olsem wanem long yu? Yu gat dispela kain tingting? Sapos nogat, orait yu no ken bel hevi tumas. Yu inap kisim pasin bilong laikim tru Tok Bilong God.
4. Yumi mas mekim wanem bilong kisim pasin bilong kaunim Baibel long olgeta de?
4 Bilong mekim olsem, pastaim yu mas skulim skin bilong yu long kisim pasin bilong kaunim Baibel long olgeta taim, olsem long olgeta de sapos inap. (Aposel 17:11) Tru, ating yu no inap lusim wanpela aua long olgeta de long kaunim Baibel olsem Nasho Dori i bin mekim, tasol ating yu inap makim hap taim long olgeta de long kaunim Tok Bilong God. Planti Kristen ol i save kirap hariap long moningtaim bilong kaunim na tingim gut long bel sampela ves bilong Baibel. Em gutpela samting tru yumi ken mekim taim yumi kirap long moningtaim, a? Sampela ol i save kaunim Baibel taim ol i laik slip. Na sampela ol i laik kaunim Baibel long narapela taim i stret long ol. Tasol bikpela samting, em yumi mas kaunim Baibel long olgeta taim. Na taim yumi kaunim pinis, orait yumi mas lusim sampela minit long tingim tingim long bel ol dispela tok. Orait nau yumi ken stori long sampela man ol i bin kaunim na tingim gut long bel ol tok bilong God na dispela i bin helpim ol.
Em i Laikim Tumas Lo Bilong God
5, 6. Yumi no save long nem bilong man i bin raitim Song 119, tasol yumi inap kisim wanem save long em taim yumi kaunim na tingim long bel ol tok em i bin raitim?
5 Man bilong raitim Song 119 em i amamas tru long Tok Bilong God. Husat i bin raitim dispela Song? Baibel i no kamapim nem bilong em. Tasol taim yumi lukim ol tok i stap long Song 119, yumi inap kisim sampela save long em, na yumi save, i gat ol hevi i bin painim em. Sampela wantok bilong em ol i tok ol i save lotuim Jehova, tasol ol i no laikim tru ol lo bilong Baibel olsem em i mekim. Tasol dispela man bilong raitim Song i no larim pasin bilong ol i pasim em long mekim ol samting i stret. (Song 119:23) Sapos yu sindaun o wok wantaim wanpela i no save tingim ol lo bilong Baibel, ating bai yu lukim olsem hevi bilong yu i wankain olsem hevi bilong dispela man bilong raitim Song.
6 Man i bin raitim dispela Song em i man bilong i stap aninit long God, tasol em i no tingim em yet i stretpela man. Em i tokaut olsem em tu i gat sin. (Song 119:5, 6, 67) Tasol em i no larim sin i bosim em. Em i askim olsem: “Olsem wanem na yangpela man i ken wokabaut long klinpela pasin?” Em i bekim olsem: “Em i mas bihainim tok bilong yu na bai em i stap klin.” (Song 119:9) Orait nau em i laik kamapim klia olsem Tok Bilong God i gat strong long kirapim man long mekim gutpela pasin, na em i tok olsem: “Mi putim tok bilong yu i stap long bel na tingting bilong mi. Olsem na bai mi no ken mekim sin long yu.” (Song 119:11) Tingim: Sapos wanpela strong em inap helpim yumi long abrusim pasin bilong mekim rong long God, em i wanpela bikpela strong tru, a?
7. Bilong wanem ol yangpela i mas tingting strong olsem ol i mas kaunim Baibel long olgeta de?
7 Ol yangpela Kristen i mas tingim tok bilong dispela man bilong raitim Song. Long nau Satan i wok strong tru long pundaunim ol yangpela Kristen. Em i gat bikpela laik tru long bagarapim tingting na pasin bilong ol yangpela manmeri i save lotuim Jehova. Satan i laik pulim ol yangpela Kristen long bihainim ol laik nogut bilong skin na brukim ol lo bilong God. Planti piksa wokabaut na ol piksa i kamap long TV ol i save kamapim tingting i wankain olsem tingting bilong Satan. Ol man na meri insait long ol dispela piksa ol i gat gutpela skin na i olsem ol i gat gutpela pasin na ol man inap laikim ol; pasin pamuk ol i mekim wantaim, ol dispela piksa i laik kamapim olsem em i pasin bilong yumi man na i orait long mekim. Ol dispela piksa i laik givim wanem tingting long ol yangpela? ‘I no gat rong long man na meri singel i slip wantaim sapos narapela i laikim tru narapela.’ Sori tru, long olgeta yia sampela yangpela Kristen i save kisim kain tingting olsem, na dispela i pundaunim ol. Sampela, em bilip bilong ol i bagarap olsem sip i save bagarap long rip. Tru tumas, Satan i strong tru long pundaunim ol yangpela! Tasol olsem wanem? Ol dispela traim i strong tumas na i no inap tru long yupela ol yangpela i sakim? Nogat tru! Jehova i bin wokim rot bambai ol yangpela Kristen inap daunim ol laik nogut bilong bel. Ol inap sakim olgeta spia samting Satan i save sutim i go long ol sapos ol i ‘bihainim tok bilong God na bai ol i stap klin, na putim tok bilong God i stap long bel na tingting bilong ol.’ Yu save lusim hamas taim long kaunim na tingim gut long bel ol tok bilong Baibel long olgeta de?
8 Man bilong raitim Song 119 i tokaut olsem: “Mi laikim tru lo bilong yu.” (Song 119:97) Em i toktok long wanem lo? Em tok bilong Jehova em i kamapim long ples klia pinis, na Lo Bilong Moses i insait long en. Pastaim ating man bai tok, Lo Bilong Moses i bilong ol lain bilong bipo tasol na i no gat wok long en long nau, na olsem wanem wanpela man inap laikim tru. Tasol taim yumi tingim ol lo i stap insait long Lo Bilong Moses, olsem man bilong raitim Song i bin mekim, bai yumi pilim tru olsem dispela Lo i kamapim gutpela tingting na save tru. Planti samting insait long Lo i olsem piksa na i makim ol samting bai kamap bihain, tasol i gat ol narapela lo tu long en, olsem lo i tok ol i no ken holim ol samting i dai pinis, na ol lo bilong kaikai, na dispela i helpim ol long i stap klin na i no gat sik. (Wok Pris 7:23, 24, 26; 11:2-8) Lo i strong long kirapim ol long bihainim stretpela pasin long wok bisnis, na i tokim ol Israel long mekim pasin sori long ol wanlotu i sot long ol samting. (Kisim Bek 22:26, 27; 23:6; Wok Pris 19:35, 36; Lo 24:17-21) Taim ol i mekim kot long man, ol i no ken helpim sampela long winim kot na daunim sampela. (Lo 16:19; 19:15) Taim ol samting i wok long painim man bilong raitim Song, ol dispela samting i givim save na tingting long em, olsem na em i lukim olsem ol man i bihainim Lo bilong God, ol wok samting ol i mekim i save kamap gutpela, na dispela i mekim na em i laikim moa yet dispela Lo. Na i wankain tu long nau—taim ol Kristen i bihainim ol lo bilong Baibel na gutpela samting i kamap long en, pasin bilong ol long laikim tru Tok Bilong God i wok long kamap strong moa.
Em i No Pret Long i Stap Narapela Kain
9. King Hesekia i kisim wanem kain tingting long Tok Bilong God?
9 Hesekia em i pikinini bilong king, na ol tok i stap long Song 119 i stret wantaim stori bilong em taim em i yangpela yet. Sampela saveman bilong Baibel i ting Hesekia i bin raitim Song 119. Yumi no save tru tru long dispela samting, tasol yumi save Hesekia i save tingim tru Tok Bilong God. Wokabaut bilong em i kamapim klia olsem em i wanbel tru long tok bilong Song 119:97. Baibel i tok long Hesekia olsem: “Em i pas tru long Bikpela na oltaim em i no lusim Bikpela. Nogat. Em i bihainim gut olgeta lo Bikpela i bin givim long Moses.”—2 King 18:6.
10. Olsem wanem pasin bilong Hesekia inap strongim bel bilong ol Kristen em papamama bilong ol i no bin stap aninit long God?
10 Stori bilong Hesekia i makim olsem em i no bin go bikpela insait long famili i stap aninit long God. Papa bilong em, em King Ahas, em i lusim Jehova na i lotuim ol god giaman, na em i bin kisim wanpela pikinini man bilong em—em brata bilong Hesekia—na kukim em long paia olsem ofa bilong givim long wanpela god giaman! (2 King 16:3) Tasol maski papa i no bin stap olsem gutpela piksa, Hesekia i kisim save long Tok Bilong God na long dispela rot em inap abrusim ol pasin bilong ol haiden na “wokabaut long klinpela pasin.”—2 Stori 29:2.
11. Hesekia i lukim wanem ol samting i kamap long papa bilong em i no bin stap gut long God?
11 Taim Hesekia i wok long go bikpela, em i lukim pasin bilong papa long bosim kantri. Ol lain birua i stap klostu long Juda. Resin, em king bilong Siria, em i stap, na em i bung wantaim King Peka bilong Israel long pait long Jerusalem. (2 King 16:5, 6) Ol Idom na ol Filistia tu i stap, na ol i kam pait long Juda na ol i winim pait, na ol i kisim sampela taun bilong Juda. (2 Stori 28:16-19) Orait King Ahas i mekim wanem bilong winim ol dispela hevi i painim Juda? Em i no askim Jehova long helpim em long sakim ol Siria, nogat. Em i singaut long king bilong Asiria i helpim em, na em i kisim gol na silva, em sampela em i bin kisim long haus bilong God, na em i givim long dispela king bilong grisim em. Tasol dispela i no kamapim gutaim tru long Juda.—2 King 16:6, 8.
12. Hesekia i mas mekim wanem na bai em i no ken mekim ol wankain rong olsem papa bilong em i bin mekim?
12 Bihain Ahas i dai na Hesekia i kamap king taim em i gat 25 krismas. (2 Stori 29:1) Maski em i olsem yangpela yet, em i mekim gutpela wok king. Em i no bihainim pasin bilong papa bilong em i bin lusim Jehova, nogat; em i bihainim gut Lo bilong Jehova. Wanpela tok insait long dispela Lo em i bilong ol king i mas bihainim, olsem: “Taim em i kamap king, orait em i mas kisim wanpela buk ol i bin raitim ol lo bilong God long en. [Em] i mas bihainim buk bilong lo ol pris bilong Livai i holim, na raitim wankain tok tasol. Em i mas putim dispela buk i stap klostu long em na ritim hap tok long en long olgeta de. Olsem bai em i ken aninit long Bikpela na bihainim tru olgeta lo na tok bilong God i stap long dispela buk.” (Lo 17:18, 19) Taim Hesekia i kaunim Tok Bilong God long olgeta de, em bai lain long pret long Jehova na i no ken mekim ol wankain rong olsem papa bilong em i bin givim baksait long God.
13. Olsem wanem Kristen inap save tru olsem olgeta samting bilong spirit em i mekim bai kamap gutpela?
13 I no ol king tasol bilong Israel i mas tingting long Tok Bilong God long olgeta taim—olgeta Israel i pret long God ol i mas mekim olsem. Namba wan Song i stori long man i stap amamas tru na i tok, em i save “laikim tumas lo bilong God, na em i save tingting long dispela lo long san na long nait.” (Song 1:1, 2) Man bilong raitim Song i tok long kain man olsem: “Olgeta samting em i mekim i save kamap gutpela.” (Song 1:3) Tasol man i no save bilip long God Jehova, Baibel i tok long em olsem: “Tingting bilong dispela man em i bruk nabaut, na long olgeta pasin em i mekim, em i no save bihainim wanpela rot tasol.” (Jems 1:8) Yumi olgeta i laik i stap amamas na ol wok bilong yumi i kamap gutpela. Orait sapos yumi kaunim Baibel long olgeta de na tingim gut ol tok bilong en, dispela bai helpim yumi long i stap amamas.
Tok Bilong God i Strongim Jisas
14. Olsem wanem Jisas i kamapim olsem em i laikim tru Tok Bilong God?
14 Wanpela taim papamama bilong Jisas i bin painim em na ol i lukim em i sindaun namel long ol tisa insait long tempel long Jerusalem. Ol dispela saveman bilong Lo bilong God “ol i kirap nogut long save bilong en na long tok em i bekim long ol”! (Luk 2:46, 47) Long dispela taim Jisas i gat 12-pela krismas tasol. Tru tumas, maski em i manki yet, em i save laikim tru Tok Bilong God. Bihain Jisas i kamapim ol tok bilong buk bilong God bilong krosim Satan, na em i tok: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.” (Matyu 4:3-10) Bihain liklik long dispela, Jisas i autim tok long ol manmeri long as ples bilong em, Nasaret, na em i kamapim ol tok bilong buk bilong God.—Luk 4:16-21.
15. Taim Jisas i autim tok long ol man, olsem wanem em i stap olsem gutpela piksa yumi ken bihainim?
15 Planti taim Jisas i bin kamapim ol tok i stap long buk bilong God bilong helpim ol tok em i skulim ol man long en. Ol man i harim tok bilong em “ol i kirap nogut tru long skul bilong en.” (Matyu 7:28) I gat as na ol i mekim olsem, long wanem, ol tok Jisas i skulim ol man long en, em i bin kisim long God Jehova yet! Jisas i tok: “Dispela tok mi givim yupela, em i no bilong mi yet. Nogat. Em i bilong God, em i bin salim mi na mi kam. Man i mekim toktok long tingting bilong em yet, em i laik litimapim nem bilong em yet. Tasol man i laik litimapim nem bilong man i bin salim em i kam, dispela man em i stretpela man. Em i no man bilong giaman.”—Jon 7:16, 18.
16. Olsem wanem Jisas i kamapim long ples klia pasin bilong em long laikim tumas tok bilong God?
16 Jisas i no olsem man bilong raitim Song 119—Jisas “em i stretpela man.” Em i no gat sin—em i dispela Pikinini bilong God i bin “daunim em yet na i bihainim tok bilong God, i go inap long em i dai.” (Filipai 2:8; Hibru 7:26) Tasol maski Jisas em i gutpela olgeta, em i stadi na em i bihainim Lo bilong God. Dispela em i wanpela as na em inap holimpas bilip na stap gut long God. Taim Pita i mekim wok long bainat bilong pasim ol birua na ol i no ken holim Bikpela bilong em, Jisas i krosim Pita na i tok: “Ating yu no save, mi inap askim Papa bilong mi, na em bai i salim planti ensel moa, i winim 12-pela lain ami, na ol bai i kam helpim mi? Tasol sapos mi mekim olsem, orait tok i stap long buk bilong God em bai i no inap kamap tru. Buk bilong God i tok, ol dispela samting i mas kamap long mi.” (Matyu 26:53, 54) Em nau, Jisas i gat bikpela tingting long ol tok bilong buk bilong God i mas kamap tru—dispela i bikpela samting tru long em, olsem na em i no tingting long abrusim pen na dai long diwai. Man! Em i laikim tumas Tok Bilong God, a?
Ol i Bihainim Pasin Bilong Krais
17. Aposel Pol i ting olsem wanem long Tok Bilong God?
17 Aposel Pol i tokim ol wanwok Kristen: “Yupela i mas bihainim pasin bilong mi na wokabaut, olsem mi tu mi save bihainim pasin bilong Krais na wokabaut.” (1 Korin 11:1) Pol i kisim pasin bilong laikim tru buk bilong God, olsem Bikpela bilong em i bin mekim. Em i tokaut olsem: “Long bel bilong mi, mi save laikim tumas Lo bilong God.” (Rom 7:22, The Jerusalem Bible) Planti taim Pol i kamapim ol tok i stap long buk bilong God. (Aposel 13:32-41; 17:2, 3; 28:23) Taim Pol i givim laspela tok long gutpela wanwok tru bilong em, Timoti, em i tok strong olsem olgeta “manmeri bilong God” i mas tingim Tok Bilong God i bikpela samting tru long i stap bilong ol long olgeta wan wan de.—2 Timoti 3:15-17.
18. Stori long wanpela man long taim bilong yumi em i bin tingim tru Tok Bilong God.
18 Planti gutpela wokboi bilong Jehova long taim bilong yumi ol tu i bihainim pasin bilong Jisas long laikim tru Tok Bilong God. Bihain liklik long yia 1900, wanpela yangpela man i bin kisim wanpela Baibel long pren bilong em. Em i stori long samting dispela gutpela presen i bin mekim long em, na em i tok: “Mi tingting strong olsem mi mas kaunim wanpela hap bilong Baibel long olgeta wan wan de.” Dispela yangpela man em Frederick Franz. Em i laikim tumas tok bilong Baibel, na dispela i mekim na bihain em i mekim wok bilong Jehova inap planti planti yia. Planti man i save tingim yet pasin bilong em, em inap kolim nating long tingting olgeta tok bilong sampela sapta long Baibel.
19. Sampela i save mekim wanem long hap bilong Baibel bilong kaunim long wik, em bilong Skul Bilong Wok Autim Tok?
19 Ol Witnes Bilong Jehova i ting pasin bilong kaunim Baibel long olgeta de em i bikpela samting tru. Long olgeta wik, ol i save kaunim sampela sapta bilong Baibel bilong redi long ol tok bai kamap long wanpela miting Kristen, em Skul Bilong Wok Autim Tok. Long dispela miting ol i save kamapim ol bikpela tok bilong ol sapta bilong Baibel ol i bin makim bilong dispela wik. Hap bilong Baibel bilong kaunim insait long wik, sampela Witnes ol i save brukim i go olsem 7-pela liklik hap, na ol i kaunim wanpela hap long olgeta de. Taim ol i kaunim, ol i save tingim gut ol dispela tok. Sapos inap, ol i save lukim ol buk i kamapim ol tok bilong Baibel na bai ol inap kisim gut ol tok bilong Baibel ol i bin kaunim.
20 Bilong kaunim Baibel long olgeta de, ating yu mas lusim sampela samting yu save mekim na bai yu “gat taim” long kaunim Baibel long olgeta de. (Efesus 5:16) Tasol ol gutpela samting yu kisim long dispela bai winim tru ol samting yu bin lusim. Taim yu wok long kisim pasin bilong kaunim Baibel long olgeta de, pasin bilong yu long laikim Tok Bilong God em bai kamap strong moa. I no longtaim na bai yu mekim wankain tok olsem man bilong raitim Song, olsem: “Mi laikim tru lo bilong yu. Mi save tingting long en long san na long nait.” (Song 119:97) Kain tingting olsem bai helpim yu long kisim ol gutpela samting tru long nau na long bihain tu, olsem yumi bai lukim long stori i kamap bihain long dispela.
Yu Tingim Yet?
◻ Olsem wanem man bilong raitim Song 119 i kamapim olsem em i laikim tumas Tok Bilong God?
◻ Pasin bilong Jisas na Pol inap skulim yumi long wanem ol samting?
◻ Pasin bilong yumi long laikim tok bilong God, olsem wanem yumi ken mekim i kamap strong moa?
8. Olsem wanem ol samting dispela paragraf i stori long en i helpim yu long pilim tru ol gutpela samting bilong Lo Bilong Moses?
20. Yumi mas mekim wanem na bai yumi gat taim bilong kaunim Baibel long olgeta de?
[Ol Piksa long pes 10]
Ol king i stap gut long God ol i mas kaunim Tok Bilong God long olgeta de. Yu save mekim olsem?
[Piksa long pes 12]
Maski Jisas i manki yet, em i save laikim tru Tok Bilong God