Jehova Em i God Bilong Sori na Marimari Long Mi
Em stori bilong John Andronikos
Em yia 1956. Mi marit inap 9-pela de tasol, na nau mi sanap long ai bilong kot bilong apil long Komotini, long hap not bilong Grik. Mi laik bai kot bilong apil i ken rausim dispela 12-pela mun kalabus narapela kot i makim long mi, long wanem, mi bin mekim wok bilong autim tok bilong Kingdom. Kot bilong apil i pasim tok olsem mi mas kalabus inap sikspela mun—laik bilong mi olsem ol i mas rausim kalabus bilong mi em i lus. Dispela em i kirap tasol bilong planti traim bai painim mi long bihain. Tasol taim ol dispela hevi na traim i painim mi, Jehova i bin i stap olsem God bilong sori na marimari long mi.
TAIM mama i karim mi long Oktoba 1, 1931, famili bilong mi i bin sindaun long biktaun Kavala, long bipo em taun Neapolis long Masedonia na aposel Pol i bin go long dispela hap taim em i mekim namba 2 raun bilong autim gutnius. Mama i kamap wanpela Witnes Bilong Jehova taim mi gat 5-pela krismas, na maski em i no save gut long rit na rait, em i bin wok strong tru inap long skel bilong em long skulim mi long pasin bilong laikim God na pret long em. Papa bilong mi em i strongpela man bilong bihainim ol pasin bilong lotu Grik Otodoks. Em i no gat laik long tok i tru bilong Baibel na em i save birua long mama, na planti taim em i paitim mama.
Olsem na mi go bikpela insait long famili i no wanbel long lotu, na papa i paitim na mekim nogut long mama, na bihain em i lusim mipela. Kirap long taim mi liklik yet, mama i save kisim mitupela liklik sista bilong mi i go long ol miting Kristen. Tasol taim mi kisim 15 krismas, ol laik bilong ol yangpela na laik bilong bosim wokabaut bilong mi yet i mekim na mi lusim ol Witnes Bilong Jehova. Tasol gutpela mama bilong mi i bin wok strong tru, na aiwara bilong em i kam daun taim em wok long helpim mi.
Mipela i stap rabis na mi bihainim ol pasin i no stret, olsem na mi kisim bikpela sik na winim 3-pela mun mi slip tasol long bet. Long dispela taim wanpela brata i gat pasin daun, na em bin helpim mama long kisim save long tok i tru, em i luksave olsem mi laikim tru God. Em i pilim olsem em inap helpim mi long kamap strong gen long ol samting bilong spirit. Ol narapela i tokim em: “Yu lusim nating taim bilong yu long traim helpim John; em i no inap amamas gen long ol samting bilong spirit.” Tasol dispela brata i no les kwik na em i wok strong long helpim mi na dispela i karim kaikai. Long Ogas 15, 1952, taim mi gat 21 krismas, mi kisim baptais long wara bilong makim dediket bilong mi long Jehova.
Mi Marit Nupela na Mi Stap Long Kalabus
Tripela yia bihain mi bungim Martha, em wanpela sista i strong long ol samting bilong spirit na i gat ol gutpela pasin tru, na i no longtaim bihain mipela i pasim tok long marit. Wanpela taim mi kirap nogut tru taim Martha i tokim mi: “Nau mi tingting long autim tok long ol haus. Yu laik kam wantaim mi?” I kam inap long dispela taim, mi no bin insait long wok bilong autim tok long ol haus, mi bin autim tok tasol long ol kain kain taim na ples. Long dispela taim i gat tambu long mekim wok autim tok long kantri Grik, na mipela i mas hait na mekim wok. Ol i kalabusim planti brata, na planti i sanap long kot, na sampela i go kalabus inap planti yia. Tasol mi no inap sakim tok bilong meri mi laik marit long em!
Long 1956, mi maritim Martha. Em long dispela taim, nainpela de tasol bihain long mitupela i marit, kot bilong apil long Komotini i makim mi long kalabus inap sikspela mun. Dispela i mekim na mi tingim gen wanpela askim mi bin mekim long wanpela sista Kristen, em poroman bilong mama bilong mi: “Mi ken mekim wanem na bai mi kamapim olsem mi wanpela Witnes tru bilong Jehova? I no gat wanpela samting i bin kamap yet long mi na bai mi ken kamapim klia dispela bilip bilong mi.” Taim dispela sista i kam lukim mi long kalabus, em i tokim mi long dispela askim na em i tok: “Nau yu ken kamapim klia long Jehova olsem yu laikim em tru. Dispela em wok yu mas mekim.”
Taim mi kisim save olsem loya bilong mi i bin traim long painim sampela mani bilong baim kalabus bilong mi na bai mi ken lusim kalabus, mi tokim em olsem mi laik stap na pinisim kalabus bilong mi. Taim mi inapim pinis sikspela mun long kalabus, mi amamas tru long lukim tupela wankalabus bilong mi ol i kisim save long tok i tru! Insait long sampela yia bihain long dispela, mi insait long planti kot, long wanem, mipela i autim gutnius.
Mipela i No Bel Hevi Long Ol Samting Mipela i Mekim
Long 1959, tupela yia samting bihain long mi lusim kalabus, mi mekim wok olsem wasman siaman, na Sosaiti i singautim mi long i go long Skul Bilong Wok Kingdom, em wanpela skul bilong lainim ol elda bilong kongrigesen. Tasol long wankain taim, ol i laik givim mi wanpela wok bilong mekim oltaim long wanpela haus sik, na mi inap kisim bikpela mani bilong helpim mi na famili bilong mi long bihain. Mi bai mekim wanem? Inap tripela mun, mi bin mekim liklik wok long dispela haus sik, na dairekta bilong haus sik i amamas tru long wok bilong mi. Tasol taim Sosaiti i askim mi long go long skul, em i no laik larim mi i kisim malolo, maski mi bai kisim malolo i no gat pe. Mi beten na mi skelim dispela hevi, na bihain mi pasim tok long bel long putim ol samting bilong Kingdom i stap namba wan na sakim dispela wok ol i laik givim long mi.—Matyu 6:33.
Long dispela taim tu, wasman distrik na wasman sekit i kam lukim kongrigesen bilong mipela. Mipela i mas hait na mekim ol miting long haus bilong ol brata, long wanem, ol pris pasto bilong misin Grik Otodoks na gavman ol i birua nogut tru long mipela. Bihain long wanpela miting, wasman distrik i askim mi, mi tingting long mekim wok autim tok long olgeta de o nogat. Dispela tok bilong em i bin kirapim tru bel bilong mi, long wanem, kirap long taim mi kisim baptais mi gat bikpela laik tru long mekim olsem. Mi bekim tok long em olsem: “Mi laik tru long mekim olsem.” Tasol mi gat narapela wok tu bilong lukautim pikinini meri bilong mi. Dispela brata i tokim mi: “Bilip long Jehova, na em bai helpim yu long bihainim dispela laik bilong yu.” Olsem na mitupela meri bilong mi inap stretim ol samting long sindaun bilong mipela, na mitupela inap lukautim pikinini bilong mipela tu, na long Disemba 1960, mi kirap mekim wok olsem painia salim long hap is bilong Masedonia. I gat 5-pela painia salim tasol long kantri, na mi wanpela bilong ol.
Bihain long mi mekim wok painia salim inap wanpela yia, brens-ofis long Atens i singautim mi long mekim wok olsem wasman bilong raun. Bihain long mi kisim skul inap wanpela mun bilong mekim dispela wok, mi kam long haus, na taim mi wok long kamapim ol ekspiriens bilong mi long Martha, dairekta bilong wanpela bikpela main bilong ain manganis, em i kam lukim mi na em i askim mi long kamap maneja bilong wanpela dipatmen long main. Em i laik mi sainim kontrak bilong wok inap 5-pela yia na bai mi kisim bikpela pe, wanpela gutpela haus, na wanpela ka. Em i givim mi tupela de bilong skelim na bekim tok bilong em. Mi no wet, mi kirap beten long Jehova: “Mi stap! Salim mi.” (Aisaia 6:8, NW ) Meri bilong mi i wanbel tru long dispela tingting bilong mi. Mipela i bilip long God, na mipela kirap mekim wok bilong raun, na Jehova em i save mekim pasin sori na marimari em i no lusim mipela.
Long Taim Bilong Hevi na Long Taim i No Gat Hevi
Maski mipela i gat hevi long mani, mitupela i no gat tupela tingting long mekim wok bilong Jehova, na em i givim mipela ol samting mipela i mas kisim. Taim mi kirap mekim wok, mi save go lukim ol kongrigesen long wanpela liklik motabaik, na mi bin raun inap 500 kilomita samting bilong mekim olsem. Planti hevi i painim mi, na sampela birua i painim mi tu. Wanpela taim long taim bilong kol, mi lusim wanpela kongrigesen na mi laik i go bek long haus. Taim mi brukim wanpela wara i tait motabaik bilong mi i dai, na wara i kam inap long skru bilong lek bilong mi. Bihain taia bilong motabaik i slek. Wanpela man i kam long rot em i gat pam, na em i helpim mi, olsem na mi inap go kamap long wanpela ples i stap klostu na long dispela hap mi stretim gut taia. Mi go kamap long haus long 3 klok long bikmoning—mi kol nogut tru na skin bilong mi i les olgeta.
Long narapela taim, mi lusim wanpela kongrigesen na mi laik i go long narapela kongrigesen, tasol motabaik i wel na mi pundaun na motabaik i pundaun antap long lek bilong mi. Dispela i brukim trausis bilong mi na blut i bagarapim tru trausis. Mi no gat narapela trausis, olsem na long dispela nait mi pasim trausis bilong narapela brata na mekim tok. Dispela trausis i bikpela tru long skin bilong mi. Tasol ol dispela hevi i no inap daunim laik bilong mi long mekim wok bilong Jehova na helpim ol brata.
Long narapela taim mi kisim bikpela bagarap; mi brukim han bilong mi na sampela tit. Long dispela taim, liklik sista bilong mi, em i no wanpela Witnes na em i stap long Amerika, em i kam lukim mi. Mi amamas tru taim em i helpim mi long baim wanpela motabaik! Taim ol brata long brens-ofis long Atens i kisim save long birua i bin painim mi, ol i raitim wanpela pas na kamapim planti tok bilong strongim mi. Wanpela bilong ol tok ol i kamapim em tok bilong Rom 8:28, em i tok: “God i save mekim olgeta samting i wok wantaim bilong mekim gut long ol man i save givim bel bilong ol long God.” Planti taim, dispela tok i bin kamap tru long laip bilong mi!
Wanpela Gutpela Samting
Long 1963, mi autim tok wantaim wanpela painia salim long wanpela ples em ol manmeri i no laik long harim tok. Mitupela i pasim tok long wok wan wan, narapela bai wok long hapsait bilong rot na narapela bai wok long hapsait. Taim mi paitim dua long wanpela haus, wantu wanpela meri i opim dua na pulim mi i go insait na em i pasim dua na lokim. Mi kirap nogut tru, na mi tingting planti bilong wanem em i mekim dispela pasin. I no longtaim bihain, em i hariap long singautim painia salim tu long i go insait long haus. Nau dispela meri i tokim mitupela: “Stap isi! No ken wokabaut nabaut!” Liklik taim bihain, mipela i harim nek bilong sampela birua. Ol i wok long painim mitupela. Taim ol i go pinis, meri i tokim mitupela: “Mi mekim olsem bilong lukautim yutupela. Mi save daun long yupela, long wanem, mi bilip olsem yupela i Kristen tru.” Mitupela i tok tenkyu tru long em na lusim planti buk na nius wantaim em.
Inap 14 yia bihain, long wanpela kibung distrik long kantri Grik, wanpela meri i kam long mi na i tok: “Brata, yu inap tingim mi? Mi dispela meri i bin haitim yu long ol birua taim yu kam autim tok long ples bilong mipela.” Em i bin lusim kantri Grik na i go long Jemani, na em i stadi long Baibel, na bung wantaim ol lain bilong Jehova. Long nau olgeta long famili bilong em i stap long tok i tru.
Tru tumas, insait long ol dispela yia, mipela i helpim planti lain na ol i stap olsem ol “pas” bilong kamapim klia wok mipela i mekim. (2 Korin 3:1) Planti bilong ol dispela lain mipela i bin helpim ol long kisim save long tok i tru bilong Baibel, nau ol i mekim wok olsem elda, wokman, na painia. Bipo i no planti pablisa tumas long ol sekit mi bin raun long en long 1960 i go 1969 samting, tasol nau mi amamas long lukim lain i go bikpela inap 10,000 manmeri i lotuim Jehova! Yumi mas litimapim nem bilong God bilong sori na marimari, long wanem, em i save mekim wok long yumi long rot em yet i makim.
‘Taim Man i Gat Sik’
Long ol yia mi bin mekim wok wasman bilong raun, Martha i bin helpim gut mi, oltaim em i gat pasin bilong amamas. Tasol long Oktoba 1976, em i kisim bikpela sik na ol dokta i mas katim em. Tupela lek bilong em i dai na em i mas wokabaut long wilsia. Olsem wanem mitupela inap karim hevi bilong baim ol samting na hevi bilong bel na tingting? Mitupela i bilip long Jehova, na em i bin mekim pasin sori na givim mitupela planti samting. Taim mi go wok long Masedonia, Martha i stap long haus bilong wanpela brata bambai em i ken lukim ol dokta. Em i save ringim mi na mekim dispela tok bilong strongim mi: “Mi stap orait. Yu mas mekim yet wok, na taim mi orait gen, mi bai wokabaut long wilsia na wok wantaim yu.” Na tru tumas, em i mekim olsem. Ol gutpela brata sista long Betel i bin salim planti pas bilong strongim mitupela. Planti taim Martha i save tingim tok bilong Song 41:3: “Taim dispela man i gat sik, Bikpela bai i lukautim em. Em bai i mekim orait sik bilong em, na mekim em i kamap strong gen.”
Ol dispela bikpela sik i mekim, olsem na long 1986 Sosaiti i ting i gutpela sapos mi wok painia salim long Kavala. Long dispela hap mi stap klostu long famili bilong gutpela pikinini meri bilong mitupela Martha. Long mun Mas long yia i go pinis, Martha i dai. Em i bin stap gut long God i go inap long em i dai. Taim em i no dai yet, na ol brata i askim em: “Yu orait?” Em i save tok: “Mi stap klostu long Jehova, olsem na mi orait!” Taim mitupela i redim ol miting na lukim ol tok i singautim ol man long i go wok long ol hap i gat planti wok bilong mekim, Martha i save tok: “John, mitupela i mas go mekim wok long hap i sot long ol man bilong autim tok.” Em i no bin lusim pasin bilong em long givim bel long God.
Sampela yia i go pinis, mi tu i kisim wanpela bikpela sik. Long Mas 1994, ol dokta i tok mi gat wanpela bikpela sik bilong klok mi inap kisim bagarap long en, na ol i mas katim mi. Long dispela taim tu, mi pilim olsem Jehova i sambai long mi na helpim mi long taim bilong dispela bikpela hevi. Mi no inap lusim tingting long wanpela beten wasman sekit i mekim taim mi slip long haus sik, na tu, mi no inap lusim tingting long Memorial mi mekim long haus sik wantaim fopela sikman em ol i gat laik long harim tok i tru.
Jehova i Bin Helpim Mipela
Ol yia i save go hariap hariap, na skin bilong yumi i no gat strong olsem bipo, tasol yumi kisim nupela strong long rot bilong stadi na wok autim tok. (2 Korin 4:16) Inap 39 yia i go pinis, mi bin tok, “Mi stap! Salim mi.” Mi bin kisim bikpela amamas na planti gutpela samting tru long i stap bilong mi. Tru tumas, sampela taim mi pilim olsem “mi no gat strong, na mi no inap helpim mi yet,” tasol mi ken bilip strong na tok long Jehova olsem: “Yu yet yu man bilong helpim mi, na yu save kisim bek mi.” (Song 40:17) Tru tumas, em i bin stap olsem God bilong sori na marimari long mi.
[Piksa long pes 25]
Mi wantaim Martha long 1956
[Piksa long pes 26]
Pasis long Kavala
[Piksa long pes 26]
Wantaim Martha long 1997