Ripot Long Wok Bilong Kingdom
Wok Bilong Jehova i Go Bikpela Long Namibia
NAMBA wan taim ol man i harim gutnius bilong Kingdom bilong God long Namibia, em long 1928 samting. Kirap long dispela taim na i kam inap nau, planti handet man i gat gutpela bel ol i bilip long tok olsem God bai kisim bek ol man. Ol dispela stori i stap daunbilo i soim pasin bilong Jehova long bungim ol dispela gutpela man i kam insait long lain bilong em.—Hagai 2:7.
◻ Paulus em i wanpela fama i sindaun long hap not-is bilong Namibia. Namba wan taim ol Witnes Bilong Jehova i bungim Paulus, em long taim em i raun long nambawan biktaun Windhuk. I no longtaim na Paulus i save olsem em i painim pinis tok i tru. Em i go bek long haus wantaim buk Yu Inap i Stap Oltaim Long Paradais Long Graun. Bihain em i go long Rundu, em wanpela taun i gat Haus Kingdom long en, na Paulus i bungim ol Witnes na em i askim ol long kam lukim em.
Tasol em i stap longwe tumas, olsem na ol Witnes i no inap i kam mekim Baibel-stadi wantaim Paulus. Tasol dispela i no daunim Paulus, na em yet i kirap stadi long Baibel. Na tu, em i givim bel long tokim ol narapela man long ol samting em i lain long en. Bihain, wanpela grup bilong Baibel-stadi i kamap. Taim dispela liklik grup i harim long redio olsem wanpela kibung bilong ol Witnes Bilong Jehova bai kamap long Rundu, ol i bungim liklik mani bilong ol na stretim rot bilong kisim PMV samting bilong i go long kibung.
Ol i amamas tru long bung wantaim ol Witnes Bilong Jehova long namba wan taim! Kwiktaim ol brata i stretim rot bambai ol brata i gat save long mekim gut wok, ol i ken go lukim dispela grup long olgeta taim. Long nau i gat 6-pela pablisa long ples Paulus i sindaun long en.
◻ Taim Johanna i harim wanpela man i tok nogut long ol Witnes Bilong Jehova, dispela i kirapim laik bilong em long save long nem bilong God. Em i tok: “Kirap long namba wan taim mi harim nem Jehova, mi no inap lusim tingting long en na mi kirap tingting, Jehova em i husat. Mi na man bilong mi i sindaun klostu long Wolvis Be long nambis bilong Namibia. Wanpela taim mipela i go long taun, na mi lukim sampela Witnes i tilim nius Wastaua long rot. Mi kisim wanpela nius na askim ol long stadi long Baibel wantaim mi, long wanem, mi gat planti askim. Mi krai taim ol i tokim mi olsem ol i no inap i kam, long wanem, ka bilong ol i bagarap. Bihain liklik man bilong mi em i dai, na mi go sindaun long taun Ketmansop. Sosaiti i bin salim wanpela painia salim (man i save autim tok long olgeta de) long dispela taun, na mi kisim buk Tok i Tru i Bringim Man Long Laip Oltaim long em. Taim mi kirap ritim buk, wantu mi save em i tok i tru.
“Bihain ol i tokim mi long insait long wok autim tok, tasol mi pret tru long ol man. Taim mi wokabaut i go long ol haus, mi beten askim Jehova long mi ken i dai bambai mi no ken autim tok. Namba wan taim mi autim tok long rot, mi hait long wanpela liklik rot bambai ol man i no ken lukim mi. Bihain mi strongim bel bilong mi na mi soim nius long wanpela man, na nau mi inap mekim sampela tok. Jehova i helpim mi, olsem na long dispela de mi stori long planti man long ol gutpela samting mi wet long kisim, em Baibel i as bilong en.
“Long nau—12-pela yia bihain—mi no gat planti samting bilong skin, tasol mi pilim yet gutpela wok painia mi mekim, na mi kisim yet bikpela amamas long wok bilong autim tok i tru bilong Kingdom long ol narapela.”