No Ken Larim Strong Bilong Yu i Kamap Samting Bilong Pundaunim Yu
Long gutpela sip Titanic i gat 16 rum ol i wokim gut bai wara i no ken i go insait long en, olsem na ol i ting dispela sip i no inap i go daun long solwara. Long namba wan raun bilong en long 1912, namba bilong ol liklik bot em i karim i no inap long olgeta man i stap long en. Dispela sip i bam long strongpela ais na i go daun long solwara, na winim 1,500 manmeri ol i dai.
KING USIA bilong Jerusalem bilong bipo i save aninit long God, na em i wanpela kepten bilong ami. Jehova i helpim em na planti taim em i winim ol birua bilong em. “Olsem na [Usia] i kamap strongpela king tru na ol manmeri bilong ol longwe ples i harim tok long biknem bilong en.” Tasol bihain “em i ting em i strongpela king tru, olsem na . . . em i no bihainim tok bilong God.” Long pasin antap bilong em, em i kisim sik lepra.—2 Stori 26:15-21; Sindaun 16:18.
Dispela tupela stori i lainim yumi olsem sapos yumi gat strong tasol yumi no gat gutpela tingting, na save, na pasin daun, orait dispela strong inap kamap olsem samting bilong pundaunim yumi o nogutim yumi. Dispela em i bikpela samting, long wanem, yumi olgeta wan wan i gat strong o pasin bilong yumi yet na yumi laik bai dispela i kamapim gutpela samting long yumi bambai yumi ken amamas na ol narapela tu i ken amamas, na bikpela samting, Man bilong wokim yumi em tu i ken amamas. Tru tumas, yumi mas mekim gut wok long wanem kain presen God i givim yumi na bosim gut bambai dispela inap i stap olsem samting bilong mekim gutpela wok long en.
Olsem: Sapos wanpela man i laikim tumas wok bilong em, dispela wok inap daunim em na em bai kamap man bilong wok wok oltaim. Man i save was gut em i no inap larim man i traim em o giamanim em, tasol sapos em i mekim olsem oltaim, em bai hatwok long skelim ol samting em i mas mekim, na em bai no inap mekim tru. Pasin bilong mekim gut ol wok samting, em wanpela gutpela pasin, tasol sapos man i laik winim mak bilong en, na em i no ting olsem em inap popaia, bai em i no stap wanbel wantaim ol narapela na em i no inap amamas. Olsem na tingim ol gutpela pasin bilong yu. Yu save mekim gut wok long ol? Ol pasin bilong yu i save helpim gut ol narapela? Na bikpela samting em olsem: Ol dispela pasin i givim biknem long Jehova, em As bilong “olgeta gutpela samting yumi save kisim”? (Jems 1:17) Yumi ken skelim gut ol narapela gutpela pasin em inap kamap olsem pasin bilong pundaunim yumi na i no inap helpim yumi sapos yumi no was gut.
Mekim Gut Wok Long Tingting
Gutpela save em wanpela gutpela samting bilong helpim yumi. Tasol em inap kamap samting bilong pundaunim yumi, sapos em i kamapim pasin hambak o yumi tingim tumas yumi yet, na dispela inap kamap sapos ol narapela i mekim planti tok amamas long yumi o mekim ol gutpela tok bilong grisim yumi. O bai yumi ting olsem yumi gat bikpela save pinis long Tok Bilong God na ol buk na nius bilong Baibel.
Hambak pasin inap kamap long kain kain rot. Olsem: Sapos wanpela man i gat gutpela save i kisim wok long kongrigesen Kristen long mekim tok, olsem pablik-tok o mekim tok long Skul Bilong Wok Autim Tok, ating em bai redim tok klostu long taim bilong givim tok na em i no beten askim Jehova long blesing bilong em. Ating em i bilip long save em i gat pinis na long pasin bilong em long wokim tingting hariap. Dispela pasin i stap long skin bilong em, ating pastaim em bai haitim pasin bilong em long slek na mekim nating ol dispela samting, tasol em i no kisim blesing long Jehova olsem na dispela inap mekim na bai em i no wok long kamap strong, em bai stap olsem tasol. Sori tru, dispela gutpela presen i lus nating!—Sindaun 3:5, 6; Jems 3:1.
Man i gat gutpela save em inap ting em i gat bikpela save pinis long Baibel na ol narapela buk bilong Baibel. Olsem wanpela balun i solap long win, kain tingting olsem i go bikpela na “i save kamapim pasin bikhet” o i mekim man i tingim tumas em yet na dispela i no ‘strongim’ pasin Kristen bilong ol long pas gut wantaim. (1 Korin 8:1; Galesia 5:26) Tasol man i save tingim ol samting bilong spirit, maski em i gat gutpela save, oltaim em i beten long kisim spirit bilong God na em i bilip long en. Strong bilong em i kamap wanpela gutpela samting na em i kamapim strong pasin bilong laikim ol narapela, pasin daun, save, na gutpela tingting—olgeta dispela pasin i wok gut wantaim.—Kolosi 1:9, 10.
Save inap pundaunim yumi sapos yumi tingim tumas save bilong yumi yet na yumi no mekim pasin daun. Man i gat gutpela save—na ol man i laikim em—ating ol i lusim tingting olsem Jehova “i no save putim yau long ol man i ting olsem ol i gat planti save,” maski ol i gat gutpela save. (Jop 37:24) Tok Bilong God i tok: “Man i gat gutpela tingting em i save pasim maus.” (Sindaun 11:2) Maski aposel Pol i kisim bikpela skul na em i saveman tru, em i tokim ol Korin olsem: “Ol brata, taim mi bin i kam long yupela na mi autim tok hait bilong God long yupela, mi no bin mekim ol kain kain bikpela toktok olsem ol saveman i save mekim. . . . Na taim mi stap wantaim yupela, mi no gat strong. Nogat. Mi save pret, na mi guria planti. Na tok mi bin mekim na gutnius mi bin autim, em mi no mekim long pasin bilong ol saveman, bai bikpela save bilong mi i ken senisim tingting bilong yupela. Nogat. Mi bin soim strong bilong Holi Spirit long yupela. Mi bin mekim olsem, long wanem, mi no laik bai save bilong man i kamapim bilip bilong yupela. Nogat. Mi laik bai strong bilong God tasol i kamapim dispela bilip.”—1 Korin 2:1-5.
Man i gat gutpela tingting tru em i no larim tingting bilong ol man bilong graun na save bilong ol long mekim ol samting i kamap gutpela i giamanim em. Em i no mekim wok long save bilong em bambai ol man i orait long em o bilong kisim ol gutpela samting bilong graun, nogat, em i givim ol gutpela samting bilong em i go long Man i givim laip na gutpela save long em. (1 Jon 2:15-17) Oltaim em i putim ol samting bilong Kingdom i stap namba wan long i stap bilong em, na em i karim planti kaikai “olsem diwai ol man i planim klostu long wara.” Jehova i mekim gut long em—i no save bilong em yet i mekim—olsem na “olgeta samting em i mekim i save kamap gutpela.”—Song 1:1-3; Matyu 6:33.
Larim Lotu Kristen i Strongim Yu
Pasin tru bilong lotu Kristen i gat bikpela strong, winim ol kain kain save bilong graun. Pasin Kristen i kamapim ol gutpela man na meri marit, ol gutpela pren tru, na ol gutpela wokman—ol i mekim pasin i stret, tingim gut ol narapela man, stap bel isi, na ol i save wok strong. (Kolosi 3:18-23) Na tu, long lotu Kristen ol i lain long toktok gut na skulim man na dispela i helpim ol long pasin bilong toktok gut. (1 Timoti 4:13-15) Olsem na ol Kristen i wok mani, planti taim ol bos bilong ol i laik givim bikpela wok na namba long ol. Tasol kain gutpela samting olsem inap long nogutim yumi sapos yumi no was gut. Bikpela namba na gutpela wok inap makim olsem man i mas mekim bikpela wok moa bilong dispela kampani, na planti taim em bai lusim ol miting Kristen, o em i no gat taim bilong mekim ol samting wantaim famili bilong em.
Long Ostrelia wanpela elda Kristen i gat famili, na em i gat wanpela bisnis inap long em i ken kisim planti mani na ol gutpela samting na biknem. Tasol em i sakim dispela tingting long kisim biknem na mani long dispela taim. Em i tok: “Mi laik lusim bikpela hap taim wantaim famili bilong mi na long wok autim tok. Olsem na mi wantaim meri bilong mi i pasim tok long daunim ol aua mi lusim long mekim wok mani.” Na em i tok moa: “Bilong wanem bai mi wok 5-pela de long olgeta wik sapos mi no gat wok long mekim olsem?” Em i tingting gut pastaim na bihain em i stretim sampela samting long i stap bilong em na nau em inap wok 3 o 4-pela de long wik na lukautim famili bilong em. I no longtaim na em i kisim sampela wok moa bilong spirit, olsem wok insait long komiti bilong lukautim ol haus kibung na long wok bilong lukautim kibung distrik. Savepasin em i bihainim long mekim ol pasin em i strong long en, dispela i mekim na em wantaim famili bilong em i amamas na belgut.
Kisim Stretpela Tingting Long Ol Wok Bilong Kongrigesen
Ol man Kristen i mas wok strong long kisim ol wok insait long kongrigesen. “Sapos man i laik i stap wasman bilong sios, em i laikim gutpela wok.” (1 Timoti 3:1) Olsem ol strong yumi stori pinis long en, bilong kisim wok insait long kongrigesen man i mas redi long mekim wok, na em i mas i gat stretpela tingting. Nogut wanpela brata tasol i mekim planti wok na dispela i mekim na em i lusim amamas bilong em long wok bilong Jehova. Tru tumas, pasin bilong givim bel long mekim wok em samting bilong amamas long en na em i bikpela samting, long wanem, Jehova i no orait long pasin bilong givim hap bel; tasol pasin bilong givim bel long mekim wok i mas kamapim olsem man i stap daun na i “tingting gut na wokabaut.”—Taitus 2:12; KTH 3:15, 16.
Jisas i gat pasin isi, gutpela tingting, na pasin bilong pilim tru tingting bilong ol man, na dispela i mekim na ol man nating i no pret long stap wantaim em. Wankain olsem long nau, ol man i no pret long i stap namel long ol man i gat pasin bilong tingim narapela na mekim gut long ol. Long kongrigesen Kristen, ol elda i gat gutpela pasin na ol narapela inap toktok wantaim ol, ol i olsem “presen” long ol man. Ol i olsem “ples hait ol manmeri i ken i go na hait long en long taim bilong bikpela win na ren. Na bai ol i stap tu olsem wara i ran i go long ples drai na olsem bikpela ston i haitim san long ples drai.”—Efesus 4:8; Aisaia 32:2.
Ol elda i mas skelim taim ol i lusim bilong helpim ol narapela na taim bilong mekim stadi bilong ol yet na tingim tingim long bel, na beten, na autim tok. Ol elda marit i mas lusim hap taim wantaim famili bilong ol, na i bikpela samting long ol i toktok wantaim famili bilong ol.
Ol Meri—Wanpela Gutpela Blesing
Olsem ol gutpela elda, ol meri i strong long ol samting bilong spirit ol tu i helpim wok insait long oganaisesen bilong Jehova. Ol meri i gat pasin bilong tingim ol narapela man—em wanpela pasin Jehova i save laikim na em i kirapim yumi long lukautim dispela pasin. Aposel Pol i tok, no ken “lukautim ol samting bilong yupela tasol. Nogat. Yupela wan wan i mas lukautim ol samting bilong ol arapela manmeri bilong yupela na helpim ol long i stap gut.” (Filipai 2:4) Tasol yumi mas skelim gut pasin bilong “lukautim ol samting bilong ol arapela,” long wanem, i no gat wanpela Kristen i laik “harim tok long ol samting ol arapela manmeri i mekim” o kamap man bilong tok baksait.—1 Pita 4:15; 1 Timoti 5:13.
Ol meri i gat ol narapela gutpela pasin. Ating wanpela meri Kristen i gat gutpela pasin bilong mekim wok long tingting, winim man bilong em. “Gutpela meri” i save pret long Jehova, em i daun long man bilong em na mekim wok long ol gutpela pasin em i gat bilong helpim man bilong em, i no bilong winim em. Man i gat gutpela tingting na pasin daun em bai tingim tru ol gutpela pasin bilong meri bilong em na amamas long ol dispela gutpela pasin; em i no inap bel nogut long em. Em bai strongim meri long mekim gut wok long save bilong em long strongim famili na long helpim ol pikinini long ‘aninit long Jehova,’ olsem meri yet i save mekim. (Sindaun 31:10, 28-30; Stat 2:18) Ol man na meri marit i gat gutpela pasin na pasin daun marit bilong ol i save stap strong na i givim biknem long Jehova.
Daunim Pasin Bilong Subim Narapela
Sapos man i gat strongpela pasin na em i strong long bihainim pasin i stret na mekim laik bilong Jehova, dispela em i gutpela samting sapos em i gat pasin daun na pasin bilong tingim olsem narapela i winim em. Tasol dispela pasin i ken pundaunim man sapos em i laik bosim strong ol narapela o daunim ol. Na i no gutpela sapos dispela pasin i stap insait long kongrigesen Kristen. Ol Kristen i mas stap bel isi wantaim narapela narapela, na ol i mas mekim tu long taim ol i stap wantaim ol elda long kongrigesen.—Matyu 20:25-27.
Ol elda i mas stap bel isi namel long ol yet. Na taim ol i bung wantaim, narapela i no ken subim narapela, nogat; spirit holi i mas stiaim ol taim ol i laik pasim tok long mekim ol samting. Tru tumas, spirit holi inap stiaim wanpela elda namel long ol lain elda, na em inap stiaim tu elda i yangpela o elda em i no man bilong toktok. Olsem na sapos sampela i gat pasin inap daunim narapela, orait maski ol i pilim olsem tingting bilong ol i stret, ol i mas daunim dispela pasin na lain long larim narapela i mekim wok bilong em, na long dispela rot bai ol i “litimapim nem” bilong ol elda wanwok bilong ol. (Rom 12:10) Saveman 7:16 i tok: “No ken strong tumas long bihainim stretpela pasin na long kisim gutpela tingting. Nogut yumi bagarapim yumi yet.”
Jehova, em Man bilong givim “olgeta gutpela samting,” em i save mekim wok long bikpela strong bilong em long stretpela pasin tasol. (Jems 1:17; Lo 32:4) Na em i Tisa bilong yumi! Olsem na yumi ken lain long em na wok strong long kamapim moa yet ol gutpela pasin i stap pinis long skin bilong yumi, o ol strong bilong yumi, na mekim gut wok long ol dispela pasin long pasin sori na pasin daun. Em i gutpela samting tru long yumi stap olsem blesing long ol narapela!
[Ol Piksa long pes 27]
Bilong kamap strong long ol samting bilong spirit, beten na stadi na wetim Jehova i helpim yu
[Piksa long pes 29]
Pasin bilong tingim gut narapela na pasin daun em i gutpela samting tru
[Piksa Kredit Lain long pes 26]
Ol i kisim long The Mariners’ Museum, Newport News, VA