Olsem Jisas, Bel i Kirapim Yu Long Mekim Wok?
“Em i lukim bikpela lain manmeri i stap. Na em i sori tru long ol, long wanem, ol i olsem ol sipsip i no gat wasman. Na em i stat long givim planti tok long ol.”—MAK 6:34.
1. Sampela man na meri i kamapim ol pasin i gutpela tru na i gat wanem as na ol i mekim olsem?
KIRAP long bipo yet na i kam inap nau, planti man i bin kamapim ol pasin i gutpela tru. I gat as na ol i bin mekim olsem. Ol pasin yumi ting i gutpela tru, olsem pasin sori, na pasin bilong mekim gut long ol man, na pasin bilong givim samting, em ol pasin bilong God Jehova na em i save kamapim ol dispela pasin. Na God i wokim ol man i kamap olsem em yet. Em nau, long dispela as planti manmeri i save kamapim ol gutpela pasin bilong God—olsem pasin sori, na mekim gut long ol narapela, na bel sori—wankain olsem planti manmeri i save kamapim olsem ol i gat maus bilong bel. (Stat 1:26; Rom 2:14, 15) Tasol ating yu save pinis, sampela i kamapim kwik ol dispela pasin na sampela i no kamapim kwik.
2. Wanem sampela gutpela wok ol man i save mekim na ating ol i pilim olsem ol i bihainim pasin bilong Krais?
2 Ating yu save long sampela man na meri em ol i save go lukim ol sikman o givim helpim long ol, o helpim ol man em hap skin bilong ol i bagarap, o givim planti samting bilong helpim ol rabisman. Tingim tu ol man em bel sori bilong ol i kirapim ol long mekim bikpela wok long ples bilong ol lepraman o long haus bilong ol pikinini i no gat papamama, o ol man i mekim wok volantia long ol haus sik, o ol man i wok strong long helpim ol refyuji o ol man i no gat ples slip. Ating sampela i pilim olsem ol i bihainim pasin bilong Jisas, em i makim pasin ol Kristen i mas bihainim. Ol Gutnius i tok Krais i bin oraitim ol sikman na givim kaikai long ol man i hangre. (Mak 1:34; 8:1-9; Luk 4:40) Taim Jisas i mekim pasin sori na pasin isi long ol, dispela i kamapim “tingting bilong Krais,” na taim em i mekim olsem, em i bihainim pasin bilong Papa bilong em long heven.—1 Korin 2:16.
3. Bilong kisim stretpela tingting long ol gutpela wok Jisas i mekim, yumi mas skelim wanem ol tok?
3 Tasol i gat wanpela bikpela samting bilong tingting bilong Krais, em planti man long nau i pilim tru pasin sori bilong Jisas ol i no tingim. Yumi ken kisim save long dispela samting long rot bilong skelim gut ol tok bilong Mak sapta 6. Long dispela sapta yumi kisim save olsem ol man i bringim ol sikman i kam long Jisas bilong em i ken oraitim. Na tu, taim Jisas i lukim planti tausen manmeri i kam long em ol i kamap hangre, em i wokim mirakel na givim kaikai long ol. (Mak 6:35-44, 54-56) Oraitim ol sikman na givim kaikai long ol man i hangre ol i kamapim long ples klia gutpela pasin sori bilong Jisas, tasol yu ting ol dispela samting em i nambawan rot bilong Jisas long helpim ol man? Jisas i bihainim pasin bilong Jehova, na olsem wanem yumi inap bihainim gut pasin bilong Jisas long kamapim pasin sori, na mekim gut long ol man, na bel sori long ol?
Helpim Ol Man Long Ol Samting Bilong Spirit
4. Stori long ol samting bilong Mak 6:30-34.
4 Nambawan as na Jisas i sori tru long ol man i olsem: Em i lukim ol i sot long ol samting bilong spirit. Dispela em i nambawan bikpela samting em i mas helpim ol long en, winim ol samting bilong skin. Tingim stori bilong Mak 6:30-34. Samting ol ves hia i stori long en i bin kamap long nambis bilong raunwara Galili, klostu long taim bilong Pasova long yia 32 C.E. Ol aposel i amamas, na i gat as tru bilong dispela samting. Ol i mekim pinis bikpela raun bilong autim tok, na ol i kam long Jisas. Ating ol i laik tokim em long ol wok ol i bin mekim. Tasol planti manmeri i kam bung. Ol i bikpela lain tumas, olsem na Jisas na ol aposel ol i no inap kaikai o malolo. Jisas i tokim ol aposel: “Goan, yumi tasol i go long wanpela hap i no gat man, na bai yupela i ken malolo liklik.” (Mak 6:31) Ol i kalap long wanpela bot, ating long hap bilong Kaperneam, na go long hapsait bilong raunwara Galili, long wanpela hap i no gat man. Tasol dispela bikpela lain manmeri ol i bihainim nambis na ran i go pas. Jisas bai mekim wanem? Yu ting em i kros long em i no inap malolo liklik? Nogat tru!
5. Jisas i gat wanem tingting long bikpela lain manmeri i kam long em? Em i mekim wanem?
5 Taim Jisas i lukim planti tausen manmeri i wetim em i stap, na ol sikman tu, em i bel sori long ol. (Matyu 14:14; Mak 6:44) Mak i stori long samting i kirapim Jisas long sori long ol na samting Em i mekim, olsem: “Em i lukim bikpela lain manmeri i stap. Na em i sori tru long ol, long wanem, ol i olsem ol sipsip i no gat wasman. Na em i stat long givim planti tok long ol.” (Mak 6:34) Tru, Jisas i lukim wanpela bikpela lain i stap, tasol em i lukim narapela samting tu. Em i lukim olsem ol wan wan bilong dispela lain ol i sot long ol samting bilong spirit. Ol i olsem sipsip i lus—ol i no gat wasman bilong stiaim ol i go long kaikai o bilong lukautim ol. Jisas i save ol bikman bilong lotu ol i no gat bel sori liklik. Ol i gat wok long i stap olsem gutpela wasman na tingim gut ol manmeri, tasol ol i tingim ol man nating i olsem pipia lain na ol i no helpim ol long ol samting bilong spirit. (Esekiel 34:2-4; Jon 7:47-49) Jisas bai mekim narapela kain pasin long ol na helpim tru ol. Em i kirap long lainim ol long Kingdom bilong God.
6, 7. (a) Ol Gutnius i kamapim wanem samting em Jisas i tingim i nambawan samting bilong helpim ol man? (b) Wanem samting i kirapim Jisas long autim tok na lainim ol man?
6 Long narapela stori bilong dispela samting, lukim samting Jisas i mekim pastaim na samting em i mekim bihain na i olsem dispela i makim nambawan samting long tingting bilong em. Luk i raitim dispela stori. Luk i wanpela dokta na em i laik ol narapela i ken i stap gut long skin. “Ol planti lain manmeri . . . i bihainim [Jisas] i go. Ol i kam long em, na em i amamas long ol i kam. Em i autim tok bilong kingdom bilong God long ol, na em i mekim orait ol manmeri i gat sik.” (Luk 9:11; Kolosi 4:14) Tru, long sampela stori bilong ol mirakel ol i no stori olsem, tasol long dispela ves, Luk i tok Jisas i mekim wanem samting pastaim? Jisas i lainim ol man.
7 Dispela i stret wantaim tok bilong Mak 6:34. Dispela ves i kamapim klia nambawan samting Jisas i mekim bilong kamapim sori bilong em. Em i skulim ol manmeri, olsem helpim ol long ol samting bilong spirit ol i sot long en. Taim Jisas i kirap mekim wok autim tok, em i tok “Mi mas autim gutnius bilong kingdom bilong God long ol arapela taun tu. God i salim mi na mi kam bilong mekim dispela wok.” (Luk 4:43) Tasol yumi popaia sapos yumi ting Jisas i autim tok bilong Kingdom olsem wanpela wok em i mas mekim, na em i mekim tasol. Em i no mekim olsem. Em i sori tru long ol man na dispela em i wanpela bikpela samting i bin kirapim em long autim gutnius long ol. Nambawan gutpela samting Jisas inap mekim bilong helpim ol man—na ol sikman, na ol man ol spirit nogut i givim hevi long ol, na ol rabisman, na ol man i hangre—i olsem: em i helpim ol long kisim save long tok i tru bilong Kingdom bilong God, na bilip long en, na laikim tru. Dispela tok i tru em i nambawan bikpela samting, long wanem, dispela Kingdom i gat wok long kamapim klia olsem Jehova i Nambawan Bos, na Kingdom bai kamapim ol gutpela samting bilong helpim ol man na ol dispela blesing bai stap oltaim oltaim.
8. Jisas i ting olsem wanem long wok bilong em long autim tok na lainim ol man?
8 Wok bilong Jisas long autim tok bilong Kingdom em i wanpela bikpela as na em i kam long graun. Klostu long pinis bilong wok bilong em hia long graun, Jisas i tokim Pailat: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim. Na olgeta man i bihainim tok tru, ol i save harim tok bilong mi.” (Jon 18:37) Tupela stori i kam paslain long dispela stori i makim olsem Jisas em man bilong pilim tru ol samting long bel—em i tingim tru ol narapela, na ol man i no pret long go toktok wantaim em, na ol man i bilip long em, na bikpela samting moa, em i mekim pasin sori. Sapos tru tru yumi laik save long tingting bilong Krais, orait yumi mas save gut long ol dispela pasin bilong em. Yumi mas save tu olsem, Jisas i putim wok bilong autim tok na lainim ol man i go pas long ol narapela samting na dispela tu em i tingting bilong Krais.
Ol Narapela i Mas Autim Tok
9. Husat ol i mas putim wok bilong autim tok na lainim ol man i go pas long ol narapela wok?
9 Jisas i tingim wok bilong autim tok na lainim ol man em i bikpela samting tru—dispela i kamapim sori bilong em—tasol dispela wok i no bilong Jisas tasol. Em i tokim ol disaipel long bihainim em long ol samting i kirapim em long mekim wok, na long ol samting em i putim i go pas long ol narapela wok, na long ol wok em i mekim. Olsem: Taim Jisas i makim pinis ol 12-pela aposel, ol i mekim wanem? Mak 3:14, 15 i tokim yumi: “Em i makim 12-pela man, bai ol i stap wantaim em, na em i givim nem aposel long ol. Em i laik salim ol i go bilong autim tok bilong God, na em i laik givim strong long ol bilong rausim ol spirit nogut.” Yu lukim dispela samting ol aposel i mas ting i bikpela samting moa?
10, 11. (a) Taim Jisas i salim ol aposel i go, em i tokim ol long mekim wanem? (b) Em i laik bai ol aposel i putim wanem wok i stap olsem nambawan bikpela samting?
10 Bihain, Jisas i givim strong long ol 12-pela aposel long oraitim ol sikman na long rausim ol spirit nogut. (Matyu 10:1; Luk 9:1) Em i salim ol i go long “ol sipsip bilong lain Israel, ol i lus pinis.” Bilong mekim wanem? Jisas i tokim ol: “Yupela go na autim tok olsem, ‘Kingdom bilong heven em i kam klostu pinis.’ Yupela go mekim orait ol sikman, na kirapim ol man i dai pinis, na mekim ol man i gat sik lepra i kamap klin, na rausim ol spirit nogut i stap long ol manmeri.” (Matyu 10:5-8; Luk 9:2) Orait, ol i mekim wanem? “Ol disaipel i go, na [1] ol i autim tok long ol manmeri olsem, ‘Yupela i mas tanim bel.’ Na [2] ol i rausim planti spirit nogut i stap long ol manmeri, na ol i putim wel long planti sikman na mekim ol i kamap orait.”—Mak 6:12, 13.
11 Sampela stori i no putim wok bilong lainim ol man i go pas, olsem na taim yumi tingim ol dispela ves yumi skelim pinis i tok long narapela samting i bihainim narapela samting, yu ting mipela i mekim bikpela tok tumas long samting ol i putim i go pas na long samting i kirapim ol long mekim wok? (Luk 10:1-9) Nogat, long wanem, planti taim ol stori i kolim wok bilong autim tok paslain long wok bilong oraitim ol sikman—i no long wan wan taim tasol. Tingim dispela samting i bin kamap. Paslain liklik long taim Jisas i salim ol 12-pela aposel i go, em i lukim ol bikpela lain manmeri i stap nogut tru na em i sori long ol. Baibel i tok: “Jisas i go raun long olgeta taun na ples. Em i skulim ol manmeri insait long ol haus lotu bilong ol. Em i autim gutnius bilong kingdom bilong God, na em i mekim orait olgeta kain sik i stap long bodi bilong ol. Em i lukim ol bikpela lain manmeri, na em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman. Olsem na em i tokim ol disaipel bilong en olsem, ‘Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.’ ”—Matyu 9:35-38.
12. Ol mirakel Jisas na ol aposel i mekim inap mekim wanem narapela wok moa?
12 Taim ol aposel i stap wantaim em, ol i kisim hap tingting bilong Krais. Ol i pilim olsem bilong sori tru long ol man, ol i mas mekim tu wok bilong autim tok na lainim ol man long tok bilong Kingdom—dispela em i wanpela bikpela wok tru ol i mas mekim. Olsem na gutpela wok bilong helpim ol man long skin, olsem oraitim ol sikman, dispela i mekim narapela wok tu. Tru, oraitim ol sikman na wokim mirakel bilong kamapim kaikai, ating dispela i pulim sampela i kam long Jisas. (Matyu 4:24, 25; 8:16; 9:32, 33; 14:35, 36; Jon 6:26) Tasol narapela samting dispela wok bilong helpim ol man long skin em i mekim i olsem: Em i kirapim ol man long luksave olsem Jisas em i Pikinini bilong God na “dispela profet” Moses i bin tok God bai salim i kam.—Jon 6:14; Lo 18:15.
13. Lo 18:18 i tok profet olsem dispela man i kamap “profet” em bai mekim wanem wok?
13 Bilong wanem i bikpela samting Jisas em i “dispela profet”? Orait, Moses i tok dispela man i mas mekim wanem bikpela wok? Yu ting “dispela profet” bai kisim biknem long rot bilong wokim mirakel na oraitim ol sikman na long kamapim kaikai bilong helpim ol man i hangre? Lo 18:18 i tok profet: “Bai mi makim wanpela man namel long ol manmeri yet, na bai em i kamap profet olsem yu [Moses]. Na bai mi givim tok bilong mi long em, na taim mi tokim em long autim wanpela tok long ol manmeri, orait bai em i autim.” Ol aposel i wok long kisim pasin bilong sori na kamapim dispela pasin, na ol i save tu olsem ol i mas bihainim tingting bilong Krais long wok bilong autim tok na lainim ol man. Em nambawan gutpela samting ol inap mekim bilong helpim ol man. Long dispela rot ol sikman na ol rabisman inap kisim ol samting bilong helpim ol inap oltaim oltaim—i no ol samting bilong helpim ol inap sotpela taim tasol o sampela kaikai ol i kisim wanpela o tupela taim tasol, nogat.—Jon 6:26-30.
Wok Long Kisim Tingting Bilong Krais Long Nau
14. Olsem wanem tingting bilong Krais yumi holim em i insait long wok bilong yumi long autim tok?
14 Yumi save tingting bilong Krais i no samting bilong Jisas na ol disaipel bilong pastaim tasol, em aposel Pol i toktok long ol olsem: “Tingting bilong Krais i stap long yumi.” (1 Korin 2:16) Na yumi save pinis yumi yet i gat wok long autim gutnius na kamapim ol disaipel. (Matyu 24:14; 28:19, 20) Tasol i gutpela yumi tingim ol samting i save kirapim yumi long mekim dispela wok. Yumi no ken mekim olsem wanpela wok yumi mas mekim tasol, nogat. Pasin bilong laikim tru God, dispela em i wanpela bikpela as na yumi autim tok, na sapos yumi bihainim tru pasin bilong Jisas, pasin bilong bel sori bai kirapim yumi long autim tok na lainim ol man.—Matyu 22:37-39.
15. Bilong wanem pasin bilong bel sori i insait long wok bilong yumi long autim tok?
15 Tru, sampela taim i hatwok long bel sori long ol man ol i no wanbilip bilong yumi, na i hatwok moa yet taim yumi bungim ol man i no givim bel long harim tok, o ol i sakim tok o birua long wok bilong yumi. Tasol sapos yumi lusim pasin bilong laikim tru ol man na bel sori long ol, yumi inap lusim wanpela bikpela samting i kirapim yumi long mekim wok Kristen bilong autim tok. Orait, olsem wanem yumi inap kisim pasin bilong bel sori? Yumi ken wok long tingim ol man wankain olsem Jisas i save tingim ol, em i lukim ol “i stap nogut tru, olsem ol sipsip i no gat wasman.” (Matyu 9:36) Dispela tok i stret long planti man long nau, a? Ol wasman bilong lotu giaman i no bin lukautim ol gut na ol i stap olsem aipas long ol samting bilong spirit. Olsem na ol i no save long ol gutpela tok i stap long Baibel bilong soim rot long ol, na long Paradais em Kingdom bilong God bai kamapim klostu nau long graun. Ol i karim planti hevi—olsem hevi bilong i stap rabis, kros insait long famili, sik, na dai—na ol i no save long ol gutpela samting Kingdom bai mekim. Yumi gat wanpela samting ol i mas kisim save long en: gutpela tok bilong Kingdom bilong God i kamap pinis long heven, na dispela tok inap helpim man long abrusim bagarap na i stap oltaim!
16. Bilong wanem yumi mas laik long autim gutnius long ol narapela?
16 Olsem na taim yu tingim ol samting bilong spirit ol man i mas kisim, ating bel i save kirapim yu long wok strong long tokim ol long ol gutpela samting God i laik mekim, a? Tru tumas, wok bilong yumi em i wanpela wok sori. Taim yumi pilim tru hevi bilong ol man olsem Jisas i bin pilim, dispela bai kamap klia long nek na long pes bilong yumi, na long pasin bilong yumi long lainim ol. Olgeta dispela samting bai helpim ol man long laikim ol tok yumi autim, em ol man i gat stretpela bel inap long ol i ken “kisim laip i stap gut oltaim.”—Aposel 13:48.
17. (a) Wanem sampela samting yumi ken mekim bilong kamapim pasin bilong laikim tru ol narapela na bel sori long ol? (b) Bilong wanem yumi no ken ting yumi ken mekim wanpela wok na maski long narapela wok, olsem helpim ol man long ol samting bilong skin na maski mekim wok bilong autim tok?
17 Tasol pasin bilong laikim tru ol narapela na bel sori long ol, dispela i mas kamap long olgeta samting yumi mekim. Yumi mas mekim gut long ol taranguman, ol sikman, na ol rabisman—olsem mekim ol samting yumi inap mekim bilong helpim ol. Yumi ken mekim tu sampela tok na wok bilong mekim gut bel bilong ol man em wanpela long famili bilong ol i dai pinis. (Luk 7:11-15; Jon 11:33-35) Tasol yumi no ken larim ol dispela wok bilong pasin sori, na mekim gut long ol man, na bel sori long ol, i kamap olsem nambawan bikpela wok yumi mekim, nogat. Ol dispela gutpela pasin bilong God inap kirapim yumi long mekim narapela wok, em wok Kristen bilong autim tok na lainim ol man, na dispela wok inap helpim ol man inap longpela taim moa. Tingim dispela tok Jisas i mekim long ol bikman bilong lotu Juda: “Yupela saveman bilong lo na yupela Farisi, yupela lukaut. Yupela i man bilong tupela maus. Olgeta liklik sayor samting bilong gaden em yupela i save tilim long 10-pela hap na givim wanpela hap long God. Tasol yupela i lusim pinis olgeta bikpela hap tok bilong lo, olsem tok bilong stretpela pasin bilong skelim man na pasin bilong marimari na pasin bilong bilip. Mobeta yupela i strong long bihainim ol tok bilong ol dispela bikpela lo, na yupela i no lusim ol arapela lo tu.” (Matyu 23:23) Jisas i save i gat tupela wok bilong mekim, tasol em i no ting em i ken mekim wanpela wok na maski long narapela wok—olsem helpim ol man long ol samting bilong skin na maski lainim ol long ol samting bilong spirit bilong helpim ol long kisim laip oltaim, nogat. Jisas i mekim dispela tupela wok. Tasol ol samting i kamapim klia olsem, em i putim wok bilong lainim ol man i go pas, long wanem, ol gutpela samting i kamap long dispela em inap helpim ol man i go inap oltaim oltaim.—Jon 20:16.
18. Yumi bin stori long tingting bilong Krais na dispela i mas kirapim yumi long mekim wanem?
18 Yumi ken tenkyu long Jehova i bin kamapim tingting bilong Krais long yumi! Long rot bilong ol Gutnius, yumi inap save gut long nambawan man tru i bin i stap long graun—yumi inap save long tingting bilong em, ol samting em i pilim tru long bel, ol pasin bilong em, ol wok em i mekim, na ol samting em i putim i go pas long ol narapela samting. Em wok bilong yumi long kaunim, na tingim, na bihainim ol tok Baibel i kamapim long Jisas. Tingim: Sapos yumi laik bihainim tru pasin bilong Jisas, pastaim yumi mas lain long tingim na pilim na skelim ol samting olsem Jisas yet i bin mekim. Olsem na yumi mas tingting strong long kisim na kamapim tingting bilong Krais. I no gat narapela gutpela rot yumi ken bihainim long wokabaut bilong yumi, na long pasin yumi mekim long ol narapela, na long samting yumi na ol narapela i mekim bilong i go klostu long dispela man em Jisas i bin bihainim stret, em gutpela God bilong yumi, Jehova.—2 Korin 1:3; Hibru 1:3.
Bai Yu Bekim Olsem Wanem?
• Baibel i tok wanem long ol samting planti taim Jisas i mekim bilong helpim ol man i sot?
• Taim Jisas i givim wok long ol disaipel, em i makim wanem wok i nambawan?
• Olsem wanem yumi inap kamapim “tingting bilong Krais” long ol wok yumi mekim?
[Piksa i karamapim pes olgeta long pes 23]
[Piksa long pes 24]
Wanem nambawan gutpela samting ol Kristen i ken mekim bilong helpim ol narapela?