‘God, Yu Mas Salim Lait Bilong Yu i Kam’

“Yu mas salim tok tru na lait bilong yu i kam na soim rot long mi.”​—⁠SONG 43:⁠3.

1. Olsem wanem Jehova i save kamapim klia ol laik bilong em?

JEHOVA i save kamapim laik bilong em long ol wokman bilong em, na dispela i makim olsem em i save tingim tru yumi. Em i no save kamapim olgeta samting bilong tok i tru long wanpela taim tasol, olsem wanpela bikpela lait tru i kam sutim ai bilong yumi. Em i save givim lait long yumi isi isi tasol. I stap bilong yumi i olsem wanpela longpela rot yumi wokabaut long en. Yumi ken tingim wanpela man i laik wokabaut long wanpela longpela rot i go long ol maunten samting. I no tulait yet na em i kirap wokabaut, na i olsem em i no inap lukim wanpela samting. Orait tulait i bruk na san i wok long kamap na nau em inap lukim sampela samting. Tasol ol narapela samting em i lukim hap hap tasol. Orait taim san i wok yet long kam antap, em inap lukluk i go longwe liklik. Na i wankain tu long lait bilong spirit Jehova i save givim long yumi. Em i larim yumi i kisim gut sampela save, na bihain em i givim sampela save moa long yumi, i go i go olsem. Pikinini bilong God, em Jisas Krais, em i bin givim lait bilong spirit long ol man long wankain pasin. Orait nau yumi ken stori long olsem wanem Jehova i bin givim lait long lain bilong em bilong bipo, na olsem wanem em i save mekim long nau.

2. Olsem wanem Jehova i bin givim lait long lain bilong em paslain long taim bilong ol Kristen?

² Ol man bilong raitim Song 43, ating em ol tumbuna pikinini bilong Kora. Ol i bilong lain Livai, olsem na ol i gat wok long skulim ol Israel long Lo bilong God. (Malakai 2:⁠7) Tru, Jehova yet em Nambawan Tisa bilong ol, na ol i bilip olsem em i As bilong olgeta gutpela tingting na save. (Aisaia 30:20) Man bilong raitim Song i beten olsem: “God . . . yu mas salim tok tru na lait bilong yu i kam na soim rot long mi.” (Song 43:​1, 3) Taim ol Israel i stap gut long Jehova, em i save skulim ol long ol rot bilong em. Sampela handet yia bihain, Jehova i givim lait na tok i tru long ol i narapela kain tru. God i mekim olsem taim em i salim Pikinini bilong em i kam long graun.

3. Ol tok Jisas i skulim ol man long en, olsem wanem dispela i olsem wanpela traim bilong ol Juda?

³ Taim Krais Jisas i stap olsem man long graun, em i stap olsem “lait bilong graun.” (Jon 8:​12) Long rot bilong “planti tok piksa” em i bin skulim ol long ol nupela nupela samting. (Mak 4:⁠2) Em i tokim Pontius Pailat: “Kingdom bilong mi em i no bilong dispela graun.” (Jon 18:36) Dispela tok em i wanpela nupela samting long dispela man bilong Rom, na yumi save em i nupela samting long ol Juda i save litimapim ples bilong ol yet, long wanem, ol i ting Mesaia bai daunim Gavman Rom na helpim Israel long kamap strong gen olsem bilong pastaim. Jisas i givim lait bilong Jehova long ol man, tasol ol hetman Juda i no amamas long ol tok bilong em, long wanem, “ol i laikim tumas bai ol man i litimapim nem bilong ol. Ol i no laik bai God i litimapim nem bilong ol.” (Jon 12:​42, 43) Planti bilong lain Juda ol i laik holimpas tok bilong ol man, na ol i no laik kisim lait bilong spirit na tok i tru i kam long God.​​—⁠Song 43:3; Matyu 13:⁠15.

4. Olsem wanem yumi save, ol disaipel bilong Jisas ol bai wok yet long kisim save?

⁴ Tasol i gat wan wan man na meri ol i gat stretpela bel na ol i amamas long kisim tok i tru em Jisas i skulim ol man long en. Isi isi ol i wok long kisim save long ol laik bilong God. Tasol taim i kam klostu long Tisa bilong ol bai lusim graun, na i gat planti samting ol i mas lain yet long en. Jisas i tokim ol: “Mi gat planti tok moa mi laik givim yupela, tasol yupela i no inap kisim nau.” (Jon 16:12) Yes, ol disaipel bai wok yet long kisim save long as bilong tok i tru bilong God.

Lait i Wok Long Kamap Yet

5. Wanem askim i bin kamap long taim bilong ol aposel? Husat ol i gat wok long stretim dispela tok?

⁵ Taim Jisas i dai na kirap bek pinis, lait i kam long God em i lait strong, winim bilong pastaim. Long wanpela driman Jehova i givim long Pita, Jehova i kamapim olsem, kirap long dispela taim, ol man bilong ol narapela lain i no bin katim skin ol tu inap kamap disaipel bilong Krais. (Aposel 10:​9-​17) Man! Dispela em i bikpela samting tru Jehova i kamapim long ples klia! Tasol bihain i gat wanpela askim i kamap. Jehova i laik bai ol dispela man bilong ol narapela lain i mas katim skin taim ol i kamap Kristen pinis o nogat? Jehova i no bin bekim dispela askim long driman em i bin givim long Pita, na i gat bikpela tok pait bilong dispela i kamap namel long ol Kristen. Ol i mas stretim dispela tok, nogut dispela i bagarapim pasin wanbel bilong ol. Olsem na long Jerusalem “ol aposel na ol hetman ol i bung bilong stretim dispela tok.”​​—⁠Aposel 15:​1, 2, 6.

6. Taim ol aposel na hetman i skelim pinis dispela askim i bin kamap long pasin bilong katim skin, nau ol i mekim wanem?

⁶ Ol lain i stap long dispela bung, olsem wanem ol inap save long laik bilong God long ol bilipman bilong ol narapela lain? Jehova i no salim wanpela ensel bilong i stap olsem siaman bilong bosim ol toktok i kamap, na em i no givim driman long ol man i stap long dispela bung. Tasol i no olsem ol aposel na hetman i no gat wanpela samting bilong stiaim tingting bilong ol. Ol i skelim gut ol tok bilong sampela Juda Kristen em ol i bin lukim pasin God i kirap pinis long mekim long ol man bilong ol narapela lain, olsem em i bin kapsaitim spirit holi bilong em i kam daun long ol man bilong ol narapela lain i no bin katim skin. Na tu, ol i wok long skelim gut ol tok bilong Buk bilong God bilong stiaim tingting bilong ol. Olsem na disaipel Jems i kamapim wanpela tok, as bilong en em wanpela ves bilong Baibel i givim sampela save long em. Taim ol i tingim tingim ol dispela tok, laik bilong God i kamap klia. Ol man bilong ol narapela lain ol i no gat wok long katim skin na bai Jehova i ken orait long ol. Em nau, ol aposel na hetman ol i no lusim taim​—⁠ol tok ol i pasim, kwiktaim ol i raitim long pas na bai dispela tok i ken stiaim ol wanlain Kristen bilong ol.​​—⁠Aposel 15:​12-​29; 16:⁠4.

7. Olsem wanem yumi ken tok, ol Kristen long taim bilong ol aposel ol i bin wok long kisim sampela save moa?

⁷ Ol bikman bilong lotu Juda ol i holimpas tok bilong ol tumbuna bilong ol, tasol planti Juda Kristen i no mekim olsem​—⁠taim ol i kisim dispela nupela save long laik bilong God long ol man bilong ol narapela lain, ol i amamas, maski ol i mas senisim sampela tingting bilong ol long ol dispela lain. Jehova i lukim dispela pasin daun bilong ol na em i mekim gut long ol, olsem na “bilip bilong ol manmeri bilong ol sios i kamap strong moa, na namba bilong ol i go bikpela moa long olgeta de.”​​—⁠Aposel 15:31; 16:⁠5.

8. (a) Olsem wanem yumi save, i gat sampela lait moa i mas kamap bihain long yia 100 samting? (b) Wanem sampela bikpela askim nau bai yumi skelim?

⁸ Long taim bilong ol aposel, lait bilong spirit i wok long kamap yet. Tasol Jehova i no bin kamapim klia olgeta wan wan samting bilong laik bilong em long ol Kristen bilong pastaim, nogat. Aposel Pol i bin tokim ol wanbilip olsem: “Nau yumi save hap hap tasol long ol samting bilong God. I olsem yumi lukim ol long glas tasol.” (1 Korin 13:12) Long bipo, ol glas bilong lukluk i no klia tumas. Olsem na pastaim lait bilong spirit i no lait strong. Taim ol aposel i dai pinis, inap sotpela taim dispela lait i go liklik, tasol long taim bilong yumi, save bilong Baibel i kamap bikpela tru. (Daniel 12:​4, NW ) Long nau, olsem wanem Jehova i save givim lait, olsem save, long lain bilong em? Na taim em i givim sampela save moa long yumi long as bilong ol tok bilong Baibel, yumi mas mekim wanem?

Lait i Wok Long Kamap Strong Moa

9. Ol Sumatin Bilong Baibel bilong pastaim ol i bin bihainim wanem narapela kain pasin bilong stadi long Baibel na em i bin helpim gut ol?

⁹ Kirap long yia 1870 samting, em namba wan taim lait i kamap strong liklik, taim wanpela liklik lain man na meri Kristen i kirap na stadi strong long ol tok bilong Baibel. Ol i kisim wanpela gutpela pasin bilong stadi long Baibel. Wanpela bai kamapim wanpela askim, na nau dispela lain bai skelim gut ol narapela ves bilong Baibel i toktok long dispela samting. Orait taim ol i ting wanpela ves i pait wantaim narapela ves, ol dispela Kristen i gat gutpela bel ol i wok strong long kisim save long olsem wanem tupela ves i stret wantaim. Ol dispela Sumatin Bilong Baibel (em nem bilong ol Witnes Bilong Jehova long dispela taim bipo) ol i no olsem ol bikman bilong lotu long taim bilong ol, nogat. Ol i strong long larim Baibel i stiaim ol, na i no ol tok o bilip ol man yet i kamapim, nogat. Taim ol i skelim gut olgeta tok bilong Baibel long wanpela samting ol i laik save long en, orait ol tingting ol i kisim long dispela, ol i raitim long buk. Long dispela rot ol i stretim tingting bilong ol long planti as bilip bilong Baibel.

10. Charles Taze Russell i bin raitim wanem ol buk bilong helpim ol man long stadi long Baibel?

¹⁰ Wanpela strongpela Sumatin Bilong Baibel em Charles Taze Russell. Em i bin raitim 6-pela buk nem bilong ol em Studies in the Scriptures, ol i bilong helpim ol man long stadi long Baibel. Brata Russell i gat tingting long raitim namba 7 buk, em bai kamapim klia ol tok bilong Buk Esekiel na Buk Kamapim Tok Hait long Baibel. Em i bin tok: ‘Taim mi painim pinis save, bai mi raitim Buk Namba Seven.’ Tasol em i tok moa olsem: ‘Sapos Bikpela i givim save long narapela man, orait em yet i ken raitim.’

11. Olsem wanem yumi ken tok, taim God i bin makim, dispela i poroman wantaim ol save yumi kisim long laik bilong God?

¹¹ Dispela tok bilong C. T. Russell i kamapim klia wanpela bikpela samting long save bilong yumi long kisim gut ol tok bilong sampela ves bilong Baibel​—⁠i gat taim stret bilong kisim dispela save. Brata Russell i save, em i no inap subim lait long kam long Buk Kamapim Tok Hait, wankain olsem man bilong wokabaut em i no inap grisim san long kam antap hariap na i no taim yet bilong mekim olsem.

Kamap Klia Long Taim God Yet i Makim

12. (a) Wanem taim yumi inap kisim gut as bilong ol tok profet? (b) Wanem samting i soim yumi olsem, long taim God yet i bin makim, long dispela taim tasol yumi inap kisim gut as bilong ol tok profet bilong Baibel? (Lukim tok i stap long sta daunbilo long han sut.)

¹² Bihain long taim Jisas i dai na kirap bek, long dispela taim tasol ol aposel i bin kisim gut as bilong planti tok profet i toktok long Mesaia. Na olsem tasol ol Kristen bilong nau i save kisim gut as bilong ol tok profet bilong Baibel taim truim bilong en i kamap pinis. (Luk 24:​15, 27; Aposel 1:​15-​21; 4:​26, 27) Buk Kamapim Tok Hait em buk i gat ol tok profet long en, olsem na yumi ken ting yumi bai kisim gut as bilong ol dispela tok profet taim ol samting ol i tok profet long en i kamap pinis. Olsem: C. T. Russell i no inap kisim gut insait bilong tok piksa bilong dispela retpela wel animal em Kamapim Tok Hait 17:​9-​11 i stori long en, long wanem, ol oganaisesen dispela wel animal i makim, olsem Lig ov Nesen na Yunaitet Nesen, ol i no bin stap long taim bilong em​—⁠ol i kamap bihain long taim em i dai pinis.a

13. Taim lait i kamap long wanpela tok bilong Baibel, sampela taim wanem samting i save kamap?

¹³ Taim ol Kristen bilong pastaim i bin kisim save olsem ol man bilong ol narapela lain i no bin katim skin ol inap kamap wanbilip bilong ol, dispela i kamapim nupela askim long ol man bilong ol narapela lain i mas katim skin o nogat. Dispela i mekim na ol aposel na hetman i kirap long skelim gen dispela bikpela tok long pasin bilong katim skin. Na i wankain tu long nau. Taim ol i kisim bikpela lait long wanpela tok bilong Baibel, sampela taim ol wokman God i bin makim, em “wokboi i gat gutpela tingting,” ol i save kirap na skelim gen sampela tok i wankain liklik, olsem yumi lukim long samting i bin kamap i no longtaim i go pinis na nau bai yumi stori long en.​​—⁠Matyu 24:⁠45.

14-16. Taim lait i kamap na i stretim tingting bilong yumi long tempel spirit, dispela i bin mekim wanem long save bilong yumi long tok bilong Esekiel sapta 40 i go inap 48?

¹⁴ Long 1971 ol i bin wokim wanpela buk i kamapim insait bilong tok profet bilong Esekiel (“The Nations Shall Know That I Am Jehovah”​​—⁠How?) Wanpela sapta long dispela buk i stori liklik long driman bilong Esekiel long wanpela tempel. (Esekiel, sapta 40-48) Long dispela taim ol i mekim bikpela tok long olsem wanem dispela driman bilong Esekiel long tempel bai kamap tru long nupela taim bai kamap bihain.​​—⁠2 Pita 3:​13.

¹⁵ Tasol tupela stori i kamap long Wastaua bilong Disemba 1, 1972, i givim narapela save long yumi long driman bilong Esekiel. Ol i stori long bikpela tempel spirit em aposel Pol i toktok long en long Hibru sapta 10. Wastaua i tok, Rum Tambu na ples bung i stap insait liklik long banis bilong tempel spirit em i makim i stap bilong dispela lain God i bin makim taim ol i stap yet long graun. Sampela yia bihain, taim ol i skelim gen tok bilong Esekiel sapta 40 i go inap 48, ol i kisim save olsem dispela tempel Esekiel i bin lukim long driman em i wok i stap long nau, wankain olsem tempel spirit i wok i stap long nau. Em i wok i stap olsem wanem?

¹⁶ Long driman bilong Esekiel, em i lukim ol pris i wokabaut insait long ol ples bung bilong tempel taim ol i mekim wok bilong helpim ol lain bilong Israel i no bilong lain pris. Yumi ken save, ol dispela pris i makim “ol pris bilong lain bilong king,” em ol wokman bilong Jehova em i bin makim ol long spirit holi. (1 Pita 2:⁠9) Tasol long Taim Bilong Wan Tausen Yia Bilong Krais i Stap King, bai ol i no ken mekim wok pris long bikpela ples bung bilong tempel i stap long graun. (KTH 20:⁠4) Long bikpela hap bilong dispela taim, o long dispela taim olgeta, dispela lain God i bin makim ol bai mekim wok bilong God insait long Rum Tambu Tru bilong tempel spirit, em “heven stret.” (Hibru 9:24) Ol pris i bin go i kam insait long banis bilong tempel bilong Esekiel, olsem na yumi ken save olsem truim bilong dispela driman i wok long kamap long nau, taim sampela bilong dispela lain God i bin makim ol i stap yet long graun. Olsem na Wastaua bilong Mas 1, 1999 i kamapim nupela tingting ol i bin kisim long dispela driman bilong Esekiel. Em nau, i kam inap long pinis bilong 1999, lait bilong spirit i bin kamapim klia tok profet bilong Esekiel.

Amamas Long Stretim Sampela Tingting

17. Taim yu kisim save long tok i tru, yu bin stretim wanem ol tingting bilong yu? Dispela i bin helpim yu olsem wanem?

¹⁷ Ol man i laik kisim save long tok i tru ol i mas orait long “kalabusim olgeta tingting . . . , bilong mekim tingting bilong ol i bihainim laik bilong Krais.” (2 Korin 10:⁠5) Tru, sampela taim i hatwok long mekim olsem, na i hatwok moa sapos sampela tingting i pas strong long bel bilong yumi. Olsem: Taim yu no kisim save yet long tok i tru bilong God, ating yu bin amamas long mekim bung o kaikai wantaim famili bilong yu long sampela bikpela de bilong lotu. Orait taim yu kirap stadi long Baibel, yu save olsem ol bilip haiden i as bilong ol dispela bung. Pastaim ating yu no amamas tumas long bihainim ol dispela tok yu bin lainim. Tasol bihain, pasin bilong yu long laikim tru God i strong moa long bel bilong yu, winim laik bilong yu long ol dispela bikpela de bilong lotu, olsem na yu lusim pasin bilong mekim ol bung em God i no amamas long en. Em nau, taim yu mekim olsem, Jehova i mekim gut long yu, a?​​—⁠Skelim wantaim Hibru 11:⁠25.

18. Taim ol i kamapim klia as bilong wanpela tok i tru bilong Baibel, yumi mas ting olsem wanem long dispela?

¹⁸ Taim yumi mekim ol samting long pasin God i laikim, dispela i save helpim yumi. (Aisaia 48:​17, 18) Olsem na taim ol i kamapim klia as bilong sampela ves bilong Baibel em pastaim yumi no bin kisim gut, yumi mas amamas long tok i tru i wok long kamap klia moa! Na tru tumas, taim yumi wok long kisim dispela lait, olsem save, dispela i makim olsem yumi stap long stretpela rot. Dispela em i “rot bilong ol stretpela man,” na em i “lait olsem san i kamap long moningtaim, na lait i wok long kamap strong moa, inap long belo.” (Sindaun 4:18) Tru, long nau yumi save “hap hap tasol” long sampela samting bilong laik bilong God. Tasol long taim God yet i makim, bai yumi lukim tok i tru i kamap ples klia olgeta, sapos yumi wokabaut yet long dispela “rot.” Tasol nau long dispela taim yumi mas amamas long ol tok i tru Jehova i mekim i kamap klia pinis, na yumi wet long kisim lait long sampela tok i tru moa em yumi no klia gut yet long en.

19. Wanem wanpela rot bilong kamapim olsem yumi laikim tumas tok i tru?

¹⁹ Orait yumi ken mekim wanem bilong kamapim olsem yumi laikim tru dispela lait? Wanpela rot, em yumi mas kaunim Baibel long olgeta taim​—⁠olsem long olgeta de sapos yumi inap. Olsem wanem? Yu bin makim hap taim bilong kaunim Baibel na yu mekim long olgeta taim? Nius Wastaua na Kirap! tu i gat planti gutpela kaikai bilong spirit yumi ken amamas long kisim. Na yumi ken tingim tu ol buk, buklet, na ol narapela samting ol i bin wokim bilong helpim yumi. Na olsem wanem long ol stori i save kamap long yiabuk bilong ol Witnes Bilong Jehova long wok bilong autim tok bilong Kingdom, em ol stori i save strongim bel bilong yumi?

20. Olsem wanem lait na tok i tru i kam long Jehova i poroman wantaim pasin bilong i go long ol miting Kristen?

²⁰ Tru tumas, Jehova i bin mekim ol samting i kamapim klia olsem em i harim pinis dispela beten i stap long Song 43:​3, em i tok: “Yu mas salim tok tru na lait bilong yu i kam na soim rot long mi, bai mi go stret long Saion, em maunten bilong yu yet, na bai mi go long dispela haus yu save stap long en.” Olsem wanem? Yu save amamas long lotuim Jehova wantaim bikpela lain manmeri tru? Ol tok bilong God ol i save skulim yumi long en long ol miting bilong yumi em i wanpela bikpela rot bilong Jehova long givim lait long yumi long nau. Orait yumi ken mekim wanem na bai yumi amamas moa long ol miting Kristen? Bai yumi toktok long dispela samting long stori i kamap bihain long dispela, na mipela laik bai yu tingim gut ol dispela tok.

[Futnot]

Yu Inap Bekim?

• Bilong wanem isi isi Jehova i save soim yumi long ol laik bilong em?

• Olsem wanem ol aposel na hetman long Jerusalem i bin stretim bikpela tok i bin kamap long pasin bilong katim skin?

• Ol Sumatin Bilong Baibel bilong pastaim ol i bin kisim wanem pasin bilong stadi long Baibel? Olsem wanem dispela pasin i narapela kain?

• Stori long olsem wanem God i save kamapim klia lait bilong spirit long taim em yet i makim.

[Piksa long pes 12]

Charles Taze Russell i save, lait bai kamap long Buk Kamapim Tok Hait long taim God yet i makim