Yu Mas Save Long Wanem Samting Bilong Wok Marila?

I HATWOK long kolim stret wanem ol samting i insait long wok marila bilong nau, long wanem, ol man i wokim marila ol i narapela narapela kain. Ol i no gat wanpela bos samting, o wanpela bilip em olgeta i bihainim, o wanpela buk holi bilong mekim ol i stap wanbel long bilip. Na tu, ol i gat narapela narapela kain pasin bilong mekim dispela wok, na ol i no stap olsem wanpela lain i save wok wantaim, na ol i no gat wankain tingting long wanem god ol i mas daun long en. Wanpela meri bilong raitim buk em i tok: ‘I gat kain kain wok posin marila samting, na ol man yet ol inap makim wanem kain tingting ol i laik bihainim long mekim dispela wok.’ Narapela meri i tok: “Planti haiden bilong nau ol i tok pait long klostu olgeta samting.”

Planti ol i no wari long ol dispela tok ol man i no wanbel long en. Wanpela buk bilong ol marilameri i tok: ‘Taim yu kisim kain kain save i pait wantaim, skelim gut dispela save na makim rot yu laik bihainim. Larim tingting bilong yu i stiaim yu. O yumi ken tok, skelim ol buk i stori long wok marila samting na makim rot yu pilim em i stret.’

Ol man i luksave olsem wanpela tok em tok i tru o nogat, ol i tingting planti long ol dispela tok i save pait wantaim. Tok i tru i gat as bilong en, na em i samting tru. Maski man i pilim o bilip olsem wanpela tok em i tru, i no olsem dispela tok i tru. Olsem: Long bipo ol dokta i bilip olsem ol inap oraitim sik numonia sapos ol i kisim kakaruk i stap laip yet na katim i go long tupela hap, na ol i putim dispela tupela hap antap long bros bilong sikman. Ating planti sikman i bilip tru olsem dispela samting bai oraitim sik bilong ol. Tasol ol samting ol i bilip na wet long en i no stret wantaim stretpela save i gat as bilong en​—⁠kain pasin olsem i no save oraitim sik numonia. Ol manmeri yet i no kamapim tok i tru​—⁠ol i traim long kisim save long en.

Baibel i tok, em i kamapim tok i tru bilong ol samting bilong spirit. Taim Krais Jisas i stap long graun, em i beten na tokim Papa bilong em olsem: “Tok bilong yu i tru olgeta.” (Jon 17:17) Aposel Pol i tok: “Spirit bilong God yet i bin kamapim olgeta tok i stap long buk bilong God.” (2 Timoti 3:16) Ol man i save wokim marila samting, planti ol i no wanbel long dispela tok. Bilong painim samting bilong stiaim ol, ol i save skelim ol stori nating bilong ol man, na ol lotu bilong bipo, na ol stori nating bilong taim ol man bai go long ol narapela planet samting. Tasol i stret long skelim tok bilong Baibel tu, a? Long olgeta hap ol man i save em i wanpela buk holi. Na tu, em i wanpela olpela buk tru i stap yet na i gat ol tok bilong lotu. Ol i bin raitim Baibel insait long 1,600 yia, tasol olgeta tok bilong en i stret wantaim. Nau yumi ken skelim tok bilong Baibel wantaim sampela bilip bilong ol man bilong nau, em ol i save laikim wok marila samting.

Husat i Stap Long Ples Bilong Ol Spirit?

Wanpela bikpela askim bilong helpim man long kisim save long ol samting bilong spirit em olsem: Husat i stap long ples bilong ol spirit? Planti marilameri bilong nau ol i lotuim diwai o maunten samting, o ol i bilip long planti god. Sampela ol i lotuim wanpela kain mama god i olsem tripela meri​—⁠yangpela meri, mama, na lapun meri​—⁠na i makim ol bikpela hap bilong i stap bilong yumi man. Dispela mama god i prenim wanpela god i gat kom. Sampela narapela marilameri ol i save lotuim wanpela god man na god meri wantaim. Wanpela man bilong raitim buk i tok: ‘Ol i ting dispela god meri na god man i kamapim pasin bilong meri na bilong man i stap long strong bilong ol samting bilong graun. God man i gat pasin bilong em yet na god meri i gat pasin bilong em, na taim pasin bilong tupela i bung wantaim ol i kamapim ol samting i gat laip.’ Wanpela meri bilong raitim ol stori em i tok: ‘Wanpela bikpela samting yu mas makim em olsem: Wanem ol god man o god meri yu laik wok wantaim ol. Insait long wok bilong posin marila samting, yu yet yu ken makim wanem god yu laik lotuim na litimapim nem bilong em.’

Baibel i no wanbel wantaim ol dispela kain tingting. Krais Jisas i givim bel long lainim ol man long Jehova, em ‘wanpela tasol em God tru.’ (Jon 17:⁠3) Baibel i tok: “Bikpela em i namba wan tru na yumi mas litimapim nem bilong em moa yet. Ol arapela god i no olsem Bikpela. Olsem na yumi mas aninit long Bikpela. Olgeta god bilong ol arapela lain manmeri, ol i giaman god tasol.”​—⁠1 Stori 16: 25, 26.

Olsem wanem long Satan? Wanpela buk dikseneri (Webster’s Ninth New Collegiate Dictionary) i tok, wok marila samting em pasin bilong “toktok wantaim Satan.” Long nau em bai hatwok long painim wanpela marilaman o marilameri i wanbel wantaim dispela tok, long wanem, planti ol i no bilip olsem Satan i stap. Nius The Irish Times i stori long wanpela yangpela meri, na nius i tok em i wanpela “marilameri i gat namba na em i bos bilong wanpela lain marilameri i gat nem long Aialan.” Dispela marilameri i tok: “Pasin bilong bilip long Satan i makim olsem man i bilip long lotu Kristen . . . [Satan] i no inap i stap long hap i no gat God long en.”

Baibel i tok Satan i stap, na em i gat bikpela asua long ol pen na hevi i stap long graun. (KTH 12:12) Jisas i tok Satan i stap, na tu, tok bilong em i soim olsem man inap mekim laik bilong Satan na em i no save long dispela. Olsem: Long taim bilong ol aposel, ol hetman bilong lotu ol i ting ol i stretpela man na ol i mekim laik bilong God, na ol i tok ol i olsem pikinini bilong God. Tasol Jisas i save i no olsem, long wanem, em i save long ol tingting i stap long bel bilong ol. Em i tokim ol stret olsem: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela.” (Jon 8:44) Na tu, long Buk Kamapim Tok Hait Baibel i tok, Satan em i “giamanim olgeta manmeri bilong graun.”​—⁠KTH 12:⁠9.

Sampela Wok Marila i Gutpela o Nogat?

Long olgeta taim ol man i bin ting wok posin marila em samting bilong ol spirit nogut. Planti manmeri bilong bipo na bilong nau, ol i bilip olsem wok posin marila samting em ol marilaman i save mekim i bilong bagarapim ol narapela. Ol i tok, ol marilaman inap givim bikpela pen long narapela na kilim i dai narapela long rot bilong posin samting. Ol lain i mekim dispela kain wok, ol man i save sutim tok long ol na tok ol i as bilong planti samting nogut, olsem sik na indai, o ol i bagarapim gaden na kaikai i no kamap.

Ol marilaman na marilameri bilong nau ol i tok strong olsem dispela tok i no tru. Ol i tok, i gat wan wan marilameri nogut i laik bagarapim man, na planti ol i tok wok marila bilong ol i bilong helpim ol narapela na i no bilong bagarapim ol. Ol Wika i tok, ol samting marilaman i mekim long narapela, dispela bai kam bek long em yet na i strong moa. Na ol i tok, dispela em i wanpela bikpela samting bilong pasim ol marilaman long mekim tok bilong bagarapim narapela. Sampela wok marila em ol i tok i gutpela samting, i olsem: Wokim marila bilong lukautim yu yet, rausim wanpela kain strong nogut long haus em ol man bipo i bin stap long en ol i lusim, mekim marila long man o meri bambai em i ken laikim yu, oraitim sik na helpim skin long stap strong, helpim yu long holimpas wok mani bilong yu, na helpim yu long kisim mani. Taim ol i tok wok marila inap mekim planti samting olsem, yumi no kirap nogut long planti man i amamas long en.

Tasol Baibel i no tok i gat gutpela marila na marila nogut. Nogat. Long Lo God i givim long Moses, God i kamapim klia tingting bilong em. Em i tok: “Yupela i no ken wokim kain kain posin na mekim pasin sanguma samting.” (Wok Pris 19:26) Em i tok tu olsem: “Yupela i no ken . . . mekim olkain pasin bilong glasman, na pasin tambaran na pasin sanguma na wokim posin na mekim marila.”​—⁠Lo 18:​10, 11.

Bilong wanem God i tok olsem? I no olsem em i laik pasim yumi long kisim samting em inap helpim yumi, nogat. Jehova i givim ol dispela lo long lain bilong em, long wanem, em i laikim ol tru na em i no laik bai pasin bilong pret na ol bilip giaman i kalabusim ol. Em i tokim lain bilong em long askim em long givim ol samting long ol em ol i mas kisim. Em i Man bilong givim ol “gutpela samting yumi save kisim na olgeta presen i gutpela tru.” (Jems 1:17) Aposel Jon i strongim bel bilong ol wanbilip na em i tok: “Sapos yumi beten na askim [God] long wanpela samting, orait em i save givim long yumi, long wanem, yumi save bihainim lo bilong en, na yumi save mekim pasin em i laikim.”​—⁠1 Jon 3:⁠22.

Olsem Wanem Long Ol Spirit Nogut?

Planti marilaman i wanbel wantaim dispela tok bilong Baibel olsem ol spirit nogut i stap tru. Wanpela man i laikim wok marila, em i raitim wanpela stori na em i toksave olsem: “Ol spirit nogut i stap: Ol i stap long hap yumi no inap lukim na i stap klostu long graun bilong yumi, ol i samting i gat laip. . . . Ol tok olsem ‘Liklik Spirit Nogut,’ na ‘Spirit Nogut’ ol i trupela tok. Ol i gat bikpela strong. . . . Ol i gat bikpela save . . . na ol inap (sapos wanpela i opim rot long ol) i kam insait long hap bilong yumi. . . . Ol inap i go insait long skin bilong yu . . . , na ol inap bosim yu. Tru tumas, dispela i wankain stret olsem ol stori bilong bipo long ol spirit nogut i bin bosim ol man.”

Long taim bilong ol man i bin raitim Baibel, ol spirit nogut i bin bagarapim ol man long kain kain rot. Ol i mekim na sampela man i no inap toktok, na sampela ol i aipas, sampela ol i longlong, na sampela ol i kisim narakain bikpela strong tru. (Matyu 9:32; 12:22; 17:​15, 18; Mak 5:​2-5; Luk 8:29; 9:42; 11:14; Aposel 19:16) Long sampela taim pen bilong man i go bikpela moa taim planti spirit nogut wantaim i go insait long em na bosim em. (Luk 8:​2, 30) Olsem na i gat gutpela as na Jehova i tokim lain bilong em long stap longwe long pasin marila na ol narapela wok bilong ol spirit nogut.

Lotu Em Tok i Tru i As Bilong En

Planti man i laik insait long wok marila, long wanem, i olsem em i wanpela kain lotu bilong lotuim ol diwai o maunten samting, na i no inap nogutim man. Long sampela ples ol man i orait long wok marila samting. Ol i no pret long en. Na planti ol i ting em i samting nating bilong amamas tasol. Ol man i orait long narapela narapela lotu na planti ol i kirap bihainim ol lotu i narakain tru, olsem na planti man i ting marila na ol kain pasin olsem i gutpela samting.

Tru tumas, i gat planti kain kain lotu i stap, na ol man inap makim lotu i stret wantaim laik bilong ol yet, kain olsem man i baim su i stret long lek bilong em. Tasol Jisas i tok i gat tupela rot tasol bilong man i ken makim. Em i tok: “Yupela i mas i go insait long liklik dua. Dua i go long ples bilong lus, em i bikpela, na rot i go long dispela ples em i op tumas na em i isi long bihainim. Na planti manmeri i save bihainim dispela rot. Tasol dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.” (Matyu 7:​13, 14) Tru, yumi yet i ken makim rot yumi laik bihainim. Tasol rot yumi bihainim em i bikpela samting tru, long wanem, em inap makim olsem bai yumi kisim laip oltaim o nogat. Bilong kisim lait bilong spirit, yumi mas bihainim tok i tru​—⁠em dispela rot yumi inap painim long Tok Bilong God tasol, em Baibel.

[Piksa long pes 5]

Planti man long nau ol i ting wok marila em i wanpela kain lotu bilong lotuim ol maunten o paia samting na em i no inap nogutim man

[Piksa long pes 6]

Long olgeta taim ol man i bin ting wok marila em samting bilong ol spirit nogut

[Piksa long pes 6]

Olsem wanem? Ol man i wokim marila ol i mekim laik bilong Satan na ol i no save long dispela?

[Ol Piksa long pes 7]

Baibel i kamapim klia rot bilong tok i tru