Yu Gat Wanem Save Long Wok Marila?

MARILA! Dispela tok i givim wanem tingting long yu?

Planti man i ting em bilip bilong ol tumbuna tasol o stori nating i kamap long tingting bilong ol man, olsem na em i no samting bilong tingting tumas long en. Taim ol i tingim dispela kain wok, ol i tingim ol stori nating, olsem ol lapun meri i save wokim ol kain kain marasin samting bilong marila posin, na ol i mekim pasin sanguma long ol man na ol i kamap olsem rokrok samting, na long nait ol i save sindaun long brum na flai nabaut long en long skai na mekim lap nogut.

Tasol sampela man i no ting dispela em i stori nating tasol. Sampela lain i bin skelim tingting bilong ol man long dispela samting ol i tok, planti manmeri tru (winim 50 pesen) long olgeta hap ol i bilip olsem ol marilaman na marilameri i stap tru, na ol inap mekim sampela samting long i stap bilong ol man. Planti milion manmeri ol i bilip olsem wok posin na marila em samting nogut tru na em inap bagarapim man, na em i samting bilong pret long en. Olsem: Wanpela buk i stori long lotu bilong ol Afrika i tok: “Ol Afrika i bilip tru olsem marila, posin, sanguma samting i stap na ol inap long nogutim ol man. . . . Ol wanples bilong ol man i save wokim posin na marila samting, ol i no laik tru long ol man na meri i wokim posin marila samting. Long nau tu long sampela hap, sampela taim ol man bilong ples i save paitim ol i go inap long ol i dai.”

Tasol long ol kantri long hap bilong Wes, wok marila i bin kamap olsem samting ol man i orait long en. Ol buk, na televisen, na ol piksa wokabaut i bin mekim planti samting bambai ol man i no ken pret tumas long wok marila posin samting. David Davis, em wanpela man bilong skelim ol piksa wokabaut samting, em i tok: “Wantu ol marilameri ol i yangpela na ol i gat gutpela skin. Ol lain i save wokim ol piksa wokabaut, ol i kisim save hariap long ol samting ol man i gat laik long en. . . . Ol i mekim ol marilameri i kamap naispela na ol manmeri i save laikim ol, na planti moa ol i laik lukim ol piksa wokabaut i stori long ol​—⁠ol meri na pikinini tu.” Dispela lain i gat save long pasin bilong kisim winmani long ol samting ol man i gat laik long lukim o kisim save long en.

Sampela i tok, ol lain bilong wokim marila i wok long kamap bikpela hariap long Yunaitet Stets, winim planti narapela lain i olsem liklik lotu. Long ol kantri i gat planti wok bisnis samting, i gat ol lain i strong long ol meri i mas i stap wankain olsem ol man, na ol man i les pinis long ol bikpela lotu, olsem na planti manmeri moa ol i wok long painim ol samting bilong spirit long rot bilong kain kain wok marila posin samting. I gat kain kain wok posin na marila samting, olsem na ol manmeri i no wanbel long insait bilong tok “marilameri.” Tasol planti marilameri i laikim lotu Wika. Wanpela buk dikseneri i tok dispela lotu “em wanpela lotu haiden, ol i save lotuim samting olsem diwai o maunten na i bin kirap long westen Yurop paslain long taim ol Kristen i kamap long dispela hap, na i kirap gen long taim bilong yumi.”a Olsem na planti ol i kolim ol yet olsem haiden.

Kirap long bipo yet na i kam inap nau, ol man i nolaik tru long ol marilameri, na ol i bin birua long ol, na givim bikpela pen long ol, na kilim ol i dai tu. Olsem na yumi no kirap nogut long ol marilameri na marilaman bilong nau ol i laik mekim ol samting bambai ol man i ken kisim gutpela tingting long ol. Wanpela lain i askim planti marilameri long ol i gat bikpela laik long kamapim wanem tok long ol man. Wanpela meri bilong skelim dispela samting, em Margot Alder, em i kamapim bekim bilong ol, olsem: “Mipela i no man nogut. Mipela i no lotu long Satan. Mipela i no save givim hevi long ol man o paulim ol. Mipela i no save bagarapim ol man. Mipela i wankain olsem yu. Mipela i gat famili, wok mani, na ol samting mipela i tingting na wet long en. Mipela i no wanpela liklik lain lotu. Mipela i no narakain. . . . Yu no ken pret long mipela. . . . Long planti samting mipela i wankain olsem yu.”

Planti man moa ol i bilipim ol dispela tok. Tasol olsem wanem? Dispela i makim olsem i no gat as na yumi mas tingting planti long wok posin marila samting? Bai yumi skelim dispela askim long stori i kamap bihain long dispela.

[Futnot]