Putim Yau Long Ol Tok Profet Bilong God
“Mipela i save bilip strong moa long tok bilong ol profet, na sapos yupela tu i holim strong tok bilong ol, em i gutpela.”—2 PITA 1:19.
1, 2. Stori long wanpela mesaia giaman.
INAP planti handet yia, ol mesaia giaman ol i laik mekim tok profet long ol samting bai kamap bihain. Inap olsem 400 yia samting bihain long Krais, wanpela man em i kolim em yet olsem Moses, em i kirapim ol Juda long ailan Krit long bilip olsem em i mesaia na em bai kisim bek ol long ol man i daunim ol. Long de em i makim bilong ol i kamap fri, ol i bihainim em i go long wanpela ples i antap tru na ol inap lukim solwara Mediterenian. Em i tok sapos ol i tromoi skin bilong ol i go long solwara, orait solwara bai bruk na rot bai kamap namel. Planti ol i kalap i go daun long solwara ol i dring wara na ol i dai, na dispela mesaia giaman i ranawe i go pinis.
2 Inap olsem 1,100 yia samting bihain long Krais, wanpela “mesaia” i kamap long hap bilong Yemen. Hetman bilong dispela kantri i tokim em long kamapim wanpela mak bilong makim olsem em i mesaia tru. Dispela “mesaia” i tokim hetman long katim nek bilong em. Em i tok profet olsem kwiktaim em bai kirap bek, na dispela bai stap olsem mak. Hetman i orait long mekim olsem—em nau, dispela “mesaia” i pinis.
3. Mesaia tru em i husat? Ol wok em i bin mekim long autim tok i kamapim long ples klia wanem samting?
3 Wok bilong ol mesaia giaman long mekim tok profet em i save pundaun, tasol pasin bilong putim yau long ol tok profet bilong God em i no inap mekim na bihain yumi bel hevi, nogat. Mesaia tru, Krais Jisas, i bin truim planti tok profet bilong Baibel. Man bilong raitim Gutnius, em Matyu, em i kamapim wanpela bilong ol em Aisaia i bin raitim. Em i tok: “ ‘Ol manmeri bilong graun bilong Sebulun na graun bilong Naptali, em graun i stap klostu long bikrot i go long solwara na graun i stap long hapsait bilong wara Jordan, em graun bilong distrik Galili, dispela distrik i gat planti manmeri bilong ol arapela kantri tu i stap long en, ol dispela manmeri i bin sindaun long bikpela tudak, ol i lukim pinis bikpela lait. Ol manmeri i bin stap long ples tudak, lait i kamap pinis long ol.’ Long dispela taim Jisas i stat long autim tok long ol manmeri. Em i tok olsem, ‘Yupela i mas tanim bel, long wanem, kingdom bilong heven em i kam klostu pinis.’ ” (Matyu 4:15-17; Aisaia 9:1, 2) Jisas yet em i dispela “bikpela lait,” na ol wok em i bin mekim long autim tok i kamapim long ples klia olsem em i dispela Profet em Moses i tok bai kamap. Olgeta man i no laik harim tok bilong Jisas, God bai i kilim ol i dai.—Lo 18:18, 19; Aposel 3:22, 23.
4. Olsem wanem Jisas i truim tok bilong Aisaia 53:12?
4 Na tu, Jisas i truim tok profet bilong Aisaia 53:12: “Ol manmeri i bin lukim em olsem wanpela man nogut. Tasol em i bin givim laip bilong em yet na karim hevi bilong sin bilong planti manmeri. Na em i bin prea bilong helpim ol manmeri bilong mekim sin.” Em i save liklik taim em i mas givim laip bilong em olsem ofa bilong baim bek ol man, olsem na Jisas i strongim bilip bilong ol disaipel bilong em. (Mak 10:45) Wanpela bikpela rot bilong em long mekim olsem, em taim bodi bilong em i senis na i kamap narapela kain.
Bodi Bilong Jisas i Kamap Narapela Kain na Dispela i Strongim Bilip
5. Long tok bilong yu yet, bai yu stori olsem wanem long taim bodi bilong Jisas i kamap narapela kain?
5 Taim bodi bilong Jisas i kamap narapela kain, dispela i makim samting bai kamap bihain. Jisas i tok: “Pikinini Bilong Man bai i stap long bikpela lait bilong Papa bilong en, na em bai i kam wantaim ol ensel bilong en. . . . Mi tok tru long yupela, sampela man i sanap hia bai ol i no i dai yet, na bai ol i lukim Pikinini Bilong Man i kam olsem king.” (Matyu 16:27, 28) Olsem wanem? Sampela aposel i bin lukim tru Jisas taim em i kam olsem King long Kingdom bilong em? Matyu 17:1-7 i tok: “6-pela de i go pinis, orait Jisas i kisim Pita na Jems wantaim brata bilong en Jon, na em i bringim ol i go long wanpela maunten i antap moa. Na ol tasol i stap. Na taim ol i lukluk i stap, bodi bilong Jisas i senis na i kamap narakain. Na pes bilong en i lait olsem san, na laplap samting bilong en i kamap waitpela olsem lait. Na Moses wantaim Elaija tupela i kamap na ol disaipel i lukim tupela i toktok wantaim Jisas.” Na tu, “wanpela klaut i lait tumas i karamapim ol,” na ol i harim nek bilong God yet i tok, “ ‘Dispela em i Pikinini bilong mi, mi laikim em tumas, na mi amamas long em. Yupela harim tok bilong em.’ Ol disaipel i harim dispela tok, na ol i brukim skru na putim pes i go daun long graun, na ol i pret tumas. Na Jisas i kam klostu long ol na i holim ol, na i tok, ‘Yupela kirap. Yupela i no ken pret.’ ”
6. (a) Bilong wanem Jisas i kolim dispela samting i bin kamap olsem wanpela piksa? (b) Em piksa bilong wanem samting bai kamap bihain?
6 Yumi ken ting dispela narapela kain samting i bin kamap long wanpela kil bilong maunten Hermon—Jisas wantaim 3-pela aposel i bin stap long dispela hap inap long nait olgeta. Olsem na yumi save dispela samting i bin kamap long nait, na ol inap lukim moa yet. Wanpela as na Jisas i kolim dispela samting i bin kamap olsem wanpela piksa, i olsem: Moses na Elaija i no stap tru tru wantaim em—ol i dai pinis longtaim tru. Krais tasol i stap. (Matyu 17:8, 9, NW ) Taim bodi bilong Jisas i kamap narapela kain na pes wantaim klos bilong em i lait nogut tru, i olsem Pita na Jems na Jon i lukim piksa bilong samting Jisas bai mekim bihain, olsem em bai kam i stap long Kingdom na kisim biknem na strong. Moses na Elaija i olsem piksa na i makim ol wanlain bilong Jisas em God i bin makim long spirit holi na ol i bilong kamap king. Na tu, dispela samting i bin kamap i strongim tru ol tok em i bin mekim long Kingdom na long wok king em bai mekim bihain.
7. Olsem wanem yumi save dispela samting i bin kamap olsem piksa em i stap strong yet long tingting bilong Pita?
7 Taim bodi bilong Jisas i kamap narapela kain, dispela i strongim bilip bilong dispela 3-pela aposel em ol bai go pas long wok bilong lukautim kongrigesen Kristen. Pes bilong Jisas i lait, na klos bilong em i lait tru, na maus bilong God yet i tok Jisas em Pikinini bilong Em na Em i laikim em tumas, na ol i mas harim tok bilong em—olgeta dispela samting i bin mekim gut wok bilong en. Tasol dispela samting ol aposel i lukim, ol i no ken tokim wanpela man long en, i go inap long taim Jisas i kirap bek. Inap olsem 32 yia bihain, dispela samting i bin kamap olsem piksa em i stap strong yet long tingting bilong Pita. Em i tokaut long en na samting dispela piksa i makim, olsem: “Mipela i tokim yupela pinis long strong bilong Bikpela bilong yumi Jisas Krais, na long em bai i kam bek gen. Tasol taim mipela i tokim yupela long dispela tok bilong Krais, mipela i no bihainim ol stori nating i bin kamap long tingting bilong ol man. Nogat. Long ai bilong mipela yet, mipela i bin lukim lait na strong bilong God i kamap long em, olsem na mipela i tok. God Papa i bin givim biknem long em, na i mekim dispela gutpela lait i kamap long em. Na God yet i stap long dispela nambawan lait bilong heven na em i mekim tok long Jisas olsem, ‘Dispela em i Pikinini bilong mi, mi laikim em tumas, na mi amamas long em.’ Mipela i bin i stap wantaim em long dispela maunten . . . na mipela i harim dispela tok i kam long heven.”—2 Pita 1:16-18.
8. (a) Tokaut bilong God long Pikinini bilong em i kamapim klia wanem samting? (b) Klaut i kamap long dispela samting olsem piksa em i makim wanem samting?
8 Bikpela samting tru, em dispela tokaut bilong God: “Dispela em i Pikinini bilong mi, mi laikim em tumas, na mi amamas long em. Yupela harim tok bilong em.” Dispela tok i kamapim klia olsem Jisas em King God i bin makim, na olgeta lain long heven na long graun ol i mas daun olgeta long em na bihainim tok bilong em. Dispela klaut, olsem smok, i makim olsem taim truim bilong dispela samting i kamap, ol man i no inap lukim long ai bilong ol. Ol man i luksave long “mak” bilong makim olsem Jisas i stap pinis olsem King long Kingdom, ol bai lukim truim bilong dispela samting long tingting bilong ol tasol. (Matyu 24:3) Jisas i bin tok ol i no ken tokim wanpela man long dispela samting olsem piksa i bin kamap, i go inap long taim em i kirap bek pinis long matmat, na dispela i soim yumi olsem em bai kisim biknem na strong bihain long taim em i kirap bek.
9. Piksa bilong taim bodi bilong Jisas i kamap narapela kain, olsem wanem na dispela i mas strongim bilip bilong yumi?
9 Pita i stori pinis long dispela samting, na nau em i tok moa: “Olsem na mipela i save bilip strong moa long tok bilong ol profet, na sapos yupela tu i holim strong tok bilong ol, em i gutpela. Tok bilong ol profet em i olsem lam i lait i stap long ples tudak, i go inap long tulait i kamap na sta bilong moningtaim em i kirap insait long bel bilong yupela. Tasol bikpela samting yupela i mas save long en, em i olsem. Yumi no ken bihainim tingting bilong yumi yet na autim as bilong wanpela tok profet i stap long buk bilong God. Long wanem, i no gat wanpela tok profet i bin kamap long laik bilong man i autim. Nogat. Holi Spirit yet i kirapim ol man na ol i autim tok God i givim long ol.” (2 Pita 1:19-21) Taim bodi bilong Jisas i kamap narapela kain, dispela i kamapim strong olsem yumi inap bilip tru long ol tok profet bilong God. Yumi mas putim yau long ol dispela tok—yumi no ken bihainim “ol stori nating i bin kamap long tingting bilong ol man,” em ol tok God i no orait long en. Dispela piksa bilong taim bodi bilong Jisas i kamap narapela kain, dispela i mas strongim bilip bilong yumi long ol tok profet bilong God, long wanem, samting dispela piksa i makim—Jisas bai kisim biknem na strong bilong bosim Kingdom—dispela i kamap pinis. Tru tumas, ol samting i kamapim long ples klia olsem Krais i stap King pinis long heven na em i gat bikpela strong.
Sta Bilong Moningtaim i Kamap Olsem Wanem?
10. Husat o wanem samting em i “sta bilong moningtaim” em Pita i toktok long en? I gat wanem as na yu bekim tok olsem?
10 Pita i tok: “Tok bilong ol profet em i olsem lam i lait i stap long ples tudak, i go inap long tulait i kamap na sta bilong moningtaim em i kirap insait long bel bilong yupela.” Dispela “sta bilong moningtaim” em i husat o wanem samting? Dispela tok “sta bilong moningtaim” em i kamap wanpela taim tasol long Baibel, tasol i gat wanpela tok long Kamapim Tok Hait 22:16 i wankain liklik long dispela, em i kolim Krais Jisas olsem “dispela sta i save lait tumas long moningtaim tru.” Long sampela taim insait long yia, ol kain sta olsem ol i laspela sta bilong kam antap long hap bilong is. Ol i kamap taim san i laik kamap, olsem na ol dispela sta i makim olsem nupela de i kirap. Pita i kolim dispela tok “sta bilong moningtaim” bilong makim Jisas taim em i kisim pinis strong bilong bosim Kingdom. Long dispela taim stret, Jisas, olsem dispela sta, i kamap long olgeta hap bilong ples antap na graun bilong yumi tu! Em i Mesaia na Sta Bilong Moningtaim, na em i makim nupela de, o nupela taim, i kamap bilong helpim ol manmeri i bihainim tok bilong em.
11. (a) Olsem wanem na 2 Pita 1:19 i no makim olsem “sta bilong moningtaim” i kamap long bel tru bilong man? (b) Bai yu stori olsem wanem long tok bilong 2 Pita 1:19?
11 Planti Baibel i givim tingting long ol man olsem dispela tok bilong Pita long 2 Pita 1:19 em i makim bel tru, olsem klok, bilong man. Klok bilong ol man i bikpela pinis, hevi bilong en long skel em inap olsem 250 i go inap 300 gram samting. Orait tingim Krais Jisas—nau em i wanpela spirit i gat biknem tru na i no inap i dai—olsem wanem em inap kamap insait long dispela liklik hap bilong ol man olsem klok? Nogat, a? (1 Timoti 6:16) Tasol bel bilong yumi i gat wok long dispela samting, long wanem, bel i save kirapim yumi long putim yau long ol tok profet bilong God. Sapos yu lukim gut tok bilong 2 Pita 1:19, bai yu lukim olsem Baibel New World Translation i putim wanpela mak olsem koma bihain long dispela tok “i go inap long tulait i kamap na sta bilong moningtaim em i kirap,” na i no bungim wantaim dispela hap tok, “insait long bel bilong yupela.” Olsem na yumi inap raitim dispela ves olsem: ‘Mipela i save bilip strong moa long tok bilong ol profet, na i gutpela sapos yupela tu i holim strong tok bilong ol i olsem lam i lait i stap long ples tudak, olsem insait long bel bilong yupela, i go inap long tulait i kamap na sta bilong moningtaim em i kamap.’
12. Olsem wanem long bel bilong klostu olgeta man long graun? Tasol olsem wanem long bel bilong ol Kristen tru?
12 Olsem wanem long bel bilong ol narapela man bilong graun i gat sin? Bel bilong ol i stap tudak long ol samting bilong spirit! Tasol sapos yumi Kristen tru, i olsem wanpela lam i lait i stap long bel bilong yumi—bel bilong yumi i no stap tudak. Olsem Pita i tok, taim ol Kristen tru i putim yau long ol tok profet bilong God i givim lait long ol, ol bai save nupela de i kamap. Ol bai save dispela Sta Bilong Moningtaim em i no kamap insait long bel tru bilong ol man, nogat; em i kamap pinis long ai bilong olgeta lain i stap long ples antap na long graun.
13. (a) Olsem wanem yumi ken save dispela Sta Bilong Moningtaim em i kamap pinis? (b) Olsem wanem na ol Kristen inap karim ol hevi em Jisas i bin tok profet bai kamap long taim bilong yumi?
13 Dispela Sta Bilong Moningtaim em i kamap pinis! Yumi ken kisim dispela save taim yumi putim yau na tingim gut bikpela tok profet bilong Jisas long em bai kam i stap. Long nau yumi lukim truim bilong en i kamap, olsem ol bikpela pait, hangre, guria, na wok bilong autim gutnius long olgeta hap. (Matyu 24:3-14) Ol dispela hevi Jisas i bin toktok long en ol i save painim yumi ol Kristen tu, tasol yumi inap karim ol dispela hevi na i stap bel isi na amamas. Olsem wanem na yumi inap mekim olsem? Long wanem, yumi save putim yau long ol tok profet bilong God na yumi bilip long ol samting em i tok promis long kamapim long bihain. Yumi save yumi stap klostu pinis long gutpela taim tru, long wanem, yumi stap klostu tru long pinis bilong “taim bilong las de”! (Daniel 12:4) Ol lain bilong dispela graun ol i stap nogut tru, olsem Aisaia 60:2 i tok profet long en: “Lukim. Ol blakpela klaut na bikpela tudak i karamapim olgeta . . . lain manmeri bilong graun.” Olsem wanem man inap wokabaut gut long rot long dispela bikpela tudak? Em i mas mekim pasin daun na putim yau long ol tok profet bilong God nau, nogut taim i pinis na em i no inap mekim moa. Ol man i gat stretpela bel ol i mas tanim bel i go long God Jehova, em i As tru bilong laip na lait. (Song 36:9; Aposel 17:28) Long dispela rot tasol ol man inap kisim lait tru, olsem save tru, na tingting long stap long gutpela taim tru long bihain em God i laik kamapim bilong ol man i bihainim tok bilong em.—KTH 21:1-5.
“Lait i Kamap Pinis Long Graun”
14. Bilong yumi ken i stap na lukim ol samting i kamap tru olsem ol gutpela tok profet bilong Baibel i makim, yumi mas mekim wanem?
14 Baibel i kamapim klia tru olsem nau Krais Jisas i kirap pinis long mekim wok bilong em olsem King. Em i bin kamap King long 1914, olsem na ol narapela gutpela tok profet bai kamap tru. Bilong yumi ken i stap na lukim ol samting i kamap tru olsem ol tok profet i makim, yumi mas kamapim klia olsem yumi gat pasin daun na yumi bilip long Krais Jisas, na yumi tanim bel na pilim tru ol rong yumi bin mekim taim yumi no gat save. Tasol ol man i laikim tudak ol bai lus long kisim laip i stap oltaim. Jisas i tok: “As bilong kot bilong ol em i olsem. Lait i kamap pinis long graun, tasol ol man i laikim tumas tudak. Ol i no laikim lait, long wanem, ol i man bilong mekim pasin nogut. Olgeta man i save mekim pasin nogut, ol i birua bilong lait. Ol i no laik bai pasin bilong ol i kamap ples klia. Olsem na ol i no save kam long lait. Tasol man i mekim pasin i tru, em i save kam long lait, bai ol man i ken lukim gut olsem, em i bin mekim wok bilong en long strong bilong God.”—Jon 3:19-21.
15. Wanem samting bai painim yumi sapos yumi givim baksait long dispela wok bilong God long kisim bek yumi long rot bilong Pikinini bilong em?
15 Lait bilong spirit i kamap pinis long graun long rot bilong Jisas, na pasin bilong harim tok bilong em i bikpela samting tru. Pol i tok: “Bipo long planti taim na long planti pasin God i bin givim tok long ol tumbuna bilong yumi long maus bilong ol profet. Tasol long dispela taim nau, em long taim bilong las de, God i bin autim tok long yumi long maus bilong Pikinini Man bilong em. God i makim dispela Pikinini pinis bilong kisim olgeta samting.” (Hibru 1:1, 2) Wanem samting bai painim yumi sapos yumi givim baksait long dispela wok bilong God long kisim bek yumi long rot bilong Pikinini bilong em? Pol i tok moa: “Bipo God i bin givim tok long ol tumbuna bilong yumi long maus bilong ol ensel, na dispela tok i stap strong. Na olgeta man i kalapim na sakim dispela tok, ol i bin kisim pe nogut inap long pasin nogut ol i bin mekim. Tasol nau God i mekim wanpela wok bilong kisim bek yumi, na dispela wok bilong en em i bikpela samting tru. Olsem na sapos yumi givim baksait long dispela wok bilong God, olsem wanem na bai yumi ranawe na abrusim pe bilong sin? Bai yumi no inap tru. Pastaim Bikpela yet i bin autim tok long em i laik kisim bek yumi. Na ol man i harim tok bilong em, ol i bin tokim yumi olsem, ‘Dispela tok em i tru tasol.’ Na God i mekim ol kain kain mirakel na olkain strongpela wok, na em i tilim ol presen bilong Holi Spirit long ol manmeri, inap long laik bilong em yet, na long dispela pasin em i soim olsem dispela tok bilong Pikinini bilong en, em i tru olgeta.” (Hibru 2:2-4) Em nau, Jisas i nambawan bikpela samting long wok bilong autim ol tok profet bilong God.—KTH 19:10.
16. I gat wanem as na yumi ken bilip tru long olgeta tok profet bilong God Jehova?
16 Olsem yumi tok pinis, Pita i tok: “Yumi no ken bihainim tingting bilong yumi yet na autim as bilong wanpela tok profet i stap long buk bilong God.” Ol man bilong graun i no inap tru long autim wanpela tok profet i tru, tasol yumi inap bilip tru long olgeta tok profet bilong God. God Jehova yet i as bilong ol. Long rot bilong spirit holi, em i bin helpim ol wokman bilong em long save olsem wanem ol tok profet bilong Baibel i wok long kamap tru. Tru tumas, yumi tenkyu long Jehova olsem kirap long yia 1914 yumi bin lukim ol samting i kamap na i truim planti tok profet olsem. Na yumi bilip tru olsem ol narapela tok profet i toktok long pinis bilong dispela taim nogut yumi stap long en, ol tu bai kamap tru. Yumi mas wok yet long putim yau long ol tok profet bilong God na larim lait bilong yumi i lait long ai bilong ol manmeri. (Matyu 5:16) Yumi tenkyu tru long Jehova i mekim na lait i kamap long yumi long dispela bikpela tudak i karamapim graun long nau!—Aisaia 58:10.
17. Bilong wanem yumi mas kisim lait bilong spirit long God?
17 Lait tru bilong san i mekim na yumi inap lukim ol samting. Na tu, em i mekim na ol kain kain kaikai i kamap long gaden. Sapos i no gat dispela lait tru, bai yumi no inap i stap laip. Orait, olsem wanem long lait bilong spirit? Em i soim rot long yumi na ol samting bilong bihain em Tok Bilong God, olsem Baibel, i bin tok profet long en. (Song 119:105) Long gutpela pasin sori, God Jehova i save ‘salim tok tru na lait bilong em i kam.’ (Song 43:3) Yumi mas kamapim long ples klia olsem yumi pilim tru ol dispela gutpela samting. Olsem na yumi mas wok strong tru long kisim dispela lait bilong gutpela save bilong God, bambai lait i ken kamap moa yet long bel bilong yumi.—2 Korin 4:6; Efesus 1:18.
18. Sta Bilong Moningtaim Jehova i putim, nau em i redi long mekim wanem?
18 Em i gutpela tru yumi save olsem long 1914, Krais Jisas, em dispela Sta Bilong Moningtaim, em i kamap long olgeta hap bilong ples antap na graun na em i kirap long truim dispela piksa bilong taim bodi bilong em i bin kamap narapela kain! Dispela Sta Bilong Moningtaim em Jehova i bin putim, nau em i stap, na em i redi long kamapim laik bilong God na truim narapela hap bilong dispela piksa—em “pait long dispela bikpela de bilong God I Gat Olgeta Strong.” (KTH 16:14, 16) Taim God i rausim pinis ol pasin nogut bilong dispela graun, Jehova bai truim tok promis bilong em long kamapim “nupela skai na nupela graun,” na inap long olgeta taim bihain yumi ken litimapim nem bilong em, em Bikpela King bilong heven na graun na em i God bilong kamapim ol tok profet i tru. (2 Pita 3:13) Inap long dispela de i kamap pinis, yumi mas wokabaut yet long lait bilong God long rot bilong putim yau long ol tok profet bilong God.
Bai Yu Bekim Olsem Wanem?
• Bai yu stori olsem wanem long bodi bilong Jisas i kamap narapela kain?
• Piksa bilong taim bodi bilong Jisas i kamap narapela kain em i strongim bilip bilong yumi olsem wanem?
• Sta Bilong Moningtaim Jehova i putim em i makim husat o wanem samting? Em i bin kamap long wanem taim?
• Bilong wanem yumi mas putim yau long ol tok profet bilong God?
[Piksa long pes 13]
Bodi bilong Jisas i kamap narapela kain. Yu inap stori long samting dispela i makim?
[Piksa long pes 15]
Sta Bilong Moningtaim em i kamap pinis. Yu save em i bin kamap olsem wanem na long wanem taim?