Ol Man i Pait Long God Ol i No Inap Win!

“Bai ol dispela man i birua long yu, tasol ol bai i no inap daunim yu.”​​—⁠JEREMAIA 1:​19.

1. Jeremaia i kisim wanem wok? Em i stap long dispela wok i go inap long wanem taim?

JEHOVA i givim wok long yangpela Jeremaia bilong mekim wok profet namel long ol lain nabaut. (Jeremaia 1:⁠5) Dispela samting i bin kamap long taim bilong gutpela King Josaia bilong Juda. Jeremaia i stap yet long wok bilong em olsem profet i go inap long taim Babilon i daunim Jerusalem na kisim lain bilong God i go kalabus.​—⁠Jeremaia 1:​1-3.

2. Jehova i strongim Jeremaia olsem wanem? Man i pait long Jeremaia em i pait long husat tru?

² Jeremaia i mas tokaut long kot bilong God, na dispela bai kirapim ol man long birua long em. Olsem na God i strongim em long karim ol hevi bai kamap bihain. (Jeremaia 1:​8-10) Em i strongim bel bilong Jeremaia long dispela tok: “Bai ol dispela man i birua long yu, tasol ol bai i no inap daunim yu. Long wanem, mi yet mi stap wantaim yu na bai mi helpim yu. Mi Bikpela mi tok pinis.” (Jeremaia 1:19) Man i pait long Jeremaia em i pait long God yet. Long nau, Jehova i gat wanpela lain wokman i stap olsem profet em wok bilong ol i wankain olsem Jeremaia i bin mekim. Olsem Jeremaia, ol i strong long autim tok profet bilong God na ol i no pret. Na dispela tok i save mekim sampela samting long olgeta man na olgeta lain​—⁠ol i gat wanem tingting long dispela tok, orait dispela i mekim na ol bai kisim gutpela samting o samting nogut. Wankain olsem long taim bilong Jeremaia, long nau i gat ol man i biruaim ol dispela wokman bilong God na ol wok God i bin givim long ol, na long dispela rot ol i pait long God yet.

Ol i Pait Long Ol Wokboi Bilong Jehova

3. I gat wanem as na ol birua i bin pait long ol wokboi bilong Jehova?

³ Bihain liklik long yia 1900 na i kam inap nau, ol birua i bin pait long ol manmeri bilong Jehova. Long planti kantri, ol man i gat tingting nogut ol i bin wok strong long pasim wok bilong autim gutpela tok bilong Kingdom bilong God. Nambawan Birua bilong yumi, Satan, i bin kirapim ol long mekim olsem​—⁠em i ‘olsem wanpela laion i save raun bilong painim ol manmeri bilong kaikai.’ (1 Pita 5:⁠8) ‘Taim bilong ol arapela lain man’ i pinis long 1914, na God i putim Pikinini bilong em i stap nupela King bilong graun, na em i tokim em: “Yu bosim ol birua bilong yu.” (Luk 21:24; Song 110:⁠2) Krais i mekim wok long namba em i bin kisim na em i rausim Satan long heven na kalabusim em i stap long hap klostu long graun. Satan i save em i gat sotpela taim tasol bilong i stap, olsem na em kamapim belhat bilong em long ol Kristen God i bin makim ol long spirit holi, wantaim ol poroman bilong ol. (KTH 12:​9, 17) Ol dispela birua i pait long God ol i bin pait planti taim long lain bilong em, olsem na wanem samting i bin kamap?

4. Long taim bilong Namba Wan Pait, wanem ol hevi i painim lain bilong Jehova? Tasol wanem samting i kamap long 1919 na 1922?

⁴ Long taim bilong Namba Wan Pait, planti samting i kamap bilong traim bilip bilong ol wokboi bilong Jehova em i bin makim ol. Ol i tok bilas long ol, bagarapim nem bilong ol, paitim ol, na ol bikpela lain i bung bung na raunim ol. Olsem Jisas i tok profet, ‘olgeta lain manmeri ol i bel nogut tru long ol.’ (Matyu 24:⁠9) Ol man i givim bel tru long helpim Namba Wan Pait na dispela i givim rot long ol birua bilong Kingdom bilong God long mekim wok long wanpela kain pasin ol man i bin mekim wok long en bilong painim rong long Krais Jisas. Ol birua i sutim tok giaman long ol manmeri bilong Jehova olsem ol i biruaim gavman, na ol i kirap pait long lain i lukautim oganaisesen bilong God hia long graun. Long Me 1918, gavman i wokim kotpepa bilong holim presiden bilong Sosaiti Was Taua, em J. F. Rutherford, na 7-pela wanwok bilong em. Kot i makim ol long kalabus inap planti yia na ol i salim ol i go long kalabus long Atlanta, Jojia, Amerika. Nainpela mun bihain ol i lusim kalabus. Long Me 1919 kot bilong apil i tok namba wan kot i no bin mekim stretpela kot long ol, olsem na dispela i senisim tok namba wan kot i bin pasim. Ol i laik wokim nupela kot, tasol bihain gavman i mekim dai dispela kot, na kot i tok Brata Rutherford na ol wanwok bilong em ol i no gat asua. Ol i kirap gen long mekim wok bilong ol, na ol kibung i kamap long Sida Poin, Ohaio, long 1919 na long 1922 i helpim wok bilong autim tok bilong Kingdom long kamap strong gen.

5. Wanem samting i painim ol Witnes Bilong Jehova long Jemani em ol Natsi i bosim?

⁵ Long ol yia namel long 1930 i go inap 1939, ol gavman dikteta i kamap, na gavman bilong Jemani, Itali, na Japan, ol i wok wantaim. Bihain liklik long 1930, ol man i kirap mekim nogut tru long ol manmeri bilong God, olsem long Jemani em ol Natsi i bosim. Ol i tambuim wok bilong ol. Ol polis i go long ol haus bilong painim ol buk samting, na holim ol man i stap long ol dispela haus. Planti tausen i kalabus long ol banis kalabus nogut, long wanem, ol i no laik lusim bilip bilong ol. Dispela pait ol i mekim long God na long lain bilong em i bilong pinisim tru tru lain Witnes Bilong Jehova long dispela kantri i gat hatpela gavman.a Taim ol Witnes i go long ol kot long Jemani bilong sambai long ol samting i stret ol i ken mekim, Dipatmen Bilong Jastis bilong gavman Natsi i wokim wanpela bikpela pepa na bai i no gat rot long ol i ken winim kot. Pepa i tok: ‘Ol kot i no ken larim ol lo i mekim na ol i pundaun long mekim wok bilong ol, nogat; ol i mas painim rot long abrusim ol dispela lo na inapim bikpela wok em gavman i bin givim long ol.’ Em nau, ol i no laik mekim stretpela kot long ol Witnes. Ol Natsi i tok wok bilong ol Witnes Bilong Jehova i save birua long gavman bilong Jemani.

6. Long taim bilong Namba Tu Pait na bihain long en, ol birua i mekim wanem bilong pasim wok bilong yumi?

⁶ Long taim bilong Namba Tu Pait, ol i tambuim wok bilong lain bilong God o pasim sampela wok bilong ol long Ostrelia, Kanada, na long sampela kantri moa em Briten i bosim​—⁠long Afrika, Esia, na sampela ailan bilong solwara Karibian na Pasifik. Long Amerika, ol birua i gat bikpela nem na ol man i gat tingting kranki long ol Witnes, ol i ‘putim sampela lo’ bilong pasim wok bilong ol Witnes. (Song 94:20) Tasol ol tok olsem ol i mas salut long plak, na ol lo i tambuim ol Witnes long go long ol haus na autim tok, ol Witnes i kisim ol dispela hevi i go long ol kot, na ol kot ol i winim long Amerika i mekim bikpela wok tru long helpim pasin bilong i stap fri long mekim lotu. Mipela i tenkyu long Jehova olsem ol birua i no win. Taim Namba Tu Pait long Yurop i pinis, ol dispela tambu i pinis. Planti tausen Witnes i lusim ol kem nogut, tasol pait ol birua i mekim long ol i no pinis yet. Bihain long Namba Tu Pait, kwiktaim pasin birua i kamap namel long ol gavman bilong Is na Wes. Ol lain long Isten Yurop ol i putim sampela hevi moa long ol manmeri bilong Jehova. Ol bikman long gavman i pasim wok bilong yumi long autim tok, na ol i pasim rot bilong kisim ol buk na nius bilong Baibel, na ol i pinisim ol kibung. Ol i putim planti Witnes long kalabus o salim ol i go long ol kem na ol i mas mekim wok kalabus.

Ol i Wok Yet Long Autim Tok!

7. Insait long sampela yia i go pinis, wanem samting i bin painim ol Witnes Bilong Jehova long Polan, Rasia, na long sampela narapela kantri?

⁷ Bihain long sampela yia, wok bilong autim tok bilong Kingdom em i kirap gen. Maski Polan i stap aninit yet long gavman Komyunis, ol i larim ol Witnes i mekim ol wanpela de kibung long 1982. Long 1985, ol kibung intenesenel i kamap long dispela kantri. Long 1989, ol bikpela kibung intenesenel i kamap na planti tausen bilong Rasia na Yukren ol i kam. Long dispela yia stret, gavman bilong Hangari na Polan i orait long ol Witnes Bilong Jehova. Long Novemba 1989, ol i rausim Banis Belin. Sampela mun bihain long dispela, gavman bilong Is Jemani tu i orait long yumi, na bihain liklik, wanpela kibung intenesenel i kamap long Belin. Na long 1990, mipela i stretim rot bilong lukim ol brata long Rasia. Mipela bungim sampela bikman long Mosko, na long 1991, gavman i rejistaim ol Witnes Bilong Jehova. Kirap long dispela taim na i kam, wok i go bikpela tru long Rasia na long ol ripablik em bipo ol i insait long Soviet Yunion.

8. Insait long 45 yia bihain long pinis bilong Namba Tu Pait, wanem samting i bin painim ol manmeri bilong Jehova?

⁸ Long sampela hap ol i no putim hevi tumas long ol Witnes olsem bipo, tasol long sampela hap ol i mekim nogut moa yet long ol. Insait long 45 yia bihain long pinis bilong Namba Tu Pait, planti kantri ol i no laik rejistaim ol Witnes Bilong Jehova. Na tu, long 23 kantri long Afrika, na 9-pela long Esia, na 8-pela long Yurop, na 3-pela long Latin-Amerika, na long 4-pela ailan, ol i tambuim oganaisesen bilong yumi o ol wok bilong yumi.

9. Wanem samting i bin painim ol wokboi bilong Jehova long Malawi?

⁹ Long 1967, ol i kirap mekim nogut tru long ol Witnes Bilong Jehova long Malawi. Ol Kristen tru i no save insait long ol samting bilong wok politik, olsem na ol wanbilip bilong yumi long dispela kantri ol i no baim kat politik. (Jon 17:16) Malawi Kongres Pati i mekim wanpela miting long 1972, na bihain long dispela ol i kirap gen long mekim nogut tru long ol Witnes. Ol i rausim ol brata long haus bilong ol na pinisim ol long wok mani bilong ol. Planti tausen ol i ranawe lusim Malawi bilong abrusim bagarap. Tasol olsem wanem? Ol dispela man i pait long God na long lain bilong em, ol i win? Nogat tru! Bikpela senis i kamap long Malawi, na long 1999 inap 43,767 pablisa bilong Kingdom i putim ripot, na 120,000 i go long ol kibung distrik. Ol i wokim wanpela nupela brens-ofis long nambawan biktaun.

Ol i Wok Long Painim Wanpela Rong

10. Olsem long taim bilong Daniel, ol birua bilong nau bilong lain bilong God ol i bin mekim wanem?

¹⁰ Ol man i bikhet na lusim lotu i tru, na ol pris pasto, na sampela moa, ol i no amamas long harim ol tok bilong Baibel yumi autim. Sampela lain bilong lotu i gat nem Kristen ol i subim ol birua na ol birua i wok long painim wanpela lo na bai long ai bilong ol man i stret ol i pait long yumi. Ol i mekim olsem wanem? Orait, taim ol birua i pait long profet Daniel ol i mekim long wanem pasin? Daniel 6:​4, 5 i tok: “Ol arapela ofisa na tupela wanwok . . . i traim painim sampela rong long wok bilong Daniel, bilong ol i ken kotim em. Tasol ol i no lukim wanpela rong, long wanem, Daniel em i stretpela man na wok bilong en i gutpela tasol. Em i no save giaman o mekim wanpela pasin i no stret. Orait na ol i toktok long ol yet olsem, ‘Yumi no inap painim wanpela rong long wok bilong Daniel, bilong yumi ken kotim em. Yumi mas lukim pasin em i save mekim long bihainim ol lo bilong God bilong en, na ating bai yumi painim rot bilong kotim em.’ ” Na i wankain tu long nau. Ol birua i traim painim sampela rong long wok bilong yumi. Ol i toktok planti long “ol lotu nogut i bihainim man” na ol i tok ol Witnes Bilong Jehova i wanpela kain lotu olsem. Ol i kamapim sampela tok kranki, na mekim tok bilas, na sutim tok giaman long yumi, na long dispela rot ol i birua long pasin bilong yumi long mekim lotu na holimpas ol lo bilong God.

11. Sampela birua bilong ol Witnes Bilong Jehova i bin sutim wanem tok giaman long ol?

¹¹ Long sampela kantri, ol lain bilong lotu na politik ol i no laik tokaut olsem yumi bihainim “pasin bilong Kristen i stap stret olgeta na i no gat asua long ai bilong God Papa bilong yumi.” (Jems 1:27) Maski yumi mekim wok Kristen long 234 kantri, ol birua i tok yumi no wanpela “lotu ol man i save long en.” Paslain liklik long wanpela kibung intenesenel i kamap long 1998, wanpela nius bilong Atens i kamapim tok bilong sampela pris bilong lotu Grik Otodoks ol i tok “[ol Witnes Bilong Jehova] i no wanpela ‘lotu ol man i save long en,’ ” maski Yuropian Kot ov Human Raits i bin tokaut olsem dispela tok i stret long ol Witnes. Sampela de bihain, narapela nius bilong Atens i kamapim tok bilong wanpela mausman bilong lotu, em i tok: ‘[Ol Witnes Bilong Jehova] ol i no “wanpela lain Kristen,” long wanem, ol i no save bihainim Krais Jisas.’ Yumi kirap nogut long dispela tok bilong ol, long wanem, yumi save tokaut olsem em i bikpela samting long yumi mas bihainim pasin bilong Jisas​—⁠i no gat narapela lotu i save tokaut strong olsem.

12. Taim yumi mekim pait bilong spirit, yumi mas mekim wanem?

¹² Bilong helpim na strongim gutnius, yumi save mekim wok long rot bilong kot. (Filipai 1:⁠7) Na narapela samting, yumi no ken lusim pasin bilong bihainim gut ol stretpela lo bilong God. (Taitus 2:​10, 12) Olsem Jeremaia, yumi ‘redi na kirap i go, na olgeta tok God i givim yumi, em yumi mas autim.’ Yumi no ken larim ol man i pait long God i pretim yumi, nogat. (Jeremaia 1:​17, 18) Tok bilong Jehova, em Baibel, i tokaut klia long stretpela rot yumi mas bihainim. Yumi no ken bilip long “ol man” bilong graun o askim ol lain, em “ol Isip” i piksa bilong ol, long helpim yumi, nogat. (2 Stori 32:8; Aisaia 30:3; 31:​1-3) Taim yumi mekim pait bilong spirit, yumi mas wok yet long bilip strong long Jehova na larim em i soim yumi stretpela rot long bihainim, na yumi no ken ting save bilong yumi yet inap helpim yumi. (Sindaun 3:​5-7) Sapos Jehova i no helpim yumi na lukautim yumi, orait yumi “wok nating” tasol.​—⁠Song 127:⁠1.

Ol i Mekim Nogut Long Ol, Tasol Ol i No Surik

13. Olsem wanem yumi inap tok dispela samting nogut tru ol i mekim long Pikinini bilong God, em i lus nating?

¹³ Jisas em i nambawan man long givim bel long Jehova na em i no surik liklik. Ol birua i bin sutim tok giaman long em olsem em i biruaim gavman na paulim pasin bilong ol man. Pailat i skelim ol dispela tok, na nau em i laik lusim Jisas i go. Tasol ol manmeri, em ol hetman bilong lotu i kirapim ol, ol i singaut long Pailat i mas nilim Jisas long diwai, maski em i no mekim wanpela rong. Ol i singaut long Pailat i mas lusim Barabas, em man i bin kirapim pait long gavman na kilim man i dai na em i stap kalabus! Pailat i tok gen long ol dispela birua olsem em i laik lusim Jisas i go, tasol ol manmeri i strong tumas, olsem na em i bihainim laik bilong ol. (Luk 23:​2, 5, 14, 18-​25) Tasol maski Jisas i dai long pos diwai, dispela samting nogut tru ol i mekim long Pikinini bilong God i no gat asua, em i lus nating, long wanem, Jehova i kirapim bek Jisas na em i go antap na kisim bikpela namba na em i stap long han sut bilong God. Long de Pentikos 33 C.E., long rot bilong Jisas i kisim biknem pinis long heven, spirit holi i kapsait na kongrigesen Kristen i kamap​—⁠em olsem wanpela “nupela” lain.​​—⁠2 Korin 5:​17; Aposel 2:​1-4.

14. Wanem samting i kamap taim ol hetman bilong lotu Juda i tok long mekim nogut long ol disaipel bilong Jisas?

¹⁴ Bihain liklik ol hetman bilong lotu ol i tok long mekim nogut long ol aposel, tasol ol dispela manmeri i bihainim Krais ol i tok ol i no inap pasim maus; ol i mas autim tok long ol samting ol i bin lukim na harim. Ol disaipel bilong Jisas i beten long Jehova: “Yu mas tingting nau long olgeta tok ol i mekim bilong pretim mipela, na yu mas helpim mipela ol wokboi bilong yu. Olsem na bai mipela i ken strong tru long autim tok bilong yu, na mipela i no ken pret.” (Aposel 4:29) Jehova i harim beten bilong ol na givim spirit holi long ol na strongim ol long autim tok yet na no ken pret. I no longtaim na ol i tambuim ol aposel gen long ol i no ken autim tok, tasol Pita na ol narapela aposel i tok: “Mipela i mas bihainim tok bilong God tasol. Mipela i no ken bihainim tok bilong ol man.” (Aposel 5:29) Maski ol birua i pretim ol, na holimpas ol, na paitim ol, dispela i no inap pasim ol aposel long autim tok bilong Kingdom i go long planti hap.

15. Gamaliel i husat? Em i givim wanem tok long ol man bilong lotu i birua long lain bilong Jisas?

¹⁵ Ol hetman bilong lotu i mekim wanem? “Ol i belhat nogut tru, na ol i laik kilim ol aposel i dai.” Tasol wanpela Farisi na tisa bilong Lo, nem bilong em Gamaliel, em i stap. Olgeta manmeri i save litimapim nem bilong em. Em i salim ol aposel i go stap ausait long haus kaunsil inap sotpela taim liklik, na em i givim tok long ol dispela man bilong lotu i birua long ol, olsem: “Yupela man bilong Israel, sapos yupela i laik mekim wanpela samting long ol dispela man, mobeta yupela i tingting gut pastaim. . . . Yupela i no ken mekim wanpela samting long ol dispela man. Nogat. Yupela i mas larim ol i stap. Sapos dispela wok ol i mekim em i kirap long tingting bilong ol man tasol, orait em bai i bagarap. Tasol sapos God yet i kirapim dispela wok, orait yupela bai i no inap pasim ol. Nogut yupela i pait long God!”​​—⁠Aposel 5:​33-39.

I No Gat Wanpela Samting Bilong Pait Inap Bagarapim Yumi

16. Long tok bilong yu yet, bai yu stori olsem wanem long ol tok Jehova i givim long lain bilong em bilong strongim ol?

¹⁶ Tok bilong Gamaliel i gutpela, na yumi save tenkyu taim ol man i tokaut na helpim yumi. Yumi save tu olsem ol tok ol gutpela jas i bin pasim long kot i bin helpim pasin bilong i stap fri long lotu. Tasol ol pris pasto bilong ol lotu i holim nating nem Kristen na ol narapela bikman bilong Bikpela Babilon, em olgeta lotu giaman, ol i no amamas long yumi bihainim Tok Bilong God. (KTH 18:​1-3) Tasol maski ol yet wantaim ol man ol i pulim ol, ol i pait long yumi, yumi ken kisim strong long dispela tok: “I no gat wanpela bilong ol dispela samting bilong pait inap bagarapim yu. Na bai yu sanap strong na bekim tok bilong ol man i sutim ol kain kain tok long yu. Long dispela pasin mi save was gut long olgeta wokman bilong mi na mekim ol i win.”​​—⁠Aisaia 54:⁠17.

17. Maski ol birua i pait long yumi, bilong wanem yumi gat strongpela bel?

¹⁷ Ol birua i pait long yumi, maski i no gat as, tasol yumi no save pret. (Song 109:​1-3) Maski ol man i bel nogut long ol tok bilong Baibel yumi autim, yumi no ken larim ol i pretim yumi na yumi lusim lo bilong God, nogat. Dispela pait bilong spirit yumi mekim em bai kamap bikpela moa, tasol yumi save ol birua bilong yumi ol i no ken win. Olsem Jeremaia, dispela tok profet bai kamap tru long yumi tu: “Bai ol dispela man i birua long yu, tasol ol bai i no inap daunim yu. Long wanem, mi yet mi stap wantaim yu na bai mi helpim yu. Mi Bikpela mi tok pinis.” (Jeremaia 1:​19) Em nau, yumi save, ol man i pait long God ol i no inap win!

[Futnot]

Bai Yu Bekim Olsem Wanem?

• I gat wanem as na ol birua i bin pait long ol wokboi bilong Jehova?

• Wanem sampela samting ol birua i bin mekim long lain bilong Jehova?

• Olsem wanem yumi save ol man i pait long God ol i no inap win?

[Piksa long pes 17]

Jehova i tokim Jeremaia, em bai sambai long em

[Piksa long pes 18]

Ol i no bin dai long ol banis kalabus nogut

[Piksa long pes 18]

Ol man i bung bung bilong mekim nogut long ol Witnes Bilong Jehova

[Piksa long pes 18]

J. F. Rutherford na ol wanwok bilong em

[Piksa long pes 21]

Ol man i pait long God na mekim nogut long Jisas, ol i no win