Laip i Gutpela Olgeta—Em i No Driman Nating!
Sindaun bilong ol man i gutpela olgeta—yu ting dispela tok i makim wanem samting? Tingim wanpela taim i no gat pasin raskol, ol man i no kisim drak, i no gat hangre, ol man i no stap rabis, na ol pasin i no stret i no stap. Bel na tingting na skin bilong olgeta manmeri i stap gut. No gat krai o bel hevi, long wanem, dai i pinis olgeta. Olsem wanem? I gat as na yumi ken wetim dispela kain sindaun?
MASKI ol man bilong saiens i kisim save long wokim ol kain kain nupela samting, planti man i no bilip save bilong ol man bai kamapim nupela sindaun i gutpela olgeta na olgeta manmeri bai stap bel isi na amamas. Tasol ol man i laik stretim ol samting i no stret na mekim ol samting i kamap gutpela moa. Ol driman nating i no inap helpim ol man i no gat ples slip na ol man i stap rabis, na em i no inap helpim ol man em skin bilong ol i bagarap na ol man i gat sik em ol i laik bai hevi bilong ol i ken pinis. Ol man i no inap kamapim sindaun i gutpela olgeta. Tasol maski long nau ol man i gat planti hevi na ol i mekim nogut long narapela man, i gat as na yumi inap bilip tru olsem klostu nau sindaun bilong ol man bai kamap gutpela olgeta.
Taim yu tingim laip i gutpela olgeta, ating bai yu tingim laip bilong Krais Jisas. Tasol i no olsem Jisas wanpela tasol i bin stap gutpela olgeta long graun. Nogat. God i bin wokim Adam na Iv i kamap olsem em yet na tupela i stap gutpela olgeta long Paradais. Tasol ol i bikhet long Papa bilong ol long heven olsem na laip bilong ol i gutpela olgeta i bin lus. (Stat 3:1-6) Man bilong wokim olgeta samting i putim laik bilong i stap oltaim long bel bilong ol man. Saveman 3:11 (NW ) i tokaut long dispela olsem: “Em i wokim olgeta samting i gutpela tru na i kamap long taim bilong en. Em i putim tingting bilong laip i stap oltaim long bel bilong ol man, bambai ol i no inap save long olgeta samting God [tru] i mekim long bipo yet i go inap long bihain tru.”
Sin na ol hevi sin i kamapim i mekim na “olgeta samting i stap nogut” na ol manmeri i stap long “kalabus bilong bagarap,” tasol lukim tok bilong mekim gut bel em aposel Pol i mekim: “Olgeta samting God i bin wokim, ol i wetim taim God i makim bilong kamapim ples klia yumi ol pikinini bilong en. . . . Nau olgeta samting i stap nogut na i save bagarap. Dispela i no kamap long laik bilong ol yet. Nogat. God yet i mekim ol i stap olsem, bai ol i wetim gutpela samting God i laik mekim long ol. Long taim God i makim, God bai i pinisim dispela kalabus bilong bagarap . . . , na bai olgeta samting i stap gutpela tru wantaim yumi ol pikinini bilong God.” (Rom 8:19-21) Baibel i kamapim klia olsem long rot bilong Krais Jisas, God i stretim ol samting bambai ol man bilong graun i ken kamap gutpela olgeta.—Jon 3:16; 17:3.
Yumi bilip olsem dispela gutpela samting bai kamap long bihain, na tu, long nau yumi inap wok long kamap strong long ol samting bilong spirit, na kamapim klia olsem pasin bilong yumi i kamap gutpela moa.
Bihainim Gutpela Tingting
Krais Jisas i ting pasin bilong i stap gutpela olgeta em i bikpela samting, olsem na em i tokim wanpela bikpela lain manmeri: ‘Yupela i mas i stap gutpela olgeta, olsem Papa bilong yupela i stap long heven em i stap gutpela olgeta.’ (Matyu 5:48) Olsem wanem? Jisas i ting yumi inap i stap gutpela olgeta long dispela taim nogut bilong nau? Nogat. Yumi mas wok strong long bihainim pasin bilong givim samting bilong helpim narapela, na mekim gutpela pasin, na pasin sori long ol manmeri, tasol planti taim yumi no save mekim samting i stret. Wanpela aposel bilong Jisas i tok: “Sapos yumi autim sin bilong yumi, orait God bai i mekim olsem em i bin tok. Em bai i mekim stretpela pasin na lusim sin bilong yumi. Na em bai i rausim olgeta pasin nogut i stap long yumi na mekim yumi i kamap klin. Sapos yumi tok, ‘Mi no bin mekim sin,’ orait long dispela tok yumi kolim God em i man bilong giaman. Olsem na tok bilong God i no i stap long bel bilong yumi.”—1 Jon 1:9, 10.
Tasol yumi inap kisim stretpela tingting long yumi yet na ol pasin yumi save mekim long ol narapela, na abrusim pasin bilong strong tumas long wanpela kain tingting. Ol gutpela tok bilong helpim man long bihainim pasin isi na stretpela pasin i stap long Baibel tasol, a? Taim yumi wok strong long bihainim pasin bilong amamas na pasin bilong mekim ol samting inap long skel, orait dispela bai helpim yumi long pas gut wantaim ol manmeri long ples wok, na poroman marit bilong yumi, na wantaim papamama o ol pikinini bilong yumi. Aposel Pol i tokim ol Kristen olsem: “Oltaim yupela i mas amamas long Bikpela. Mi tok gen, yupela i mas amamas. Yupela i mas isi isi long olgeta man na larim ol i lukim dispela gutpela pasin bilong yupela.”—Filipai 4:4, 5.
Ol Gutpela Samting Yumi Kisim Taim Yumi Bihainim Gutpela Tingting
Sapos yu bihainim gutpela tingting taim yu putim mak long ol samting yu laik mekim, orait dispela bai helpim yu na ol narapela, na bai yu abrusim pasin bilong ting olgeta samting yu mekim i mas kamap gutpela olgeta em dispela pasin i save givim pen long yu na daunim yu. Bilong save tru wanem wok yu inap mekim, yu mas bihainim gutpela tingting na tingting stret long ol samting yu laik mekim. No ken lusim tingting, God i wokim yumi bilong i stap long graun na amamas long mekim ol wok i gat as bilong en bilong helpim yumi yet na ol narapela.—Stat 2:7-9.
Sapos yu bin putim ol mak long yu yet em ol i antap tumas na yu no inap winim, gutpela yu beten long Jehova. Bel bilong yu bai i stap isi taim yu mekim ol samting bilong God i ken orait long yu. Jehova i save long bel na tingting bilong yumi na em i save yumi no gutpela olgeta, olsem na em i bihainim pasin isi na i no hatwok long amamasim em. Man bilong raitim Song i strongim yumi olsem: “Papa i save sori long ol pikinini bilong en. Olsem tasol Bikpela i save sori long ol manmeri i pret long em. Em i save olsem em i bin kisim graun na wokim yumi na em i tingim yumi i olsem das tasol.” (Song 103:13, 14) Yumi ken amamas, long wanem, God i save marimari long yumi ol man bilong graun! Em i save yumi no inap mekim stret olgeta samting, tasol long ai bilong em yumi inap i stap olsem pikinini em i laikim tumas.
Maski long bihainim pasin bilong ting olgeta samting i mas kamap gutpela olgeta, mobeta yumi wok long kisim pasin bilong skelim gut ol samting bilong spirit na bihainim stretpela tingting! Na tu, yumi ken save i no gat wanpela man inap pasim Jehova long kamapim laik bilong em long mekim olgeta manmeri bilong graun i kamap gutpela olgeta long rot bilong Kingdom bilong God. Tasol wanem insait bilong dispela tok ol man i stap gutpela olgeta?
Laip i Gutpela Olgeta i Winim Pasin Bilong Ting Olgeta Samting i Mas Kamap Gutpela Olgeta
Laip i gutpela olgeta i no wankain olsem pasin bilong ting olgeta samting i mas kamap gutpela olgeta. Ol manmeri i stap long Paradais long graun aninit long Kingdom bilong God bai ol i no strong long ol man i mas bihainim tingting bilong ol na ting ol yet i stretpela man. Ol man i laik winim bikpela hevi tru ol i mas winim wanpela mak em i olsem: Ol i mas pilim tru long bel ol samting ofa bilong Krais i mekim long ol, wankain olsem bikpela lain bilong olgeta kantri em Jon i bin lukim, na ol i tok: “God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi.” (KTH 7:9, 10, 14) Olgeta manmeri bai winim taim bilong bikpela hevi tru em i wok long kam klostu nau, ol bai amamas, long wanem, long laik bilong em yet, Krais i bin dai bilong helpim ol wantaim ol narapela manmeri i bilip long em. Ofa em i mekim long pasin sori em i opim rot bilong ol long kisim malolo long ol sin na popaia bilong ol.—Jon 3:16; Rom 8:21, 22.
Laip i gutpela olgeta em i wanem kain laip? Pasin sori na gutpela pasin bai senisim pasin bilong resis long winim narapela na strong long kisim biknem, na ol manmeri bai stap amamas na pasin bilong tingting planti na ting yu no inap mekim wanpela gutpela wok em bai pinis. Tasol bai yumi no les long laip i gutpela olgeta. Tok Bilong God i no stori long olgeta samting bilong Paradais, tasol em i stori long sindaun yumi inap wetim: “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam . . . na sindaun long ol haus bilong ol na kisim ol gaden wain bilong ol na wokim wain na dring. Ol manmeri bilong mi bai i stap longpela taim tru, olsem ol strongpela diwai. Na bai ol i amamas long ol samting ol yet i bin hatwok long kamapim. Wok ol i mekim bai i no inap lus nating. Na ol pikinini bilong ol bai i no inap painim bagarap.”—Aisaia 65:21-23.
No ken tingting nating long wanem kain amamas, na stua, na masin, o wanem kain ka, bas, o balus, bai yumi mekim wok long en long Kingdom, nogat; tingim truim bilong dispela tok profet: “Ol wel dok na ol pikinini sipsip bai i kaikai wantaim. Na ol laion bai i kaikai gras olsem ol bulmakau. Na ol snek bai i kaikai das bilong graun tasol. Na long . . . maunten bilong mi Bikpela, bai olgeta samting i stap gut wantaim, na bai i no gat wanpela i mekim nogut long ol arapela. Mi Bikpela, mi tok pinis.” (Aisaia 65:25) Laip i gutpela olgeta bai i narapela kain olgeta long laip bilong yumi long nau! Sapos yu wanpela bilong ol manmeri ol i winim mak bilong i stap laip long dispela taim, bai yu gat as long bilip olsem Papa bilong yu long heven em i tingim yu wantaim famili bilong yu. “Yu mas amamas long Bikpela, na em bai i givim yu ol samting yu laikim tru.”—Song 37:4.
Laip i gutpela olgeta em i no wanpela driman tasol. Laik bilong Jehova long ol manmeri bai kamap tru. Yu wantaim famili bilong yu inap i stap namel long ol manmeri i kamap gutpela olgeta na i stap oltaim oltaim long nupela graun bilong God. Baibel i tok profet olsem: “Ol stretpela man bai i kisim graun God i givim ol, na bai ol i stap oltaim long en.”—Song 37:29.
[Piksa long pes 6]
Yumi inap kisim stretpela tingting long yumi yet na ol narapela, na abrusim pasin bilong ting olgeta samting i mas gutpela olgeta
[Piksa long pes 7]
Gutpela sapos long ai bilong tingting yu lukim olsem yu stap pinis long taim bilong stretpela pasin na bel isi long Paradais