Olgeta Samting i Mas Kamap Gutpela Olgeta—Bilong Wanem Yumi Mas Lusim Dispela Kain Tingting?
Olsem wanem? Yu save wok strong bambai wok bilong yu i kamap gutpela tru? Taim yu mekim olsem dispela inap helpim yu na ol manmeri i stap klostu long yu. Tasol sampela i kirap na bihainim pasin olsem olgeta samting ol i mekim i mas kamap gutpela olgeta. Dispela i makim ol i bihainim wanem kain pasin?
WANPELA buk i stori long dispela pasin olsem: Sapos man i mekim wanpela wok na em i no kamap gutpela olgeta, em i ting dispela wok i no gutpela. Ating yu bin bungim sampela man i gat dispela kain tingting. Yu inap luksave olsem dispela kain pasin inap kamapim planti hevi na ol man i no pilim amamas long wok ol i mekim na ol i stap bel hevi. Planti manmeri i gat stretpela tingting, ol i save pasin bilong ting olgeta samting long sindaun na wok bilong man i mas kamap gutpela olgeta, dispela i no gutpela tingting. Em i wanpela pasin yumi mas lusim. Tasol hevi i save kamap taim yumi yet i gat dispela pasin na yumi yet i no inap luksave olsem yumi wok long bihainim dispela pasin, olsem na em i hatwok long lusim.
Nelson i gat planti wok em i mas mekim na planti hevi bilong stretim. Oltaim em i save skelim ol namba samting, na em i ting namba wan samting em ol wokman i mas kamapim planti samting. Ol wok bisnis i resis wantaim, olsem na planti man i pilim olsem ol i mas mekim wok bilong ol i kamap gutpela olgeta long olgeta taim. Ating sampela i amamas long wok bilong Nelson, tasol dispela pasin long mekim wok i kamap gutpela olgeta i givim hevi long skin bilong em, olsem het i pen na em i tingting planti. Olsem wanem? Yu gat wankain hevi olsem Nelson?
Dispela pasin i save givim hevi long ol yangpela tu. Taim Rita bilong Rio de Janero i stap pikinini em i amamas long go long skul. Em i no laik bai ol narapela i ting em i laik kisim namba, tasol sapos em i no kisim ol mak i winim ol wanklas em bai bel hevi stret. Rita i tok: “Kirap long taim mi liklik, mi save skelim mi yet wantaim ol narapela ol i gat planti taim, tasol mi no gat, long wanem, oltaim mi tingting planti na mi hariap hariap long mekim ol samting. Mi pilim olsem mi no gat taim bilong malolo, long wanem, oltaim mi gat sampela wok mi mas mekim.”
Taim Maria i stap liklik pikinini em i save bel hevi na krai taim em i no inap wokim piksa i gutpela olsem sampela narapela yangpela i wokim. Na tu, em i no save amamas taim em i mekim musik na singsing, nogat, em i pilim bel hevi na tingting planti, long wanem, em i laik bai musik na singsing bilong em i mas kamap gutpela olgeta. Narapela meri Brasil, nem bilong em Tânia, long pasin daun em i abrusim pasin bilong resis wantaim ol narapela, tasol em i tokaut olsem long skul na long haus em i save putim ol mak em i mas winim i go antap tumas. Em i pilim olsem sapos wok em i mekim i no kamap gutpela olgeta ol manmeri i no inap laikim em tumas. Na tu, sampela taim Tânia i ting ol narapela manmeri i mas mekim wok bilong ol i kamap gutpela moa, na taim ol i no mekim em i pilim bel hevi.
Tru, gutpela save long mekim wanpela wok, na givim bel long mekim, na amamas long mekim wok em i bikpela samting, tasol sapos yu putim ol mak yu no inap winim, ating bai yu pilim olsem yu no inap mekim gutpela wok. Ating ol papamama o sampela narapela ol i laik bai ol yangpela i mas winim ol mak i antap tumas long skul o long spot na ol yangpela bai hatwok long inapim dispela. Olsem mama bilong Ricardo i bin mekim. Em i laik bai Ricardo i mas kamap dokta, na pilaim piano, na lainim sampela tok ples. Yu inap luksave olsem dispela kain tingting inap kamapim ol hevi o bel hevi, a?
Bilong Wanem Yumi Mas Abrusim Dispela Pasin?
Ol kampani i laikim ol man i mekim ol wok i nambawan tru, na samting ol i wokim i wok stret tru na i nambawan. Olsem na ol manmeri i mas resis long kisim wok mani. Planti ol i pret long lusim wok mani bilong ol na dispela samting i save kirapim ol long wok strong moa. Sampela wokman i kain olsem wanpela man bilong pilai spot em i bin trening strong tru bilong winim wanpela mak ol narapela i no bin winim. Bihain em i mas resis wantaim sampela narapela na em i pilim olsem em i mas trening moa yet na kisim sampela marasin i olsem drak bambai em inap kamap strong moa na em inap win. Ol man i lusim stretpela tingting long mekim ol wok i nambawan tru, na ol i ting wok ol i mekim i mas kamap gutpela olgeta, olsem na “pret i save kirapim ol, nogut ol i no inap mekim gut ol samting” o ol i “wok strong tru bilong stap namba wan.”—Buk The Feeling Good Handbook.
Tru, sampela i pilim olsem ol samting ol i mekim bilong malenim piksa o pilaim musik samting o long spot ol inap mekim i kamap gutpela moa. Tasol Dokta Robert S. Eliot i tok, “pasin bilong ting olgeta samting yu mekim i mas kamap gutpela olgeta em i wanpela mak yu no inap winim. Ol man i gat dispela pasin bai pilim olsem bel bilong ol i gat tok, na ol i mas tokim ol man long as na ol i mekim ol samting, na ol i pret long ol man bai tok bilas long ol.” Olsem na tok bilong saveman King Solomon em i tru: “Ol man i save hatwok tru na ol i wokim olkain gutpela samting. . . . Ol i ting long ol wantok i gat biknem na planti samting. Na ol i mekim planti wok bilong kamap wankain olsem ol wantok. Dispela em i longlong pasin tru. I olsem man i ran i go bilong holimpas win.”—Saveman 4:4.
Yu ken mekim wanem sapos yu save ting olsem ol wok i mas kamap gutpela olgeta? Olsem wanem? Yu pilim olsem maski yu wok strong moa, bihain yu bel hevi moa yet long wok bilong yu? Yu gat laik long i stap isi na no ken tingting planti long olgeta taim? Wanem insait bilong dispela tok stap gutpela olgeta? Yu gat laik long mekim olgeta samting yu inap long mekim, tasol yu laik abrusim pasin bilong ting olgeta samting yu laik mekim i mas kamap gutpela olgeta? Sapos ol sinman inap mekim wok long save na strong God i bin givim long ol bilong painim ol samting em inap helpim ol man, orait tingim ol samting ol man inap mekim sapos sindaun bilong ol i gutpela olgeta na God i stiaim ol!
[Piksa long pes 4]
Ol papamama na ol narapela inap putim ol mak i antap tumas na ol yangpela i no inap winim