Bilong Wanem Yumi No Ken Putim Ol Mak i Antap Tumas?
TAIM ol samting yumi wet long en i kamap tru, na taim yumi gat strongpela laik long mekim wanpela samting na yumi winim dispela mak na mekim tru, yumi amamas. Tasol yumi save, planti samting yumi tingting long mekim na ol samting yumi wet long en ol i no save kamap olsem yumi bin ting ol bai kamap. Taim yumi bel hevi planti taim long ol samting i no bin kamap olsem yumi laikim, dispela inap mekim na yumi kros long yumi yet na long ol narapela. Wanpela saveman i bin tok: “Sapos man i ting long kisim wanpela samting na i wet nating longpela taim, bai em i bel hevi moa yet.”—Sindaun 13:12.
Wanem sampela samting inap mekim na yumi bel hevi long ol wok samting bilong yumi i no kamap gutpela? Olsem wanem i gutpela long putim ol mak yumi inap winim? Na tu, taim yumi mekim olsem, dispela inap helpim yumi olsem wanem?
Bel Hevi Long Ol Mak Yumi No Inap Winim
Long nau ol man i hariap hariap long mekim ol samting, na taim yumi laik hariap yumi no save mekim stret ol samting. Yumi lusim bikpela hap taim na strong bilong yumi, na taim yumi no pinisim samting yumi tingting long mekim, dispela inap mekim na yumi kros long yumi yet. Na tu, yumi bai kirap na ting olsem yumi mekim ol narapela i bel hevi. Cynthia em wanpela meri marit na em i wanpela mama na em i save long hatwok bilong mekim wok mama. Em i tok: “Taim mi stretim wanpela pikinini na mi no stretim narapela, na taim mi pilim olsem mi no lainim ol gut, dispela i mekim na bel bilong mi i kros.” Stephanie em wanpela yangpela, na em i tingim skul bilong em na i tok: “Mi no gat taim bilong mekim olgeta samting mi laik mekim, na dispela i mekim na bel bilong mi i no i stap isi.”
Sapos yumi putim mak i antap tumas, dispela inap mekim na yumi kirap kisim tingting olsem olgeta samting yumi mekim i mas stret olgeta, na dispela inap mekim na yumi bel hevi tru taim yumi no inap winim dispela mak. Ben em i wanpela yangpela man marit, na em i tok olsem: “Taim mi skelim ol pasin na tingting na laik bilong mi, oltaim mi save lukim olsem mi inap mekim gut moa dispela samting. Oltaim mi laik bai olgeta samting i mas stret olgeta, na dispela i mekim na mi les kwik, na kros, na mi bel hevi.” Gail em wanpela meri marit Kristen, na em i tok: “Ol man i gat dispela tingting olsem olgeta samting i mas stret olgeta, ol i laik bai olgeta samting ol i mekim i mas stret tasol na i no gat liklik popaia long en. Mipela i laik kamap nambawan mama tru na nambawan meri marit tru. Taim mipela i mekim planti samting mipela i amamas, olsem na taim mipela i hatwok nating, dispela i save mekim na mipela i kros.”
Tasol narapela samting inap mekim na man i no amamas, em sik na lapun. Taim yumi no inap wokabaut gut na yumi no gat strong, dispela i kamapim klia olsem yumi no inap mekim planti samting, na dispela i mekim na yumi bel hevi. Elizabeth i tok: “Mi les kwik long mi yet, long wanem, nau mi no inap mekim gut ol wok samting em mi inap mekim wantu tasol taim mi no kisim sik yet.”
Em nau, yumi stori pinis long sampela samting inap mekim na man i bel hevi. Sapos yumi no wok long daunim dispela kain tingting, em inap mekim na yumi ting olsem ol narapela i no save amamas long yumi. Olsem na yumi ken mekim wanem na bai yumi no bel hevi tumas taim yumi no winim mak yumi bin putim? Na yumi ken mekim wanem bilong kisim pasin bilong putim ol mak i no antap tumas?
Rot Bilong Putim Ol Mak Yumi Inap Winim
Jehova i save long skel bilong yumi long mekim ol samting. Song 103:14 i tok: “Em i save olsem em i bin kisim graun na wokim yumi na em i tingim yumi i olsem das tasol.” Jehova i save long ol samting yumi inap mekim na ol samting yumi no inap mekim, na em i laik bai yumi mekim ol samting yumi inap long mekim. Na wanpela samting em i laik yumi mas mekim i olsem, yumi mas “daunim tingting bilong yumi yet na i stap wanbel wantaim God bilong yumi, na bihainim em wanpela tasol.”—Maika 6:8.
Na tu, Jehova i tokim yumi long kisim helpim long em long rot bilong beten. (Rom 12:12; 1 Tesalonaika 5:17) Tasol olsem wanem dispela i helpim yumi? Beten i save strongim yumi na mekim yumi i gat stretpela tingting. Taim yumi beten strong, dispela i makim olsem yumi laik kisim helpim—em i makim olsem yumi gat pasin daun na yumi save yumi no inap winim mak i antap tumas. Jehova i gat laik long harim beten bilong yumi na givim spirit holi long yumi, em i save kamapim pasin bilong laikim ol arapela, helpim ol man, mekim gutpela pasin long ol na pasin bilong daunim laik bilong yumi yet. (Luk 11:13; Galesia 5:22, 23) Beten i save helpim yumi long daunim pasin bilong tingting planti na bel hevi long ol samting yumi no inap mekim. Elizabeth i tok, long rot bilong beten “yu inap kisim ol tok bilong strongim yu, em yu no inap painim long narapela rot.” Kevin i tok: “Mi beten bilong kisim bel isi na stretpela tingting na bai mi inap stretim wanpela hevi i painim mi. Jehova i no save lusim mi.” Aposel Pol i save olsem i gutpela samting tru long beten. Olsem na em i tok: “Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru. . . . Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” (Filipai 4:6, 7) Em nau, taim yumi toktok wantaim Jehova, dispela i save helpim yumi tru long kisim pasin bilong putim ol mak em yumi na ol narapela inap long winim.
Tasol sampela taim yumi laik bai wantu wanpela man i mas tokim yumi olsem yumi inap winim dispela mak. Tok man i mekim long taim stret i gutpela na em inap helpim man. Yumi ken kamapim sampela hevi bilong yumi yet long wanpela pren yumi save bilip tru long em, na em bai helpim yumi long kisim sampela tingting long wanem ol samting i save mekim na yumi bel hevi o tingting planti. (Sindaun 15:23; 17:17; 27:9) Ol yangpela i save hatwok long daunim bel hevi ol i kisim save olsem, taim ol i askim papamama long givim sampela tok long ol, dispela i save helpim ol long kisim stretpela tingting long ol samting ol i mas mekim. Kandi i pilim tru dispela samting na em i tok: “Papamama i soim gutpela rot long mi na mi no putim mak i antap tumas na mi kisim stretpela tingting na ol narapela inap pas gut wantaim mi.” Em nau, dispela tok i stap long Sindaun 1:8, 9 i stret tru: “Pikinini, yu mas harim tok bilong papamama bilong yu na yu no ken sakim tok bilong tupela. Tok bilong tupela bai i mekim yu i kamap gutpela man, olsem yu putim naispela bilas long het bilong yu na naispela bis i stap long nek bilong yu.”
Ol samting i save kamap taim yumi tingting olsem olgeta samting i mas stret olgeta, dispela i stret wantaim wanpela tok bilong ol man, olsem: “Sapos yumi laik bai ol samting yumi mekim i mas stret olgeta olsem yumi laikim, dispela bai mekim na yumi bel hevi.” Bilong abrusim dispela hevi, yumi mas senisim tingting bilong yumi. Sapos yumi gat pasin daun na yumi gat stretpela tingting long ol mak yumi no inap winim, bai yumi no putim ol mak i antap tumas. Rom 12:3 i toksave olsem yumi ‘no ken ting save na pasin bilong yumi i winim ol arapela. Nogat.’ Na tu, Filipai 2:3 i strongim yumi long daunim yumi yet na ting olsem ol narapela i winim yumi.
Elizabeth, em yumi bin stori long em pastaim, em i les kwik long em yet, long wanem, em i gat sik. Em i ting olsem em i mas i gat sampela hap taim bambai em i ken save long tingting bilong Jehova long ol samting na dispela inap strongim bel bilong em olsem Jehova i no save lusim tingting long ol wok yumi mekim. Colin i bin kisim wanpela sik i save pinisim strong bilong man, na dispela i mekim na em i no inap wokabaut. Taim em i no bin kisim dispela sik yet em i save mekim bikpela wok autim tok, tasol nau em i no save mekim bikpela wok, olsem na em i save pilim olsem wok bilong em i no gutpela. Em i tingim tingim ol tok bilong Baibel, olsem tok i stap long 2 Korin 8:12, na dispela i helpim em long rausim tingting kranki bilong em. Dispela ves i tok: “Sapos man i laikim tumas long givim samting, orait God i laikim tumas long kisim. God i save ting long ol samting ol wan wan man ol inap long givim, na em i kisim ol samting ol i givim. Em i no save ting long ol samting man i no gat, na em i skelim pasin bilong en.” Colin i tok: “Maski mi no mekim planti samting, tasol mi save mekim dispela wok, na Jehova i orait long en.” Hibru 6:10 i tokim yumi olsem: “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em.”
Orait olsem wanem yumi ken save ol mak yumi putim i no antap tumas? Yu ken askim yu yet olsem, ‘Ol mak mi putim i stret wantaim ol mak God i laikim?’ Galesia 6:4 i tok: “Olgeta man i mas skelim wok bilong ol yet, em i gutpela o nogat. Man i mekim olsem, em i ken amamas long pasin em yet i mekim na em i no ken skelim pasin bilong en wantaim pasin bilong narapela man.” Tingim tok bilong Jisas: “Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.” Em nau, yumi ol Kristen yumi gat plang bilong karim, tasol em i “isi long karim” na “em i no hevi,” na Jisas i tok promis olsem sapos yumi lain long karim gut dispela plang, bai yumi kisim malolo, olsem nupela strong.—Matyu 11:28-30.
Taim Yumi Putim Ol Mak i Stret Dispela i Save Kamapim Amamas
Taim yumi harim na bihainim ol tok bilong Baibel bilong stretim yumi na yumi wok long kisim pasin bilong putim ol mak yumi inap long winim, bai yumi kisim blesing long nau na i go inap oltaim oltaim. Wanpela samting i olsem: Skin bilong yumi i stap gut. Ol tok bilong Jehova i bin helpim wanpela meri nem bilong em Jennifer, na em i tokaut olsem: “Nau mi gat bikpela strong long mekim ol wok, na mi givim bel long mekim ol samting long i stap bilong mi.” Tok bilong Sindaun 4:21, 22 i stret, em i tokim yumi long putim gut yau long ol tok bilong Jehova, long wanem, “dispela tok bai i givim laip long [yumi]. Dispela tok inap mekim [yumi] i stap gut tru.”
Narapela gutpela samting moa yumi kisim, em tingting na bel i stap gut. Theresa i tok: “Taim mi putim Tok Bilong God i go long tingting na bel bilong mi, mi pilim olsem mi stap amamas.” Tru, sampela taim bai yumi bel hevi yet long sampela samting yumi gat bikpela laik long mekim tasol em i no kamap gut. Tasol bai yumi save long pasin bilong karim dispela hevi. Jems 4:8 i tok: “Yupela i mas i go klostu tru long God, na em bai i kam klostu tru long yupela.” Maski yumi stap we, Jehova i tok promis olsem em bai strongim yumi long karim ol hevi i painim yumi long i stap bilong yumi, na em bai mekim gut long yumi na givim bel isi long yumi.—Song 29:11.
Sapos yumi putim ol mak inap long yumi, dispela bai mekim na yumi stap strong yet long ol samting bilong spirit. Yumi ken tingting tasol long ol bikpela samting long i stap bilong yumi. (Filipai 1:10) Ol mak yumi putim i mas stret na yumi inap winim, na dispela bai mekim na yumi stap amamas na bel gut. Yumi bai gat bikpela laik moa long givim yumi yet long Jehova, long wanem, yumi save em bai helpim yumi na ol samting yumi mekim bai kamap gutpela. Pita i tok: “Yupela i mas daunim laik bilong yupela yet na stap aninit long strongpela han bilong God. Na long taim em yet i makim, em bai i litimapim yupela.” (1 Pita 5:6) No gat wanpela samting yumi ken mekim na em inap givim bikpela amamas long yumi olsem pasin bilong givim biknem long Jehova, a?
[Ol Piksa long pes 31]
Sapos yumi kisim pasin bilong putim ol mak em yumi inap winim, dispela bai helpim yumi na yumi no ken bel hevi tumas taim yumi no winim ol mak