Yu Inap Karim Ol Hevi!
TINGIM hevi bilong wanpela yangpela man i gat 23 krismas. Em i no bin skul gut, na em i kisim liklik pe tasol long wok mani bilong em. Olsem na em i ting em i no inap marit na kisim gutpela sindaun. Mama bilong em i tok: “Em i bel hevi tru long dispela samting.” Tasol i gat planti milion manmeri ol i stap bel hevi olsem. I gat kain kain as na planti manmeri long nau i bel hevi na ol i no save long rot bilong helpim i stap bilong ol.
Wanpela buk i stori long ol samting i mekim na man i bel hevi—olsem em i tingting planti long i stap bilong em, o wanpela wok samting bilong em i no kamap gutpela, o em i no gat rot long inapim sampela laik bilong em, o i gat sampela hevi moa em i no inap stretim. (Buk Webster’s Third New International Dictionary) Yumi tu, taim yumi wok strong long mekim wanpela wok, tasol em i no kamap gutpela, yumi bel hevi. Ating dispela i painim yu tu, a?
Sampela kain wok ol man i mas mekim i olsem i no gutpela wok na i no gat nem, na ol man i mekim kain wok olsem ol i ting ol i samting nating tasol na ol i bel hevi. Na ol meri marit na ol mama tu, ol i save mekim bikpela wok long olgeta de, na ol i gat planti hevi tu, tasol sapos famili bilong ol i no tok tenkyu long em o tokaut olsem em i bin mekim gutpela wok, ating mama bai bel hevi na em bai ting ol i no amamas long wok em i bin mekim. Na hevi i save painim sampela yangpela long skul na ol i hatwok long skul gut na kisim gutpela save, na ol i bel hevi. Na sampela bilong narapela lain o bilong narapela kain skin ol i pilim olsem ol man i laik daunim ol na mekim nogut long ol, na ol i bel hevi long dispela. Na sampela bisnisman i laik bihainim stretpela pasin long wok bisnis bilong ol na wokim gut ol samting. Tasol sampela taim bisnis bilong ol i bagarap, long wanem, sampela bisnisman i mekim pasin giaman na paulim ol wok na nau bisnis bilong ol i kamap gutpela na i daunim bisnis bilong ol dispela stretpela man, na nau ol i bel hevi.
Wanpela saveman tru bilong bipo, em King Solomon, em i bel hevi long ol wok bilong em na em i tok: “Mi tingting gut long ol dispela samting mi bin mekim long hatwok bilong mi, na mi pilim olsem, olgeta dispela samting i olsem samting nating tasol na i no inap long helpim mi liklik. . . . Oltaim yumi save hatwok na tingting planti long ol samting, tasol dispela i bekim wanem gutpela samting long yumi? Taim yumi stap long dispela graun, olgeta samting i mekim yumi wari tru na bel hevi. Na long nait yumi wok yet long tingting planti na i no gat malolo bilong yumi.” (Saveman 2:11, 22, 23) Tok bilong Solomon i kamapim stret kain bel hevi em planti man i kisim long nau, na ol i no amamas long i stap bilong ol.
Sampela man i laik kisim ol samting ol i ting i stret long kisim, na ol i kirap mekim pasin raskol. Na sampela taim planti hevi i painim ol marit na nau marit i bagarap na famili i bruk.
Ating planti bilong yumi i mas wok strong long painim rot bilong karim ol hevi na bai i no ken daunim ol. Sampela taim, maski yumi mekim wanem, dispela hevi i go bikpela. Sindaun 13:12 i tok: “Sapos man i ting long kisim wanpela samting na i wet nating longpela taim, bai em i bel hevi moa yet.” Bel hevi em inap nogutim skin bilong yumi na em inap nogutim yumi long ol samting bilong spirit tu. Tasol olsem wanem? I no gat rot tru bilong stretim ol dispela hevi? Yumi mas ting olsem ol dispela hevi i olsem pe yumi kisim long ol popaia bilong yumi? I gat sampela samting yumi ken mekim bambai bel hevi i no ken daunim yumi na i stap bilong yumi i ken kamap gutpela? Orait nau yumi ken skelim ol dispela samting.
Sampela Rot Bilong Karim Hevi
Taim yumi gat wanpela hevi na yumi laik bai wanpela i givim sampela tok long yumi bilong helpim yumi, yumi save go long wanpela man i gat save long dispela kain samting na yumi save bilip long em. Sindaun 3:5, 6 i tok: “Yu mas bilip strong long [Jehova]. Yu no ken ting save bilong yu yet inap helpim yu. Long olgeta samting yu mekim, yu mas tingting strong long [Jehova] na yu mekim, na em bai i soim yu stretpela rot long bihainim.” Ol gutpela tok bilong helpim yumi i stap long Baibel, em Tok bilong God. Nau yumi ken skelim sampela gutpela tingting Baibel inap givim long yumi.
Sampela i save bel hevi long wok mani bilong ol. Ating ol i laikim dispela wok, tasol pe i liklik tasol. Ol i laik lukautim gut famili bilong ol long ol samting bilong skin, tasol mani bilong ol i sot na oltaim ol i tingting planti long dispela. Olsem na ol i wok ovataim o mekim narapela wok tu bilong kisim hap mani moa. Bihain ol i pilim olsem i stap bilong ol i no gat amamas long en—ol i kaikai na slip na wok—em tasol. Oltaim ol i mas baim paua na wara samting, na ol dinau i go bikpela, na bel hevi tu i go bikpela.
Nambawan samting bilong wok mani bilong yumi, em bilong helpim yumi long kisim ol samting yumi mas kisim. Tasol yumi mas kisim hamas samting? Aposel Pol i tok: “Taim mama i karim yumi na yumi kamap long graun, yumi no bin karim wanpela samting i kam. Na taim yumi lusim graun yumi bai i no inap karim wanpela samting i go. Tasol sapos yumi gat kaikai na laplap samting, orait yumi ken tok, ‘Em inap long mi.’ ” Olsem wanem? Yumi wok long kisim ol dispela samting tasol, o yumi wok long kisim planti samting moa olsem ol narapela man i holim? Sapos olsem, bai yumi inap kisim planti hevi long dispela. Pol i toksave olsem: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na . . . ol bai i bagarap olgeta. . . . Sampela man i bin laikim tumas mani, na dispela pasin i pulim ol na ol i lusim bilip pinis, na ol i karim bikpela hevi moa.” (1 Timoti 6:7-10) Sapos yumi skelim gut laik bilong yumi, olsem yumi laikim tumas ol samting bilong skin o nogat, ating bai yumi lukim olsem yumi wok long kisim planti samting tumas. Sapos olsem, orait yumi ken tingting long lukautim mani na no ken tromoi nating, na yumi ken kisim ol samting inap tasol long helpim sindaun bilong yumi.
Sampela bel hevi bilong ol yangpela i olsem: Ol yangpela meri i gat strongpela laik long marit na i stap amamas, na ol i gat famili bilong ol yet. Olsem na yangpela meri bai bilasim gut skin bilong em na go long ol pati o sosel samting na bai em i ken bungim wanpela yangpela man. Meri i mekim mekim, nogat. Orait, planti yia i lus na em i bel hevi nogut tru. Bihain em i tingting long maritim nating wanpela man i no stret long em. O em bai kirap pren wantaim wanpela man na mekim pasin pamuk.
Sapos wanpela yangpela meri i gat kain hevi olsem, em i no ken les—em i mas tingting gut na skelim gut ol samting em i laik mekim. Sapos em i mekim nating na maritim wanpela man i no stret long em—o wanpela man i no save bilip long Jehova—em i mekim pasin kranki tru. (1 Korin 7:39; 2 Korin 6:14, 15) Pasin pamuk i no inap kamapim wanpela gutpela samting—em bai kamapim bikpela bel hevi tasol. (Sindaun 6:32, 33) Sapos meri i laik marit, em i mas skelim gut pasin na tingting bilong em. Sapos em i bilasim ‘insait bilong bel,’ olsem i stap belgut na bel isi, dispela gutpela pasin bilong em inap mekim na wanpela gutpela man bai i gat laik long maritim em. Dispela gutpela pasin i winim tru ol gutpela gutpela bilas bilong skin taim meri i laik painim wanpela gutpela man i stret long em i ken maritim. (1 Pita 3:3, 4) Na nogut meri i laik i go long ol saveman bilong dispela graun bilong kisim sampela tingting long ol. Em i mas i go long Man i bin kamapim marit long pastaim tru na bai em i ken save, wanem kain meri em man bilong em inap laikim tru. (Sindaun sapta 31) Ol singel i mas wok long kamapim ol gutpela pasin olsem ol i laik bai poroman marit bilong ol i bihainim taim ol i marit pinis. Na ol i mas bung wantaim ol gutpela manmeri i save daun long ol lo bilong Baibel. Sapos ol i mekim olsem, ating ol inap painim wanpela gutpela poroman na ol bai painim amamas long marit bilong ol. Na sapos wanpela singel i no inap painim wanpela gutpela poroman bilong maritim, orait em i mas wok yet long bihainim ol tok bilong Baibel na bai em i stap amamas na kisim ol gutpela blesing bilong ol man na meri singel.
Sapos yumi gat planti wok yumi mas mekim, orait dispela tu inap mekim na yumi bel hevi. Yumi tingting planti long ol samting bilong lukautim gut famili bilong yumi, na long ples wok ating i hatwok long inapim laik bilong bos. Na sapos hevi samting i painim sampela wanblut, ol i singaut long yumi mas helpim ol. Ol dispela planti samting i mekim na ating yumi no gat taim bilong mekim ol wok samting bilong yumi yet. Yumi bel hevi long ol dispela samting i laik daunim yumi, olsem na yumi ting, ‘Maski, mi les pinis!’ Orait, yumi inap mekim wanem bilong karim ol dispela hevi?
Yumi mas skelim ol samting yumi ting i bikpela samting. Yumi no inap mekim olgeta samting bilong helpim ol narapela man, a? Olsem na yumi mas save, wanem samting i “bikpela samting tru” na mekim ol dispela samting. (Filipai 1:10) Olsem Baibel i tok, “dok i gat laip i winim laion i dai pinis.” (Saveman 9:4) Sampela wok i bikpela samting na yumi no inap abrusim, tasol sampela wok i no bikpela samting tumas na yumi ken mekim long narapela taim. Na ating yumi bin tok long mekim wanpela wok, tasol i no wok bilong yumi yet tasol—em samting bilong ol narapela tu i mas mekim. Na sampela wok, sapos i no bikpela samting, orait ating yumi ken lusim olgeta. Tru ating sampela bai bel hevi long yumi no bin mekim dispela wok, tasol nogut yumi winim mak bilong strong bilong yumi na dispela bai nogutim skin na tingting bilong yumi.
Sapos yumi gat wanpela sik na yumi mas slip long bet inap planti de o wik samting, dispela inap mekim na yumi bel hevi tru. Na sapos yumi gat bikpela pen tu bai yumi bel hevi. Yumi go lukim planti dokta o yumi kisim kain kain marasin na bai sik o pen i pinis, tasol nogat. Em nau, bai yumi les long i stap laip.
Sapos kain hevi olsem i painim yumi, ating yumi mas wetim nupela taim God bai kamapim na bai dispela sik bilong yumi i ken pinis. (2 Pita 3:13; Aisaia 33:24) Yumi save, ol dokta na ol marasin i no inap stretim olgeta sik na pen. Olsem na long nau yumi mas karim ol dispela pen. Aposel Pol i tok em i gat wanpela ‘nil i sutim skin’ bilong em, ating em wanpela sik bilong ai o bilong narapela hap bilong skin. Planti taim em i beten askim God long tekewe dispela pen long em. (2 Korin 12:7-10) Tasol God i no oraitim sik bilong Pol, na ating em i bin karim dispela pen i go inap long taim em i dai. Tasol em i no bel hevi—em i stap belgut tasol. (2 Korin 7:4) Na stretpela man Jop i karim bikpela pen tru, tasol em i bilip strong long Jehova, na Jehova i givim gutpela pe tru long em. (Jop 42:12, 13) Sapos yumi wokman bilong God, yumi mas tingim ol dispela man ol i stap olsem gutpela piksa bilong yumi, na oltaim yumi mas beten askim Jehova long helpim yumi, na dispela bai strongim yumi long karim hevi bilong yumi.—Song 41:1-3.
Ol i Stap Strong, Maski Ol i Gat Hevi
Lain bilong Jehova inap i stap strong, maski ol i gat sampela hevi. Sapos yumi gat wanpela bikpela sik, yumi ken kisim ol gutpela kaikai bilong spirit God i save givim long yumi, na bai yumi inap i stap strong long bilip. (Taitus 2:1, 2) Maski yumi rabis long ol samting bilong skin, bai yumi stap olsem maniman tru long ol samting bilong spirit.
Sapos sampela hevi i kamap insait long famili, yumi mas askim God long givim tingting na strong long yumi, na dispela bai helpim yumi long karim ol dispela hevi. Tingim Abigel, em meri bilong Nabal, em “man bilong kros na pasin bilong en i no gutpela.” Insait bilong nem bilong em i olsem “Krankiman.” I hatwok tru long i stap wantaim kain man olsem, a? Tasol Abigel i no bel hevi olgeta—em i stap olsem meri “i gat planti gutpela tingting na save.” Olsem na taim wanpela bikpela hevi tru i kamap bihain, em i givim sampela gutpela tok long Devit na Devit i pilim tru tok bilong em; olsem na maski Nabal i bin toknogutim Devit na i no tenkyu long ol gutpela pasin Devit i bin mekim long em, Devit i no bekim nogut long Nabal na kilim em i dai wantaim lain bilong em.—1 Samuel 25:2-38.
Na sapos yumi bel hevi long ol samting em wanpela insait long kongrigesen i mekim, Jehova inap strongim yumi long karim dispela hevi. Baibel i stori long wanpela man, em Diotrefes, em i mekim pasin bikhet, tasol gutpela man Gaius i no larim dispela samting i daunim em—em i mekim yet ol gutpela wok bilong helpim ol man na em i kisim amamas na gutpela pe long Jehova.—Aposel 20:35; 3 Jon 1-10.
Sapos yumi gat laik long helpim kongrigesen, tasol ol i no makim yumi long kamap elda o wokman bilong kongrigesen—ol i makim ol narapela tasol—yumi inap bel hevi long dispela. Tasol yumi no ken larim dispela hevi i daunim yumi. Yumi mas wok long kamap strong moa long ol samting bilong spirit na larim spirit bilong God i kamapim moa yet ol gutpela pasin long yumi. (Galesia 5:22, 23) Moses i stap inap 40 yia long hap bilong Midian, na long dispela taim God i strongim Moses long kamapim moa yet ol gutpela pasin olsem pasin daun, na no ken les kwik, na ol narapela pasin em i mas kisim bilong helpim em long karim ol hevi taim em i kamap olsem gopas bilong ol Israel bihain. Na ating Jehova i redim yumi tu bambai yumi inap holim sampela bikpela wok Kristen moa long bihain, sapos yumi stap strong na yumi no larim ol hevi i daunim yumi.
Klostu Nau na Ol Hevi Bai Pinis!
Yumi laik save, ol bel hevi bilong yumi bai pinis bihain? Tru, long tingting bilong yumi i olsem i no gat rot bilong pinisim ol hevi bilong yumi. Tasol Jehova i no olsem. Long maus bilong profet Aisaia em i tok: “Tok bilong mi bai i no inap kam bek nating long mi. Nogat. . . . Em bai i kamapim ol samting mi gat laik long ol i mas kamap.” (Aisaia 55:11) Jehova i gat olgeta strong, olsem na i no gat wanpela samting em i no inap mekim. (Mak 10:27) Em bai truim olgeta tok promis bilong em long givim ol gutpela blesing long lain bilong em.—Josua 21:45.
Sapos man i no bilip na em i gat tupela tingting, dispela i as bilong planti bel hevi. Tasol Baibel i tok, “Pasin bilong bilip em i olsem: Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru.” (Hibru 11:1) Sapos yumi bilip long God, yumi inap save tru olsem olgeta samting God i tok long kamapim, ol bai kamap tru. Bikpela as tok bilong Baibel em Jehova i tok promis long Kingdom bai bosim graun, na bai graun i kamap gutpela ples paradais na ol stretpela man bai stap amamas na i stap oltaim. (Song 37:11, 29) Olgeta samting nogut—na bel hevi tu—bai pinis, long wanem, God bai ‘inapim laik bilong olgeta samting i gat laip.’—Song 145:16.
Ol dispela gutpela samting i no kamap yet, olsem na long nau hevi bai wok yet long painim yumi. Tasol ol gutpela tok promis long Baibel inap strongim yumi long karim ol hevi. Baibel inap soim yumi long olsem wanem yumi ken bihainim gutpela tingting na skelim gut ol samting na bai yumi ken i stap bel isi. Maski yumi bel hevi long sampela samting, yumi inap kisim dispela “bel isi God i save givim yumi.” (Filipai 4:6, 7) Olsem na Jehova inap helpim yumi long karim ol hevi bilong yumi long nau, na bihain bai yumi inap winim tru ol dispela hevi.
[Rait long pes 31]
God inap helpim yu long karim ol hevi, olsem em i bin helpim Jop na Moses na Abigel na Pol