Taim Samting Yu Wetim i Kamap i No Kamap Tru

BEL hevi inap kamap insait long olgeta marit, maski long taim tupela i no marit yet i luk olsem pasin na tingting bilong tupela i stret wantaim. Tasol olsem wanem wanpela man na meri em pastaim i olsem pasin bilong tupela i stret tru wantaim, tasol taim ol i marit pinis, ol i narapela narapela kain tru?

Baibel i tok ol manmeri i marit bai “painim planti hevi long laip bilong ol.” (1 Korin 7:28) As bilong planti hevi olsem, em sin i stap long skin bilong yumi olgeta. (Rom 3:23) Na tu, ating wanpela poroman o tupela wantaim i no bihainim ol stiatok bilong Baibel. (Aisaia 48:​17, 18) Tasol sampela man o meri, taim ol i marit nupela ol i putim bikpela mak tumas long ol samting ol i laik bai i kamap insait long marit. Taim ol i mekim olsem, ol liklik kros samting inap kamapim bikpela hevi tru long marit.

Wetim Ol Samting i No Inap Kamap

Yu man o meri marit, ating taim yu marit nupela yu tingim sampela gutpela samting tru bai kamap. Planti ol i gat kain tingting olsem. Orait, tingim bek long sindaun yu bin tingting na wet long kisim. Olsem wanem? Marit bilong yu i sot long mak yu bin tingim? Sapos olsem, yu no ken ting yupela i no inap stretim ol hevi i kamap namel long yutupela. Pasin bilong bihainim ol stiatok bilong Baibel inap helpim yupela long stretim ol hevi.a (2 Timoti 3:16) Tasol nau i gutpela sapos yu skelim sampela tingting yu bin holim long ol samting bilong marit.

Olsem: Sampela i bin ting, i stap bilong ol marit em samting bilong amamas tasol, na narapela i mekim ol switpela tok tasol long narapela na mekim gut oltaim long em, olsem sampela buk i gat stori nating i stori long en. O yu bin ting yu wantaim poroman bilong yu bai lusim bikpela haptaim long i stap wantaim, o yutupela bai stretim olgeta liklik kros na hevi bilong yupela long gutpela pasin na pasin isi. Planti ol i bin ting, taim ol i marit pinis ol i no gat wok long bosim skin long ol samting bilong maritpasin. Ol dispela kain samting i hatwok long kamapim insait long marit, olsem na sampela bai bel hevi taim marit bilong ol i no winim dispela mak.​—Stat 3:16.

Narapela tingting kranki i olsem: Sampela i ting marit yet bai mekim man i amamas. Tru, sapos yumi gat poroman marit bilong i stap wantaim em, yumi inap kisim bikpela amamas long dispela. (Sindaun 18:22; 31:10; Saveman 4:9) Tasol yu ting marit inap stretim olgeta liklik kros o hevi? Ol man o meri i gat dispela kain tingting, bai ol i pilim tru olsem dispela tingting i kranki stret!

I No Kamapim Tingting Bilong Ol

Tasol i no olgeta samting yumi wetim i kamap ol i kranki, nogat. Sampela samting yumi laik bai i kamap ol i stret. Tasol sampela hevi inap kamap long sampela laik yumi wetim i kamap. Wanpela man i gat wok long helpim ol marit i gat hevi em i tok: “Mi save lukim sampela marit em narapela i kros long narapela, long wanem, wanpela i wetim wanpela laik bilong em long kamap tru, tasol poroman bilong em i no bin kliagut long dispela laik bilong em.” Bilong save olsem wanem dispela samting inap kamap, yumi ken tingim dispela stori.

Mary i maritim David, em i save sindaun longwe long ples bilong Mary inap sampela handet kilomita. Taim Mary i no marit yet, em i save taim em i lusim ples na i go sindaun long nupela hap, dispela bai givim hatwok long em, long wanem, em meri bilong sem. Tasol em i bilip tru olsem David bai helpim em long lain long nupela ples. Olsem: Em i ting David bai stap klostu long em na helpim em long kisim save long ol pren bilong em. Tasol dispela samting i no kamap. David i amamas long toktok wantaim planti poroman bilong em​—em i lusim Mary i stap wanpis, maski Mary i nupela long dispela ples. Mary i bel hevi na i pilim olsem David i no tingim em na i lusim em tasol. Em i tingting: ‘Olsem wanem David inap mekim olsem long mi?’

Yu ting dispela laik bilong Mary i kranki liklik? Nogat. Em i laik bai man bilong em i helpim em long sindaun gut long nupela ples em i stap long en. Mary i meri bilong sem, na em i save tingting planti taim em i mas bungim planti nupela lain. Tasol Mary i no bin kamapim dispela samting long David. Olsem na David i no gat save liklik long dispela bel hevi bilong Mary. Orait wanem samting bai kamap sapos dispela hevi i stap olsem? Ating Mary bai bel nogut i go i go, na bihain em bai ting man bilong em i no pilim liklik hevi bilong em.

Ating yu tu i bin kisim dispela kain bel hevi taim i luk olsem poroman bilong yu i no tingim yu. Sapos olsem, orait yu ken mekim wanem?

Toktok Wantaim Em

Tru tumas, sapos yu wetim samting i kamap tasol em i no kamap, ating bai yu bel hevi stret long dispela. (Sindaun 13:12) Tasol i gat sampela samting yu inap mekim bilong stretim dispela hevi. Wanpela savetok bilong Baibel i tok: “Man i gat gutpela tingting, em i save tingting gut pastaim na bihain em i mekim gutpela tok. Na dispela i save mekim ol man i laikim tumas long harim tok bilong en.” (Sindaun 16:23) Olsem na sapos yu ting samting yu bin wetim i no kamap, toktok wantaim poroman bilong yu long dispela samting.

Makim taim i stret, ples i stret, na ol tok i stret bilong kamapim ol hevi bilong yu. (Sindaun 25:11) Toktok isi na long pasin rispek. Tingim samting yu laik mekim​—yu no laik sutim tok long poroman, yu laik toksave long em long ol samting yu bin wetim i kamap na ol tingting i stap long bel bilong yu.​—Sindaun 15:1.

Bilong wanem yu mas mekim olsem? Ating gutpela poroman em inap pilim samting yu laikim, a? Orait tingim dispela: Ating poroman i gat narapela tingting long dispela samting, tasol em bai amamas long kisim tingting bilong yu sapos yu kamapim klia long em. Sapos yu kamapim laik bilong yu o ol samting yu mas i gat, dispela i no makim olsem marit bilong yu i no strong o man bilong yu i no save pilim ol hevi bilong yu.

Olsem na yu no ken surik long toktok wantaim poroman bilong yu. Long dispela stori yumi bin mekim, Mary inap tokim David: “Mi mas tokaut olsem, mi save hatwok long bungim planti nupela manmeri. Inap yu helpim mi long kisim save long ol na toktok wantaim ol, na bihain mi yet inap mekim?”

“Putim Yau Kwik Long Harim Tok”

Orait nau tingim narapela samting bilong dispela kain hevi. Sapos poroman bilong yu i laik toktok wantaim yu, na em i bel hevi, long wanem, em i ting yu no bin inapim wanpela samting em i laik bai yu mekim. Sapos dispela samting i kamap, orait putim yau long tok bilong poroman! Yu no ken tok yu no gat asua. Baibel i tok: “Yupela olgeta i mas putim yau kwik long harim tok, tasol yupela i no ken hariap long mekim toktok, na yupela i no ken kros kwik.” (Jems 1:19; Sindaun 18:13) Aposel Pol i tokim ol Kristen: “Yumi no ken ting long helpim yumi yet. Nogat. Yumi mas ting long helpim ol arapela.”​—1 Korin 10:24.

Bilong mekim olsem, yu mas pilim gut tingting bilong poroman. Baibel i tok: “Yupela ol maritman, yupela i mas bihainim gutpela tingting na sindaun gut wantaim ol meri bilong yupela.” O olsem Baibel bilong J. B. Phillip i tanim dispela ves, “yupela ol maritman i mas traim long pilim gut tingting bilong ol meri bilong yupela em yupela i save sindaun wantaim ol.” (1 Pita 3:7) Na meri i mas wok strong long mekim wankain pasin long man bilong em.

Tingim: Maski pasin bilong yu wantaim poroman i stret tru wantaim, tingting bilong yupela long ol samting i no wankain stret. (Lukim blok “Wankain Ples, Tasol Ol i Lukim Narapela Narapela Samting.”) Tasol dispela em i gutpela samting, long wanem, i gutpela long kisim tingting bilong narapela long ol samting. Taim yupela i marit, yupela i gat ol tingting bilong yupela yet long ol samting yupela i laik bai kamap, em famili na lain yupela i kamap bikpela insait long en i stiaim dispela samting. Olsem na maski narapela i laikim tru narapela olsem lewa tru, tasol samting yupela i wetim i kamap, ating em i narapela narapela kain.

Olsem: Ol marit Kristen i save gut long stiatok bilong Baibel long wok bos bilong famili. (Efesus 5:​22, 23) Tasol olsem wanem man bai mekim wok bilong em olsem het bilong famili bilong yupela? Na olsem wanem meri bai kamapim olsem em i daun long man bilong em? Yutupela i larim dispela stiatok bilong Baibel i stiaim yupela? Na yupela i wok strong long bihainim dispela tok?

Na ating yupela i gat narapela narapela tingting long sampela samting moa bilong sindaun bilong yupela. Husat bai mekim ol wok bilong haus? Wanem taim yupela bai go lukim ol wanblut o singautim ol i kam? Hamas aua bai yupela i lusim long dispela? Olsem wanem tupela marit Kristen bai soim olsem ol i putim ol wok bilong Kingdom i stap namba wan long laip bilong ol? (Matyu 6:33) Long ol samting bilong mani, sampela marit i save baim planti samting na ol i gat bikpela dinau, olsem na i gutpela long skelim gut mani na tingim gut ol samting ol i mas baim. Tasol ol i ken mekim olsem wanem? Tupela i mas toktok stret long ol dispela samting na long pasin rispek, na dispela bai helpim gut tupela.

Pasin bilong toktok gut wantaim i ken helpim yupela long kamapim bel isi insait long marit bilong yupela, maski sampela samting yupela i bin wetim i kamap ol i no kamap yet. Dispela bai inapim yupela long bihainim tok bilong aposel Pol, em i tok: “Sapos wanpela . . . i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata.”​—Kolosi 3:13.

[Futnot]

[Blok/Piksa long pes 10]

WANKAIN PLES, TASOL OL I LUKIM NARAPELA NARAPELA SAMTING

“Sapos sampela turis i sanap nabaut antap long maunten na ol i lukim ol samting i stap daunbilo, ol wan wan bai lukim narapela narapela samting, long wanem, ol i sanap i stap long narapela narapela hap, na ol wan wan i gat narapela narapela laik long samting ol i laik lukim. Insait long marit tu i olsem. Maski tupela i gat wankain laik, em i no wankain olgeta. . . . Tupela i mas lain long bungim tingting na laik bilong wan wan i kamap wankain tasol, na bai tupela i kamap olsem ‘wanpela bodi.’ Bilong mekim olsem, tupela i mas toktok gut wantaim.”​—Wastaua, Ogas 1, 1993, pes 4.

[Blok long pes 11]

OL SAMTING YU INAP MEKIM NAU

• Skelim gen ol samting yu gat laik long poroman i mas mekim. Ol dispela laik bilong yu i stret? Nogut yu putim bikpela mak tumas long poroman i mas winim.​—Filipai 2:4; 4:5.

• Traim long stretim sampela samting long ol dispela laik bilong yu. Yu no ken tok: “Mitupela bai wanbel long olgeta samting.” Mobeta yu pasim tok long bel olsem yu bai wok strong long stretim ol liklik kros long pasin isi.​—Efesus 4:32.

• Toktok wantaim poroman long samting yu wetim i kamap. Pasin bilong toktok gut wantaim, dispela em nambawan rot bilong lain long kamapim pasin bilong narapela i laikim tru na rispek long narapela.​—Efesus 5:33.

[Piksa long pes 9]

“Putim yau kwik long harim” tingting bilong poroman